Era Sa Tu Tale Edaidai na Parofita

Elder Jeffrey R. Holland

Ena Kuoramu ni iApositolo Le Tinikarua

E sega ni vakawalena na Lotu oqo me vakatakila ki vuravura na parofisai, na matakalou, kei na ivakatakila ia eda sa veivakaroti kina.

Ni oti toka ga na nona curu o Carolyn Rasmus ki na Brigham Young Univesiti, era a sureti koya e dua na ilawalawa vou ni veivakavulici me ra laki lakova na veiulunivanua ena siga Vakarauwai ena cake kei Provo. O Carolyn e a sega ni lewe ni Lotu i Jisu Karisito ni Yalododonu Edaidai, ia e ciqoma ena marau na nona veimaliwai vou oqo. Sa maqusa sara o koya me tomani ira ki na kakaba o ya.

Ni sa cabe cake na siga, sa vakakina o ira na daukaba oqo ena yasa ni ulunivanua. Ia, ni sa tini na kaloko, era sa vakasaqara na ilawalawa oqo na vanua me ra dabe kina. E vakasama sara o Carolyn, “Oqo e totoka. Era kila vakacava niu via vakacegu?” sa vakasaqara talega o koya na vanua me na vakacegu kina. Ia era vaka me ra totolo sara ni via vakacegu, ka so era taura mai na nodra peni kei na ivolalalai ka dua e dolava sara e dua na retio lailai.

Na ka e vakarau yaco oqo ena veisautaka vakadua na nona bula. E a kaya mai e dua na itokani, “Carolyn, keimami via tukuna tiko e dua na ka. Oqo na imatai ni siga Vakarauwai ni Okotova ia kivei keimami e sega walega ni dua na siga totoka ka ra draudrau vinaka kina na veika bula, ia sa siga talega ni neimami koniferdi raraba ni Lotu. Oi keimami na Yalododonu Edaidai na vanua ga keimami tu kina se cava ga keimami vakayacora tiko keimami na tu vakadua ka vakarorogo ki na koniferedi. O koya gona eda sa na dabe mada ena kedra maliwa na veioki kei na paini, sarava yani na buca e ra, ka vakarorogo kivei ira na parofita ni Kalou ena vica na auwa.”

“Vica na auwa!” e vakasamataka sara o Carolyn. “Au sega ni kila ni ra se bula tikoga na parofita ni Kalou” e kaya mai, “kau sega talega ni kila ni na taura e rua na auwa !” E sega ni kila tiko o koya ni ra na laki vakacegu tale ena rua na kaloko ena yakavi o ya me rua na auwa ka sureti koya me laki vakarorogo tale e vale ena siga ka tarava.

Io, na kena vo sa kilai tu. A lolomataki vua e dua na ivolanikalou vakawaqa leca mai vei ira na gonevuli, na nodra loloma na itokani kei na matavuvale ena tabanalevu ni YDE sa tekivu me laki lotu o koya, kei na veika e sotavi vakayalo eda vinakata kece me ra taukena o ira era sasaga yani ki na rarama ni kosipeli, e a papitaiso rawa kina o Carolyn ka vakadeitaki me lewe ni Lotu. Sa kilai vakavinaka tu na veika a qai yaco. Na nona vakatakilaitaki ki na koniferedi raraba ena siga o ya ena ulunivanua na Y sa raica rawa kina o Sisita Rasmus ni sa yaco dina vua na veisureti vakaparofita nei Aisea, “Me da na laki cabe cake ki na ulunivanua i Jiova, ki na vale ni Kalou i Jekope; ena vakavulica vei keda ko koya na nona ivalavala, ia eda na muria na nona sala ni na lako mai Saioni na vunau, kei na vosa i Jiova mai Jerusalemi.”¹

Eda sa na vakarau tinia oqo e dua tale na koniferedi raraba totoka. Eda sa kalougata na rogoca na nodra itukutuku na iliuliu, ka vakabibi o Peresitedi Gordon B. Hinckley, o koya eda sa tokona me gusu ni Kalou e vuravura, na noda parofita bula, daurairai, ka dauvakatakila. Me vaka ga era dau vakayacora na parofita ni itabagauna, vakatekivu mai vei Atama ki na gauna oqo, sa mai vakasoqoni keda vata o Peresitedi Gordon B. Hinckley me vaka ena vanua buca kei Atama- onitai-Amani ni sa lomani keda ka vakavulici keda ka vakatikora vei keda na nona veivakalougatataki.²

Au sa rawa ni kaya eke ni nodra masulaki keda o ira na veitacini kei na veiganeni vakalotu oqo ka ra vosa vei keda ena macawa oqo ni sa yaco kina me veilaveti, ka nuitaki ni sa veisau kina na bula vei keda yadua me vakataki Sisita Rasmus kei na udolu vakaudolu na tamata era dau vakarorogo vakayabaki ki na sere ni YDE, “Come, listen to a prophet’s voice, and hear the word of God.”³

Niu sa vakadinadinataka ka vakavinavinakataka na itukutuku kei na inaki ni koniferedi raraba, au na via vosa ena tolu na ka e dau cauraka tiko vakarua ena veiyabaki na soqoni levu oqo ki vuravura raraba.

iMatai, erau kaburaka tiko vakadoudou ka vakadodonu ni sa tiko e dua na parofita bula e vuravura ka vosa tiko ena yaca ni Turaga. Kei na noda gadrevi me da dusimaki vakaoqo! Oqo na gauna voravora ka dredre. Eda sa raica tu na veivaluvaluti kei na nuiqawaqawa ni tamata. Era sotava na wekada na rarawa kei na mosi ni yalo vakavuvale. Na mataivalu era sotava na rere kei na leqa e vuqa. Oqo e tukuna vei keda na tadra nei Liai ni sa solegi ena butobuto o ira na lako tiko ki na vunikau ni bula, ni sa solegi ira taucoko na tiko e kea—o ira na ivalavala dodonu ka vakakina o ira na ivalavala ca, o ira na gone kei na qase sara, o ira na curuvou kei na daulotu. Ni vakatauvatataki era na sotava taucoko na veisaqasaqa kei na oca, ia na ititoko kaukamea ga—na vosa bula ni Kalou—ena laki taqomaki ira mai. Eda gadreva kece na ititoko o ya. Eda gadreva taucoko na vosa o ya. E sega ni dua e taqomaki rawa ke sega kina, ni yali na ka oqo sa rawa ga ni dua me na “muria na sala tani [ka] lako sese kina me vaka sa volai vakakina.”⁴ Eda sa marau vakalevu ni da sa rogoca na domo ni Kalou ka vakila na kaukauwa ni ititoko kaukamea mai na rua na siga ni koniferedi oqo.

E sega ni wasoma ia ena veiyabaki oqo e so era kaya tiko ni ra sa luluqa mai na iLiuliu ena nodra vunau, ni ra sega ni kila na veika e so, ni so na nodra veivunauci kei na ivakavuvuli sa sega ni veiraurau, ka sa sega ni yaga ki na noda gauna oqo.

Kivei ira ko ni sa tokona rawa ka laurai kina na veidusimaki ni Lotu, au kaya eke ena vu ni yaloqu taucoko ni se bera vakadua ena noqu bula raraba me vakaoqo meu bau veimaliwai kei na dua na ilawalawa vakaoqo era sa rui veikauwaitaki, ka ra kila vinaka na veika eda sotava tu, era raica lesu na veika sa sivi, ka kakavaki ki liu, ka vakadikeva vakavinaka, vakamatau, ka masulaka na veika e takoso mai. Au sa vakadinadinataka ni veitovo kei na veimaliwai savasava era sa vauci tu kina o ira na ilawalawa turaga kei na marama oqo e ulabaleta vakadua na veivuku kece se kila vakatamata au kila ni sa tu e vuravura. Au sa raica e mataqu na nodra cakacaka vinaka o ira oqo, kei na kaukauwa ni nodra cakacaka, kei na vakalou ni nodra bula. E sega ni vakawalena na Lotu oqo me vakatakila ki vuravura na parofisai, na matakalou, kei na ivakatakila ia eda sa veivakaroti kina. Na rarama dina sa cilava yani na vuravura butobuto oqo, ka sa ramase tiko yani mai na veisoqoni oqo.

iKarua, na veikoniferedi yadua oqo sa kacivi tiko kina na kena cakacakataki sega walega kivei keda yadua ia kivei ira talega na tamata kecega, o ira na wekada vakavuvale kei ira ena lotu kei ira era tamata tani. Ena mataka nikua sa vakauqeti keda o Peresitedi Hinckley ni oqo na ika 150 ni vakananumi ni ilawalawa mataqiqi ena gauna ni koniferedi raraba ni Okotova 1856 eke ena Bucabuca o Salt Lake, eratou a lakova rarawa tiko yani na batabata ni mua ni vanua o Nebraska ka ratou na laki vakataotaki tu ena ucacevata vavaku kei Wyoming. E voqataka vei keda o koya na vosa momona nei Peresitedi Brigham Young ena koniferedi raraba vei ira na Yalododonu, mo “Ni lako ka kauti ira mai na wekada o ya era sa tao tu ena Buca.”⁵

Me vaka ga ni sa itoko ni koniferedi raraba o ya ni Okotova 1856 na nodra laki vakabulai mai o ira sa vakaleqai, sa mai itoko talega ni koniferedi oqo kei na kena sa oti kei na kena e tarava. Ena sega beka ni cagi kei na ucacevata veibuluti eda sotava ena koniferedi oqo ia era wavokiti keda tu na tamata vakaleqai—o ira na dravudravua kei na vakaloloma, o ira na tabaki sobu kei na luluqa, kei ira sa “muria na sala tani ka lako sese kina” ka da sa tukuna oti, kei na lewevuqa “era sa sega ni kila rawa na ka dina ni ra sa sega ni kila na vanua me ra vakasaqara kina.”⁶ E sa malumalumu sara na durudra, sa wadamele na ligadra,⁷ ka sa roro mai na siga ca. Era na vueti ga mai vei ira e tiko vakalevu vei ira ka kila vakalevu ka rawa ni veivuke vakalevu. Mo ni kakua ni taroga oqo “Evei o ira?” Era sa tu kecega ena veivanua ena yasada imatau kei na yasada imawi, ena noda itikotiko kei na vanua ni cakacaka, ena veitikotiko raraba kei na yasana kei na veimatanitu e vuravura. Kauta na nomu ilawalawa kei na nomu qiqi, vakavodoka kina na nomu loloma, na nomu ivakadinadina kei na dua na taga valawa vakayalo ka lako yani ki na dua ga na vanua sa rawa. Ena muataki iko na Turaga kivei ira na vakaleqai tu ka rawata mo na ciqoma na kosipeli i Jisu Karisito ka sa cauraki tiko ena koniferedi oqo. Dolava na yalomu ka dedeka yani na ligamu vei ira sa vesuki tu ena ika ruasagavulu kadua ni senijiuri oqo me vakataka na Martin’s Cove kei na Devil’s Gate. Ni da vakayacora oqo eda sa vakamuria kina na kerekere vakawasoma ni iVakavuvuli me baleti ira na sipi sa yali na iyau sa yali kei na yalo sa yali.⁸

Kena iotioti, na koniferedi raraba ni Lotu sa ivakaro raraba ki vuravura ni o Jisu sa Karisito, ni o Koya kei Tamana, na Kalou kei na Tamada kece, erau a rairai vua na cauravou lailai parofita o Josefa Simici ka sa yaco kina na parofisai ena gauna makawa ni o Jisu Karisito sa tucaketale ena vakalesua mai na Nona Lotu e vuravura ka na “lako tale mai vakakina me vaka dou sa raici koya [o ira na Yalododonu kei Jutia] ni sa lako ki lomalagi.”⁹ Na koniferedi oqo kei na koniferedi tale eso era sa ivakaro raraba ni sa vakalolovirataki Koya me tadu mai ki vuravura ena dravudravua kei na yalomalumalumu, me sotava na rarawa kei na cati, veivakaisini kei na mate me rawa ni da vakabulai mai na veika ni mate ni sa tadolavi na noda bula tawamudu, mai na “we ni kena kuita eda sa vakabulai kina.”¹⁰ Na koniferedi oqo e vakaraitaka raraba ki na veimatanitu, veimatatamata, duivosavosa kei ira na tamata na iyalayala vaka-Mesaia ni “sa sega ni mudu na nona loloma.”¹¹

Kivei kemuni ko ni nanuma tiko beka ni ko ni sa yali se sega na nomuni inuinui, se cakava e dua na ivalavala ca levu ka sa dede mai, kivei kemuni sa tao tu ena buca batabata ni bula oqo ka sa ca na nomuni qiqi, na koniferedi oqo e voqataka yani na vosa loloma i Jiova, “Sa dodo tikoga na [ligaqu].”¹² “Niu sa dodoka yani na ligaqu kivei ira,” E kaya, “Ia era na cakitaki au; sa kaya na Turaga na Kalou, au na lomani ira, … kevaka era na veivutuni ka lako mai vei au; ia au sa dodoka tu yani na ligaqu ena veisiga.”¹³ Sa ka tawamudu na Nona loloma ka sa dodoka tu ga yani o Koya na ligana. Sai Koya na loloma uasivi nei Karisito, na loloma sa sega ni mudu, na loloma sa sega ni yalani rawa ena gauna mada ga ni sa takali na noda kaukauwa kecega.¹⁴

Au sa vakadinadinataki Jisu ni sa dauveivukei, veivueti, ka dauloloma vakalou, ni sai koya oqo na Nona Lotu ni veivakabulai sa vakayavutaki ena Nona loloma veivueti, ka vakakina era sa vosa tiko ena iVola i Momani, “sa talai ira mai kina na parofita na Turaga, [me ra tukuna yani]… . [Io] era sa talai mai na parofita.”¹⁵ Au sa vakadinadinataka ni o Peresitedi Gordon B. Hinckley sa parofita ena kena ituvaki taucoko, mai buradelana ki yavana, ka sa parofita e talei vei keda na nona bula kei na nona vosa ka da sa dau masulaka tiko vagumatua. Sa na tinia tiko vei keda o koya na soqoni vakayabaki oqo. Ena vuku ni veivakalougatataki kece oqo kei na vuqa tale au sa vakavinavinakataka na veikoniferedi yadua, e na yaca i Jisu Karisito, emeni.