Me Vakaliuci Tiko na Vakamau ena Valetabu

Mai vei Vitaly kei Ekaterina Shmakov

Rau a dui sucu o Vitaly kei Ekaterina (Katya) Shmakov mai Omsk, e Rusia, kei Yekaterinburg, e Rusia. Rau a lewena na Lotu i Jisu Karisito ni Yalododonu Edaidai ni rau se lalai, ka rau laki kaulotu—o Vitaly ena Tabana ni Kaulotu e Czech Prague kei Katya e Russia Novosibirsk. Erau kaya ni nodrau veisau oqo a tadolava na nodrau vakasamataka na veika ni bula marau, yalonuidei, ka taucoko, ia na nodrau kaulotu a vakadeitaka me rau gadreva na kena buli e dua na vuvale bula vakosipeli, vakatekivu sara ga ena vakamau ena valetabu. Oqo na kedrau italanoa.

Vitaly: Niu sa lesu mai vale ni oti e vica na vula na noqu kaulotu, au a sa kerei sara meu daunivakasala ni a vakayacori e dua na neitou koniferedi ni itabagone. A kacivi au ki na nona valenivolavola o Steven C. Smith, na peresitedi ni Tabana ni Kaulotu e Russia Novosibirsk. Au nanuma sara niu sa na kacivi ki na dua na itutu vou se dua beka ga na veivakatarogi. Ia, a kaya vei au o Peresitedi Smith ni gadreva meu na sotava e dua—oqo e dua na goneyalewa ka se qai kaulotu oti ga ka sa lesu tale i nodratou ena dua na tiki i Rusia ia ena tiko o koya e taoini me baleta na koniferedi.

Au se bera mada vakadua ni raici Katya, ia niu gole yani ki na koniferedi, au tukuna vua na yacaqu, ka keirau tekivu veivosaki sara. Ena bogi o ya au a kerei Katya me keirau danisi. Ka vakakina ena siga ka tarava.

Katya: Niu sa tubucake tiko mai, au sega sara ni veikilai vakalevu vei ira na cauravou, era lewe ni matabete, ia au kila ga ni na vakarautaka na Turaga e dua na cauravou vinaka meu na vakamautaka. Au sega mada ni kila se gauna cava vakakina se keirau na sota vakacava, ia au sa nuidei tikoga vua na Turaga kei na Nona yalayala.

Ni oti na noqu kaulotu, au a sureti meu laki veituberi ka veivuke ena dua na koniferedi ni itabagone. Niu raici Vitaly ena koniferedi, sa guta sara na yaloqu meu kilai koya. E guiguilecavi dredre na tolu na siga keirau mai veimaliwai vata tiko kina ena koniferedi o ya.

E vakauqeti sara vakaukauwa na yaloqu ni sai Vitaly na tagane meu na vakamautaka. E dina ni sega ni tamata taucoko ena totolo vakaoqo na yalodra ena imatai ni veigadivi vakaoqo. Ia meda na kila vakacava ni sa dodonu tiko na sala eda muria tiko? Au a vulica ena noqu kaulotu meu kila na domo ni Yalotabu ka muria na Nona veidusimaki ka sega tale ni vakatitiqataka. Niu sa mai vakila na yalo ni veivakauqeti oqo meu kilai Vitaly kina, au sa muria sara.

Au kila ni Yalotabu ena dusimaki keda taucoko kevaka meda na vakasaqara na Nona veitokani. Sa ka bibi meda kakua ni vakatauvatana na noda salatu kei ira tale eso—ena sega ni dusimaki keda kece vakaoqo na Yalotabu—ia kevaka eda sa muria tiko na domo ni Yalotabu, eda na yalonuidei ni da sa muria tiko na salatu e dodonu vei keda.

Vorati ni Dredre

Vitaly: Ena tolu na siga o ya, au a kila niu sa kunea e dua e totoka sara. Au a rarawa ni sa mai tini na koniferedi ka keirau sa veitalatala kei Katya. Kalougata, ni a dua tale na koniferedi ni itabagone qase cake e na vula a tarava. Au sa namaka sara meu na tiko kina.

Me vaka au sa namaka tiko a totoka sara na koniferedi o ya. A laki levu sara na gauna me keirau veivosaki ka veikilai kina. Ni oti na koniferedi, sa veisolitaki sara na neirau dui naba ni talevoni ka keirau dui lesu ki na neirau dui itikotiko.

Ni oti toka e vica na macawa, keirau sa veiqiriti sara ka soli itukutuku ena tex. (Au vakabauta ni vica toka ga na macawa au sa rawa ni tex vakatotolo ena noqu talevoni veikauyaki ka berabera eso era na taipa ena nodra kompiuta veikauyaki!)

E vakaitikotiko o Katya mai Yekaterinburg, o ya e 11 na auwa ni da vodo sitima ni vanua mai na noqu itikotiko e Omsk, Siberia. Se cava ga, sa maqusa tikoga na yaloi keirau mei keirau na sota tale. Keirau sa tekivu veigadivi ena mua ni macawa. E na imatai ni macawa au dau laki sikovi koya, ia ni oti e vica na macawa ena sikovi au mai o Katya. Niu dau laki raici Katya, au dau laki tiko vei ira eso na noqu itokani ena nona taoni, ia ni dau mai raici au o koya, e dau mai tiko talega vei ira eso na nona itokani ena noqu taoni. Keirau dau qai laki lotu vata kei ira na itokani oqo ena neirau veigadivi tiko vakaoqo.

Katya: Ena rairai balavu toka na tinikadua na auwa, ia e Rusia, e vaka ga e dua na taubale lekaleka! Ena vuku ga ni yawa ni vanua, keirau mani sega kina ni dau veisotari wasoma. E oti toka e vica na macawa keirau sa qai veiraici tale ka rua se tolu na siga na neirau laki gade vata tiko ka mua lesu tale na ilakolako. Keirau sa kila tiko ni sa dodonu me levu cake na neirau gauna vata, ka sa vaka me dredre mai na veitalatala. Ia baleta ga ni dredre toka na veiraici vakaoqo, sa koula sara vei keirau na veiminiti yadua. Ni kadre cake tiko mai na neirau veimaliwai, keirau sa kakavaka sara e dua na gauna me keirau sa na sega tale ni veitalatala se vakamoce.

Na neirau veigadivi tiko oqo, sa rui ka talei ka rabailevu: keirau vodo basikeli kei na ose, sikova na vale ni iyaya makawa, wili ivolanikalou, vakasaqa, gade ena ruku ni veikau (ka keirau a danisi talega kina), ka sikova e dua na vale ni gone luveniyali ka veimaliwai kei ira na gone.

Ni gauna keirau dau sota kina, keirau cakava e dua na ka vou, ka keirau marau kina vakalevu. Au taleitaka dina na ivakarau ni nona tuvanaka o Vitaly na neirau gade. Na itaviqaravi e tuvanaka o koya a vukea me keirau veikilai vakavinaka kina.

Vitaly: E na vuku ga niu se gonevuli tiko, au sega ni rawa meu vakayagataki ilavo ena so tale na ka ni marau. Sa tiko ga na ilavo meu laki raici Katya kina ka sauma na bili ni noqu talevoni. Ia ni sa vidavidai tu na ilavo e sega ni kena ibalebale o ya me sa laki ka wale tu ga se sega ni yaga na neirau veigadivi. Ia eso na neirau gade e sega sara ga ni dua na ilavo a vakayagataki kina.

E rairai rogo sabalia toka, ia au gadreva meu kila na yaloi Katya ni tiko vata kei ira na gone, ka keirau mani lako sara ki na nodra vale na gone luveniyali. E vakatu oqo ena vuqa na neirau gade; ni keirau saga me keirau veikilai vakavinaka sara vakai keirau.

Bulataka na iVakarau ni Turaga

Vitaly: E Rusia, me vaka ga ena veivanua tale eso, sa kena ivakarau tu me ra sa laki tiko vata na veiwatini ni se bera na vakamau. Ni oti na noqu vakatutu vei Katya, eso na noqu itokani a taroga na vuna au sa via vakamautaki koya kina ni se bera mada ni veikilai na yagoi keirau. Era kaya, ka vuqa talega era kaya vei Katya, ni sala dodonu walega me kilai vinaka kina o Katya ni sa dodonu me noqu, o ya me keirau na vale vata mada vakalailai.

Au a qai tukuna vei ira ni sega ni gadrevi me da vale vata kei na dua tale meda na kilai koya kina vinaka. Au a vakamacalataka talega vei ira na noqu itokani me ra kila kina niu sa masulaka oti ka sa tukuni mai meu sa na vakamautaki Katya. Niu sa mai masulaka na noqu vakatulewa, au sa sega tale ni rerevaka na bula vakamau. Au yalo maqusa ka vakila e dua na bula vou sa tu e mataqu. A sega tale ni dua me saqata se vakalewa mai na ka au sa lewa oqo. Ia, era a qai tokona mai na noqu lewa oqo.

Katya: Ni sa vakatutu vei au o Vitaly, rau sa saga o noqu itubutubu meu kakua ni vakamau. Rau nanuma ni sa rui totolo na neirau vakamau ka gadrevi meu kilai Vitaly vakavinaka cake tale. A kaya talega vei au na ka oqo o noqu boso e valenicakacaka, “E dodonu mo drau tiko vata mada ni bera ni ko vakatulewa vakaoqori.”

E rarawa na yaloqu ni vakatu oqo na nodra vakasama eso baleta na vakamau kei na matavuvale. Au sega ni vakabauta ni ra kila tu na bula marau levu e tiko ni rau laki vakamau ka vauci e valetabu e dua na veiwatini. Na veilomani kei na marau levu keirau a vakila kei Vitaly ena neirau vakamau a vakaukauwataki cake tale ena neirau sa kila ni keirau sa vauci me tawamudu.

Vitaly: Keirau a vakamau kei Katya mai Omsk ena 25 ni Feperueri, 2006. (Na lawa ni matanitu o Rusia e vinakati me vakayacori taumada na vakamau vakamatanitu qai muri na veivauci e valetabu, me vaka ga ena veimatanitu eso.) Ena mataka e tarava keirau sa biubiu ena ilakolako ki Valetabu e Stockholm mai Suwiteni. E tolu na auwa na neirau vuka mai Omsk ki Moscow, ka tiko e kea ena siga taucoko. Keirau a qai vodo sitima ni vanua ena bogi taucoko ki Saint Petersburg. Mai kea keirau a vodo basi vata yani me walu na auwa kei ira eso na Yalododonu Edaidai ki Helsinki, e Finiladi. Ka laki vakacavari na ilakolako oqo ena dua na vodo waqa e 11 na auwa ki Stockholm.

Sa mai cava na ilakolako, ni keimami sa yaco ki na valetabu.

Vei ira eso, sa vaka me dua na bolebole, na ilakolako balavu oqo, ia ena vuqa na sala, na neirau ilakolako takoso oqo e Iurope sa dua dina na vakacagicagi ni vakamau (honeymoon) totoka sara.

Sa dua dina na siga cecere, na siga keirau a vauci kina, ena 1 Maji, 2006—e siga ni vakacegu kei na veivakadeitaki. Au kila ni yalewa au sa taura tu oqo na ligana au na bula vata kei koya me tawamudu. Na vakasama duadua mada ga oqo a vakasinaita na yaloqu ena marau kei na vakavinavinaka vua na Tamada Vakalomalagi ni sa nuitaki au tiko ena vuku ni Luvena yalewa sa mai watiqu. Au sa volekati Koya vakalevu cake sara kina mai na veigauna sa oti yani.

Vakasaqarai ni iTovo sa Vakarisito

Katya: Sa dua oqo na luvei keirau yalewa. E goneyalewa totoka. Au vinakata me na laki vakamau ena valetabu ena dua na siga, ka keirau sa na nona itokani dauloloma ka itubutubu vinaka sara vua.

Au nuitaka ni na kunea talega o koya e dua na lewe ni matabete bula kilikili sa tu vua na itovo sa Vakarisito. E a vukei au na noqu raica na itovo vakaoqori vei Vitaly ka vukei au meu kila ni sa rawa meu vakamautaki koya.

Na cava au a domoni Vitaly kina? E dina sara, e rairai vinaka ka maqosa, ka kila vinaka na vakamarautaka na yalewa. Ia oqo era sega ni ka bibi. E tiko vua na ka au vakatoka me “irairai ni dua na tisaipeli i Karisito.” Au vakila na rarama e tiko vua. O koya e dua na lewe ni matabete bula dodonu.

Vitaly: Io, e dina, sa dua na ka totoka meda vakamautaka e dua ka dreti keda na kena irairai. Ia ena gauna eda vakatabakiduataka kina na irairai vakayago, eda na calata vakaidina na ituvaki era bibi sara—o ya na itovo, bula vakayalo, kei na ivakarau tale eso era ka yaga sara ki na dua na vakamau me na laki gugumatua.

Au raica ni rawa ni dua na bolebole vei ira eso na itabagone qase cake me ra kunea e dua na watidra ena loma ni Lotu baleta walega ni sega so ni levu na Yalododonu Edaidai era vakaitikotiko vata. E lako na yaloqu vei ira. Ia, au kila se cava ga na ituvaki eda na sotava, kevaka eda na vakayacora na noda itavi ka vakarautaki keda meda laki vauci ena valetabu, sa rawa vua na Tamada Vakalomalagi me veivakarautaki.