Ko Hoku Sinó ko ha Temipale
ʻE tāpuekina kitautolu ʻo kapau te tau tauhi hotau sinó ʻi he founga kuo fekauʻi mai ʻe he ʻOtuá! (Vakai, Mōsaia 2:41; T&F 89:18–21.)
Ko e hā ʻoku tau maʻu ai ha sinó?
Kimuʻa pea fāʻeleʻi kitautolú, ne tau hoko ko ha ngaahi laumālié ʻo ʻikai ha sino fakamatelie. Naʻe lahi ha ngaahi meʻa naʻe ʻikai ke tau lava ʻo fai kae ʻoua kuo tau maʻu ha sino. Naʻe tuku mai kitautolu ʻe he ʻOtuá ki he māmaní ke tau maʻu ha sino. ʻOku fie maʻu ke tau fakatou maʻu ha laumālie mo ha sino ka tau toki hoko ʻo hangē ko e Tamai Hēvaní. (Vakai, T&F 88:15.)
Ko e hā hono lelei hono maʻu ha sinó?
ʻOku mahuʻinga mo toputapu hotau sinó pea ʻoku ui kinautolu ʻe he ʻEikí ko ha temipale (vakai, 1 Kolinitō 3: 16–17). Pea ʻoku fakalata foki hono maʻu ha sinó! ʻOku lava e sinó ʻo lele, hiva, kaka, kata, tā fakatātā, kakau, hulohula, mo fai ha ngaahi ʻekitivitī kehe. Te tau toe lava foki ʻo fakaʻaongaʻi hotau sinó ke ako, tokoniʻi e kakaí, faʻu ʻa e ngaahi fāmilí, pea ʻai e māmaní ke hoko ko ha feituʻu lelei ange.
Ko e hā ʻoku ʻikai ke faitatau ai e taha kotoa?
ʻOku ʻomi e sinó ʻi he ngaahi fuo, lanu, fōtunga mo e lalahi kehekehe kotoa pē, pea ko e konga ʻeni e palani ʻa e Tamai Hēvaní. Neongo ʻoku kehekehe ʻa e sino takitaha, ka ʻoku fakatupu kotoa kitautolu ʻi he tatau ʻo e ʻOtuá (vakai, Sēnesi 1:26). ʻOku ʻuhinga ia ʻoku fakatatau hotau sinó ki Hono sino haohaoá. ʻOku fakaʻofoʻofa ʻa e sino kotoa pē koeʻuhí he ko ha meʻaʻofa takitaha mei heʻetau Tamai Hēvani ʻofá.
Fēfē kapau ʻoku ʻi ai ha ngaahi meʻa ʻi hoku sinó ʻoku ʻikai te u saiʻia ai?
Ko e taimi ʻe niʻihi ʻoku ʻikai ke ʻasi, ngaue, pe ngāue hotau sinó ʻo hangē ko ʻetau fie maʻú. Ka ʻe ʻi ai ha ʻaho, te tau toetuʻu kotoa ʻo maʻu ha sino ʻoku haohaoa (vakai, ʻAlamā 40:23). ʻOku ʻofa e ʻOtuá ʻiate kitautolu neongo pe ʻoku fēfē hotau sinó, pea ʻe lava foki ke tau ʻofa ʻiate kitautolu. Tatau ai pē pe ko e hā e tūkunga hotau sinó he taimí ni, ʻe lava ke tau fili ke houngaʻia ʻiate kinautolu mo fakaʻaongaʻi kinautolu ke nau fai ha ngaahi meʻa lelei ʻi he māmaní.
ʻOku totonu ke tauhi fēfē hoku sinó?
ʻOku totonu ke tau tauhi hotau sinó ʻaki e ʻofa mo e fakaʻapaʻapa tatau pē te tau fai ki ha—faʻahinga koloa matuʻaki mahuʻinga fau. Naʻe fakahā mai ʻe he Tamai Hēvaní ʻi he kau palōfitá mo e Lea ʻo e Potó, e meʻa ʻoku kovi mo lelei ki hotau sinó. ʻOku lahi e ngaahi meʻa te tau lava ʻo fai ki hono tokangaʻi hotau sinó:
-
Kai e meʻakai moʻui leleí pea fai ha fakamālohisino.
-
Tui ha vala ʻoku tāú pea tauhi hotau sinó ke maʻa.
-
Fakaʻapaʻapaʻi e sino ʻo e kakai kehé.
-
ʻOua naʻa fakaʻilongaʻi hotau sinó ʻaki e tātataú pe ko hano fakaavaava.
-
ʻOua naʻa fakaʻaongaʻi e faitoʻo konatapú, ʻolokaholó, tapaká, kofí, pe tií.
-
Fai ha ngaahi vaʻinga ʻoku malu mo fakafiefiá pea fakamamaʻo mei he ngaahi ʻekitivitī ʻoku fakatuʻutāmakí.
ʻI heʻetau tokangaʻi lelei hotau sinó, ʻoku tau ongoʻi lelei ange ai e Laumālie Māʻoniʻoní.