Taledi nei Taylor

Heather Hall, Utah, Amerika

E rawa mo tukuna vei au na cava na veitaledi nei Taylor ka rawa meu wasea kei ira na lewe ni kalasi?” a taroga vei au na noqu qasenivuli ni yabaki walu ena Lalai. E a talevoni mai baleta ni kalasi nei Taylor era na veivosakitaka na taledi era a ciqoma mai vua na Tamada Vakalomalagi.

Au sega sara ga ni nanuma rawa e dua na ka. Au vakasamataka lesu na walu na yabaki sa oti, noqu tovolea tiko meu kunea e dua na isaunitaro. Ena va na siga ni nona sucu mai o Taylor a tauvi koya na paralase ka vakacacana nona mona ka sega ni tarovi rawa na kena ituvaki. E sega ni rawa me rai, vosa, se veitaratara. E sega ni dua na toso vua e dua na gone vula ono ena itagede ni kena tubu cake na vakasama. E vakayagataka e levu nona veisiga ena idabedabe qiqi ena neimami qaravi koya ka tovolei me vakalogalogavinakataki.

Keimami marautaka nona vulica me dredre se gunu mai na dua na bilo vinaka sara, ka keimami marautaka ena nona sa rawa me tucake ka taura e vica na ikalawa. Ia ni keimami sa rekitaka ka marautaka e tautuba, kei na lomanivale keimami tagi vata kei na kena kilai ni veika lalai e rawati oqo era rawa me ra vakaibalebaletaka me vaka e rawa ni rawata e dua ga na Taylor. Ia au vakabauta ni sa sega ni ka oqo e via rogoca na qasenivuli ni Lalai.

Au vakasavasavataka noqu itilotilo kau sauma ena ririko, “O Taylor e sega dina sara ga ni tu vua e dua na taledi au rawa ni vakasamataka.”

Na marama yalololoma oqo a qai veisautaka me tawamudu neirau veimaliwai vata kei na luvequ tagane mai na nona sauma mai.

“Noqu vakasamataka tiko baleta na lesoni oqo, au kila ni o ira vakayadua na luve ni Kalou e tiko nodra dui taledi,” a kaya. “Au na vakatututaka ni taledi nei Taylor sa ikoya ni vakatavulici ira tale eso me ra veiqaravi. Kevaka e sa donu vei iko, au na gadreva meu vosa kivei ira noqu kalasi me baleta noqu kila vakacava na taledi nei Taylor ena lotu eke. Au sa raici ira na gone tale eso ena Lalai nodra vulica me ra biliga nona idabedabe qiqi, dolava vua na katuba, ka vorata nodra rere ena nodra qusia na baluna ena dua na itavoi ena gauna e gadrevi kina. Au vakasamataka ni sa ikoya e dua na taledi uasivi ka vakalougatataki kina na noda bula”

Au kudruvaka ena veidinadinati, ka keirau veivakamocetaki lo. Au lomatarotarotaka kevaka e kila na qasenivuli ni Lalai oqori na cava na kena bibi ni itautau ni vosa oqori me tara kina noqu bula. O Taylor e duadua tu ga. E se gadreva vakalevu tikoga na veiqaravi. Na valenibula, vuniwai, kei ira na vuniwai ni qavokavoka era se vakayagataka tikoga e levu na tiki ni noqu bula. Ia na noqu rai e sa veisau, kau sa tekivu meu kidava nona taledi.

Au raici ira na tamata era vakavolivoliti keda tu me ra veisautaka rawa vakacava nodra ivakarau ena nodra vakasaqara me ra qaravi koya. Au kidava talega nona vakalesuya tale mai vei keda meda toso vakamalua, kidava na veika e gadreva, ka yaco mo yalololoma vakalevu cake, dau vakadidike, ka vosota.

Au sega ni kila na inaki ni Kalou me tu ena matai Taylor eso na bolebole dredre sara; ia au vakabauta ni nona qasenivuli ni Lalai e solia vei au e dua na kena irairai lailai wale sara. E tiko qo o koya me wasea nona taledi vata kei keda. E tiko oqo o koya me solia vei keda na gauna donu noda vulica meda veiqaravi vakacava.

“Au sa raici ira eso tale na gone ena nodra vulica me ra biliga na idabedabe qiqi nei Taylor, dolava vei koya na katuba, ka vorata rawa nodra rere,” e kaya vei au na qasenivuli ni Lalai nei luvequ tagane.