“Vakania na Noqu Sipi”
“Muri au, ka vakania na noqu sipi” (V&V 112:14).
“E kaya vei Pita ko Jisu me vakania na Nona sipi. O ya na sala e rawa ni vakaraitaka kina vei Jisu ko Pita ni lomani Koya.”
“Na, a dua tu beka na qele ni sipi nei Jisu?”
“Sega, daulomani. E dau vakatokai ko Jisu ena so na gauna me iVakatawa Vinaka, o keda eda vaka na Nona sipi. A vakavulici Pita tiko ko Jisu ni kevaka eda vinakata me da vakaraitaka vei Jisu ni da lomani Koya, e dodonu me da vukei ira na tani.”
“Oqori na vuna me daru na kauta kina na pai vei Sisita Jacobs ni oti na lotu vakamatavuvale?”
“Io, e vakakina. Ia ena vinaka cake kevaka e rawa ni o vakasamataka e dua na ka mo vakaraitaka kina vei Sisita Jacobs ni o lomani koya.”
E vakasamataka o Olivia na cava e rawa ni cakava. E nanuma ni rau dau taleitaka o Na kei Bubu na iyaloyalo e dau droinitaka.
“Au kila! Au rawa ni cakava e dua na kadi me baleti Sisita Jacobs ka qai droinitaka kina e dua na iyaloyalo!”
A droinitaka o Olivia e dua na drodrolagi totoka. Ena loma ni kadi e qai vola kina, “Mo bula vinaka mai vakatotolo! Loloma, Olivia.”
Ni ratou yaco yani na nona matavuvale ki na vale nei Sisita Jacobs, a tarogi Sisita Jacobs o Na se sa vakaevei tiko. Sa tekivu me tagi o Sisita Jacobs.
“Au se qai kila niu na lako ki valenibula meu laki sele ni mataka. Au rere toka vakalailai.”
A solia o Na na pai vei Sisita Jacobs. Oti qai solia yani o Olivia na kadi a cakava.
“Vinaka vakalevu, Olivia. Na kadi rairai totoka oqo kei na kamica ni nomu matadredredre au sa logavinaka kina.”
E vakila o Olivia ni vaka e dua e mokota tu na utona. E marau ni rawa ni vukei Jisu ena kena vakani na Nona sipi.