Carol F. McConkie
Unang Magtatambag sa Kinatibuk-ang Kapangulohan sa Young Women
Sukad sa batan-on pa siya, si Carol Foley McConkie may mga “pangandoy sa templo.” Kana nga tumong migiya sa iyang mga buhat sa tibuok niyang kinabuhi.
Natawo niadtong Abril 1952 sa Spokane, Washington, USA, kang Williams ug Joanne W. Foley, si Sister McConkie gamay pa nga bata dihang nanuktok ang mga misyonaryo sa ilang pultahan sa Wilmington, Delaware, ug gipaila ang iyang pamilya sa ebanghelyo. Dali nga mihangop ang iyang mga ginikanan sa mga pagtulun-an bisan sa oposisyon ug mga pag-usab sa estilo sa ilang kinabuhi.
Isip usa ka bata mibiyahe siya uban sa iyang pamilya sakay sa tren tabok sa nasud aron ma-sealed sa Templo sa Manti Utah.
“Nindot kaayo kadto nga kasinatian,” miingon siya. “Nahinumdom ko nga nagsul-ob og puti ug unsay ipasabut niini sa akong pamilya. Talagsaon kadto nga kasinatian, ug bisan bata pa kaayo ko niadto, akong mahinumduman ang akong mga pagbati, mga panumduman sa kaputi, ug katahum niadtong adlawa. Kadto nga kasinatian naghatag kanako og unang tinguha sa pagtinguha kanunay sa templo sa akong kinabuhi.”
Ang templo nahimong iwag sa paglaum panahon sa mga pagsulay ug sa dihang duna na siyay kaugalingon niyang pamilya.
Nahimamat niya ang iyang bana, si Oscar Walter McConkie III, samtang nag-eskwela sila sa Arizona State University. Si Sister McConkie nakaangkon sa iyang bachelor’s degree sa English education. Nagminyo sila niadtong Disyembre 22, 1973, sa Templo sa Mesa Arizona ug ginikanan sila sa pito ka anak.
Sa dihang gitawag siya nga unang magtatambag sa kinatibuk-ang kapangulohan sa Young Women, si Sister McConkie nagserbisyo sa Young Women general board. Gigahin niya ang kadaghanan sa iyang pagserbisyo sa Simbahan sa mga calling nga naglakip sa pagpanudlo ug isip presidente ug magtatambag sa Relief Society sa ward ug sa mga kapangulohan sa Primary. Nagserbisyo siya uban sa iyang bana samtang nagdumala ang iyang bana sa California San Jose Mission sugod 2005 hangtud 2008.