Ena Yaco Mai na Sigatabu
Ena vuku ni bula kei na vakacaboisoro tawamudu ni iVakabula kei vuravura eda na veisotari tale kei ira eda a dau vakamareqeta.
Au vakavinavinaka ni rawa meu tiko vata kei kemuni nikua kau vakaukauwataki ena nomuni ivakadinadina. Sega na vosa me vakamacalataka, niu vakavinavinakataka na nomuni vosa ni veitokoni, ivakaraitaki ni loloma, kei na nomuni qaqa ni masu.
Nikua, au na gadreva meu na vosa tiko ena vica na ka baleta na noqu vakanananu.
Au a sucu mai vei rau e dua na itubutubu vinaka sara. Mai vei tamaqu, Joseph L. Wirthlin, au vulica na bibi ni cakacaka vakaukauwa kei na dauloloma. E a bisopi tu ni neitou tabanalevu ena gauna ni Vakaloloma Levu. E tiko vua na yalo ni kauwataki ira na bula leqaleqa tu. E dodoliga yani vei ira na leqa tu, sega ni baleta ni nona itavi, ia e sa baleta sara ga ni sa yalona dina.
E sega ni cegu vakadua na nona dau kauwaitaki ira tu na bula leqaleqa. Mai na vuni yaloqu o koya e sa bisopi dina sara ga.
O ira kece era kilai tamaqu, era na kila ni o koya e dau lotu tu ga e veigauna kece. E dua e a tukuna vei au ni o tamaqu e rawa ni cakava na cakacaka ni tolu na tagane. E dau toso tu ga. Ena 1938 e a cicivaka tiko e dua na bisinisi ka toso vinaka sara tiko ena gauna e kacivi koya yani kina o Heber J. Grant, na Peresitedi ni Lotu.
A tukuna vua o Peresitedi Grant ni ratou sa na veisautaka tiko na Matabisopi Vakatulewa ena siga o ya, ka sa vinakati tamaqu me daunivakasala nei LeGrand Richards. E kidacala eke o tamaqu ka kerea me laki masulaka mada.
A kaya yani o Peresitedi Grant, “Baraca Wirthlin, sa vo walega qo e 30 na miniti me tekivu na soqoni ni koniferedi e tarava kau vinakata meu laki vakacegu mada vakalailai. Cava o kaya?”
Mani vakakina, e qai vakadonuya o tamaqu. E a veiqaravi kina me 23 na yabaki, 9 vei ira e veiqaravi vaka-Bisopi Vakatulewa ni Lotu.
A sa yabaki 69 o tamaqu ena gauna e mate kina. Au a tiko vata voli kei koya ena gauna e a caroba kina ka sega sara ni laki vakilai koya. Vakalailai ga sa leqa.
Wasoma toka na noqu dau nanumi tamaqu. Au sa daunanumi koya sara ga.
O Madeline Bitner, na tinaqu, e dua ka ivakaraitaki vinaka sara ki na noqu bula. Ena nona gauna ni gone e dau matai sara na qito, ka jabeni ni veitaucici. Sa rui dau yalovinaka ka yalololoma ka sa rui dau vuki totolo sara. Wasoma ni dau kaya, “vakatotolo” ni dau va ya, keitou sa dau vakatotolo sara. De dua beka ya na vuna au a sa rui dau vuki totolo kina niu a dau qito veicaqe tu eliu.
O tinaqu e gadrevi keitou na luvena me keitou dau rawa ka; ka vinakata talega na neitou sasaga me yacova na itagede duadua e cake. Au se nanuma vinaka tikoga ni dau kaya, “Kakua na barasi.” Barasi na vosa e dau vakayagataka vua e dua e dau vucesa ka sa sega soti ni rawata na ka e soli vua me cakava. “Dau gugumatua.”
Mate o tinaqu ni yabaki 87 kau dau nanumi koya wasoma, kau sega ni vakamacalataka rawa na noqu sa mai calati koya tu oqo.
O Judith na ganequ gone, e daunivolaivola, daunisere, ka qasenivuli. E dau taleitaka e levu sara na ka, wili kina na kosipeli, ivakatagi, kei na dikevi ni veiyaya makawa. Na siganisucu nei Judith ni vo toka e vica na siga mai na noqu. Ena veiyabaki au dau solia vua e dua na noti dua na dola vou me noqu iloloma ni siganisucu.
A mate o Judith ena vica na yabaki sa oti, kau sa calati koya, ka dau nanumi koya wasoma.
Meu sa na toki sara mai oqo vei Elisa, na watiqu. Au nanuma na imatai ni gauna au sotavi koya kina. Au a vukea e dua na noqu itokani, ka gadreva meu lako ki nodratou meu laki kauti Frances mai, na tacina. Dolava mai o Elisa na katuba, vei au mada ga, au sa vinakati koya sara ga ena imatai ni gauna au raici koya kina.
Au nanuma ni vakila talega o koya e dua na ka, ni imatai ni vosa meu rogoca ni cavuta na, “O au kilai iko tiko.”
O Elisa e kenadau ena vosa vakavalagi.
Me yacova mai nikua, au se vakamareqeta tikoga na lima na vosa o ya me vaka eso na malanivosa totoka ena ivosavosa ni kawatamata.
O koya e taleitaka na qito tenisi, ka tibi na liva nona dau tavi. Au tovolea meu qito tenisi vata kei koya ia au qai kere vakacegu ga niu sa vakila ni sa na sega ni rawa meu tavia na ka au sega ni rawa ni raica.
O koya na noqu ivakadei kei na noqu ivakavakacegu. Baleti koya au sa tagane vinaka, tagane vakawati vinaka ka tama vinaka. Keirau a vakamau, walu na luvei keirau, ka salavata voli me 65 na yabaki.
Au dinau tu oqo vei watiqu kau sega ni vakamacalataka rawa. Au sega mada ni kila se dua na veiwatini e vinaka sara, ia au kila ni neirau e vakakina.
Ni vosa o Peresitedi Hinckley ena veibulu nei Elisa, e kaya ni dua na ka rarawataki ka vakamosiyalo ni yali e dua eda dau lomana. Ena voroka toka na yalomu.
E dina o koya. Me vaka ni vuni noqu marau levu o Elisa, oqo na nona takali sa vuni noqu rarawa levu.
Ena veiauwa ni lolosi au dauvakayagataka meu vakasamataka kina na veika vakalomalagi. Au sa laki vakananuma sara kina na inuinui bula ni ivakavuvuli ni bula tawamudu.
Ena noqu bula, au sa rogoca oti kina e vuqa sara na veivosa baleta na Tucaketale. Me vakataki iko au sa rawa niu wiligusutaka na veika e yaco ena mataka ni imatai ni Sigatabu ni Tucaketale o ya. Au sa makataka ena noqu ivolanikalou na veitukutuku baleta na tucaketale ka voleka sara tu ga oqo vei au na veivosa era cavuta na parofita nikua baleta na ulutaga oqo.
Eda kila na cava na tucaketale—na nodrau semati vata tale na yalo kei na yago ki na kena itutu vinaka duadua.1
E kaya o Peresitedi Joseph F. Smith, “ni o ira eda na veitalatala eke, eda na sota tale ka raici ira me vakataki ira sara ga. Eda na sotavi ira vata ga ena ibulibuli eda a veikilai tu kina eke ena bula oqo.”2
Peresitedi Spencer W. Kimball e vakamatailalaitaka ena nona kaya, “Au vakabauta ni kevaka me da rawa ni raitayaloyalotaki keda ena noda vinaka taucoko, bula-vakayago, bula-vakayalo, kei na vakasama, sa ikoya sara ga oqori na ituvaki ni noda bula ena gauna eda lesu mai kina.”3
Ni da sa mai tucaketale, “na yago oqo sa na laveti cake ki na yago tawamate rawa … [eda]sa na sega ni rawa tale ni mate.”4
E rawa ni ko vakasamataka mada o ya? Bula ni se tu donu? Sega na tauvimate, sega na mosi, sega na lomaocaoca ka da dau sotava tu oqo?
Na tucaketale sa ikoya na uto ni noda vakabauta na vakabauti Karisito. Kevaka me sega, ia, na noda vakabauta ena sega ni vakaibalebale. A tukuna na iApositolo o Paula, “Kevaka me sega ni tucaketale o Karisito, sa na sega ni vakaibalebale na neitou itukutuku, ka sa vaka talega kina na neitou vakabauta.”5
Ena itukutuku kei vuravura era lewe levu era vuku, levu era kaya ni ra kila vinaka na veika vakalou. Ia ni sa tucaketale mai na ibulubulu na iVakabula, e vakayacora e dua na ka e se bera vakadua ni dua me sa bau cakava mada. E vakayacora e dua na ka ena sega ni dua me cakava rawa. Basuraka na ilati ni mate, sega walega me baleti Koya, ia me baleti ira kece era sa mai bula oti eke—yalododonu kei na ivalavala ca.6
Ni tucake mai na ibulubulu na Karisito, me isevu ni Tucaketale, sa vakarautaka sara ga na isolisoli o ya vei keda kece sara. Salavata na isolisoli cecere o ya, na Nona vakamalumalumutaka na ca, vakaseavutaka na rarawa, ka dau vakamamadataka na bibi ni yalodra na sa yali e dua na wekadra voleka.
Au vakasamataka na kena butobuto na Vakaraubuka o ya ni sa lauvako tu ena kauveilatai na Karisito.
Ena Vakaraubuka vakarerevaki o ya, e sautaninini na vuravura ka uku na loaloa. E a ravuta na vuravura na cagi vakacevaruru.
O ira na tamata ca era via kauta laivi na Nona bula, era sa tekivu marau. Me vaka ni sa mai mate oti o Jisu, era sa na veiseyaki ga na Nona ilawalawa. Ia, ena siga o ya era tucake ena qaqa.
Na siga o ya, e a seirua kina na ilati ni vale ni soro.
Erau sa rarawa sara ka luluvu, ko Meri Makitalena kei Meri na tinai Jisu. Na tamata uasivi sara ka rau dau lomana ka vakaliuca sa rube galugalu toka ena kauveilatai.
Ena Vakaraubuka o ya era tucake galugalu na iApositolo. O Jisu, na nodra iVakabaula—na tamata ka taubale e dela ni wai ka vakatura na mate—sa mai tu oqo na kena lewa e ligadra na tamata ca. Era sarava galugalu tu na Nona sa vakamalumalumutaki mai vei ira na Nona meca.
Ena Vakaraubuka o ya, e ya vakasewasewani, ka vakamavoataki, vakasaurarataki ka vakalialia na iVakabula ni kawatamata.
Sa dua na Vakaraubuka sinai ena veivakacacani, veivakararawataki ka coka na yalodra o ira era dau lomana ka vakaliuca na Luve ni Kalou.
Au vakasamataka ni veisiga kece me tekivu mai na gauna ni itukutuku makawa ni vuravura oqo, na siga butobuto duadua na Vakaraubuka o ya.
Ia na mosi e yaco ena siga o ya e sega ni dede.
Na veilecayaki e sega ni tiko vakadua baleta ena Sigatabu, e sa tucaketale na Turaga ka basuraka na ilati ni mate. A cabeta mai na ibulubulu ko Koya ka rairai ena qaqa lagilagi me vaka na iVakabula ni kawatamata kecega.
Ena dua ga na gauna lekaleka, na yaloka ni mata tonawanawa sa na mamaca vinaka tale. Na gusu ka vakacabo masu ni lomaleqa kei na rarawa, sa vakasinaiti ena reki kei na vakacaucau. Ni o Jisu na Karisito, na luvena na Kalou bula, sa tucake tu e matadra me isevu ni Tucaketale, ka ivakadinadina ni mate sa itekitekivu ga ni dua tale na bula e uasivi cake sara.
O keda kece sara ena tiko na noda Vakaraubuka—na veisiga oqori ena kakavorovoro kina e yasada na veika vakavuravura ka ra dau sinai ka vakavolivoliti keda tu. Eda na sotava na veigauna dredre ka da nanuma ni na sega ni na vakavinakataki rawa tale. Eda na sotava kece na noda Vakaraubuka.
Ia au vakadinadinataka vei kemuni ena yacana o Koya ka sa vakamalumalumutaka na mate—ena yaco mai na Sigatabu. Ena buto ni noda rarawa, ena yaco mai na Sigatabu.
Kevaka me vakacava sara na noda veilecayaki, vakacava na noda rarawa, ena yaco mai na Sigatabu. Ena bula oqo se ena bula sa bera mai, ena yaco mai na Sigatabu.
Au vakadinadinataka vei kemuni ni tucaketale e sega ni italanoa vakaibalebale. E tiko vei keda na nodra ivakadinadina o ira era raici Koya. E udolu mai na vuravura makawa kei na vuravura vou era vakadinadinataka na tucaketale ni iVakabula. Era vakila na mawe ni mavoa e ligana, yavana kei na sarisarina. E tuturu na wai ni matadra ni yalo vakacegu ni ra sa mokoti Koya.
Era vakavoui na tisaipeli ni sa oti na Tucaketale. Era lako yani ki vuravura ka vunautaka na itukutuku ni kosipeli.
Kevaka me ra a digitaka ke ra lesu tale ki na nodra veimataqali bula makawa, kei na cakacaka. Tukuna na gauna, ni nodratou a bula vata mai kei Koya ena rawa ni a guilecavi.
E rawa ni ratou cakitaka na vakalou kei Karisito. Ia, e sega ni ratou cakava vakakina. Ena mata ni veika vakarerevaki, veivakacalai, kei na beitaki ni vakamatei, eratou curuma na veivale ni tui, veivaletabu, valenilotu ena doudou ni kacivaki Jisu Karisito na Luve ni Kalou bula.
Eso vei ira era solia sara ga me nodra iotioti ni ivakadinadina na nodra bula vakamareqeti. Era mate vakadua na mariteri, kei na ivakadinadina ni Karisito ka sa tucaketale ena tebenigusudra ena gauna era mate kina.
Na tucaketale e vaqaqacotaka tale na nodra bula o ira era raica. Sega li ni rawa ni vaqaqacotaki keda?
Eda na tucake taucoko mai na ibulubulu. Ena siga o ya ena mokoti tinaqu kina o tamaqu. Ena siga o ya, au na ciqomi noqu daulomani tale kina o Elisa.
Ena vuku ni bula kei na vakacaboisoro tawamudu ni iVakabula kei vuravura eda na veisotari tale kei ira eda a dau vakamareqeta.
Ena siga o ya eda na kila kina na loloma ni Tamada Vakalomalagi. Ena siga o ya eda na marau kina ni sa dolava na sala na Mesaia ka sa vakamalumalumutaka na veika kece me.
Rawa ni da na bula tawamudu kina. Ena vuku ni veicakacakatabu vakalotu eda ciqoma ena veivaletabu, noda biuta na bula vakavuravura lekaleka oqo ena sega ni veitawasea vakabalavu na veiwekani ka sa vauci vata tu ena wa ni veivauci tawamudu.
Sa noqu ivakadinadina bibi ni mate e sega ni iyalayala ni bula. “Kevaka me da sa vakanuiniui me yaga vei keda na Karisito ena bula ga oqo, eda sa qai vakaloloma vakalevu cake vei ira kecega na tamata.”7 Ni sa tucaketale na Karisito, “Sa guce ko mate a sa muduki sara.”8
Ena vuku ni noda Dauveivueti lomani, sa rawa ni da laveta cake na noda vakavinavinaka, ena loma sara ga ni noda Vakaraubuka butobuto duadua, ka kaya, “Ko iko mate sa evei na nomu batigaga? Ko iko bulubulu sa evei na nomu gumatua?”9
Ena vosa nei Peresitedi Hinckley baleta na bula galili e dau yaco vei ira era vakayalia na nodra daulomani, e tukuna talega, ni ena vakanomodi ni bogi, ena vakasolokakana kina ki yaloda ena vakacegu e dua na domo rogo lailai: “Veika kece sa vinaka tu”
Sega ni vakaiyalayala na noqu vakavinavinaka ena vuku ni ivakavuvuli dina ni kosipeli kei na isolisoli ni Yalo Tabu ka sa vakasolokakanataka ki yaloqu na vosa ni veivakacegui ni noda parofita lomani.
Mai na boto ni ituitui ni noqu rarawa au sa marautaka na lagilagi ni kosipeli. Au vakavinavinaka ni digitaki o Parofita Josefa Simici me vakalesuya mai ki vuravura na kosipeli ena iotioti ni itabagauna oqo. Au vakavinavinaka ni tiko e dua na noda parofita, o Peresitedi Gordon B. Hinckley, o koya ka liutaka tiko na Lotu ni Turaga e vuravura edaidai.
Me da tovolea me da kila ka bulataka na vakavinavinaka ena vuku ni isolisoli vakaitamera ka soli vei keda ni da sa luvena tagane kei na yalewa na Tamada Vakalomalagi dauloloma kei na yalayala ni siga vou ko ya ni da na tucake taucoko ena qaqa mai na ibulubulu.
Me da na daukila tu ga, se mani vakacava sara na butobuto ni noda Vakaraubuka, ena yaco ga mai na Sigatabu, sa noqu masu ena yaca i Jisu Karisito, emeni.