Aumaia Faatasi Tagata o le Aai e Ala i le Faaaliga Ata i Kanata
O Sean Flint o se uso fou o le Ekalesia ma o ia foi o se faifeautalai a le Uarota, ma na manao o ia e fetufaai atu lona malamalama o le talalelei i tagata uma o le aai o Moose Jaw, Saskatchewan, Kanata. Sa malamalama lelei le uso ia Flint i manatu ma lagona sese e faatatau i le Ekalesia o loo i totonu o Moose Jaw ma o le a faigata ai le galuega faafaifeautalai.
“Sa matou mananao e fai se auala e faatosina mai ai manatu o tagata i le Ekalesia ma faailoa atu o le tele o manatu ma lagona sese agai i le Ekalesia e le sao,” sa saunoa ai Uso Flint.
Sa talatalanoa Uso Flint ma faifeautalai o lana Uarota, ma autasi ai o le auala pito i sili ona talafeagai e fetufaai ai le talalelei e aunoa ma ni faafinauga ma oo atu ai i le lautele o le aai ma le sili atu ma le 30 o ituaiga lotu eseese o le aumaia faatasi lea o tagata uma i luga o le mea e tasi o loo malamalama ai tagata uma—o le talitonuga. E tele ni manatu sa vaavaai agai iai, ae na faaiuina i se manatu i le faia lea o se faaaliga ata e faamalosia ai lagona talitonu ma o le auala lea e tatau ona agai iai.
“Na fai mai se tasi o faifeautalai na mafaufau e faaali ni ana ata i le faaaliga ata na lagolagoina e le Ekalesia,” na saunoa ai Uso Flint. “Na faafuasei ona oo mai se lagona i lou mafaufau. E le matagofie ea le valaulia o lotu uma i totonu o Moose Jaw e auai ma faaali a latou lava ata i se faaaliga ata?“
Ma ua maua ai loa ma le manatu, i se taimi puupuu lava na faavaeina ai loa le Faaaliga Ata o le Talalelei 2006. I le fesoasoani a le au paia ma faifeautalai o le Uarota a Moose Jaw, na vave ai ona faasalalauina tala o lenei faamoemoe ma amata ai loa ona faia fuafuaga.
Sa fauina ni ata lanu tetele se fasefulu ma tufatufaina foi ni tusi valaaulia i tagata o isi ekalesia ina ia faaali foi ni a latou ata faalelotu. E sili atu i le 32,000 kopi laiti o nei ata ua uma ona tufatufaina i tagata uma o le aai, o le saunoaga lea a le Taitai Misiona a le Uarota, le susuga ia Gerry Miller.
Na saunoa foi le uso ia Miller sa fesoasoani malosi atu foi le autalavou a le Uarota. “O alii talavou, i lalo o le taitaiga a le peresitene o Alii Talavou, o Lorne Bachiu, sa latou fausiaina ni tulaga e sili atu ma le 150 e tuu ai ata o le faaaliga ata.”
O le nusipepa foi a lea aai, o le Times-Herald, na latou lomia se faamatalaga puupuu faatatau i lenei faaaliga ata, e faapena foi le leitio, CHAB, na latou faasalalauina foi se tala e faatatau i ai.
Ae peitai, i sina taimi puupuu a o lei amataina le faaaliga, sa popole le uso o Flint nei tei ua le taunuu le faamoemoe.
“E tolu aso ao lumanai le faaaliga e matou te lei mauaina lava ni tali mai isi lotu po o nisi foi e le auai i le Ekalesia,” o se faaaliga lea a Uso Flint. Ae ina ua maea le tele o tatalo ma faatauanau mo isi aso e lua na sosoo ai, na logoina mai ai e le Ekalesia Tuufaatasi a Saint Andrew ma le toasefulu o tagata o isi lotu o loo iai a latou ata e tuuina mai mo le faaaliga.
Na tatalaina le faaaliga e pei ona fuafuaina, ma faaalia ai le sili atu ma le 140 ata i vaega eseese e ono. Sa saunia foi faifeautalai i lea lava taimi mo le taliina o fesili mai malo eseese na auai ma tufatufaina faamatalaga e uiga i le Ekalesia ia i latou na talosagaina ia faamatalaga.
E ui ina e le i ausia se fia selau o i latou na auai i le faaaliga, ae na manatu Uso Flint ua ausia le tulaga sa ia manaomia, o le aumaia faatasi lea o tagata o Moose Jaw ma faasoa atu iai le talalelei i se auala lelei faauo.
Na saunoa Uso Flint e faapea, “Sa leai se tulaga po o ni lagona feteenai na atagia. Sa peiseai na lagona uma e tagata le agaga. Ma e o se lagona sili ona taua lea.”
Sa tuuina atu e Vicci Spicer i le faaaliga mo se taimi le tumau se tasi o faatusa tuai o le Masonic Temple o loo taina i se laau mai le atunuu o Taipei lea e tusa lona matua ma auga tausaga o le 1500, ma na faaalia lona fiafia tele i le avanoa na ia maua e auai i lea faaaliga ata.
Na saunoa le tamaitai o Vicci, “Ona o la’u lotu o le lotu Iutaia, e masani lava ona le valaauliaina au i ni faaaliga ata faalelotu, a ua ou feiloai i le toatele o ni tagata lelei ma ua ou vaai i le matagofie o le tele o ata, ae o le mea sili ua ou maua le faauo i totonu o le Ekalesia Mamona.”
E ui lava ina e le o mautinoa lelei pe o le a avea le faaaliga ata ma gaoioiga faaletausaga, ae ua matauina le lagolago a tagata ma le aai i le toe faia o se isi faaaliga.
Fai mai le faamatalaga a Uso Flint, “Sa matuai fiafia le Ekalesia Tuufaatasi a Saint Andrew i le faaaliga ata. Fai mai i latou o se manatu lelei tele ma fautuaina ai o lo latou falesa, o se nofoaga lelei tele lea mo le faaaliga i le tausaga e sosooo ai. O i latou uma na asiasi atu i le faaaliga na latou faaalia le toe fia auai i le faaaliga o le tausaga e sosoo ai, ma o le a latou ta’uina atu i a latou uo.”