Misia o le Ipu a le Lalolagi
E i ai le taaloga e tasi e matua fiafia i ai tagata uma i Pasila—o le soka. Ma e leai se isi taaloga soka e tele atu nai lo le Ipu a le Lalolagi. Ina ua manumalo la ia Fabiana Silva, o se tasi o le Uarota a Pasila, i le Siteki oVitória da Conquista Pasila, i se tauvaga ma maua ai le avanoa e auai atu ai i le Ipu a le Lalolagi o le 1998 i Falani, na matua faafiafiaina o ia! Ae na leai sona manatu o le a avea ma se avanoa faafaifeautalai.
Na le faigata i isi tagata tauva ona matau tulaga faatauaina a Fabiana a o latou auai i lea taaloga soka ma lea taaloga soka, ma na taunuu Pasila i le taaloga faaiu e tauva ai ma Falani. Na latou faaaloalogia ona lavalava tauagafau, o ona uiga lelei, ma lana gagana mama. Ae o lena faaaloalo na iu i le le talitonu ina ua ia tau atu ia i latou o le a le auai o ia i le taaloga o le siamupini ona o le a faia i le Aso Sa.
E ui i uunaiga ma faitioga mai le vaega, ae na le suia lava le mafaufau o Fabiana. O le Aso Sa na faitau ana tusitusiga paia i lona potu i le faletalimalo aua na te lei iloa se mea e i ai se falesa. Na faiaina Pasila; na toe foi le vaega i lo latou atunuu.
I ni nai vaiaso mulimuli ane na faateia Fabiana ina ua maua atu sana tusi mai ia Fábio Fan, o se tasi foi na manumalo i le tauvaga mai le isi itu o le atunuu. Na fai mai na maua e ia ni lagona lelei ona o ona tulaga faatauaina ma o loo sailiili o ia i le Ekalesia. Mulimuli ane na ia toe lafoina mai se isi tusi—ua maea ona papatisoina o ia. Ona fesoasoani lea o Fábio e aumai tagata o lona aiga i le Ekalesia ma auauna atu i se misiona.
Na auauna foi Fabiana i se misiona i Campinas, Pasila, lea na matua lava saunia i ai aua ua maea ona ia aoaoina “o le tamaitusi aupito mataalia o le a tatou tauaveina, o le lelei o o tatou lava olaga ma faataitaiga.”1