Ua Fesoasoani le Ekalesia i Tagata Florida na Taia i Asiosio

I totonu o le 24 itula talu ona maliliu ai le sili atu ma le 20 tagata i le ogatotonu o Florida, i Amerika, ona o ni asiosio se tolu, ae taunuu loa le 500 o tagata o le Ekalesia e fesoasoani i le amataina o galuega laveai. Na matuai faatamaia e nei asiosio le sili atu ma le 1,500 o fale ia Fepuari 2007, e aofia ai ma fale o ni tagata e 14 o le Ekalesia.

E ui ina faaleagaina fale o tagata o le ekalesia, ae sa saogalemu uma le au paia ma faifeautalai i nofoaga na aafia. Sa fesoasoani taitai o le Perisitua i le sailiga o ni nofoaga mo aiga o le au paia ua leai ni mea e nonofo ai.

E tusa ma le 400 le au paia na ofoina atu lo latou taimi, na faapotopoto i le fale lotu i Orlando mo faatonuga i nofoaga o le a galulue ai mo le faamamaina ma le aveeseina o le otaota. I nisi vaega o le aai, e sili atu ma le 100 i latou na ofo atu e fesoasoani i le faamamaina o le nofoaga i Deland.

E le gata i le malosi o tagata, ae na saunia foi e le Ekalesia ni tapoleni, afi eletise, ili afi, totini lima, samala, fao, ma ni pusa mo galuega faamama.

Fai mai Brady Nixon, o se tasi o le au paia mai Oviedo na iai i nei galuega fesoasoani mo le faamamaina, “E matuai ogaoga ma lautele le faatafunaga. Sa matua faafetai tagata ona ua faasaoina i latou ma lo matou iai e fesoasoani ia i latou.”

Ua uma ona iai i nofoaga e tuu ai fesoasoaniga a le Ekalesia i Florida le tele o mea e manaomia mo le soifua e pei o vaiinu ma taumafa.