Elder Ulisses Soares
Sa Kapangulohan sa Seventy
Si Elder Ulisses Soares, kinsa nagsugod sa pagserbisyo sa Kapangulohan sa Seventy sukad Enero 2013, nakasaksi gayud mismo sa pas-pas nga paglambo sa Simbahan sa daghang dapit sa kalibutan.
Si Elder Soares natawo sa São Paulo, Brazil, niadtong Oktubre 1958. Ang iyang mga ginikanan, sila si Apparecido ug Mercedes Soares, mipasakop sa Simbahan sa lima pa ang iyang edad. Nagtambungan sila og miting sa usa ka kwarto sa taas sa usa ka bakery. Nahinumdom si Elder Soares sa kahinam nga iyang gibati isip otso anyos dihang ang unang stake sa South America giorganisar sa São Paulo niadtong 1966. Ang Simbahan sa Brazil pas-pas nga milambo ngadto sa 50 ka stake niadtong 1990 ug milabaw na sa 200 ka stake sa tuig 2000.
Si Elder Soares, kinsa nakaangkon og bachelor’s degree sa accounting ug economics sa Pontificia Catholic University ug MBA sa National Institute of Postgraduate Study, nagtrabaho sa multinational tire company dihang gitanyagan siya og posisyon sa Simbahan. Gikuha siya nga motrabaho sa Finance Department, unya nahimo siyang direktor sa temporal affairs sa area office sa Simbahan sa São Paulo, nga nagsuporta sa Kapangulohan sa Area sulod sa 10 ka tuig. Nakaserbisyo sab siya isip unang presidente sa São Paulo Brazil Cotia Stake.
Nakaserbisyo siya isip presidente sa Portugal Porto Mission sugod 2000 hangtud 2003 ug gitawag ngadto sa Unang Korum sa Seventy niadtong Abril 2005. Nakaserbisyo siya sa Kapangulohan sa Brazil ug sa Africa Southeast Area.
“Kini nga mga kasinatian nakahatag nako og panglantaw nga makakakita nga ang Simbahan maestablisar bisan asa nga dapit diin kita dunay matinud-anong mga tawo,” miingon siya, “ug sa panglantaw kon unsay angay nakong kat-unan aron mas makaserbisyo og maayo.”
Si Elder Soares ug iyang asawa, si Rosana Fernandes Morgado, naminyo niadtong Oktubre 1982 sa Templo sa São Paulo Brazil. Ginikanan sila sa tulo ka anak.
Si Elder Soares nakaserbiyo og full-time nga misyon sa Brazil Rio de Janeiro Mission. Nakaserbisyo sab siya isip presidente sa elders quorum, magtatambag sa bishopric, high councilor, executive secretary sa stake, ug regional welfare agent.