Bonnie L. Oscarson
Kinatibuk-ang Presidente sa Young Women
Samtang nagserbisyo isip matron sa Templo sa Stockholm Sweden sugod 2009 hangtud 2012, si Bonnie Lee Green Oscarson nakakita sa mga Santos sa Ulahing Adlaw sa Sweden, Norway, ug Latvia nga nagsakripisyo sa pagsimba sa balay sa Ginoo.
Wala siya kahibalo niadto, nga ang mga leksyon diay nga iyang nakat-unan gikan niining “labihan ka mapaubsanon, mapahinunguron ug mapasaligon” nga mga miyembro makatabang sa iyang pag-focus isip kinatibuk-ang presidente sa Young Women sa Simbahan.
“Tungod kay daghang batan-ong mga babaye ang mipili karon nga magmisyon ug motambong og templo sa mas bata nga edad, manghinaut ko nga ang akong kasinatian sa pagtrabaho sa templo makatabang nakong makasabut unsaon sa pagtabang kanila nga makaandam,” miingon siya.
Si Bonnie Lee Green natawo niadtong Oktubre 1950 sa Siyudad sa Salt Lake kang Theo James ug Jean S. Green. Dihang ang iyang mga ginikanan mihukom nga gusto nila nga makasinati ang ilang mga anak og Simbahan nga naa gawas sa Utah, ang nuwebe anyos nga si Bonnie ug ang iyang pamilya mibalhin ngadto sa Oklahoma, USA. Ang pamilya nakapuyo usab sa Colorado ug sa Tennessee sa wala pa mobalhin ngadto sa Missouri, diin nahimamat ni Bonnie si Paul Kent Oscarson sa Far West, Missouri, temple site—usa ka dapit nga makahuluganon kay sila parehong may mga katigulangan nga nagpuyo sa dapit sa Far West.
Human makaeskwela sa Brigham Young University, ang magtiayon nagminyo niadtong Disyembre 19, 1969, sa Templo sa Salt Lake; pito ka anak ang nahimong sakop sa ilang pamilya.
Si Sister Oscarson 25 anyos pa lang dihang ang iyang bana—nagserbisyo og full-time nga misyon sa Swedish Mission sugod 1965 hangtud 1968—gitawag nga modumala sa Sweden Göteborg Mission.
Dihang ang mga Oscarson namalik na sa Estados Unidos, nakapuyo sila sa Missouri, New Jersey, Massachusetts, ug Texas, diin si Brother Oscarson nagtrabaho isip regional vice president sa usa ka department store. Sama sa iyang mga ginikanan, si Sister Oscarson nakakaplag og dakong kalipay nga magpuyo sa mga dapit diin diyutay ra ang mga miyembro.
Si Sister Oscarson nakaserbisyo isip presidente sa Young Women sa tulo ka higayon, isip titser sa sayo nga buntag nga seminary sulod sa siyam ka tuig, ug isip titser sa Doktrina sa Ebanghelyo.