Elder Timothy J. Dyches
Sa Seventy
Usa sa paboritong buluhaton ni Elder Timothy John Dyches sa kinabuhi mao ang “pagkahimong saksi” ug pagpamatuod ngadto sa uban, pagtabang kanilang moduol kang Kristo. Sa pagserbisyo man og misyon, pagpakig-uban ba sa iyang pamilya, o sa trabaho, malipayon siyang modawat sa iyang buluhaton ug responsibilidad ug maningkamot sa pagtabang sa uban aron makahimo sa samang butang.
Natawo niadtong Enero 1951 sa Murray, Utah, USA, kang Milo Fredrick ug Mary Katherine Dyches, siya ang ikaduha sa pito ka anak. Dihang batan-on pa siya nga deacon, namalhin ang iyang pamilya ngadto sa Elko, Nevada, diin migahin siya didto og panahon human sa klase sa pagtrabaho sa pharmacy sa iyang papa. Dihang kauban siyang nagtrabaho, gitudloan siya sa iyang amahan sa kaimportante sa pagtabaho—butang nga nakatabang kaayo kaniya isip batan-ong misyonaryo sa Germany South Mission sugod 1970 hangtud 1972.
“Lisud kadto nga misyon, apan talagsaong misyon alang kanako,” miingon siya. “Akong nakat-unan ang bili sa tinuoray nga pagtrabaho ug kamasulundon ug dili moundang.”
Kana nga kinaiya sa pagtrabaho nagpadayon human sa iyang misyon sa iyang pag-eskwela, propesyon, ug mga buluhaton sa Simbahan. Nahimamat ni Elder Dyches ang umaabut niyang asawa, si Jill Dudley, samtang nag-eskwela sa Brigham Young University. Naminyo sila niadtong Abril 26, 1974, sa Templo sa Manti Utah. Sila dunay tulo ka anak.
Si Elder Dyches nakaangkon og bachelor’s degree sa Brigham Young University ug nagpadayon aron maangkon ang medical degree sa Washington University Medical School. Gigahin niya ang propesyunal niyang panarbaho sa pribado nga pagpanambal sa dunggan, ilong, ug tutunlan didto sa Reno, Nevada.
Dihang gitawag siya ngadto sa Ikaduhang Korum sa Seventy, si Elder Dyches nagserbisyo sa organisasyon sa Young Men isip adviser sa korum sa mga deacon. Nakaserbisyo siya og daghan pang mga calling, lakip ang pagka-Area Seventy, presidente sa Oregon Portland Mission, presidente sa stake, magtatambag sa kapangulohan sa stake, high councilor, ordinance worker sa templo, presidente sa Sunday School, ug pagka-ward clerk.