O A’u Solofanua Su’i Felavasa’i
Sandra Jennings, Mekisiko Fou, ISA
E i ai sa’u ata su’i felavasai o tamai solofanua sa ou galue ai pe tusa ma se tausaga. Na toeitiiti lava a maea ae ou iloaina loa ua sese le lanu o se tasi o tamai solofanua. Talu ai ona sa talafeagai le lanu mo se nofoa solofanua, o lea ou te lei iloaina ai lau mea sese seia oo ina ou vaaia ua fetaui le lanu o le tamai solofanua ma lanu ia e i luga o le ie lea e su’i ai ata o solofanua.
Sa ou matua le fiafia lava. Sa faaaluina lou taimi atoa e galue ai i le ata, ma o le manatu o le toe talaeseina uma o filo o le lanu sese na toetoe lava a lofituina. Faatasi ai ma ou loimata, sa ou tatalaina le lapisi ma togi i ai le ata.
Sa ou nofo i lalo i le laulau i le mea o loo teu ai au mea suisui ma faavauvau ai i le maimau o lau ata manaia o tamai solofanua ma faagasolo ai loa i isi galuega faatino. Ae na le mafai ona ou faia—na le mafai lava ona ou faagaloina le galuega sa ou galue malosi ai. Na ou susueina le lapisi ma toe aumai i fafo le ie. Sa ou maua le nonoa i le pito i tua o le lanu sese ma seiina ma le faaaeteete. Sa liliu i luma le ata ma amata ona ou talaina filo.
O nisi taimi ua vave le talaina [o filo]. O isi taimi na ou iloa ai ua le faigofie. Sa ou le mautinoa pe faapefea ona toe talaina le mea na ou suiina. O nisi taimi e tatau ai ona otiina le filo o suiga taitasi. Fai mai lau tama tama ua ia fiafia lava ona o le a ou toe faia atoa lena galuega e toe faasao ai. E ui ina sa na o se ata sui felavasa’i.
A o ou aveesea ia filo, na amata ona ou mafaufau i le salamo ma le faigata tele o le auala e faasa’o ai nisi o mea sese na ou faia. O le salamo moni e manaomia ai le manao atoa, galuega, ma le puapuagatia, ae e tauia ia taumafaiga.
A o ou toe suiina le solofanua, na faamanatu mai ia te au o le salamo e faatagaina ai le Togiola a Iesu e aveesea ai mea ua pisipisia o le agasala mai lo’u olaga ma fesoasoani ia te au e toe faia se amataga fou. O a’u “solofanua o le salamo” o loo tāupe i lou fale, e avea o se faamanatu mālū ae susulu malosi e fai le mea sao, ia aua lava nei fiu pe a ou le atoatoa, ma manatua e ala mai i le salamo, o le a faaatoatoaina e le Togiola le eseesega.