Na Uto ni Kakana Vakayalo
E dodonu me da kania vakalevu kina na uto ni kakana vakayalo —na uto ni kakana ka lako mai ena kena kilai na taucoko ni kosipeli kei na kaukauwa ni matabete tabu.
E dau laki vakania o tukaqu na nona bulumakau ena buca ni veiulunivanua totoka, ka drokadroka ena tokalau ni neitou tauni e Utah ena veivula i katakata. Ia, era sa gadreva na bulumakau me ra kania na kakana bulabula ena nodra dau dramica na masima cevata. Era kau mai na masima cevata oqo mai na dua na qara ni masima e toka vakayawa. Ni sa dau oti na masima ena kena itawatawa sa qai dau laki vakavodoka o tukaqu ki na dua na ose kaukauwa e dua na taga ka tawana kina na masima cevata. Au sa qai vakatoka na ose daucakacaka oqo me o Slowpoke ena dua na inaki vinaka. Sa qai vakavodoki au o tukaqu vei Slowpoke kei na taga masima cevata. E a qai solia mai vei au na dali ni ose meu muataki koya yani ena ulunivanua ni muri tukaqu kei na nona ose.
E berabera na lako nei Slowpoke, ia au sega ni vakaukauwataki koya baleta ni bibi tiko na nona iusana. E dua na siga taucoko na kena lakovi na ulunivanua ki na itawatawa ni masima cevata ka vakasoburi kina na masima cevata mai na ose. Ni dau katakata na draki, e dau boi vakatani na yavaqu bunobuno mai na masima cevata era tawani taga tiko. E dua na ka marautaki ni keitou sa kosova na uciwai ka rawa niu sobu ka savata ka vakamamacataka na boi ca ni yavaqu
E dau lagasere toka o tukaqu ena so gauna. E dau lagata vakalevu na sere kei Saioni. Ia a lagata e dua ka vakauqeti au sara vakalevu o ya na “Vakaraitaki ira mai na nomu itokani kau na qai tukuna o cei o iko.” Niu raica lesu, sa dua na ka talei na usani masima ena buca ni veiulunivanua, ka ra vakaukauwataki na bulumakau mai na masima cevata o ya.
Na uto ni kakana e veivakabulabulataki ka vinaka kina na yago ka veivakabulai ki na manumanu kei na tamata talega. Era dau taleitaka na bulumakau nei tukaqu na uto ni kakana era tiko ena masima cevata, ia ena cecere cake na veika era gadreva na tamata. E dodonu me ra vakani tikoga vakayalo baleta “sa ka levu na bula, a ka lailai na kakana”1 kei na kena “sa tiko e dua na yalo ena loma ni tamata: a sa solia vei ira na vuku na icegu i Koya sa Kaukauwa.”2 Na yalo ni tamata e vinakata me lomani. E gadreva talega me na “vakatuburi cake ena vakabauta kei na ivakavuvuli vinaka.”3
Na veivakani vakayalo e veivakarautaki ki na noda papitaiso. Na vakavakarau oqo e okati kina na vakamalumalumutaki keda vua na Kalou, ena “yalo e raramusumusu kei na yalo e bibivoro,” veivutunitaka na noda ivalavala ca taucoko, ka sa “lomada [me da] taura na yaca i Jisu Karisito,” ka sa kunei “ena [noda] cakacaka ni [da] rawata na Yalo i Karisito.”4
Na uto ni kakana vakayalo bibi duadua sai koya na noda ivakadinadina ni sa Kalou na Tamada Tawamudu, ni sa noda iVakabula ka Dauveivueti o Jisu, ka sa noda Dauveivakacegui na Yalo Tabu. Ena vakadeitaka vei keda na isolisoli ni Yalo Tabu na noda ivakadinadina oqo. Sa dau yaco mai ena ivakadinadina oqo na uto ni kakana vakayalo ni vakabauta kei na nuitaka na Kalou, ka kauta mai na veivakalougatataki vakalomalagi. E dau yaco mai vei keda na uto ni kakana vakayalo mai na veimataqali ivurevure ia ena vuku ga ni lekaleka ni gauna au na vakamacalataka ga e tolu.
Ena vica na yabaki sa oti, a tekivutaka kina e dua na cauravou ka vakarau vuli torocake tiko me na vakabulabulataki koya ena nona wilika na ivolanikalou me veimama ni auwa ena veisiga yadua. Ni sa tekivu wilika na Veiyalayalati Vou, e sotava e dua na dredre. Sa luluqa tale mai na nona ituvaki vakayalo taumada, ka sa sega ni vakararamataki vakayalo. E tarogi koya ga, “Na cava beka na noqu cala?” A qai vakasamataka rawa e dua na ka. Eratou a veiwali tiko vakaveitokani—eso era sega sara ni lasa, ka veivakamaduataki toka. E a sega walega ni laki tomani iratou ia a tukuna talega eso na veiwali e sega ni lasa. Ni vakasamataka tiko na veika oqo, a raica sara na tikina oqo ena Maciu,“Ia kau sa kaya vei kemudou, a vosa ca ga vakayadua ga era na cavuta na tamata, era na tarogi kina ena siga ni lewa.”5 Sa kila kina ni sa dusimaki koya ki na tikina o ya na Yalotabu. E a vakatikitiki mai na nona iVolatabu ka cabora e dua na masu ni veivutuni.
E rawarawa sara na isau ni nona taro “Na cava beka na noqu cala?” E a wilika tiko na ivolanikalou, makataka na ivolanikalou, ka taleitaka sara tiko na ivolanikalou, ia a sega ni vakamuria tiko na ivakasala era tiko ena ivolanikalou. Ni vakavoutaka tiko na nona wilika na ivolanikalou, ka saga me bulataka na ivakaraitaki i Karisito, sa raica rawa o koya ni sa vinaka cake mai na veitiki ni nona bula raraba.6 Ena nona sa semata na ivolanikalou ki na nona bula, sa umanaka kina e dua na uto ni kakana vakayalo bibi.
Ena noda bula veilecayaki vakayago, e dodonu me da kania vakalevu kina na uto ni kakana vakayalo, na uto ni kakana ka lako mai ena kena kilai na taucoko ni kosipeli kei na kaukauwa ni matabete tabu. Ni curuma na yaloda na kila ka vakaoqo, e sega walega ni da tu volekata na Kalou ia eda na via qaravi Koya kei ira na tamata.
Ena vica na yabaki sa oti era a vakayacora e dua na veivuke raraba ni veivakani e dua na kuoramu ni bete. E maqusa sara o Jimi, e dua vei ira na bete, ni sa vakaitavi kina ka sa saga me na kauta na kakana e levu duadua. Sa yaco mai na gauna me ra laki sota ki valenilotu na bete. Era gole kece yani ena dua vata ga na gauna ka lokuci na gauna ni lesu mai ena yakavi. Era kurabui ni lala tu mai na qiqi nei Jimi. E sega sara ni vosa, ka so na cauravou era a dredrevaki koya. Ni raica na ka oqo o nodra daunivakasala ka kila ni dau taleitaka o Jimi na motoka, a kaya sara, “Gole mada mai tuba, Jimi. Mai raica mada na noqu motoka. E sa vakalomaleqataki au tiko.”
Ni rau sa tu e tuba, a tarogi Jimi o dauinivakasala. E kaya mai o Jimi, “E sega. Ia au a laki kau kakana mai, ka levu sara. E sinai na noqu qiqi. Niu sa lesu tiko mai valenilotu, au a lako sara ki na vale ni dua na marama dawai e sega ni lewenilotu ka tiko e loma ni noda tabanalevu. Au a tukituki ka vakamacalataka na veika eda cakava tiko, ka sureti au o koya meu curu ki loma. E a vakaraica na ka me na solia vei au. E a dolava na bolaniwai liliwa kau raica ni lala didi tu. Era lala tu na kovate. E a qai raica rawa o koya e dua na kava tini vuanikau.
“Au sega ni vakadua ni vakabauta. Ni ra veiciciyaki tu e kea na gone ka ra gadrevi me ra vakani, ka sa mai solia o koya e dua na tini vuanikau. Au taura ka biuta ena noqu qiqi kau gole mai e gaunisala. E sivi vakalailai ga mai liu ni sa curumi au e dua na yalololoma kau sa kila meu sa na lesu ki na vale o ya. Au a qai solia kece vua na kakana.”
E a kaya o daunivakasala, “Jimi, kakua sara vakadua ni guilecava na veika e yaco vei iko nikua, oqori sara ga na veika e vinakati tiko.”7 E sa tovolea o Jimi na uto ni kakana ni veiqaravi ena loloma dina.
E vuqa na uto ni kakana vakayalo e dau yaco mai ena gauna ni kaulotu— ena vakaitavi vakatabakidua ena nona cakacaka na iVakavuvuli. Era yaco mai ki na nodra vukei na tamata me ra yadra tiko vakayalo me ra ciqoma kina na kosipeli. Ena dua na senijiuri sa oti a vakatulewa tiko o Elder J. Golden Kimball ena Tabana ni Kaulotu e Southern State, ka a kaciva kina o koya e dua na nodra bose na cauravou daukaulotu. Oqo me ra na laki sota ena dua na vanua lala ka bose vakatikitiki e loma ni veikau. E dua vei ira na cauravou kaulotu oqo e mavoa tiko e dua na yavana. E sa mavoa ka vuce levu tu na yavana ka vaka me vakaruataki na levu ni yavana ka dua. Ia e gadreva ga o daukaulotu me tiko ena bose oqo e loma ni veikau. Erau sa qai vavai koya e rua na cauravou daukaulotu ki na vanua ni bose.
E a tarogi ira na daukaulotu o Elder Kimball, “Kemuni na veitacini, a cava o ni vunautaka tiko?”
Era kaya, “Keimami vakavulica tiko na kosipeli i Jisu Karisito.”
“Ko ni sa tukuna tiko beka vei ira ni tu vei kemuni na kaukauwa kei na lewa, ena vakabauta, mo ni vakabula na tauvimate?” a taroga.
Era kaya mai, “Io.”
“Ia oqori,”e tomana,” a cava o ni sega ni vakabauta kina?”
E a vosa sara na cauravou e vuce tiko na yavana ka kaya, “Au vakabauta.” Oqo na ikuri ni italanoa nei Elder Kimball: “E a dabe ena dua na dulumi [Na daukaulotu] ka ra wavokiti koya na daukaulotu. E a lumuti ena waiwai kau a masulaki koya, ka a vakabulai ena kedra maliwa. E a veivakurabuitaki dina; ka ra masulaki taucoko o ira na daukaulotu era tauvimate tu, ka ra vakabulai taucoko. Sa oti na neimami bose o ya ka ra sa lesi na daukaulotu, ka yaco na marau kei na reki e sega ni tukuni rawa.”8 Sa vakavoutaki tale na kedra uto ni kakana ni vakabauta, ka vakabulabulataki na nodra saga na cakacaka ni kaulotu.
Na uto ni kakana vakayalo, ka vaqaqacotaki keda tiko vakayalo, ena rawa ni oti na kena mana kei na kena kaukauwa kevaka eda sega ni kilikili tiko kei na veidusimaki vakalou eda gadreva. Na iVakabula e kaya vei keda, “Oi kemudou na masima kei vuravura; ia kevaka sa seavu mai na masima na kena tuituina ena vakatuituinataki tale ena cava? Sa qai sega ni yaga ena dua na ka, me biu ga ki tautuba, ka me butuka sobu ko ira na tamata”9 E dodonu me da vakayawaka na yagoda kei na yaloda mai na veisala taucoko ni veivakatotogani kei na veivagagai. Eda sega ni dau kania na kakana sa ca se sa tauvi gaga tu. Ena digidigi vata ga oqori, me da kakua ni wilika se sarava e dua na ka e sega ni vinaka. E vuqa na veivagagai vakayalo ni noda bula era yaco mai ena Initaneti, qito ni komupiuta, televiseni kei na iyaloyalo yavala se vakaraitaka na nodra itovo lolovira na tamata. Ni da bula tiko ena vuravura vakaoqo, me da toroya cake tiko na noda kaukauwa vakayalo.
E tukuna o Inosi na nona masu ka kerekere vagumatua ena siga taucoko ka laki bogi ena vuku ni nona bula.10 E gadreva sara ga na uto ni kakana vakayalo ka na vakamamautaka na karamaca ni dina vakayalo. Me vaka ga e kaya na iVakabula kei vuravura vua na yalewa ena tobu ni wai e Samaria, “Ia ko koya sa gunuva na wai kau na solia vua ena sega sara ni viagunu ka tawamudu; ia na wai kau na solia vua ena tu ena lomana me mataniwai sa tovure ki na bula tawamudu.”11
Eda sa mai soqoni vata tiko vakalewelevu oqo vakamatabete ni Kalou, laurai se sega, sa nuitaki tiko kina na noda vakani vakayalo. Au sa nuitaka ni da na via kania ka gunuva na vosa ni Turaga mai vei ira na Nona italai, o ira na parofita, ka me da na vakasinaiti tiko ena veimacawa ena soqoni ni sakaramede ka vakavouya kina na noda veiyalayalati.
Sa tiko vei kemuni yadua na lewe ni Matabete i Eroni na gacagaca bibi ni nomuni ivotavota tawamudu. Na veigacagaca oqo, eso era sa malai mai, ka sa gadrevi me ra vakaukauwataki na waqana mai tuba. Eso era vakayago; eso era vakayalo. Ena via kila o yalomu na nona ilakolako tawamudu—me kila na vanua e tadu mai kina, na vuna e mai tiko kina oqo, kei na vanua me na kune marau ka reki kina ka rawata na kena ivotavota. Na kena vakatawani na yaloda ena uto ni kakana vakayalo sa rawa me na tawayalani ka salavata kei keda ki na veigauna tawamudu. E vakavulica o Amuleki, “Raica na yalo ga ko a soli iko kina ena nomu bula oqo, ena laki lewai iko tale ena bula sa bera mai.”12
Kemuni na veitacini, sa vakavinavinakataki na nomuni yalodina kei na ivalavala dodonu. Mai na nomuni ilesilesi gugumatua ena veikuoramu, tabana, tabanalevu, kei na iteki sa tubucake kina na Lotu, ka sa tete yani ki liu na cakacaka ni Kalou ki vuravura taucoko. Mai na nomuni matabete ko ni sa vakalougatataka kina na nomuni matavuvale kei ira tale eso ena yaca ni Turaga. E yaco oqo mai na digidigi vakalou eda sa nuitaki kina mai vua na Turaga, ka sa yalataka o Koya, “Ko koya yadua ko sa vosa vakalougatataka au na vakalougatataka.”13
Kemuni na veitacini, au sa nuitaka ni da na dina ka dodonu tiko ena noda veiyalayalati taucoko. Sa noqu masu ni da na tudei tiko ena noda veimaliwai vakamatavuvale, vakabibi vei ira na watida, vakakina vei ira na noda itubutubu, o ira na luveda, kei na makubuda. Me na voqa tiko na noda ivakadinadina yadudua ni sa dina na cakacaka oqo ena noda bula sa vo. Me da kakavaka yani na ivalavala dodonu ni da sa italai yalomalumalumu ni Turaga, sa noqu masu ena yaca i Jisu Karisito, emeni.