Saunoaga Faalauiloa ua Silasila i le Lumanai o Talafaasolopito o Aiga i Luga o le Initoneti
O suesuega faatatau i le lumanai o talafaasolopito o aiga atonu ua lalata tele mai nai lo le mea o loo e mafaufauina,” o le saunoaga lea a Rich Running i sana lauga sa faia i le aso 9 o Ianuari, 2007, o se vaega o aoaoga faaletausaga a le Salt Lake Institute of Genealogy (Inisitituti o Gafa i Sate Leki) na lagolagoina e le Utah Genealogical Association (Faalapotopotoga tau Gafa i Iuta).
E lata i le 200 tagata na auai i lea saunoaga faalauiloa “Tatalaina o le Granite Mountain Vault,“ lea na auai atu iai taitai o le pulega a le Ekalesia mo le gaosiga ma le Matagaluega o Talafaasolopito o Aiga o le Ekalesia, ma sa latou faamalamalamaina ai le agai i luma o auala faa-faatekinolosi i ni vaega se lua mo sailiiliga o gafa—pueina o ata o faamatalaga ma lona faatulagaina i faila.
I le avea ai o se isi o le pulega o le gaosiga i le matagaluega, na faamatalaina e Uso Running o nei suiga o ni laasaga mo le fausiaina o “auala televave faafuainumera” mo i latou o loo suesueina gafa.
Pueina o Ata o Faamatalaga i le FamilySearch
O auala televavave faaonaponei ua faaaogaina e felauai ai faamatalaga o loo ua fausiaina nei e ala atu i le Pueina o Ata o Faamatalaga i le FamilySearch, ua fua faatatauina e tusa ma le lima piliona faamaumauga faasolopito o lo o i le Anapapa e Teu ai Faamaumauga a le Ekalesia [Granite Mountain Records] ua faaliliuina nei mai lipine mataninii i ata faakomepiuta ma o le a mafai ona avanoa i luga o le Initoneti, o le saunoaga lea a Uso Running.
O le Anapapa e Teu ai Faamaumauga, o loo i Wasatch Mountains, o loo iai se faaputuga o faamaumauga o talafaasolopito o aiga pito i sili ona tele i le lalolagi. O loo faaaogaina nei e le aufaigaluega ni polokalama maoae faakomepiuta e faaliliu ai lola o lipine mataninii o loo teuina i lea nofoaga i ni ata faa-komepiuta sili ona lelei.
“O lenei faiga o le pueina o ata faa-komepiuta na amataina i lenei nofoaga malupuipuia i le lima tausaga ua tuanai,” sa faamatalaina ai e Derek Dobson, o le pule e nafa ma lenei matafaioi i le FamilySearch. “I totonu o se vaitaimi puupuu o le atiina ae o le malamalama faa-tekinolosi na mafai ai ona faatinoina nei galuega e tusa pe faa-faina lona televave ma le maualuga o lona lelei faatusatusa i le lima tausaga ua mavae… . O le taimi nei, ua mafai ona faaliliuina ni faamatalaga o loo i totonu o se lola o lipine mataninii se tasi i ni ata faafuainumera faakomepiuta se 1,200, i le pe tusa ma le 20 minute.”
Na saunoa Uso Running e faapea o le faa-komepiutaina o nei faamatalaga o le a matua faafaigofieina ai galuega tau gafa. Ma o le a mafai ona mauaina nei faamaumauga i luga o le komepiuta i totonu o lou lava fale nai lo le malaga atu i se nofoaga o nofoaga e 4,500 o le Ekalesia mo le faaaogaina o lipine mataninii.
O le FamilySearch, le tautua i mataupu tau gafa a le Ekalesia i luga o le Initoneti, e iai lona faamoemoega autu o le aoina lea ma le teumaluina o faamatalaga ma faamaumauga taua tau gafa ma faalauteleina avanoa e maua ai e tagata nei faamaumauga.
“O le FamilySearch Scanning o se vaega taua tele lea i le faatinoina o lea faamoemoe,” o le saunoaga lea a Paul Nauta, o le pule o mataupu tau i le va i fafo mo le Matagaluega o Talafaasolopito o Aiga ma le Ekalesia.
O Le FamilySearch Indexing [Faasino Upu o le FamilySearch]
I le fesootaiga ma le FamilySearch Scanning, o le faatulagaina o nei faamatalaga ua mafai ona tuufaatasia i le fesoasoani a le afe ma afe o i latou ua ofo fua mai lo latou taimi. O i latou ia ua mafai ona latou tuueseina faamatalaga o talafaasolopito o aiga mai ata faakomepiuta o faamaumauga faasolopito ma o le a fesoasoani tele lea i le vave sailia o faamatalaga talafeagai.
E pei ona taua ai muamua o galuega faitele e saili ai gafa, o le FamilySearch Indexing o le a mafai ai e tagata taitoatasi ona ofo fua lona taimi e galue ai i luga o le komepiuta mai lona fale, tatala faamaumauga faasolopito, ma faaopoopo i ai nisi faamatalaga aoga e faaaoga ai le fomu i luga lava o le komepiuta, lea e le atoa se itula e faatumu ai.
“O lea faiga ua mafai ai e tagata ona faatinoina le tele o ni galuega i se taimi puupuu,” e pei ona saunoa ai Uso Dobson. “E toatele tagata e le mafai ona faaaluina ni itula se tele i nofoaga e saili ai gafa. Ae peitai, soo se tasi lava, ua mafai ona faaaluina na o se afa itula po o se itula foi i le sailiga o igoa i se faiga faigofie ma mafai ona malamalama i ai. E oo lava i le autalavou ua ofo fua mai lo latou taimi i le FamilySearch Indexing ma ua lagona ai lava lo latou fiafia tele.”
O le uluai FamilySearch Indexing na faasalalauina ia Setema 2005, ma i le faaiuga o Iuni 2006 ua sili atu ma le 25,000 tagata i totonu 1,200 siteki ma sosaiete faa-paaga ua maea ona resitala e fai ma volenitia o le FamilySearch Indexing.
Ua mafai nei e tagata o le Ekalesia ona faafesootai o latou taitai o uarota po o paranesi mo nisi faamatalaga faaopoopo i ni auala e mafai ai ona auai i lea auaunaga. Peitai, o le ofo fua atu o le taimi mo le FamilySearch Indexing ua le faatuaoiina mo na o tagata o le AAG [Au Paia o Aso e Gata Ai].
E manatu le uso o Nauta o le vaega pito i sili ona taua o lenei “auala televave” mo le feaveaiina o faamatalaga tau gafa o le faailoaina lea o se taunuuga manaomia.
“O nei mea uma o loo faatinoina e le Ekalesia mo galuega tau gafa o le faaavanoaina lea o faamaumauga mo tagata ina ia mafai ona saili ai o latou augatuaa ma fesootai ai i o latou tupuaga,” o lana saunoaga lea.
O faamatalaga faaopoopo e uiga i le FamilySearch Scanning ma le FamilySearch Indexing o loo maua lea i luga o le Initoneti i le www.family search.org po o le www.familysearch indexing.org.