Haʻu ʻo Fanongo ki he Leʻo ʻo e Palōfitá
Fai Ho Fatongiá
ʻI he taʻu ʻe nimangofulu mā taha kuo hilí, ne u fanongo ai ki hano toe fai ʻe Uiliami J. Kulisilou ko e Siʻi, ko e palesiteni ʻo e Siteiki ʻOkiteni Sauté he taimi ko iá, ʻa ia ko ha talanoa kau ki he falalá, fakaʻapaʻapá mo e fatongiá.
“Ne tuʻu e [talavou] ko Lūpetí he veʻe halá ʻo sio ki he lue fakavave holo ha fuʻu kakai tokolahi. Ne fāifai peá ne fakatokangaʻi hano kaungāmeʻa. Naʻá ne fehuʻi ange, ‘Ko ʻenau fakavavevavé ki fē?’
“Ne kiʻi longo taimi siʻi pē hono kaumeʻá… . ʻKuo mole ʻa e foʻi ʻemalata ʻa e tuʻí! …ʻOku fekumi ki ai e kakai kotoa pē, he kuo fakahā ʻe he Tuʻí ʻe ʻi ai ha pale … ʻo e tokotaha te ne maʻu iá. Haʻu, ta fakavavevave.’
“Ne kiʻi momou ʻa Lūpeti mo pehē ange, ‘Ka he ʻikai te u lava ʻo ʻalu kae ʻoua kuó u poaki ki heʻeku kuifefiné.’
“Naʻe tali ange ʻe hono kaumeʻá, ‘Ta he ʻikai ke u tali au. ʻOku ou fie kumi ki he foʻi ʻemalatá.’
“Ne fakavave atu ʻa Lūpeti ki he kiʻi fale he veʻe vao ʻakaú ke poaki ki heʻene kuí… .
“Ka naʻe kalokalo ʻene kuí. Naʻá ne fehuʻi ange, ‘Ko e hā e meʻa ʻe hoko ki he fanga sipí? Kuo nau hohaʻa ʻi honau lotoʻaá ke fai mo ʻave kinautolu ki he feituʻu mohukú pea kātaki ʻo ʻoua naʻa ngalo ke ʻave kinautolu ki he vaí ʻi he tuʻu tonu ʻa e laʻaá.’
“Naʻe lue loto-mamahi atu ʻa Lūpeti ʻo ʻave e fanga sipí ki he feituʻu mohukú, pea ʻi heʻene hoʻataá naʻá ne fakafoki kinautolu ki he kiʻi vai ʻi he vao ʻakaú. Naʻá ne tangutu ʻi ha fuʻu maka he veʻe vaí. Naʻá ne fakakaukau, ‘Pehēange mai ne u maʻu ha faingamālie ke kumi e foʻi ʻemalata ʻa e Tuʻí!’ Naʻá ne tafoki ʻo sio ki he ʻoneʻone naʻe toka ʻi he kiʻi vaí, fakafokifā naʻá ne sio fakamamaʻu ki he vaí. Ko e hā ē? ʻOku ʻikai ko ia ia! Naʻá ne puna ki he loto vaí … peá ne kaikaila, ‘Ko e foʻi ʻemalata ʻa e Tuʻí!’
“Ne lele fiefia ʻa Lūpeti ki he fale ʻo ʻene kuifefiné ke fakamatala ki ai e meʻa kuó ne ʻiló. Naʻe pehē ange ʻe heʻene kuí, ‘Tamasiʻi, ʻokú ke monūʻia, ka ne ʻikai te ke mei maʻu ia ʻo kapau naʻe ʻikai te ke fakahoko ho fatongiá, ʻo fakaseʻeseʻe e fanga sipí.’ Pea naʻe ʻiloʻi ʻe Lūpeti ʻoku moʻoni ia.”1
ʻOku hā e lēsoni ke ako mei he talanoa ko ʻení ʻi he veesi ʻiloa ko ia ʻoku pehē: “Fai [ho] fatongiá; ko e lelei tahá ia; Tuku leva ki he ʻEikí ʻa e toengá!”2
Tau ako hotau ngaahi fatongiá. Tau moʻui taau ke fakahoko ʻa e ngaahi fatongia ko iá pea ʻi heʻetau fai iá, ʻoku tau molomolomuivaʻe ai ʻi he ʻEikí. ʻI he taimi ne ui ai Ia ki Hono fatongiá, naʻá Ne tali, “ʻE Tamai, ke fai pē ʻa ho fingangaló, pea ke ʻoʻou ʻa e lāngilangí ʻo taʻengata” (Mōsese 4:2). Fakatauange te tau fai ʻa e meʻa tatau.
Mei ha lea ʻi he konifelenisi lahi ʻo ʻOkatopa 2006.