Ni Ra Sega ni Vude na Ga
Keitou nanuma ga ni ra na lako i wai na neitou luve ni ga. Qai vakidacala vei keitou.
Era tekivu kece ena dua na iloloma vakidacala e kauta mai o Ta vei iratou na luvena yalewa e lewe tolu. Ni keitou irova sobu yani na loma ni dua na kateni, keitou soki ena marau na goneyalewa. Na luve ni ga! Keitou sega tale ni wawa ena neitou tatara yani me keitou toboka e dua. Keitou drigilaki Ta, ka voleka kina ni lutu na kateni.
“Dou wawa, ra goneyalewa!” e tukuna mai. “Dou na yadua!”
Au kidacalataka na kena somidi na luve ni ga lailai oya e ligaqu. Ena noqu qumia toka vakamalua, e vaka na qumia toka e dua na kota (ilavo siliva ruasagavulu kalima na sede) ka via tautauvata talega na kena bibi.
“Ie, sa dua na ka na kena mama!” Au kacivaka yani. “Sa rauta me ra dau vude na luve ni ga!”
E dredre tale o Ta ni lako yani ki valenikuro vei Na. Dau levu na nona veivakidacalataki o Ta, vakabibi na kena era dau matadredredre kina na nona matavuvale. Oqori na gauna au nanuma kina na tobu. Ena nodratou itikotiko vinaka na neitou ga vovou.
“Nora, kauta mai na tobu palasitika makawa mai na qaraji,” au tukuna yani vei taciqu.
Ni vakadrodroya tiko na paipo ni neitou lomanibai e muri na wai makare, batabata ki na tobu, sa tekivu me keitou vakadikeva na neitou ga ka vakarau me vakatokayaca. Na noqu e toka e dua na roka dravu lailai e gusuna kei na yava raraba lelevu.
Vakasauri na noqu nanumi ira mai na noqu itokani. Era na dredrevaka na noqu maqusa tiko ena vukudratou na neitou manumanu susu. Au qai kila ni ra na sega ni tiko na noqu itokani ena loma ni vica na siga mai oqo. Era sa vakatara vei ira o ira na nodra itubutubu me ra laki keba ena veivulunivanua voleka. Na vodo baisikeli cake ena dua na gaunisala kuvu, digia e dua na vanua ni keba, dumuka e dua na valelaca. Era na lalasa dina ka lesu mai ki vale ena siga ka tarava, era na veidredrevaki ka veitalanoataka na keba. E sega ni vakatara o Na meu lako. E kaya niu se rui gone!
Ni sa sinai na tobu ni qalo, keitou qai wavoki mai na goneyalewa, ni keitou sa nanamaki tiko mai vakalevu ki na gauna oqo. Keitou biuti ira yani na manumanu ni ra yavavala ka tagitagi ki wai ka LUTU yani vakadua ki ra. Eratou luvu tolutolu!
Keitou toburaka yani na ligai keitou ka vueti iratou mai na manumanu malumalumu oqo. Na cava beka e leqa? Keitou sega ni kerei iratou me ratou cakava e dua na ka dredre, me vaka na qalo. Na ka ga me ratou caka o ya me ratou vude tu ga. E sega beka ni ka rawarawa vua e dua na ga o ya?
“Na cava e yaco?” e vakataroga na taciqu.
“De tou vakidacalataki iratou!”
Keitou duavata ni vakataki ira ga na gonelalai ena nodra vuli lako. Era na lutu ena so na gauna. Keitou sa mani duavata me keitou tovolea tale.
“Dua, rua, tolu, lako.
Plunk! Plunk! Plunk! Lutu sobu me vaka na uma.
E kalougata vei iratou na luve ni ga, ni sega ni dua vei keitou a via tomana na neitou vakasama ni gadrevi ga vei iratou na vakatovotovo. Ni vakatura mai o Nora ni ratou gadreva na ivakamamaca ni drauniulu e vutidratou, keitou a cici kece yani ki vale. Erau vakamamacataki iratou vakamalua na taciqu ena noqu ivakamamaca piqi niu vakasaqara na naba ni talevoni ena yaca mai na kateni.
“Ni bula vinaka saka,? Keitou se qai volia—io, neitou ta se qai volia wale—e tolu na luve ni ga. Io saka. Io, e dua na leqa e tiko vei iratou na neitou ga. Raica, keitou vinakata me vude na neitou ga.”
Na ka e tukuna na tamata o ya e dolava sara na mataqu. Au sega ni kila na levu ni ka au sa vulica me yacova na gauna au qai rogoca kina ena noqu vakamacalataka vei Nora kei Suzy: “Raica, na vutina malumu o ya e sega ni sisi kina na wai. Era na suasua ga. Me tou na wawa ena dua se rua na macawa me rawa ni cakava na yagodratou na waiwai ka na sega kina ni rawa ni suasua na vutidratou.”
“E sega ni dina oqori,” e veibataka o Nora. “Au sa raica oti na luve ni ga ni ra muri tinadra yani e uciwai. Era se qai siga vica ga kina.”
“E vakamacalataka vakaoqori vei au na turaga o ya. Ni ra sucu mai na ga, e dau ologi ira e tabana na tinadra me ra katakata tiko kina. Na waiwai mai na tabai tinadra ena drodrovi ira na luvena. Ni ra tiko vata kei tinadra, e rawa ni ra vude. Ni ra tiko vakataki ira, era na gadreva me ra qase cake vakalailai ni bera ni ra qai rawa ni bula e wai.”
Oqori na gauna e lako kina na noqu vakasama ki na dua na vanua ena veiulunivanua, kau vakasamataki ira na noqu itokani ena nodra valelaca. E rairai e via maroroi au toka tale mada vakalailai e ruku ni tabana o tinaqu. Au masia toka vakamalua na dakuna lailai na noqu luve ni ga ena dua na noqu iqaqalo.
“Au na tei kua mada ni biuti iko ena tobu, ka lailai,” au yalataka vua. Oti, ena dua na vakasama e muri, au vakuria, “O nanumi tinamu beka?”
Droini mai vei Jim Madsen.