Tolu na iTauwelu kei na Niusipepa 25 na Sede
Ni da sa dinata na veivakavuvuli tabu ni yalododonu kei na yalodina, eda sa dina tiko kina ki na noda vakabauta ka da dina vei keda.
E matamuni na ivavakoso vakaitamera oqo ni vuravura raraba, ena lomalomarua, au vakatusai au mada. Au vakayacora oqo me ikau ni dua na ulutaga sa dau vakaosoosotaka tu na noqu vakasama ena dua na gauna. Ena 1955 ni oti na imatai ni noqu yabaki ena vuli torocake, au a cakacaka ena vulaikatakata ena Jackson Lake Lodge ka se qai dola vou e Moran, mai Wyoming. Na noqu sala ni veilakoyaki e dua na motoka, na Hudson ni 1941, sa yabaki 14 ka sa dodonu me vakawabokotaki ena 10 na yabaki yani ki liu. Eso tale na ivakatakilakila ni motoka oqo, o ya ni sa veveka sara vakaca na kena buturara, ka ni kevaka me sega na papa ka ubi tu kina, au sa rawa ni yarataka tu ga e dela ni gaunisala na yavaqu. Ia, na kena vinaka ni sega ni vaka na veimotoka yabaki 14 tale eso ni gauna oqo, e sega ni vakayagataki kina na waiwai—e levu na wai ena kena redieita, ia e sega ga na waiwai. Au sega ni rawa ni vakasamataka se dau lako tiko ki vei na wai kei na cava na vuna sa dau mamare cake tikoga kina na waiwai ka makare.
Niu vakavakarau meu draiva ena 185 na maile ena ilakolako lesu ki vale ni sa oti na vulaikatakata au kauta na motoka vei koya na mekeniki duadua ga ka tiko e Moran. Ni oti na nona dikeva, e qai vakamacalataka na mekeniki ni sa kaca tu na buloko ni idini ka sa turu tiko na wai ki na waiwai. Sa vakamacalataki e keri na veika tawamacala ni wai kei na waiwai. Au vakataroga se na rawa beka ni turu na wai ki na taqe ni benisini; ena vinaka cake na levu ni maile au rawa ni ciciva ena benisini.
Oqo na vakatutusa: ni oti na cakamana ena noqu yaco rawa ki vale, a lako mai ki tuba na tamaqu ka kidavaki au ena marau. Ni oti na veimokomoko ni veikidavaki kei na vica na veiwali, e rai yani ki na idabedabe e muri ni motoka ka raica e tolu na itawelu ni Jackson Lake Lodge—na kena eda sega ni rawa ni volia. Ena mata cudrucudru e kaya ga mai, “Au a namaka mo vinaka cake.” Au sega ni vakasamataka ni cala na veika au cakava. Vei au na itauwelu oqori e ivakatakarakara ga ni cakacaka ena dua taucoko na gauna ni katakata ena dua na otela levu, e dua na mataqali ivakarau vakapasidia. Ia, ena noqu kauta mai au vakila ni sa yali kina vei au na nona veivakabauti kei na nuidei nei tamaqu kau sa yalolailai sara kina vakalevu.
Ena mua ni macawa ka tarava au vakadavora tale vakavinaka na papa ka buturara ni noqu motoka, vakatawana na redieita ena wai, ka tekivuna na ilakolako 370 na maile (595 –kilomita) ki Jackson Lake Lodge meu vakasuka e tolu na itauwelu. A sega ni taroga na tamaqu se cava au laki cakava tale ki Jackson kau sega ni vakamacalataka. E sega ni gadrevi me tukuni. Oqo e dua na lesoni sau levu ka mosimosi, ni yalodina, ka sa tu dei tu vei au ena noqu bula taucoko.
Sa yaco me da matau sara vakalevu ki na sega ni dina ka da kurabui kina ni da rogoca se wilika, eso na ivakarau ni bula vinaka sa yali tiko ena vuravura ni gauna oqo o ya na yalododonu kei na yalodina. Ena vica na yabaki sa oti era sa vakavotui kina eso na iliuliu vakabisinisi ena nodra sega ni cakadodonu kei na ivalavala tale eso ni cakacaka vakailawaki. Na vuana sai koya, era sa vakayalia na nodra ivurevure ni bula kei na nodra peniseni e tini vakaudolu na tamata cakacaka dina, ni dua na gauna balavu. Eso sa yali kina na nodra itikotiko, na veisau ni vuli, kei na so tale na ituvatuva ni bula. Eda wilika na takalevu ni ilawaki ena noda veikoronivuli, ni sa leqataki vakalevu cake na rawa maka kei na diqiri mai na vuli kei na veivakarautaki. Eda rogoci ira na gonevuli era lawakitaka na nodra rawa ka mai na veikoronivuli ni vuli vuniwai ka ra sa veiqaravi tiko ena gauna oqo ena tabana ni veiqaravi dredre eso vei ira na nodra tauvimate. O ira na itabaqase kei na so tale era lawakitaki mai vei ira na kenadau, ka yaco kina na yali ni itikotiko se na veika era sa maroroya tu mai ena nodra bula taucoko. Ena veigauna kece na sega ni dina oqo kei na lailai ni yalodina era coke ni kocokoco, dokadoka kei na sega ni veidokai.
Ena Vosa Vakaibalebale eda wilika kina: “A ka vakasisila vei Jiova na tebenigusu lasu: ia ko ira sa dina na nodra cakacaka sa rekitaka ko koya” (Vosa Vakaibalebale 12:22).
O Momani, ni vosa tiko ena vukudra na Lemani ka ra vakatokai me ra tamata i Onitai-Nifai-Liai, a vola kina: “Era sa mai cokovata kei ira na Nifai ka okati me lewe ni lotu ni Kalou. Ia sa ka dokai sara na nodra yalodina vua na Kalou, kei ira talega na tamata; raica era sa yalodina sara ka dodonu ena ka kecega; ia sa tudei sara na nodra vakabauta na Karisito ena nodra bula taucoko” (Alama 27:27; vakamatatataki).
Ena rauta na tolusagavulu na yabaki sa oti niu cakacaka tiko ena vuravura ni bisinisi, keimami lako sivita na Rara ni Waqavuka na O’Hare e Chicago, kei na so na noqu ilawalawa vakabisinisi. E dua vei ira na tamata oqo e se qai volitaka walega na nona kabani ena tini vakamilioni na dola—ena dua tale na kena itukutukuni, e sega ni dravudravua ko koya.
Ni keitou lako sivita e dua na misini ni niusipepa, a biuta na tamata oqo ena misini e ruasagavulukalima na sede, dolava na katuba ki na ibinibini pepa ena loma ni misini, ka tekivu me taura na pepa ka sega ni sauma ka solia mai e yadua vei keitou. Ni solia mai vei au e dua na niusipepa, au biuta e ruasagavulukalima na sede ena misini ka tovolea meu kakua ni veivakacudrui ia meu dusimaka e dua na tikina bibi, ka kaya ena veiwali, “Jimi, ena 25 na sede au sa na rawa ni maroroya toka kina na noqu yalodina. Ena lomatarotarotaki beka na dua na dola, ia na 25 na sede—sega, sega ni 25 na sede.” Raica, au a nanuma vinaka toka na veika au a sotava ena tolu na itauwelu kei na Hudson ni 1941. Ena vica na miniti ka tarava, keitou a lako sivita tale na misini ni niusipepa vata oqori. Au raica ni sa vakalutulutu tani mai vei keimami o Jimi ka laki biubiu tiko na ikava ni dola ena misini. Au tukuna tiko vei kemuni na veika oqo sega ni baleta meu ivakaraitaki ni yalododonu, ia meu vakabibitaka ga na lesoni ni tolu na itauwelu kei na niusipepa 25 na sede.
Ena sega ni kune na yalododonu ena vuravura ni bisinisi, ena veikoronivuli, ena veitikotiko, se ena dua tale na vanua me yacova ni sa tu na dodonu e yaloda—na mataqali yalododonu me na vakavuvulitaki e vale mai na noda ivakaraitaki yadua kei na veivakavulici vakadodonu.
Na veilesoni bibi ka guiguilecavi dredre e vakavuqa ni ra dau vakavulici mai na ivakaraitaki rawarawa eso—e rairai ena rawarawa sara me vaka na tolu na itauwelu se niusipepa ka 25 na sede na kena isau. Au vakasamataka se na vakacava beka na vuravura kevaka me a vakavuvulitaki mai vale ena gauna ni gone na veilesoni rawarawa ni dina, na veilesoni rawarawa me vaka na “Lomana na wekamu me vakataki iko” (raica Maciu 22:39; Marika 12:31) kei na “Cakava vei ira na tani na veika ko na vinakata me ra cakava vei iko” (raica Maciu 7:12; Luke 6:31). Au vakasamataka se ra na tu beka evei nikua na udolu vakaudolu na tamata cakacaka era sa biu mai, kei na nodra peniseni kevaka me ra a sotava ena veigauna taumada ni nodra bula o ira na daunibisinisi lelevu oqo, na veika me vaka na tolu na itauwelu se niusipepa 25 na sede.
Na yalododonu e itakele ni bula Vakarisito dina. Vei keda na Yalododonu Edaidai, na yalodina e gadrevi vakabibi me baleta na kena curumi na valetabu ni Turaga. Na dina e umani koto ena veiyalayalati eda cakava ena valetabu. Ena vei-Sigatabu yadua eda dau vakaivotavota ena ivakatakarakara ni yagona kei na Nona dra na iVakabula, eda vakavouia tale kina na noda veiyalayalati taumada ka tabu—ka kovuta na dina. Ni da Yalododonu Edaidai sa noda icolacola tabu me, sega walega ni da vakavulica na ivakavuvuli ni dina ia me da bulataka talega, me ivakaraitaki rawarawa beka me vaka na tolu na itauwelu se dua na niusipepa 25 na sede. Sa dodonu me okati ki na veika yaga taumada me ra na dusimaka na noda bula ni veisiga na yalodina kei na yalododonu.
Ni da sa dinata na veivakavuvuli tabu ni yalododonu kei na yalodina, eda sa dina tiko kina ki na noda vakabauta ka da dina vei keda.
Sa noqu masu, me vaka ni da Yalododonu Edaidai me da na kilai ni da dua vei ira na tamata yalododonu duadua e vuravura. Ka na tukuni me baleti keda me vakataki ira na Onitai-Nifai-Liai ni da sa “yalodina sara ka dodonu ena ka kecega; ka… . sa tudei sara na nodra vakabauta na Karisito, ena nodra bula taucoko” (Alama 27:27). Ena yaca i Jisu Karisito, emeni.