Kivei Ira na Cauravou me baleta na Veigadivi

Mai vei Iratou na Mataveiliutaki Raraba ni Cauravou

iVakatakilakila

Young Men General Presidency

Na Cava na Veigadivi?

Ra cauravou, na veigadivi sai koya na nomu kerei koya e dua na goneyalewa mo drau vakaitavi ka veimaliwai vata ena dua na itaviqaravi navuci vata vakailawalawa.

Na Cava e Bibi kina na Veigadivi?

Na veigadivi e rawa me gauna vakasakiti ni vuli vei kemudrau ruarua, o iko kei na goneyalewa drau sa veigadivi tiko. E rawa ni o vulica kina e vuqa na ka me baleti iko, ka rawa ni o vakatorocaketaka na nomu kila, na nomu rokova, kei na nomu marautaki ira na luvena yalewa matalia ka talei na Kalou.

E se yawa sara beka na kena gauna mai na gauna oqo, ia na vakamau sa dua vei ira na vakatulewa bibi duadua ena nomu bula. E se sega ni gauna ni vakatulewataki ni ka oqori na gauna ni nomu itabagone ia na veigadivi ena kena ivakarau dodonu ena vukea na nomu vakarautaki iko mo vakatauca na lewa oqori ni sa yaco mai na kena gauna donu. Na veigadivi ena basika kina na veigauna vivinaka mo tara cake kina na maqosa ni bula veimaliwai ka na vukea mo yalodei ka irairai totoka vua na goneyalewa drau veigadivi tiko. Ena yaco mo kila ka rawai mai vei ira e tu vei ira na veika vivinaka kei na itovo ni bula ka na bibi me tu vua na nomu itokani tawamudu. Na ivakarau ni veigadivi dodonu talega ena vukea mo bula kilikili kaya ka vakarau mo vakamautaka ena valetabu me baleta na gauna oqo kei na veigauna tawamudu o koya e donu ena kena gauna dodonu.

Na veika kece oqo era na cau ki na nomu na marautaka e dua na veivakalougatataki cecere duadua ni bula: e dua na bula marautaki ka qaqa ni tiko vakawati.

Na Cava na iVakarau Dodonu ni Veigadivi?

Era sa vakasalataka na parofita ni Turaga mo kakua ni veigadivi me yacova ni o sa yabaki 16. Ni o sa tekivu veigadivi, veigadivi ga vata kei ira e cecere na nodra ivakatagedegede ka rawa ni o rokova tiko na nomu ivakatagedegede ni o tiko vata kei ira. Dau vakaitavi ena veiitaviqaravi maucokona ka na rawa kina vei iko kei na nomu itau mo drau dau dokai kemudrau ka toka volekata ga na Yalo ni Turaga. Sa ka bibi sara me dau savasavavuka tikoga na noda vakasama kei na lomada. Levea na veimaliwai ka dau basika kina na veitalanoa kei na itovo ka vakauqeti kina na veimoceri. Levea na nomudrau dau tiko duadua ga kei nomu itau se na gadi tiko ni sa bogilevu na vanua. Sa nomudrau itavi ruarua mo drau dau veivukei ena kena rokovi tiko na savasava ni matabete kei na bula vakamarama ka mo drau dau taqomaka na nomudrau dokai kei na ivalavala savasava.

Ni o sa tekivu veigadivi, lako vata kei na dua tale se levu na veitau. Levea na nomu dau gadi vata vakawasoma kei na dua na tamata se na nomu taura vakabibi e dua na veitokani se qai tekivu walega.

Raica me dau rawa vakavinaka kece na veika me baleta na nomu bula ni o veigadivi. Me kakua ni veitaravi na nomu veigadivi ka me laki leqa kina na isema ni bula vakamatavuvale se me vakaleqai kina na ka ni vuli se na kena vakatorocaketaki na maqosa kei na taledi eso. Vakadeitaka me sota vata kei rau na nomu itubutubu na goneyalewa drau sa veigadivi tiko ka me rau logavinaka kina.

Keimami vakauqeti iko mo dau vakaitavi ena itaviqaravi ni veigadivi tuvalaki vakamatau ka rawarawa, vinaka, ka sega ni sau levu, ka na vukei iko mo kilai koya vinaka kina na goneyalewa drau veigadivi tiko.