Uo i le Uo
Agalelei
“O le agalelei e amata ia te au” (Tusipese a Tamaiti, 83).
A o avea au ma se tama aoga maualuga e 16 tausaga i Seoul, Korea, na valaaulia a’u e sau uo i le vasega, o se Au Paia o Aso e Gata Ai i se gaoioiga a le paranesi. Na ou ofo i le toatele o tagata na faafeiloaia a’u na pei o se uo ua leva. Na ou mafaufau, “Oka se manaia o lenei lotu e i ai nei ituaiga tagata agalelei!”
I lena Aso Sa na ou toe alu foi ma toe faafeiloai fiafia foi a’u. Na faafeiloai atu foi a’u i faifeautalai, ma na lei umi ae amata ona la aoaoina au i le talalelei. E lua masina mulimuli ane ae papatiso ma faamauina a’u. E lei i ai i lea taimi sou malamalamaga loloto o le talalelei, ae na ou lagona le fiafia i aoaoga faavae ua uma ona ou aoaoina. Na faapitoa lo’u fiafia i le ata o le faaolataga ma le mataupu faavae o le alualu i luma e faavavau. Na matagofie le iloa afai ou te faia mea uma lava ou te mafaia mo a’u lava, o le a faia e le Faaola ni mea o totoe. Ae o le mafanafana o tagata o le Ekalesia o le mea moni lea na taitaiina a’u i lo’u liuaina.
Talu mai lena taimi, ua ou taumafai e fiafia i tagata uma ou te feiloai i ai. Ou te manao e pasi atu le agalelei na ou maua mai tagata o lena paranesi. Ou te matua le manao e avea a’u ma pa pupuni mo soo se isi e fia auai i le Ekalesia.
Ina ua uma lo’u papatisoga na ou fesoasoani e tapena le falelotu ma le fanua i Aso Toonai uma lava. E leai se isi na fai mai ou te faia. Na ou faia aua na ou lagona o se avanoa mamalu. Ina ua faauu a’u o se tiakono, na ou aoao ai o se tasi o o’u tiutetauave o le faamamaina o le falelotu. Na faaauau ona ou faia, ma na ou fiafia pea i ai. Ae i se isi itu na sili atu le faamalieloto i le taimi e le’i faamoemoeina mai ia te a’u.
O le mea lea, tamaiti, ia faia lou tiute i taimi uma. Ae aua le fefe e fai se mea e sili atu nai lo mea ua faatonu oe e te faia. O le a e maua le olioli tele i lena ituaiga o auaunaga.
E ui ou te lei auai i le Peraimeri o se tamaitiiti, na ou iloa o se faamanuiaga le Peraimeri ina ua i ai la’u lava fanau. I se tasi taimi na masii ai lo matou aiga i se fale fou i le taulaga i Seoul. Ina ua matou nonofo ai iina, na matou iloa ai e i ai ni nofoaga o faafiafiaga leaga i le pitonuu. Na ma popole ma lo’u toalua pe o le a faapefea ona aafia ai le ma fanau. I se tasi aso na ma faalogo atu o talanoa lo ma afafine ma lona tuagane laitiiti i le nofoa pito i tua o le taavale. “A e alu i le aoga, atonu e fesili atu nisi o au uo pe aisea ua e nofo ai i se pitonuu e ese le leaga,” o le tala lea a lo ma afafine. “Ae aua le popole. O loo ta aoaoina i le Peraimeri le auala e ola ai i le talalelei a Iesu Keriso. A ta mulimuli lava i aoaoga a Iesu, o le a ta saogalemu.”
Na tali atu lo’u atalii, “Ioe, e le afaina po o fea tatou te nonofo ai pe a ta filifili le mea sao.”
Sa talanoa lava le tasi i le isi, ae e le o i maua. A o ou faalogologo, na o’u lagona le agaga faafetai tele i o la faiaoga lelei i le Peraimeri. Na ola ae lo’u afafine ma lo’u atalii e avea ma ni tagata faamaoni o le Au Paia o Aso e Gata Ai. Ia fiafia laia i le Peraimeri, ma fai mea e aoao atu e o outou faiaoga. O le a sili atu ona outou lelei ma saogalemu pe a outou faia.