Elder Arnulfo Valenzuela
Sa Seventy
Si Elder Arnulfo Valenzuela nagdako sa Mormon colonies sa Chihuahua, Mexico, ug nakagradwar sa gipanag-iya sa Simbahan nga Academia Juárez. Sa iyang pagkabata nahatagan siya og bililhong mga oportunidad nga magiyahan sa matinud-anong mga tawo kinsa mga mapahinunguron sa ebanghelyo ug sa pagserbisyo sa Ginoo.
Ang mga leksyon nga akong nakat-unan nianang nailhan nga dapit sa Simbahan sa Latin America makatabang kaayo kaniya samtang magpadayon siya sa iyang katungdanan isip sakop sa Unang Korum sa Seventy.
“Gibati nako ang dakong panalangin tungod niini nga calling sa pagserbisyo og full-time sa Ginoo,” miingon siya.
Natawo niadtong Mayo 1959 kang Gilberto ug Rosa Valenzuela, ang batan-ong Arnulfo naanad na sa pagtambong og mga kalihokan sa Simbahan. Sa edad nga 19 gidawat niya ang tawag nga moserbisyo sa Mexico Veracruz Mission. Nianang matahum nga rehiyon sa Mexico iyang nakita ang katagbawan sa inadlawng pagtuon sa ebanghelyo ug ang kalipay sa pagdapit sa uban ngadto kang Kristo.
Wala madugay human sa iyang misyon, mibisita siya og usa ka pamilya nga iyang nabunyagan nga namalhin usab ngadto sa Siyudad sa Mexico. Ang pamilya nga ilang silingan, si Pilar Porras, matinud-anong kinabig sa Simbahan. Si Arnulfo ug Pilar nagkahigalaay ug nagsugod sa pag-date. Naminyo sila sa Templo sa Mesa Arizona niadtong Abril 6, 1982, sa panahon nga walay mga templo sa ilang yuta nga natawhan.
Nagpatubo sila og tulo ka anak, padayon nga miserbisyo sa Simbahan samtang nakita nila ang Mexico nga nahimong usa ka nasud sa mga templo. “Lisud hunahunaon nga duna na mi 12 ka templo sa Mexico, duna pay usa nga gitukod,” miingon siya.
Atol sa iyang pagka-bishop, magtatambag sa kapangulohan sa stake ug sa misyon, ug isip Area Seventy, si Elder Valenzuela nakasaksi sa talagsaong debosyon sa dili maihap nga mga miyembro sa Mexico kinsa andam nga mohatag sa tanan nga naa kanila alang sa kawsa sa Ginoo.
Gradwado sa University of Accounting and Administration Studies sa Mexico City, si Elder Valenzuela nakatrabaho sa lain-laing katungdanan sa management alang sa internasyunal nga mga korporasyon.