Neill F. Marriott
Ikaduhang Magtatambag sa Kinatibuk-ang Kapangulohan sa Young Women
Bisan sa wala pa siya mamiyembro sa Simbahan, si Neill Foote Marriott nakakat-on na isip batan-ong babaye nga adunay Dios ug Siya nahigugma kaniya.
“Ang akong papa sinunod sa atong Langitnong Amahan,” miingon ang bag-ong ikaduhang magtatambag sa kinatibuk-ang kapangulohan sa Young Women. “Ang Iyang gugma ug pagdawat sa uban walay sukod. Usa kini ka yano ug natural nga pagbalhin sa gugma ug pagsalig nga naa nako alang sa akong Langitnong Amahan.”
Natawo kang George ug Antonia Foote niadtong Oktubre 1947 sa Alexandria, Louisiana, USA, siya lang ang babaye sa unom ka manghod nga mga lalaki. Human makagradwar sa Southern Methodist University sa Dallas, Texas, nga may degree sa English literature ug secondary education, mibalhin siya sa Cambridge, Massachusetts, diin nagtrabaho siya isip secretary sa Harvard University. Didto iyang nahimamat si David Cannon Marriott, kinsa miingon kaniya nga, “duna koy mga higala nga gusto nakong imong mahimamat.” Wala madugay iyang gidala ang mga misyonaryo sa pagtudlo kaniya ug sa iyang mga kaubanan sa kwarto.
Samtang naminaw siya sa mga misyonaryo, miingon siya, “ang mga leksyon mihulip sa kulang nga mga piraso sa akong panabut sa ebanghelyo.” Human sa iyang bunyag niadtong Mayo 1970, siya ug si David nagpabiling higala; human sa usa ka tuig nagsugod sila sa pag-date ug nagminyo niadtong Hunyo 1971 sa Templo sa Salt Lake.
Nakigtambayayong sa iyang bana, si Sister Marriott naa ra sa balay nag-atiman sa ilang 11 ka anak samtang padayon ang iyang bana sa pagnegosyo. Sila mialagad og daghang mga calling sa Simbahan. Nakaserbisyo si Sister Marriott uban niya dihang nagdumala siya sa São Paulo Interlagos Mission sugod 2002 hangtud 2005, ug si Sister Mariott nakaserbisyo isip ordinance worker sa Templo sa Salt Lake, presidente sa Relief Society sa stake ug ward, presidente sa Young Women sa ward, magtutudlo sa Doktrina sa Ebanghelyo, ug food storage specialist.
Sa bag-o niyang buluhaton, si Sister Marriott nanghinaot nga makapaambit sa samang pagpamatuod nga iyang nadawat sa batan-on pa siya. Gusto niya nga ang batan-ong mga babaye masayud nga “gihigugma sila sa ilang Langitnong Amahan sa pinakadako, pinakamahimayaong paghigugma.”