Si Elder Eldred G. Smith Namatay sa Edad nga 106
Si Elder Eldred G. Smith, kinsa nagserbisyo isip Patriarch sa Simbahan sukad 1947 hangtud 1979, namatay niadtong Abril 4, 2013, didto sa iyang panimalay. Nag-edad siya og 106.
Gituohan nga siya ang pinakatigulang nga tawo sa Utah, si Elder Smith kinatas-an og kinabuhi kay sa ubang kanhi General Authority.
Ang Presidente sa Simbahan nga si Thomas S. Monson mibisita ni Elder Smith sa iyang adlawng natawhan, niadtong Enero 9, 2013. Si “Eldred Smith buotan nakong higala,” miingon si Presidente Monson. “Nagkuyog mi sa pagbiyahe sa lagyong dapit. Akong gihigugma ug gitahud kining tawhana.”
Si Eldred G. Smith gitawag nga Patriarch sa Simbahan niadtong Abril 10, 1947, ni kanhi Presidente sa Simbahan nga si Presidente George Albert Smith ug mao ang katapusang tawo nga naghupot sa mao nga katungdanan. Nahimo siyang emeritus niadtong 1979. Ang mao nga office nagsugod pa sa tuig 1833 uban sa calling ni Joseph Smith Sr., amahan sa Propeta nga si Joseph Smith. Si Elder Smith apo sa mga apo sa igsoon sa Propeta nga si Hyrum.
Atol sa iyang pagserbisyo isip Patriarch sa Simbahan, si Elder Smith nakabiyahe og daghang dapit sa kalibutan ug nakahatag og daghang panalangin sa mga dapit nga walay patriarch. Niadtong 1966 mibiyahe siya kaniadto dihang Elder Monson pa si Presidente Monson ngadto sa Australia ug Samoa aron mohatag og patriyarkal nga panalangin sa mga miyembro didto. Una kadtong higayon nga ang tigdumalang patriarch mibisita sa Samoa. Karon kadaghanan sa mga stake duna nay patriarch nga nagpuyo sulod sa stake.
Sila si Presidente Monson ug Elder M. Russell Ballard sa Korum sa Napulog Duha ka mga Apostoles namulong sa paglubong ni Elder Smith. Si Presidente Monson mibasa sa pahasubo nga sulat gikan sa Unang Kapangulohan ngadto sa pamilya, dayon midugang, “Temporaryo lang, ako nawad-an og buotan nga higala.”
Si Elder Ballard, kinsa apo sa mga apo usab ni Hyrum Smith, namulong kabahin sa mga natampo ni Elder Smith sa paghimong buhi sa kasaysayan sa ilang pamilya. “Siya atong gipasidunggan isip Patriarch sa Simbahan ug patriarch sa among kaliwatan,” miingon siya. Iyang gidugang nga nasayud siya sa gibati ni Elder Smith nga ang iyang pamilya mao ang pinakatalagsaon niyang kalampusan.
Nagminyo si Eldred Smith kang Jeanne Audrey Ness niadtong 1932; sila dunay lima ka anak. Human sa pagkamatay ni Jeanne niadtong Hunyo 1977, nagminyo siya kang Hortense Child; nagserbisyo si Hotense kaniadto isip magtatambag sa kinatibuk-ang kapangulohan sa Young Women. Namatay ni Hotense niadtong Mayo 2012.
Duha ka anak nga lalaki ni Elder Smith ug duha ka babaye buhi pa (laing babaye patay na), 22 ka apo (ang duha patay na), 63 ka apo sa tuhod, ug 22 ka apo sa mga apo.
Si Gerry Avant mitampo niini nga artikulo.
Si Presidente Thomas S. Monson, sa tuo, nakig-istorya ni Elder Eldred G. Smith, kinsa nagserbisyo isip Patriarch sa Simbahan sukad 1947 hangtud 1979, sa ika-106 niya nga birthday, Enero 9, 2013. Si Elder Smith namatay niadtong Abril 4 didto sa iyang panimalay.
Gilitratohan ni Gerry Avant, Church News