Ko ha Fili ʻi ha Kihiʻi Momeniti Pē
Fakatatau mo ʻeku manatú, naʻe ʻi ai haʻaku foʻi pulu ʻakapulu peá u fakaʻānaua ke u hoko ko ha taha ʻakapulu fakapalofesinale. Naʻe poupouʻi au ʻe heʻeku ongomātuʻá ʻi heʻeku tulia ʻeku fakaʻānauá. Naʻá na toe fakalotolahiʻi foki au ke u ʻalu ki he lotú. Ka ʻi heʻeku lahi haké, naʻá ku toki ʻalu pē ki he lotú ʻi he ʻikai ke u tau-ʻakapulú. Naʻá ku ʻilo pē ʻe tokoniʻi lahi au ʻe he ongoongoleleí, ngaahi ʻekitivitī ʻo e Siasí pea mo hoku ngaahi kaungāmeʻá, ka ko e meʻa naʻá ku feinga lahi taha ki aí, ke fakahoko ʻeku fakaʻamu ke u vaʻinga ʻakapulú.
Ko e taimi naʻá ku kamata ai ke fakamālohisinó, naʻe kamata ke ʻi ai haʻaku ngaahi kaungāmeʻa mahuʻinga ʻi he ngaahi kalapu ʻakapulu leleí. Naʻe maʻu haʻaku ngaahi faingamālie ke u vaʻinga pea aʻu ʻo u fakamālohisino fakataha mo ha niʻihi ʻo e ngaahi kalapu ko ʻení. Naʻá ku fefolauʻaki ʻi ha ngaahi fonua kehekehe ke kau ʻi ha ngaahi feʻauhi pea naʻá ku mātuʻaki vēkeveke mo fiefia ʻi he malava ke u moʻui ʻi he tōʻonga moʻui ʻa ha taha vaʻinga ʻakapulu fakapalofesinale. ʻI ha taha ʻo e ngaahi folau ko ʻeni ki ʻĒsiá, naʻe ʻamanaki ke hoko moʻoni ai ʻeku fakaʻānauá. Naʻe saiʻia ha kalapu lahi ʻi heʻeku founga vaʻingá pea nau loto ke u kau ange ki heʻenau timí. Ka naʻe fakatokangaʻi ʻe hoku fakafofongá ha ngaahi palopalema ʻi he aleá pea naʻe ʻikai aofangatuku ai ʻemau aleapaú.
Naʻe lolotonga fakafonu ʻe hoku ngaahi kaungāmeʻá ʻenau pepa ngāue fakafaifekaú heni; ʻi ai mo ha niʻihi naʻe foki mai mei heʻenau ngāue fakafaifekaú ʻo fakamatala fiefia ʻa e tūkunga ʻo ʻete hoko ko e faifekaú. Naʻa nau fakatēloʻimata ʻi he taimi kotoa pē naʻa nau lea aí pea naʻe ongo moʻoni ʻa e Laumālié. Naʻá ku maʻu foki ʻe au mo ha holi ke ngāue fakafaifekau; naʻá ku loto ke u aʻusia ʻa e ngaahi meʻa tatau ko ʻení. Ka naʻá ku manavasiʻi, kapau te u fili ke u ʻalu ʻo ngāue fakafaifekau, he ʻikai hoko ʻeku fakaʻamu ke u ʻakapulú koeʻuhí he ʻe mole ʻiate au hoku mālohí mo ʻeku vave fakaesinó. Naʻe lahi fau ʻeku fie hoko ko ha taha ʻakapulu fakapalofesinalé; naʻá ku toloi leva ʻeku ako he ʻunivēsití ka u ngāue pē mo moʻui ke fakahoko ʻeku fakaʻamu ko ʻení.
ʻOku ou ʻalu maʻu pē ʻi heʻeku ngaahi folau ki he ʻakapulú mo ha Tohi ʻa Molomona. Naʻá ku saiʻia ʻi he ngaahi lea ʻa e kau palōfitá, ʻi heʻenau tōʻonga moʻuí, ʻenau loto ʻaki e talangofua ki he ngaahi fekaú pea mo ʻenau tā-sīpinga lelei ki honau kakaí. Naʻá ku ongoʻi mā ʻi he ʻikai ke u hoko ko ha sīpinga lelei ki he kau vaʻinga kehé mo e ʻikai fakamuʻomuʻa ʻa e ngaahi meʻa ʻa e ʻOtuá. Naʻá ku feinga he taimi ʻe niʻihi ke fakamatalaʻi ʻa e anga ʻo ʻeku tui fakalotú, ka ko e meʻa ʻeni naʻá ku ongona maʻu peé, “ʻAi ke tau fiefia heʻetau folaú. Tuku e launoa ia ko ʻená. Tau ō ʻo fiefia!” Naʻe kamata ke fakatupuʻita kiate au ʻa e laú, taʻe faitotonú pea mo e ngaahi tapa kehekehe ʻo e moʻui fakaʻakapulú. Naʻe ʻi ai ha taimi lahi naʻá ku ongoʻi taʻelata ai mo mamahi pea naʻá ku ʻiloʻi naʻe ʻi ai ha feituʻu naʻá ku ongoʻi maʻu pē ai ʻa e fiefiá pea naʻe ʻi ai haku ngaahi kaungāmeʻa naʻe tokanga mai kiate au—ko ha ngaahi kaungāmeʻa naʻe fakataha ʻi he ngaahi ʻekitivitií mo e ngaahi hulohulá, ʻi he ngaahi kalasi seminelí mo e ʻinisititiutí—ko ha ngaahi kaungāmeʻa fakalangi. Naʻá ku fakaʻamua moʻoni ʻa e ngaahi meʻa ko ʻení.
ʻI ha Sāpate ʻe taha naʻe ʻikai ke u folau ai, naʻá ku ʻalu ai ki he lotú ʻi hoku uōtí ʻi Palāsila. ʻI he ʻosi ʻa e houalotú, ne ui au ʻe he pīsopé ki hono ʻōfisí ke ma talanoa. Naʻá ku ʻilo te ma talanoa fekauʻaki mo e ngāue fakafaifekaú he kuo ʻosi foki mai ʻa e taha kotoa pē ʻi hoku toʻú mei he ngāue fakafaifekaú. Naʻe fakatukupaaʻi ai au ʻe he pīsopé ke u ngāue fakafaifekau pea naʻá ku feinga ke fulihi ʻema talanoá, ʻo talaange ʻoku teʻeki ai ke u mateuteu. Naʻá ku feinga ke motuhi atu ʻa e pīsopé ʻi ha faʻahinga founga pē, ka naʻe vilitaki pē ia mo ne fakalotoʻi au ʻi hono mahuʻinga ʻo e ngāue fakafaifekaú. Naʻe fakaʻosi ʻaki ʻema talanoá ha taumuʻa ke u teuteu.
Hili mei ai ha ngaahi māhina, kuo fakahū atu ʻeku ʻū pepá pea kei hokohoko pē mo ʻeku fakamālohisinó. ʻI he taimi ko ʻení, ne u lava pē ʻo fakafekauʻaki lelei ʻa e ʻakapulú mo e Siasí ʻi heʻeku fakakaukaú. Ka naʻe ʻikai haʻaku lavelaveʻiloa he ʻikai fuoloa fēfē ʻeni. Kuo pau pē ke u fili.
ʻI he aʻu mai hoku uiuiʻí, ne fakatahataha hoku fāmilí ʻi ʻapi. Naʻa mau mātuʻaki fiefia kotoa. Fakafokifā pē kuo tatangi ʻa e telefoní.
Naʻe lea mai he telefoní hoku fakafofonga ʻakapulú ʻo ne talamai kuó ne maʻu haʻaku aleapau vaʻinga lelei ʻi ha kalapu ʻi ʻIulope. Naʻe ʻāvea heni ʻeku fakakaukaú! Naʻá ku sioloto ki he malaʻe vaʻingá ʻoku fonu ai e kau mamata ʻakapulú. Naʻá ku fakakaukau ki he fale fakaʻofoʻofa mo e kā pea mo e vāhenga te u lava ke maʻú. Ko e ʻamanaki ʻeni ke fakahoko ʻeku fakaʻānauá. ʻOku toe siʻi pē ke ʻi hoku ʻaofinimá—peá u toe sio ki he sila naʻe ʻi loto hoku uiuiʻí he veʻe telefoní.
Naʻe kamata leva ke u fakatēloʻimata. ʻI he vahaʻa taimi ko ʻení naʻe hangē ʻeku moʻuí ha heleʻuhilá kiate au. Ne ʻeke mai ʻe hoku fakafofongá he telefoní pe ko e hā haʻaku fakakaukau ki he ongoongo ko ʻení. Naʻá ku fakalongolongo pē. Naʻe ʻikai ke u toe lava ʻo lea pea naʻe tete mo hoku ongo vaʻé. Naʻe ʻikai ke u loto au ke moʻoni ʻa e meʻa ʻoku hoko he momeniti ko ʻení, ka naʻe hoko! Naʻe pau ke u fili, ko e fili faingataʻa taha ʻeni ʻi ha toe fili ʻi heʻeku moʻuí.
Naʻe tetetete hoku leʻó, ka naʻe fāifai peá u talaange ki ai kuo ʻosi maʻu haʻaku aleapau lelei ange ʻaʻaku. Te u hoko ko ha faifekau ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha taʻu ʻe ua. Naʻá ku fakamālō ange leva ki hoku fakafofongá ʻi he faingamālié pea mo ʻene ngāue mo feinga maʻakú. Hili ia peá u tāpuni atu leva ʻa e telefoní ka u foki ki hoku lokí, ʻo tangi ai ʻi ha taimi lōloa. Naʻá ku ʻilo he ʻikai tatali ʻa e faingamālié ia ʻi ha taʻu ʻe ua pea he ʻikai toe fakahoko ʻeku fakaʻānaua ki he ʻakapulú.
Naʻá ku tūʻulutui leva ʻo lotu ki he Tamai Hēvaní, ʻo kole ha fakanonga. Naʻá ku ongoʻi hano tali mai ʻe ha kihiʻi leʻo siʻi mo lōngonoa, ʻo ne fakanonga hoku lotó mo pehē mai, “ʻE hoku foha, kuó ke ʻosi kau koe ki he taha ʻo e timi lelei taha ʻi he māmaní.” Naʻá ku fakakaukau ki he lea ko ʻení pea ʻoku ou kei fakakaukau pē ki ai he ʻahó ni.
Ko e ʻaho ní, kuó u foki mai mei heʻeku ngāue ʻi he Misiona Palāsila Fotalesá pea ʻoku ʻikai haʻaku teitei fakaʻiseʻisa ʻi heʻeku filí. ʻOku ʻatā ʻa e Siasi moʻoni ʻo Sīsū Kalaisí ki ha taha pē ʻoku fie fiefia. Pea naʻá ku ʻilo ʻi heʻeku ngāue fakafaifekaú ko e founga lelei taha ke te fiefia aí ko ʻete fakahoko ʻa e meʻa ʻoku fie maʻu ʻe he Tamai Hēvaní ke tau faí. Ne hoko ʻeku ngāue fakafaifekaú ko e fili lelei taha ia kuó u fai ʻi heʻeku moʻuí. Naʻá ne akoʻi au ko kinautolu kotoa pē ʻoku nau fuofua kumi ki he puleʻanga ʻo e ʻOtuá, te nau maʻu ha tuʻunga ʻi he timi ʻa e ʻEikí (vakai, Mātiu 6:33).