Auaunaga i le Ekalesia

“O Ia Mea Uma e Faamanuiaina ai A’u”

Saunia e Michael R. Morris

Mekasini a le Ekalesia

Afai o le Aso Toonai, o le a e maua atu Elvira Guagliarello o pisi lava i le umukuka o lona fale i Puerto Madryn, e tu i le gataifale o le Faga o Atenitina Nuevo, i le itumalo i saute o Chubut.

Na te fuaina falaoamata ma le vai ona tago atu lea i isi mea e faaaoga i le kuka. E tau le tautala a o galue, o ana galuega e leotetele atu nai lo ana upu. Aua foi, o loo i ai o ia i le feau a le Alii.

“Ou te lagona le fiafia aua ou te iloa o loo o’u faia se mea lelei,” o le tala lea a Tuafafine Guagliarello a o ia seuina mea e faaaoga i le kuka. E mafaufau o ia i le Faaola a o galue, ma fiafia i le manatu o le taunuuga o lana auaunaga o le a fesoasoani ai i isi tagata o le Ekalesia e manatua o Ia.

O Tuafafine Guagliarello, e 82 tausaga o lona soifua, e fiafia e auauna atu o se faiaoga asiasi, fiafia e taitai musika i lana uarota, ma gaosia falaoa e faaaoga i le sauniga o le faamanatuga—o se valaauga ua ia faalauteleina mo le toeitiiti 10 tausaga. Na te saunia se papa falaoa mo ia lava i le amataga o le vaiaso, ae o Aso Toonai, na te faaavanoaina ai le taimi e fai ai falaoa “e faapitoa lava mo le Lotu,” o lana tala lea. “Ou te faapea ifo ia te a’u lava, ‘E tatau ona ou faia le falaoa, ma e tatau ona ou alu i le lotu.’ Ou te le manao e faaletonu.”

Pe a tusa ai ma lona malosi, e auai foi o ia i le malumalu—e alu ai i se malaga faaletausaga e 20 itula e malaga ai i le pasi e agai i matu i le Malumalu o Buenos Aires Atenitina.

“E fiafia i taimi uma Tuafafine Guagliarello e auauna atu i soo se auala na te mafaia,” o le tala lea a lona epikopo o Jesús Santos Gumiel. “E iloa e tagata o le uarota e mafai ona latou faamoemoe ia te ia. E ui lava i tausaga o lona soifua, e faamaoni lava o ia i le saunia o le falaoa i Aso Toonai uma ma le sau i le lotu i Aso Sa uma lava. O ia o se faataitaiga lelei.”

Sa feiloai Tuafafine Guagliarello i faifeautalai faamisiona i le 1962 i Mar del Plata, i saute o Buenos Aires, a o faigaluega i se fale mautotogi lea sa nonofo ai faifeautalai. Ina ua ia matauina i laua o tuitui i faitotoa i le 15 tausaga mulimuli ane, ina ua alu atu o ia i Puerto Madryn, sa ia taliaina loa lesona a faifeautalai, ma papatisoina, ma amata ai lona soifua auauna i le Ekalesia.

O le taimi nei o loo nofo ai lava na o ia, ae na te le lagonaina o mautoatasi. O loo i ai ana tusitusiga paia ma lona aiga faaleuarota, ma e talanoa soo o ia i lona Tama Faalelagi e ala i le tatalo. Ma le isi, e fiafia o ia i le mafutaga a le Agaga, lea ua folafola mai e le Alii ia i latou o e auauna ia te Ia e ala i le auauna atu i isi.¹

“O ia mea uma ua faamanuiaina ai a’u,” o le tala mai lea a Tuafafine Guagliarello ma ataata. “O le Ekalesia e faagalulueina i tatou, ma o le mea lena ou te fiafia i ai. Ou te maua i taimi uma le fiafia i le auauna atu i lo tatou Tama oi le Lagi.”

Faamatalaga

1. Tagai Henry B. Eyring, “I Le Malosi o le Alii,” Liahona, Me 2004, 19; tagai foi i le Ioane 14:16–18; Mataupu Faavae ma Feagaiga 88:3.

Faaaogaina Tatau o Tausaga o le Avea ma Tagata Matua

President Ezra Taft Benson

O le ki lava i le lagonaina o le tauaogaina ma le foiaina o lagona o le tuua toatasi, o le vaavaai lea mo ni auala e fesoasoani ai i isi o loo manaomia le fesoasoani. Na fautuaina mai e Peresitene Ezra Taft Benson (1899–1994) e faapea, e ao ona manatunatu tagata matutua o le Ekalesia e auauna atu i auala nei:

1. Faigaluega i le malumalu ma auai atu i ai e le aunoa.

2. Aoina mai ma le tusiaina o talafaasolopito o aiga.

3. Ia aofia ai i auaunaga faamisiona.

4. Fausia o le maopoopoga o aiga.

5. Taliaina ma le faataunuuina o valaauga o le Ekalesia.

6. Tuuina atu o auaunaga faa-Keriso.

7. Faatumauina o le malosi faaletino, maloloina ma le tiotio.

Mai ia Ezra Taft Benson, “I Le Au Matutua o le Ekalesia,” Ensign, Nov. 1989, 4–6.

Elvira Guagliarello

Pito i luga: ata na pueina e Michael R. Morris