O Le Puluvaga o Iesu Keriso
Mai le “O Le Puluvaga,” Liahona, Oketopa 1977, 55–57.
O Iesu Keriso, o lo tatou Puluvaga, na totogiina le tau lea e le mafai ona tatou totogiina ina ia mafai ai ona tatou toe foi atu ma mau faatasi ma lo tatou Tama Faalelagi.
Sei ou faamatala atu ia te outou se tala—o se tala faatusa.
Sa i ai se alii sa i ai se mea sa manao tele i ai. Sa sili atu ona taua lenei mea ia te ia nai lo soo se isi lava mea i lona olaga. Ina ia ona maua lenei mea sa ia manao i ai, sa ia alu atu [ma faia] se aitalafu tele.
Sa lapataiina o ia i lona faia o se aitalafu tele aemaise lava i le tagata na aitalafu ai, le tagata lea na nono mai ai le tupe. Ae sa sili atu ona taua ia te au le mauaina o le mea sa manao i ai i le taimi lava lea. Sa ia mautinoa o le a mafai ona ia toe totogia lea aitalafu i se taimi mulimuli ane.
O lea na ia sainia ai se feagaiga. O le a ia totogia uma i se taimi. Sa lei popole tele i ai o ia, aua sa foliga mai sa mamao lava le aso e totogi uma ai le aitalafu. Ua ia maua nei le mea sa manao i ai, ma o le mea lena sa foliga mai sa sili atu ona taua.
Sa lei manatu mamafa o ia i le na ia aitalafu ai, ma sa ia faia ni [tamai] totogi i lea taimi ma lea taimi e faamalie ai le na aitalafu ai, ma le manatu e le oo vave mai le aso [e tatau ona totogi uma ai lana aitalafu].
Faamasinoga Tonu po o le Alofa Mutimutivale?
Peitai, e pei lava ona masani ai, na oo mai lava le aso ma ua faamutaina foi le feagaiga. Ae e le i uma ona totogi le aitalafu. Sa oo ina sau lē na ia aitalafu ai ma fai mai e totogi atoa atu le aitalafu.
O le taimi lena faatoa ia iloa ai, e le gata ina i ai i lē ua ia aitalafu ai le pule na te [ave ai] ana mea uma, ae faapea foi ma le pule e ave ai o ia i le falepuipui.
“‘E le mafai ona ou totogi atu oe, aua ua leai so’u malosi e faia ai,’ o lana tali atu lea.
Ona fai mai lea o lē na ia aitalafu ai, “O le a matou aveina au mea uma ma o le a tuuina atu oe i le falepuipui. O le mea lena na e ioe i ai. O lau lava filifiliga na e faia ai. Na e sainia le feagaiga, ma o le a faamalosia nei loa.”
“E a pe a sei tuu mai sina taimi e totogi ai pe faamagalo foi le aitalafu?” o le aioi mai lea a lē ua aitalafu.” “Fai se fuafuaga mo au ina ia tuu ai pea a’u mea ma ia le avea ai a’u i le falepuipui. E te talitonu moni lava i le alofa mutimutivale a? E le faaalia ea lou alofa mutimutivale?”
Ua tali mai lē ua aitalafu ai, “O le alofa mutimutivale e itu tasi. Na o oe e manuia ai. A ou alofa mutimutivale atu ia te oe, o le a le totogia ai a’u. O le faamasinoga tonu ou te manao i ai. E te talitonu ea i le faamasinoga tonu?’
“Sa ou talitonu i le faamasinoga tonu i le taimi na ou saini ai le feagaiga,” o le tali lea a lē ua aitalafu. “Sa ‘au ia te a’u i le taimi lena, aua sa ou manatu o le a puipuia ai a’u. Ou te lei manaomiaina le alofa mutimutivale i lena taimi pe manatu foi e ao ona ou manaomiaina.”
“O le faamasinoga tonu lea ua faamalosia mai ia e totogi le feagaiga po o le puapuagatia i le faasalaga,” o le tali lea a lē ua aitalafu ai. “O le tulafono lena. O le mea lena sa e ioe i ai, ma o le ala lena e tatau ona i ai. E le mafai e le alofa mutimutivale ona faoa le faamasinoga tonu.”
O le mea lena ua feagai nei ma ia alii: Ua manao le tasi i le faamasinoga tonu, ae o le isi ua aioi mai mo le alofa mutimutivale. E leai se tasi o i laua e manumalo vagana ua gauai atu le tasi i le isi.
“Afai e te le faamagaloina la’u aitalafu, o lona uiga ua leai se alofa mutimutivale,” o le aioi mai lea a lē ua aitalafu.
Ae tali mai lē ua aitalafu ai, “A ou faamagaloina lau aitalafu, o le a leai se faamasinoga tonu.”
E foliga mai, ua le mafai ona faamalieina tulafono uma e lua. E lua mataupu o le faavavau e foliga mai ua feteenai le tasi ma le isi. Pe leai ea se auala e faamalie atoatoa ai le faamasinoga tonu, faapea foi le alofa mutimutivale?
E i ai se auala! O le tulafono o le faamasinoga tonu e mafai ona faamalie atoatoa ma le alofa mutimutivale e mafai ona faaali atu i le atoatoa—peitai e manaomia ai se isi tagata. Ma sa faapea ona tupu lena mea i le taimi lea.
O Lana Puluvaga
Sa i ai se uo a lē ua aitalafu. Na sau o ia e fesoasoani. Sa Ia silafia lelei lē ua aitalafu. Sa manatu o ia ua valea le ua aitalafu i lona tuu o lenei mea e oo mai ia te ia. E ui i lea, sa ia manao e fesoasoani atu, aua ua ia alofa ia te ia. Ona ia tulai mai lea ua tu i le va o nei alii, ma liliu atu i le na aitalafu ai le tagata, ma tuuina atu le ofo lenei: “O le a ou totogia le aitalafu pe afai e te faamagalo le ua aitalafu ia te oe mai lenei feagaiga, ina ia tuu pea ana mea ma le avea ai i le falepuipui.”
A o mafaufau lē ua aitalafu ai le tagata i le mea ua ofo mai, sa toe faapea mai le puluvaga, “Na e manao i le faamasinoga tonu. E ui ina le mafai ona ia totogia oe, ae o le a ou totogia lana aitalafu. O le a faapea ona faia ai le mea sa’o ia te oe e pei ona tatau ai, e aunoa ma se isi mea e te manao i ai. O le a le avea lena ma faamasinoga tonu.”
Sa malie loa i ai lē ua aitalafu ai le tagata.
Ona liliu atu lea o le puluvaga i lē ua aitalafu. “Afai ou te totogia lau aitalafu, e te talia ea a’u e avea ma lē ua e aitalafu ai?
“Oi ioe, ioe,” o le tagi atu lea a lē ua aitalafu. “Ua e laveai a’u mai le falepuipui ma ua e faaalia le alofa mutimutivale ia te a’u.”
“Ua lelei,” o le tali ane lea a lē ua fesoasoani, “o le a e totogi mai ia te a’u le aitalafu, ae o le a ou faia le tuutuuga. O le a le faigofie foi, ae mafai lava ona e faia. O le a ou faia se auala. E le manaomia ona e alu ai i le falepuipui.”
Sa faapea ona toe totogi atoatoa lē na aitalafu ai le tagata. Sa faia ia te ia le mea tonu. Sa le i solia foi se feagaiga. Sa faapea foi ona faaali atu i lē na aitalafu le alofa mutimutivale. Sa faataunuuina tulafono uma e lua. Talu ai ona sa i ai se puluvaga, o lea na faamalieina atoatoa ai le faamasinoga tonu, ma faaalia atoatoa ai foi le alofa mutimutivale.
O Lo Tatou Puluvaga
Tatou te ola uma lava i se ituaiga o aitalafu faaleagaga. E i ai se aso o le a tapunia ai lea aitalafu, ma manaomia ai le totogiina atoa. Ae ui i lea, atonu tatou te vaai faatauvaa i ai i le taimi nei, ae a oo mai lena aso ma o le a tapunia le avanoa e toe totogiina ai se mokesi, o le a tatou tilotilo solo ma le oi ma le le malolo mo se tasi, soo se tasi, e fesoasoani mai ia i tatou.
Ma e tusa ai ma tulafono e faavavau, e le mafai ona faaalia le alofa mutimutivale sei vagana ua i ai se tasi ua i ai uma le naunautaiga ma le mafai e na te tauaveina ai a tatou aitalafu ma totogi le tau, ma faia ia tuutuuga mo lo tatou togiola.
Sei vagana ua i ai se puluvaga, sei vagana ua i ai sa tatou uo, ae tatau lava ona pau le mamafa atoa o le faamasinoga tonu i o tatou luga. O le totogi atoa mo soligatulafono uma, e tusa lava po o le a le itiiti po o le a foi le loloto, o le a aveesea mai ia i tatou i le mea e gata ai.
Ae ia iloa le mea lenei: O upumoni, o upumoni mamalu, ua folafolaina mai o loo i ai sea ituaiga o Puluvaga. “Aua e toatasi le Atua, e toatasi foi le puluvaga i le Atua ma tagata, o le tagata o Iesu Keriso lea” (1 Timoteo 2:5). E ala mai ia te Ia ua mafai ai ona faaalia atoatoa le alofa mutimutivale mo i tatou taitoatasi e aunoa ma le solia o le tulafono e faavavau o le faamasinoga tonu.
O le faaalia o le alofa mutimutivale e le otometi. O le a maua e ala i se osiga feagaiga ma Ia. O Ana tuutuuga, o Ana tuutuuga agalelei, lea e aofia ai, le papatisoga i le faatofuina mo le faamagaloina o agasala, e avea ma se mea taua atoatoa.
E mafai ona puipuia tagata uma e le tulafono o le faamasinoga tonu, ma o le taimi lava foi lea e mafai ai e i tatou taitoatasi ona mauaina faamanuiaga o le togiolaina ma le faamaloloina o le alofa mutimutivale.
Ata na tusia e Dan Burr