iTabagone
Noqu Vakatovotovo ni Vakabauta
Au a tekivu wilika na iVola iMomani ena veisiga niu yabaki 13, kau sa vakalougatataki kina.
Na neitou kalasi ni Wilivola ni Sigatabu ni yabaki 13 a sega soti ni dau kilai me dau vakarokoroko. Ia, e dua tiko na neitou qasenivuli totoka sara ka dau tovolea ena veigauna me veivakavulici ena Yalatabu. Dua na lesoni qori e baleta na kena wiliki na ivolanikalou.
Ni sa mai cava na lesoni sa qai bolei keitou o koya. E bolei keitou kece sara, ia e qai rai sara ga mai vakadodonu vei au ka qai kaya, “Au bolei kemudou mo dou wilika na iVola i Momani ena veisiga.” Au sa qai vakananuma, “Au na vakaraitaka vei iko. Au na cakava!”
Au tekivu ena 1 Nifai wase 1 ena bogi sara ga o ya ka tomana yani noqu wiliwili ena veisiga. Au a sega beka ni tekivu ena kena ivakarau e vinakati, ia niu sa tosoya noqu wiliwili au sa vakila na vinaka ni kena wiliki na iVola i Momani. Noqu wilika ena veibogi sa qai vaka meu taleitaka cake sara.
Vica na vula e muri niu yaco ena Alama 32 au sa taleitaka sara na vakasama ni vakatovotovtaki ni vakabauta. Mai koronivuli keimami se qai vakayacora ga e dua na vakatovotovo ni sainesi, au sa qai tekiduru ka kereya vua na Tamada Vakalomalagi meu sa na tekivutaka mada noqu vakatovotovo. Au kereya meu sa na cakava meu kila ga vakai au na dina ni iVola i Momani.
Au sa qai dau vakasamataka ni sa dau sauma tu ga mai na Tamada Vakalomalagi noqu masu. Ni wiliki na iVola i Momani ena veisiga e vakalevutaka noqu kaukauwa meu valuta kina na ca. Au vakila niu voleka sara vua na Tamada Vakalomalagi. Au vakila ni vakaukauwataki au na Yalo Tabu meu valuta kina na dredre. Na ka e tukuna o Alama baleta na vakatovotovotaki ni vosa ni Kalou e dina: “Sa ivunau vinaka ka dina; raica sa vakamarautaka na yaloqu, kau sa taleitaka sara” (Alama 32:28).