Ena Yaco Dina na Tucaketale

Epereli 2010

Dina ni Kosipeli

Na Dina ni Tucaketale

Mai vei Peresitedi Spencer W. Kimball (1895–1985)

iVakatakilakila

President Spencer W. Kimball

Ena dua na Siganisucu ena vica na yabaki sa oti, keimami a taubaletaka na vanua a taubale kina o Jisu. E vica na auwa totoka keimami a laki tiko sara ena Were o Kecisemani ka tovolea me keimami vakananuma lesu na rarawa a sotava ni sa soli Koya me Mate ena Kauveilatai ka me na Tucaketale. Keimami sa laki tucake voleka tu ena vanua a masu kina, na vanua a tauri kina vakavesu, laki lewai ka totogitaki me mate.

E taudaku ni koro levu oqo, keimami a cabeta kina na ulunivanua vatuvatu, ka ra tu kina e so na qara lalai, ka vaka na qavokavoka ni tamata na kedra irairai, ka tukuni vei keimami ni oqo o Kolikoca, na vanua a lauvako kina ka mate. Keimami a qai sirova sobu mai na baba vatu ni delana oqo ka laki curu sara ki na dua na katuba lailai ni dua na qara tuvaki ca ka tukuni ni a vakotori e kea na yagona.

Na levu ni auwa keimami a tiko kina ena were lailai ena taudaku ni qara oqo sa mai vakananumi kina na italanoa vakosipeli ni Nona bulu kei na Tucaketale, ka a yaco dina e kea. Keimami a raitayaloyalotaka ena neimami vakasama kei na masumasu ena nodratou sa lako mai ki na ibulubulu o ira na marama, ka vaqiqica laivi na isogovatu na agilosi ni Turaga, kei na nodra sa rere na sotia.

Sa Tucaketale o Koya

Sa voleka ga me keitou raica votu na agilosi e rua ena nodrau isulu tatalivaliva ka a vosa vei Meri, “E na cava dou sa mai vakasaqarai koya sa bula ena kedra maliwa na mate?

“Sa sega eke ko koya, sa tu cake tale.”

A kaya taumada kina na Turaga: “Ena soli yani na Luve ni Tamata ki na ligadra na tamata ca, ka na vakoti ki na kauveilatai, ka na tu cake tale ena ikatolu ni siga” (Luke 24:5–7).

Keitou a vakananuma na nodratou veivosaki o Meri, rau na agilosi, kei na Turaga:

“Yalewa, ko sa tagi ena vuku ni cava? Sa kaya vei rau ko koya, E na vuku ni ra sa kauta tani na noqu Turaga, ia kau sa sega ni kila na tikina era sa vakotori koya kina.”

Sa vuki vakanadaku “ka raici Jisu ni sa tu, ia sa sega ni kila ni sai Jisu.

“Sa kaya vua ko Jisu, Yalewa, ko sa tagi ena vuku ni cava? ko cei ko sa vakasaqara? Sa nanuma ko koya ni sai vakatawa ni were, a sa kaya vua, Kevaka ko sa kauti koya tani, tukuna saka vei au na tikina ko sa vakotori koya kina, kau na qai laki kauti koya tani.

“Sa kaya vua ko Jisu, I Meri. Sa vuki ko koya, ka kaya vua, Raponai; a kena ibalebale, Vakavuvuli.

“Sa kaya vua ko Jisu, Kakua ni tarai au; niu sa bera ni lako cake vei Tamaqu: ia mo lako vei ira na wekaqu, ka kaya vei ira, Au sa lako cake vei koya sa Tamaqu, ka Tamamudou; vei koya sa noqu Kalou, ka nomudou Kalou” (Joni 20:13–17). …

Na Bibi ni Siga ni Mate

Eso na gauna na noda marau baleta e dua na ka bibi e dau vaka me vakavuravura toka, ka sega ni kila na inaki dina ni noda marau o ya. E yaco tiko oqo ena Siga ni Mate, ka da marautaka tiko kina na olidei ka sega ni marautaka na inaki dina ni Tucaketale ni Turaga. Era na bula rarawa o ira era sega ni via kila na itutu vakalou i Karisito, itutu vakaluvena na iVakavuvuli. Era kalouca o ira era vakatoka na cakamana cecere ni Tucaketale me dua ga na “ka a yaco vei iratou na tisaipeli, ka sega ni dua na ka bibi cecere ka a yaco dina.”

Eda kila vakavinaka tu ni a yaco dina na veika kece oqo. Na Karisito a vakamacalataki Koya kina vei Nikotimo:

“Keitou sa vosataka na ka keitou sa kila, ka tukuna na ka keitou a raica; ia dou sa sega ni vakabauta na neitou itukutuku” (Joni 3:11).

Ka keitou nanuma sara na veika a tukuna o Pita:

“O koya oqo me kila sara kina na mataqali taucoko nei Isireli, ko Jisu oqo, ko koya dou a vakota ki na kauveilatai, sa lesia na Kalou me Turaga ka Karisito talega” (Cakacaka 2:36).

“Ia dou a cakitaki Koya na Yalosavasava ka Dodonu … ;

“Ka dou a vakamatea na Vu-ni-bula, ko koya sa vakatura cake tale mai na mate na Kalou; ia keitou sa vakadinadina e na ka oqo” (Cakacaka 3:14–15).

Erau a tucake tale ena doudou o Pita kei Joni ena mataveilewai ka rau kaya:

“Mo ni kila kecega, kei ira kecega na Isireli, ni sa yaca i Jisu Karisito na kai Nasareci, ko koya ko ni a vakota ki na kauveilatai, ko koya sa vakatura cake tale na Kalou mai na mate, ia ena vukuna ga sa tu kina eke ko koya oqo [a tamata lokiloki e liu ] e na matamuni ka sa bula vinaka. …

“A sa sega na bula e na vukuna e dua tani: ni sa sega sara e dua tale na yaca e ruku i lomalagi sa soli kivei ira na tamata, me da bula rawa kina” (Cakacaka 4:10, 12).

Ni sa vakalialiai rau na iApositolo na mataveilewai ka vakaroti rau me rau kakua ni vosa tale se vakavuvuli ena yaca i Jisu Karisito, rau a sauma kina vakaoqo: “Mo ni lewa ga se sa dodonu se segai e na mata ni Kalou me keirau vakarorogo vei kemuni ka kua vua na Kalou.

“Ni sa dredre vei keirau me keirau kua ni tukuna na veika keirau a raica ka rogoca” (Cakacaka 4:19–20).

“A sa levu na nodra kaukauwa na iapositolo ni ra sa tukuna sa tu cake tale mai na mate na Turaga ko Jisu: a sa vinakati vakalevu ko ira kecega” (Cakacaka 4:33).

iVakadinadina nei Pita

Eda kila talega ni a yaco dina na Tucaketale. A kaya kina o Pita ki na mataveilewai veibeitaki:

“A nodra Kalou na noda qase sa vakaturi Jisu cake tale mai, ko koya dou a vakamatea ni dou a vakarubeca ena dua na kau. … …

“Keitou sa yaco talega me dauvakadinadina e na veika oqo; ka sa vakakina na Yalo Tabu, ko koya sa solia na Kalou vei ira sa talairawarawa vua” (Cakacaka 5:30, 32).

Eda tu ka qoroi Pita vakaidina sara, ni sa mai vakadeitaki koya kina ka sa daramaka oti ena loloma na ilesilesi ni veiliutaki kei na itutu ni lewa kei na yaloqaqa vei ira sa vakalou ka vakadeitaki. Na kaukauwa sa mai vakatikori vua a liutaki ira kina na Yalododonu ka vorati vuravura kina vata kei ira era veivakacacani, tawa vakabauta, kei na veika dredre. Ia a cauraka voli tikoga na nona itukutuku e kila tu, eda qoroya kina na nona kaukauwa ena nona sotavi ira na tamata ca kei na veiiliuliu ni lotu, o ira na vakaitutu era rawa ni vakamatei koya, ka tukuna tikoga na Turaga sa tucaketale, na Tui ni Sautu, o Koya na Yalo Savasava ka Dodonu, na Tui ka iVakabula. Sa vakadeitaki koya kina o Pita, ka sega tale ni valuti rawa, se veilecayaki. Oqo na veika meda kila kina ni sa dina sara o koya. … …

iVakadinadina nei Paula

Na ivakadinadina i Paula e taucoko sara. A rogoca na domo i Karisito sa tucaketale:

“I Saula, I Saula, ko sa vakacacani au ena vuku ni cava?” Ena nona via kila na domo o ya , a kaya kina o Saula, “O cei ko iko, na Turaga?” ka saumi mai vua, “Oi au ko Jisu, ko koya ko sa vakacacana: e ca vei iko mo caqeta na mata ni moto” (Cakacaka 9:4–5).

Ia ko Paula oqo, sa mai vakaukauwataki sara, ka ra sa tabaki koya na lewe ni matabete, sa rai rawa tale na matana a boko, sa veilakoyaki yani ki na veivalenilotu ka vunau vei ira na Jiu e Tamasiko, ka “vakadinadinataka sara ni sa Karisito ko koya oqo” (Cakacaka 9:22).

A qai gole yani o Paula vei iratou na iApositolo e Jerusalemi, ka kaya kina o Panapasa ena vuku i Paula, “ka tukuna vei ira na nona raica na Turaga e na gaunisala, ko koya sa vosa talega vua, kei na nona vunau doudou mai Tamasiko e na yaca i Jisu” (Cakacaka 9:27).

A tomana kina o Paula:

“Ia ni ra sa vakayacora oti kecega na veika sa volai ena vukuna, era sa kevutaka sobu mai na kau, ka buluta ena dua na ibulubulu.

“A sa vakaturi koya cake tale mai na mate na Kalou:

“Ka bogi vuqa sa rairai kina ko koya vei ira era a lako vata kaya mai Kalili ki Jerusalemi, a sa dau tukuni koya ko ira oqori vei ira na tamata. …

“Ni sa vakayacora na Kalou vei keda na luvedra, ni sa vakatuburi Jisu cake tale ko koya. …

“Ia ena vuku ni sa vakaturi koya cake mai na mate, me kakua ni vuca tale” (Cakacaka 13:29–31, 33–34). …

iVakadinadina i Josefa Simici

E laveti na noda bula ena ivakadinadina ni parofita ena gauna oqo, o Josefa Simici, ena nona vakadeitaka tale vei ira na tamata na dina ni Tucaketale. E cavuta tale kina eke o Elder George A. Smith na iotioti ni vosa nei Josefa Simici ena June ni 1844, ni vo toka e vica na siga me vakamatei kina vakaloloma:

“Au tu vakarau meu vakacabori meu isoro vei ira na tamata oqo; ia a cava era rawa ni cakava na keda meca? Era rawa ni vakamatea ga na yago, ka sa yala e kea na nodra kaukauwa. Ni tudei na noqu itokani. Ni kua ni rere. Ni kua ni vakasaqara mo ni maroroya na nomuni bula, ni ko koya e rerevaka me mate baleta na dina, ena vakayalia na bula tawamudu. Mo ni yalodina tiko me yacova na ivakataotioti; ka da na qai tucake tale mai na mate ia eda na vaka na Kalou, ka da veiliutaki ena matanitu vakasilesitieli, matanitu yalataki, kei na lewa ni veika tawamudu vakalomalagi.”¹ …

Taro kei na kena iSau maivei Jope

Na taro nei Jope era sa taroga e milioni na tamata ni ra mai buluta na nodra daulomani: “Kevaka sa ciba na tamata, e na bula tale ko koya?” (Jope 14:14).

Io sa mai saumi na nodra lomatarotaro e vuqa sara vei ira, ni sa sobuti ira e dua na yalo ni vakacegu cecere, me vaka na tegu ni lomalagi. Ia e sega ni wili rawa na levu ni kavoro ni yalo era sa mai vakabulai ena iregu ni veivakacegui oqo ka rawa ni kila ga na yalo ka sega ni vakamacalataki rawa.

Ni gauna e vakacegui kina na yalo ni dua na tamata ka vakadeitaki vou na nodra vakasama a vakaleqai taumada kei na yalodra a kavoro, sa rawa me ra kaya vata kina kei Jope na daulomani:

“Niu sa kila sa bula tiko na noqui Vakabula, ena tu talega e vuravura ena siga mai muri:

“Ia ni sa rusa sara na kuliqu oqo, kau na kunea ga na Kalou e na yagoqu:

“Ko koya kau na raica dina sara koi au, ka kunea ena mataqu ka sega ni dua tani” (Jope 19:25–27).

A vakaraitaka o Jope na nona gadreva me volai ena ivola na nona ivakadinadina ka ceuti ena vatu me ra na wilika o ira na itabatamata era muri mai. A yaco dina na nona gagadre oqo, ni sa mai vakacegui na yalo ni tamata e vuqa ni ra sa mai wilika na nona ivakadinadina kaukauwa oqo.

Na Raivotu nei Joni

Meu tinia, ena noqu wilika na raivotu nei Joni na Daunivakatakila:

“Ia kau a raici ira era a mate, na tamata lalai kei na turaga, era sa tu e na mata ni Kalou; a sa tevuki na ivola e so: e dua tani tale na ivola sa tevuki, ai vola ni bula: ia na mate era sa lewai mai na ka sa volai e na ivola, me vaka na nodra ivalavala.

“Ia na wasawasa sa soli ira na mate era sa tiko kina; o mate talega kei bulu e rau sa soli ira na mate era sa tiko kina: a sa lewai ko ira na tamata yadua me vaka na nodra ivalavala” (Ai Vakatakila 20:12–13).

Ia ni oti na draki butobuto veilecayaki ka batabata e tarava mai na kadre ni veika bula, ka ra lagata vata mai na ka bula kecega ni sa vakalou na Turaga sa tucaketale, ni sai Koya na Dauveibuli, ni sai Koya na iVakabula kei vuravura, ni sai Koya dina na Luve ni Kalou.

VAKANI IRA NA NOQU SIPI, MAI VEI KAMILLE CORRY @ 1998 IRI