Elder S. Gifford Nielsen
Sa Seventy
Si Elder Stanley Gifford Nielsen ganahan kaayo sa pagkaatleta, apan ang sport dili ang pinakaimportante nga butang sa iyang kinabuhi. Mituo siya nga ang pagbalanse importante ug ang ebanghelyo mao ang pundasyon sa kalipay karon ug sa kahangturan.
Natawo niadtong Oktubre 1954 kang Harry ug Lois Nielsen, nagpuyo siya sa Provo, Utah, USA, hangtud nahuman sa kolehiyo. Gitudloan siya sa iyang mga ginikanan sa paghimong sentro sa ebanghelyo nga maoy migiya sa iyang kinabuhi.
Human nag-antus sa grabe nga pangkaangol nga nakapahunong niya sa iyang college football career, si Elder Nielsen miingon nga nakakat-on siya nga ang pinakaimportanting butang sa kinabuhi dili mawala tungod sa pagkaangol.
Human sa malampusong pagkaayo, midula siya sa quarterback sa National Football League, apan nahugno ang iyang panarbaho human sa tulo ka tuig. Gibiay-biay siya. Panahon kadto sa kaugalingong pagpamalandong ug pagpangita kon unsa gayud ang iyang gituohan. “Akong nahibaloan nga ang Manluluwas dili gayud mobiya kanimo, bisan unsa pa,” miingon si Elder Nielsen, kinsa nagpuyo karon sa Sugar Land, Texas.
Kon duna may kasulatan nga gipaningkamutan niyang masubay sa iyang kinabuhi, kini ang naa sa Mateo 5:14–16: “Kamo ang kahayag alang sa kalibutan. … Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit.”
“Ang Ginoo moabli sa Iyang mga bukton alang kaninyo,” miingon si Elder Nielsen. “Inyo Siyang mahigugma pinaagi sa pagsunod sa ebanghelyo.”
Panahon sa iyang pag-eskwela sa kolehiyo iyang nahimamat si Wendy Olson. Naminyo sila sa Templo sa Provo Utah niadtong Abril 23, 1975. Nakaangkon siya og degree sa communications sa Brigham Young University. Quarterback siya sa Houston Oilers ug direktor sa sports sa KHOU television sa wala pa siya matawag nga moserbisyo og full-time alang sa Simbahan.
Amahan sa unom ka anak, si Elder Nielsen nakaserbisyo isip magtutudlo sa seminary, presidente sa Young Men, presidente sa elders quorum, bishop, ug presidente sa stake. Nagserbisyo siya isip Area Seventy dihang gitawag siya sa Unang Korum sa Seventy.