Vaiaso o le Eseta

E mafai ona e saunia mo le Eseta e ala i le aoao e uiga i mea na tutupu i le vaiaso a o lei oo i le Faasatauroga ma le Toetu o Keriso. Amata i aso e valu a o lumanai le Eseta, faitau i mea na tutupu ma fuaiupu o mau ua lisiina mo aso taitasi.

Aso Toonai

O se aso malolo taua ua faaigoaina o le Paseka sa na o le toe ono aso oo i ai. Sa toatele tagata na o mai i Ierusalema ina ia ofo atu a latou taulaga i le malumalu i lena aso. Na maliu atu Iesu i Petania, o se aai e lata ane i Ierusalema. O le a Ia mafuta ai iina mo po e lima ma Ana uo o Lasalo, Maria, ma Mareta. Na u’uina e Maria Ona aao i le suauu.

Tagai i le Ioane 12:1–3.

Aso Sa

Na maliu ane Iesu mai Petania i Ierusalema. Na Ia tietie i le asini i le aai, e pei ona tau mai e se fuaiupu i le Feagaiga Tuai o le a Ia faia. Na iloa e tagata o Ia o lo latou Tupu ma alalaga, “Osana,” ma fola i lalo laupama i luma o le asini e taofia ai le pefu mai le oo ae i le Faaola. Na asiasi atu Iesu i le malumalu ona toe foi atu ai lea i Petania.

Tagai i leSakaria 9:9; Mataio 21:1–11; Mareko 11:1–11.

Aso Gafua

Na silasila atu Iesu i fefaatauaiga a tagata i totonu o le malumalu. Ona sa Ia finagalo e avea le malumalu o se “fale o le tatalo,” na Ia tuliesea i latou. Ona Ia faamalolo ai lea o tagata o e pipili pe tauaso. Na feitai faitaulaga lotoleaga ia te Ia.

Tagai i le Mataio 21:12–17; Mareko 11:15–19.

Aso Lua

Na aoao e Iesu tagata i le malumalu ma luga o se mauga lata ane ua taua o le Mauga o Olive.

Sa taupulepule faitaulaga e fasiotia Iesu. O se tasi o Ona soo, o Iuta le Sekara, na ioe e tuuina atu Iesu i le au faitaulaga e faafesuiai mo tupe siliva e 30.

Tagai i le Mataio 25:31–46; 26:14–16.

Aso Lulu

E le o taua i tusitusiga paia le mea na faia e Iesu i lea aso. Atonu na ia faaaluina le aso e faatasi ai ma Ona soo. E mafai ona e faitauina le faataoto i taupou e toasefulu, o se tala na aoao atu e Iesu i Ona soo e fesoasoani ai ia i latou e saunia mo Lona Afio Mai Faalua.

Tagai i le Mataio 25:1–13.

Aso Tofi

Na sauni le au soo o Iesu mo le taumafataga o le Paseka. A o faia le taumafataga, na fetalai atu Iesu i le au soo, o se tasi o i latou o le a faalataina o Ia. Ona Ia tuuina atu lea ia i latou o le faamanatuga mo le uluai taimi, ina ia fesoasoani latou te manatua ai o Ia. Na maliu atu Iesu i le Faatoaga o Ketesemane ina ia puapuagatia mo a tatou agasala ma tatalo atu i le Atua. Na o mai tagata ma pelu ma pue o Ia. Na sosola le au soo i le fefefe.

Tagai i le Mataio 26:17–29, 36–56.

Aso Faraile

Na aveina atu Iesu i le faitaulaga sili, o Kaiafa. Na faafiti le soo o Iesu o Peteru i lona iloaina o Ia. Na fesiligia Iesu e le kovana, o Pilato, faapea ma Herota. Na faasalaina o Ia e maliu i luga o le satauro. Na faasatauroina Iesu. Na tuu e se alii mauoa e igoa ia Iosefa ia Iesu i totonu o lona tuugamau. Sa asiasi atu Maria le tina o Iesu, ma Maria le Makatala i le tuugamau.

Tagai i le Mataio 26:57–72; 27:1–2, 27–37; Luka 23:44–46, 50–56.

Aso Toonai

Na taoto le tino maliu o Iesu i le tuugamau. Na fuli i ai se maa tele i le gutu o le tuugamau. Sa fai atu faitaulaga amioleaga ia Pilato ia i ai ni leoleo e tutu i fafo o le tuugamau ina ia mautinoa e leai se tasi e alu i totonu.

Tagai i le Mataio 27:57–66.

Aso Sa o le Eseta

Na toetu mai Iesu! Ua toetu o Ia mai le tuugamau. Na alu ifo se agelu mai le lagi ma faataavale ese le maa.

Na fetalai atu Iesu i Ona soo ina ia latou aoao atu ma papatiso i isi ma folafola atu o le a Ia faatasi pea ma i latou.

Tagai i le Mataio 28.

Ata na pueina e Matthew Reier; luga, mai le agavale: Na Maliu Atu Iesu i Petania i le Afiafi, saunia e James Tissot; O Le Ulufale Atu Manumalo o Iesu i Ierusalema, saunia e Harry Anderson © IRI; Faamaloloina o le Alii Tauaso, saunia e Harry Anderson, faaaloaloga a le Pacific Press Publishing, Inc., e le mafai ona kopiina; O Le Siufofoga Mai le Lagi, saunia e James Tissot; faamatalaga auiliili mai le E Toalima i Latou na Popoto, saunia e Walter Rane, faaaloaloga o le Falemataaga o Talafaasolopito o le Ekalesia; Keriso i Ketesemane, saunia e Harry Anderson © IRI; faamatalaga auiliili mai le O Le Faasatauroga, saunia e Harry Anderson © IRI; O Le Tanumia o Keriso, saunia e Carl Heinrich Bloch, faaaogaina i le faatagaga a le National Historic Museum i Frederiksborg i Hillerød, Tenimaka, e le mafai ona kopiina; pito i lalo: Ua Toetu o Ia, saunia e Del Parson