‘Oku Tali ‘e ‘Eletā Pālati e Ngaahi Fehu‘i ‘Oku Lahi Hono Faí

Kuo ʻosi fakahū ki he LDS.org he ʻInitanetí ha ngaahi konga vitiō ʻoku hā ai ʻa e tali ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi fehuʻi ʻoku lahi hono fai ʻe he kau faiongoongo ʻa e mītiá.

ʻOku fakamatala ʻa ʻEletā Pālati ki ha ngaahi tefito hangē ko ʻení, pe ko ha kakai Kalisitiane koā e Kāingalotu ʻo e Siasí pea ʻoku poupouʻi nai ʻe he Siasí ʻa e kau kanititeiti fakapolitikalé pe ʻikai.

ʻOku maʻu e ngaahi konga vitioó ʻi he lea faka-Pilitāniá pē, pea naʻe faʻu iá ke toe fakamatalaʻi lelei ange ai e Siasí ke mahino ki he kakaí—kae fakatautefito ki he kau faiongoongó—koeʻuhí ko e fakaʻau ke lahi ange hono fakatokangaʻi ʻo e Siasí ʻi he ʻIunaiteti Siteití. Kuo hā mei he ngaahi fakakaukau kuo tuku maí ko e konga lahi ʻo e kakaí ʻoku siʻi ʻaupito ʻenau ʻilo ki he Siasí pe ko e ʻikai ʻaupito pē haʻanau ʻilo ki ai.

Ko e tali ʻeni ʻa ʻEletā Pālati ki he taha ʻo e ngaahi fehuʻi ʻoku lahi taha hono faí—Ko ha kau Kalisitiane koā e kakai Māmongá?: “ʻOku fakatefito e meʻa kotoa pē ʻoku mau faí, mo ia kotoa pē ʻoku mau fakaʻamu ke mau aʻusiá, ʻia [Sīsū Kalaisi]. ʻOku makatuʻunga ʻemau ngaahi fakaʻamú mo ʻemau ngaahi fakaʻānaua ki he kahaʻú ʻi heʻemau tui kia Sīsū Kalaisí mo ʻemau loto fiemālie ke ʻiloʻi pe ko e hā ʻEne ngaahi akonakí pea mau feinga ke tauhi ʻEne ngaahi fekaú.”

Naʻe fakahoko e ngaahi fakaʻekeʻeké ʻe he kau ngāue ʻa e potungāue Fetuʻutaki mo e Kakaí ʻa e Siasí taʻe hiki ki muʻa ha ngaahi fakamatala ke faiʻaki ʻeni pea naʻe fakamafola ia ʻi ha konifelenisi ongoongo ʻi he ʻinitanetí mo e kau faiongoongo ʻa ha ngaahi kautaha nusipepa lahi ʻi he fonuá ʻoku nau ʻomi e ngaahi ongoongo kau ki he ngaahi meʻa fakalotú.

Naʻe pehē ʻe kinautolu naʻa nau lea ʻo fakafofongaʻi e Siasí ko hono fakamafola ko ʻeni ʻo ha fakaʻekeʻeke mo ha taki fuoloa ʻi he Siasí, ko ha taha pē ia ʻo e ngaahi sitepu ʻoku fakahoko ke fakamahinoʻiʻaki ʻa e ngaahi meʻa ʻoku tui ki ai e Siasí mo ʻene ngaahi founga ngāué. ʻOku ʻi ai e ʻamanaki ʻe toe ʻi ai mo ha ngaahi fakaʻekeʻeke ʻe fai fekauʻaki mo ha ngaahi tefito kehe pea ʻe kau mai ki ai ha niʻihi kehe ʻo e Kau ʻAposetoló. ʻOku lolotonga hoko ʻa ʻEletā Pālati ko e sea ʻo e Kōmiti Fetuʻuaki mo e Kakaí ʻa e Siasí.

Naʻe tali ʻe ʻEletā Pālati e ngaahi fehuʻi ko ʻení: Ko ha Kalisitiane kimoutolu? Ko e hā e kaunga ʻa Sīsū Kalaisi ʻi hoʻomou tuí? ʻOku mou hū kia Sīsū Kalaisi ʻi hoʻomou ngaahi houalotu he Sāpaté? Ko e hā ʻoku pehē ai ʻe ha niʻihi ko e kautaha lotu pē kimoutolú? Ko e hā e ngaahi founga ʻoku mou faitatau ai mo e kau Kalisitiane kehé? Ko e hā e ngaahi founga ʻoku mou kehekehe ai mo e kau Kalisitiane kehé? Ko ha palōfita ʻa Siosefa Sāmita? ʻOku fie maʻu ha kau palōfita he ʻahó ni? ʻOku ʻi ai ha fakamoʻoni fakasaenisi ki hono moʻoni ʻo e Tohi ʻa Molomoná? ʻOku poupouʻi nai ʻe he Siasí ʻa e kau fakafofonga fakapolitikalé?

Ke hū ʻo mamata ʻi he ngaahi konga vitioó, ʻalu ki he LDS.org pea lomiʻi ʻi he Newsroom he tuliki fakatoʻomataʻu ki laló, ʻosi ko iá pea taipeʻi ʻa e “Elder Ballard Interview” ʻi he puha Search.