Dou Tu Cake na Tamata ni Kalou
Na matabete qo ena gadreva sara vakalevu me da na bula-kilikili kaya tiko.
Sa dua na ka rairai vinaka oqo. Ena kena sinai tu vakaoqo na Vale ni Koniferedi, kei na kena kacivaki yani na noda itukutuku ki na veiyasai vuravura. Rairai e qai soqoni levu duadua ni turaga ka ra taura tu na matabete me vakayacori. Au vakavinavinaka vei kemuni na taciqu ko ni tiko rawa ena bogi nikua.
Ena noqu rogoca wale tikoga oqo ena retioyaloyalo na nodra vakatasuasua na BYU Men’s Chorus. Era lagata e dua na sere sa bau veivakauqeti sara ga, “Dou Tu Cake, na Tamata ni Kalou.” E a vola o William P. Merrill ena 1911, ka tiko ena noda ivola ni sere, e dina ga au sega ni nanuma niu a lagata voli.
Na kena vosa e salavata kei na sere ni lotu makawa vaka-Valagi ka a vola o Charles Wesley kei ira na so tale. E vakaoqo na qaqana:
Dou tucake na tamata ni Kalou,
Sa vakayacori na ka sa lailai wale,
Mo ni qaqa kei na igu kei na vakasama ka kaukauwa,
Me qaravi na nodra Tui na Tui
Dou tucake na tamata ni Kalou,
Ena dua na duavata vou,
kauta mai na siga ni matatagane
Ka bokoca laivi na bogi ni ca e nodatou
Dou tucake na tamata ni Kalou, Ena dua na duavata vou,
kauta mai na siga ni matatagane
Ka bokoca laivi na bogi ni ca e nodatou
Dou tucake na tamata ni Kalou!
Mo lakova na vanua sa butuka oti o koya
Ni da sa tacina na Luveni ni Tamata
Dou tucake mai na tamata ni Kalou
(Hymns, naba 324; ikatolu ni qaqana ena The Oxford American Hymnal, ed. Carl F Pfatteicher [1930], naba 256)
Kemuni na taciqu, e rawarawa sara na kena rawa ni bulataki na veivosanikalou. Me vakaoqo e a, cavuti Aisea o Nifai ka kaya: “De ko a vakarorogo ki na noqu vunau, sa na qai vaka na uciwai na nomu vakacegu ka na vaka na ua ni wasawasa na nomu cakacaka dodonu” (1 Nifai 20:18; raica talega Aisea 48:18).
Na vosa i Liai e veivakayadrati ki na turaga kei na cauravou kecega ni matabete. E kaya o koya ena yalona taucoko: “Oi kemudou na luvequ, dou yadra mai dou vakaiyaragi ena iyaragi ni ivalavala dodonu. Dou kureitaka laivi na sinucodo dou sa vesuki tu kina ka tucake mai na kuvu ni soso ia dou lako tani mai na butobuto” (2 Nifai 1:23).
Sega ni dua na turaga se cauravou e tiko ena soqoni oqo e sega ni rawa ni vakavinakataka na nona bula. O ya na ka me yaco. Me vaka, ni da taura tu na kaukauwa ni Kalou. Kevaka me da gonetagane ka taura tu na matabete i Eroni, ena noda na veivakavulici ni agilosi me veituberi ka veidusimaki, me veivakalougatataki ka veitaqomaki. Sa qai dua na ka vinaka ka taleitaki. Kevaka me sa vakatikori vei keda na matabete i Melikiseteki sa soli vei keda na idola ni matanitu ka tiko kina na kaukauwa tawamudu. Qo na veika e tukuna na Turaga ena Nona vakotora na ligana e uludratou na Nona tisaipeli.
Na matabete qo ena gadreva sara vakalevu me da na bula kilikili kaya tiko. Vakatabui na vakanananu ca. Tabu sara na iyaloyalo vakasisila. Me kua ni da beitaki ni da cala vakalawa ena veivakacacani. Me da ulabaleta na veika kece qori. “Dou Tu Cake, na Tamata ni Kalou!” ka vakanadakuya na veika oqori ka na qai tuberi iko na Turaga ka maroroi iko.
E kaya na parofita o Aisea, “Kakua ni ko rere; niu sa tiko vata kei iko: kakua ni ko taqaya; niu sa nomu Kalou: kau na vakaukauwataki iko; io, kau na vukei iko; io, kau na tokoni iko ena ligaqu imatau sa daudina” (Aisea 41:10).
Eso vei kemuni na cauravou e dau sega soti ni rairai maqosa na nomuni isulusulu. Sega ni dodonu me vaka o ya ra cauravou ni ko ni sa tabaki oti ki na matabete tabu ni Kalou. Noda ivosavosa ena so na gauna e salavata sara ga kei na noda isulusulu. Eda vakasinaiti keda ena veika cacawale, ka cavuta wale tu ga vakaveitalia na yaca ni Turaga. Na Kalou sa vosa saqata sara tikoga vakamatata na ka oqo.
Au kila ni ko ni sa rogoca oti na italanoa kei Peresitedi Spencer W. Kimball, ia meu tokaruataka tale mada. E a sa qaravi ena veisele mai valenibula. Sa vakadavori koya oti e dua na nasi cauravou gone ena dua na idavodavo qiqi, ka sa tekivu kauti koya yani. Ni curu yani ena liva e qai tao vakasauri na yava ni qiqi, qai kaburaka mai na cauravou qo eso na vosa ka cavuta wale tu ga kina vakaveitalia na yaca ni Turaga.
O Peresitedi Kimball, e se qai tekivu me vakilai koya mai, e kaya yani, “Isa, Isa! Qori sara ga na noqu Turaga ko sa cavuta tiko vakaveitalia na yacana.”
Dua na vakanomodi levu, sa qai kaya cake mai vakamalua sara na cauravou ena domo malumu, “Au kerea meu vosoti.” (Raica Teachings of President Spencer W. Kimball, t. 198.)
Dua tale na ka e tarai au tiko vakabibi, au gadreva meu wasea vei kemuni. Ena ivakatakila e sa vakaraitaka tu kina na Kalou me ra vakavulici na tamata oqo ena veika kece e rawa ni ra vulica. O Koya e sa vakamatatataka sara tu ga na ka oqo. Ia e dua tiko na leqa sa vaka me laurai tiko mai vakamalua. O Baraca Rolfe Kerr, na Komisina ni Tabana ni Vuli ena Lotu (Church Commissioner of Education), e vakasalataki au ka kaya, ni e Amerika raraba, e 73% ni goneyalewa era vakaotia vinaka nodra vuli mai na koronivuvli torocake ia o ira na cauravou e 65%. Era dau lutu wasoma mai koronivuli na cauravou ni vakatauvatani kei ira na goneyalewa.
Rauta ni 61% ni cauravou era vola yaca me ra laki vuli ki na koliji ni sa biu mai na koronivuli torocake, ni vakatauvatani kei na 72% o ira na goneyalewa.
Ena 1950, e 70% o ira era vola yaca ena koliji era cauravou, ka 30% na goneyalewa; e laurai tiko ni ena yabaki 2010 sa na tiko ena 40% o ira na cauravou ka tiko sara ena 60% o ira na goneyalewa.
Era sa rawa koroi vakalevu na yalewa ena bachelor’s degrees mai vei ira na tagane mai na yabaki 1982 ka levu cake ena koroi ni master’s degrees mai na yabaki 1986.
Sa matata sara tikoga ena veimatanivika oqori, ni ra sa lewelevu cake tikoga na goneyalewa era rawa ka vakavuli mai vei ira na cauravou. Koya gona, au sa na kaya kina vei kemuni na cauravou, tu cake ka vakaraitaki iko mo vakayagataka na ka ni veivakavulici sa ra vakarautaki tu oqo. Ko na gadreva beka mo vakawatitaka e dua na goneyalewa ka uasivi cake na nona kila vakavuli mai vei iko? Eda dau vosa ena “vesuki vakatautauvata” au nanuma ni baleta tiko na vuli.
Kena ikuri na nomu vuli ena vukei iko ena vaqaqacotaki ni nomu qaravi itavi tiko ena Lotu. Dua na vakadidike e a vakayacori ena vica na yabaki sa oti, e vakaraitaka ni torocake ga ni rawa ka vakavuli na kena qaqaco cake na vakabauta, kei na vakaitavitaki ena veika vakalotu.
Au a sa tukuna oti na iyaloyalo vakasisila. E dau rawarawa sara me veivakabobulataki ena kena ka ca duadua o koya qo. Meu wilika mada vei kemuni na ivola au ciqoma mai vua e dua na kena bobula:
“Au wasea vata mada kei iko e dua na ka, au se bera vakadua ni tukuna vua e duatani tale. Au tagane kau sa yabaki 35. Dua na iwiliwili levu ni noqu yabaki vakaqase au sa vesuki tu ena iyaloyalo vakasisila. Dua na madua levu vei au niu tukuna yani na ka oqo, … ia sa dina sara ka ni noqu vesuki tu oqo e tautauvata sara ga kei na dua e daumateni se daukana waigaga… .
“Na vuna levu au volavola yani kina meu tukuna ni sega ni rawa vua na Lotu me cakava duadua na nodra tuberi o ira era dau vakayagataka na iyaloyalo vakasisila. Au a se raica sara na iyaloyalo oqo niu se gone. Au a vakacacani mai vua e dua na tavalequ qase toka vei au, ka vakayagataki na iyaloyalo vakasisila me dreta na noqu vakasama. Au sa vakadeitaka oqo ni kena vakayagataki na ka oqo ki na itabayabaki era sara sa vakavuna tu na noqu sa mai bobula tu ena gauna oqo.
“Au nanuma ni o ira era bisinisitaka tu na ka oqo era na kaya, ni oqo e ka ni galala ni digidigi. Sa sega tu na noqu galala. Au sa vakayalia na noqu galala baleta niu sa sega ni rawa ni vakamalumalumutaka na ka oqo. Au sa coko tu ena dai, kau sa na sega ni rawa ni lako tani mai kina. Yalovinaka, yalovinaka, yalovinaka masuti ira na veitacini ena Lotu, me ra kakua walega ni drotaka tani, ia me ra kauta laivi sara ga na ivurevure ni iyaloyalo vakasisila mai na nodra bula. Sega walega ni ivola kei na mekesini, me ra sogota sara ga na nodra keveli ni sara iyaloyalo ena nodra veivale. Au kila eso e tu vei ira na veika vakaoqo ka ra kaya ni ra rawa ni kauta laivi na tikina e ca, oqo e sega na kena dina… .
“Na iyaloyalo vakasisila kei na veisau ni ka vinaka ki na ka ca e sa vaka e matau ki na noda bula ka ni sa tu kecega e veivanua. Au sa raica na mekesini ni iyaloyalo vakasisila ena veitutu ni sala kei na veisovasova ni benu. Me da vosa vei ira na luveda ka tukuna vei ira ni sega ni vinaka na veika oqo ka sa dodonu me ra kakua ni dau vakaraica ni ra sotava… .
“Kena itinitini, Peresitedi Hinckley, kerea mo masulaki au kei ira ena Lotu ka ra tautauvata kei au, ka sa dodonu me keimami vakaukauwataki ka saga me vakamalumalumutaka na ka ni veivakabobulataki levu oqo.
“Au sega ni rawa ni sainitaka na yacaqu, kau kila ni ko na kila na vuna.”
Sa ka vinaka na komupiuta kevaka walega me vakayagataki vakadodonu. Ia, ni sa vakayagataki me baleta na iyaloyalo vakasisila, se na ka e vakatokai me rumu ni veivosaki, se me dua tale na ka e kauta mai e dua na ka e ca se na vakanananu ca, sa dodonu me tiko na vakatulewa vakavuku ka me sa sogo laivi sara ga.
E kaya na Turaga, “Dou biuta tani sara na ivalavala ca ena kemudou maliwa; dou vakasavasavataki kemudou e mataqu” (V&V 43:11). Sega ni rawa me dua e sega ni kila na ibalebale ni veivosa oqori.
Tomana tale ka kaya: “Raica sa vale ni Kalou na vei vu ni ka; io sa vale ni Kalou na tamata, io sa nona valetabu ia na valetabu sa vakadukadukalitaki, ena vakarusa na Kalou” (V&V 93:35). Sega ni veivakatovolei oqo. Sa vosa e kaya na Kalou ni sa dodonu me da maroroya na yagoda ka drotaka na veika ena veivakaleqai.
Sa yalayala oti tu vei keda o Koya. Kaya o Koya, “Ia, mo yalomalumalumu; raica ena tubera na ligamu na Turaga na nomu Kalou ka vakayacora na nomu kerekere” (V&V 112:10).
Tomana sara: “Raica ena solia vei kemudou na Kalou na nona Yalo Tabu mo dou vuku kina; io ena isolisoli ni YaloTabu e sega ni vakamacalataki rawa, raica e sa sega mada ni vakatakila na ka oqo; mai na ivakatekivu kei vuravura me yacova edaidai” (V&V 121:26).
O keda kece sara e dodonu me da vulica ka vakamuria na vosa kei na ivakarau ni bula nei koya na iVakavuvuli. Ena vinaka talega me da vulica na bula nei Parofita Josefa. Mai na Nona ivakaraitaki eda na vulica vakalevu yadudua sara mai kina na noda dui ivakarau.
Au vakadinadinataka na dina ni veika tawamudu oqo. Au vakadinadinataka ni kevaka me da tovolea me da vakavinakataka cake na noda bula ena laurai na vatukana. Me vakalougatataki kemuni na Kalou, kemuni na taciqu. Au vakadinadinataka na veika oqo ena yalomalumalumu kei na vakavinavinaka, ena yaca i Jisu Karisito, emeni.