Fesili & Tali

“Aisea e i ai pea faafitauli i lo’u aiga e ui lava ina matou o i le lotu, faia afiafi faaleaiga, ma taumafai e ola i le talalelei? O le a se isi mea e mafai ona matou faia?”

O le ola i le talalelei e aumaia ai faamanuiaga ae le faapea o le a outou le feagai ai ma ni luitau. E mafai e faigata ona faamalolosia lo outou faatuatua e ala i le uunaia o outou e saili le fesoasoani a le Tama Faalelagi. O le foiaina o faafitauli e ala i Lana fesoasoani ua aoaoina ai outou i le ala e fai ai filifiliga amiotonu.

Pe na outou talanoaina lenei tulaga o se aiga? E ala i le fefautuaai faatasi, atonu o le a outou maua ai ni manatu aoga. Pe na outou anapopogi ma tatalo o se aiga mo ni fofo? Pe na outou saili i tusitusiga paia ma lauga o konafesi aoao? Atonu e manaomia e lou aiga le faia o ni suiga e faaleleia ai le tulaga, pe atonu pau le mea tou te manaomia o le filiga, faatalitali ma le onosai ma talitonu o le a faamalolosia outou e le Alii i le taimi o lenei tofotofoga (tagai i le Mosaea 24:15).

Afai na faatiga nisi i lou aiga, taumafai e faamagalo i latou ma aua le tuuaia i latou. E ui atonu e le foia vave e le faamagalo atu le faafitauli, ae o le a aumaia le filemu i lou loto ma o le a faafaigofie atili ai ona taulimaina le faafitauli.

Ua osofaia e le fili aiga ona e matua taua lo latou malosiaga i le Ekalesia ma lou nuu. O lea ia tumau ai pea. Faaauau pea ona o i le lotu, faia afiafi faaleaiga, ma ola ai i le talalelei. O le usiusitai e te lagona ai le Agaga Paia, ma e taua tele Lana taitaiga e maua ai tali o loo e sailia. O le ola ae i se aiga malosi, e oo lava i se aiga e tatau ona foia faafitauli, o se tasi lea o sini e sili ona taua tou te mafai ona maua.

Faaaoga Taiala Ua Tuuina Mai Ia I Tatou

Atonu e lei faamalosia se aiga seiloga ua tofotofoina. O le mea e lelei ai, e le tatau ona tatou feagai na o i tatou ma ni faafitauli; e finagalo le Tama Faalelagi ia tatou manuia o ni tagata taitoatasi ma faaleaiga. Ina ia fesoasoani ia i tatou, ua Ia saunia ni taiala taua, e pei o tusitusiga paia, se perofeta soifua, isi taitai o le Ekalesia, ma le Agaga Paia. E mafai ona latou fesoasoani ina ia tatou malamalama ma faaaoga mataupu faavae o le talalelei e aumaia ai le olioli ia i tatou ma o tatou aiga. Ma le isi foi, aua nei galo ona ta’u atu i o outou matua lo outou talisapaia ma le alolofa ia i latou. Ou te iloa o le a saunia e le Alii se ala e faatasia ai, faamalosia, ma siitia ai i luga lou aiga. Ou te iloa o le aiga ua faauuina e le Atua.

Jared L., 18 tausaga, Mindanao, Filipaina

Aoao mai Ou Luitau

E tusa lava po o le a le malosi o lau taumafaiga, o le a i ai pea lava luitau. O nei tofotofoga e fesoasoani i lo tatou tuputupu ae. E fuafua lava i le auala e te tali atu ai i na luitau. O le ki o le aoao mai ai. Toe laa tasi i tua ma vaai po o le a tonu lava se mea o loo tupu i ou autafa. Tatalo e uiga i faafitauli o loo e aafia ai ma ia faatuatua o le a fesoasoani le Alii ina ia e manumalo mai ai. E mafai ona avea lena o se malosiaga ia te oe, ma ona mafai ai lea ona avea oe ma se malosiaga i isi.

Makenzie C., 18 tausaga, Chihuahua, Mekisiko

Faitau le Aiga o se Folafolaga

E oo mai faafitauli e tusa lava pe fai a tatou tatalo pe leai. E le o se mea e faasalaina ai i tatou ae ia faamalosiau ai i tatou. O faafitauli tatou te fetaiai i le olaga e maua ai le avanoa e galulue faatasi ai aiga. Ao pagatia lo’u aiga i le popole, faafitauli tau tupe, ma le taumafaiga ina ia maua se taimi e faatasi ai, ua sili atu lo matou vavalalata ma faapea foi ma lo matou Tama Faalelagi. O se tasi o mea matou te faia pe a oo mai taimi faigata o le faitau lea “O Le Aiga: O Se Folafolaga i le Lalolagi.” E faamanatu maia ia i matou le sootaga paia matou te faasoaina ma le taua tele o le tausia o a matou feagaiga.

Anna G., 15 tausaga, Georgia, ISA

Talia le Finagalo o le Tama Faalelagi

Ou te manatu o se tasi o auala e tofotofoina ai i tatou e le Tama Faalelagi o faafitauli. E le tatau ona tatou faagaloina o Ia o lo tatou Tama ma ona o lea tulaga e matua alofa tele o Ia ia i tatou ma e finagalo i le mea sili mo i tatou. Ou te iloa pau lava le auala e mafai ai ona tatou manumalo i faafitauli o le filiga ma le taliaina o le finagalo o le Tama.

José C., 18 tausaga, Ancash, Peru

Ia E Talitonu i le Alii

O le mea e fesoasoani ia te au pe a ou fesili pe aisea ua i ai faafitauli i lou aiga, e tusa lava pe o loo matou faia mea uma matou te mafaia, o le tala lea ia Iopu ma le tele o puapuaga na ia oo i ai. E faitauina faapea leIopu 19:25–26: “Aua ua ou iloa o loo soifua le na te togiolaina au, o aso amuli foi e tulai mai ai o ia i luga o le eleele: e ui lava foi ina faaumatia lenei tino pe a mavae atu lou pau, ae ou te iloa atu le Atua i lou tino.” Sa feagai Iopu ma nisi o luitau sili ona faigata, ae peitai na ia iloaina lava o loo soifua lona Faaola! Afai e mafai ona tatou mafaufau ma ola faapei o Iopu, ou te iloa o le a mafai ona tatou vaai i tua atu o o tatou faafitauli ma iloa o loo i ai so tatou Faaola, le o loo siitiaina i tatou i nei tofotofoga.

Megan B., 17 tausaga, Iuta, ISA

Foia Faafitauli i le Faamoemoe

E faamalosia atili i tatou e faafitauli pe a faafetaia’ia sa’o. O le mea e tatau ona e faia o le i ai o le faamoemoe ma le lototele e feagai ai ma faafitauli. Atonu o loo e faia le mea sili i lou auai i le lotu ma taumafai e ola i le talalelei, o lea la e tatau ona e taliaina le mea moni, o ou faafitauli o le a faamamaina oe ma avea oe ma se tagata sili atu i le iuga. Taumafai foi e matau se mea e le o sao lou faiga ma taumafai e faasao. Taumafai e le aunoa e fesoasoani atu i isi, ma ao e faia o lea, o le a foliga mai ua mamasagia ou faafitauli. A o le sili o na mea uma, filifili ma le Alii i taimi uma. Tatalo e uiga i ou faafitauli ma talosagaina le Tama Faalelagi e taialaina oe.

Raymond A., 18 tausaga, Accra, Kana

Tumau e oo i le Iuga

O le aiga e totonugalemu i le fuafuaga a Le Foafoa, o lea la e mautinoa lava o le a faia e le fili mea uma na te mafaia e taofia ai i tatou mai le ola faatasi, o se aiga fiafia e taulai atu i le talalelei. Ua tatou iloa e le mafai ona tatou faamoemoe o le a faigofie le olaga pe faapea o le taimi lava tatou te o ai i le lotu ma faia a tatou afiafi faaleaiga, o le a saoloto loa le olaga mai faaosoosoga. Pe a oo ina louloua mea uma, faitau au tusitusiga paia, tatalo, ma tau lava ina talanoa o se aiga.

Elder Dudley, 21 tausaga, Misiona a Initonesia Jakarta

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

Mulimuli i Fautuaga a Perofeta

Elder Robert D. Hales

“O le fesoasoani mai o le Alii ma Ana aoaoga faavae, e mafai ai ona malamalama ma faatoilaloina ni aafiaga tiga mai luitau e ono fetaiai ma le aiga. Pe o a lava manaoga o le aiga e i ai, e mafai ona faamalolosia o tatou aiga pe a tatou mulimuli i fautuaga e tuuina mai e perofeta.

“O le ki i le faamalolosia o aiga, o le oo mai lea o le Agaga o le Alii i o tatou aiga.”

Elder Robert D. Hales o le Korama a Aposetolo e Toasefululua, “Faamalolosia o Aiga: O Lo Tatou Tiute Paia,” Liahona, Iulai 1999, 38.

O Le Isi Fesili

“E faapefea ona taofiofia lou ita pe afai ua e matuai le malie lava?”

Auina mai lau tali ia le silia ma le aso 15 o Me, 2011, i le:

Liahona, Questions & Answers 5/11

50 E. North Temple St., Rm. 2420

Salt Lake City, UT 84150-0024, USA

Po o le i-meli: [e-mail]

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.