Na iTuvatuva Cecere ni Marau
Me vaka ga ni gadreva na ika na wai, o na gadreva na kosipeli kei na veitokani ni Yalo Tabu mo rawa ni marau vakaidina.
Ena gauna au se dikoni kina me vakataka e levu vei kemuni na gone tagane, keirau a taubale cake kei tamaqu ki na dua na uciwai ena ulunivanua me keirau laki siwa. Ni vakabacataka na bati ni siwa ko tamaqu ena mua ni noqu wanisiwa, e tukuna vei au ni dodonu meu na vakacobara na bati ni siwa e gusu ni ika, ena gauna e via covuta kina na baca ke sega ena dro. Au sega ni kila na icakacaka ni kena vakacobari na bati ni siwa, e qai vakamacalataka vei au ni bati ni siwa e vinakati me dei na kena vakacobari ena gusu ni ika ena gauna e via covuta kina na baca, de na qai kureitaka tani mai na bati ni siwa ia na bati ni siwa ena vakacobari kevaka au dreta totolo ki muri na kau ni siwa ena gauna e via covuta kina na baca na ika. Oqo au via siwata sara ga e dua na ika, kau sa mai tucake tu yani e bati ni uciwai ka drodro sobu mai na ulunivanua ko ya, tu vakarau vinaka sara, vakadre matua na veitiki ni yago kece, ka mai waraka tu e dua na ivakaraitaki ena mua ni noqu kau ni siwa me vakaraitaka ni sa via covuta na baca na ika. Ni oti ga e vica na miniti au vakila na yavavala e mua ni noqu kau ni siwa, ia ena gauna vata ga ko ya, au dreta vakasauri ki muri na noqu kau ni siwa ena noqu igu taucoko ka namaka e dua na veidre bula vata kei na ika. Dua na ka vakaloloma au raica vua na ika oqo—coba dei toka ga e gusuna na bati ni siwa—e yaviti mai wai ki loma ni macawa me ulabaleta na uluqu, laki tavulaki ka veimoqeyaki tu ena dela ni qele vaka ki dakuqu.
E rua na ka au vulica rawa ena ka au sotava o ya: iMatai, ni dua na ika e kau tani mai wai ena laurai ni sena, tutuna, kei na buina e cakacaka vinaka ga e wai, eratou sega ni yaga e vanua mamaca. iKarua a kalouca na ika au siwata ena siga ko ya, ni a vakacalai ka vakaisini ena ka e raica ni ka e rui yaga sara ia e dua na ka e rerevaki—vakavu mate—me ka yaga se rairai na kena levu ni nona viakila, e vakavuna me raica vakavoleka ka rairai baria.
Kemuni na taciqu lomani ena Matabete i Eroni, e rua na lesoni e rawa ni vulici mai na ka oqo: iMatai, na yavutu ni inaki ni bula, me vaka e vakavulica ko Liai, “me rawata na marau” (2 Nifai 2:25). Me rawa ni rawati na marau, e dodonu mo kila ni, ko luvena na Tamamu Vakalomalagi, o vakaivotavota ena itovo vakalou kei na isolisoli vakayalo—me vaka ga ni gadreva na ika na wai, o na gadreva na kosipeli kei na veitokani ni Yalo Tabu mo rawa ni marau vakaidina. Baleta ni ko sa nona kawa na Kalou (raica Cakacaka 17:28), e sega ni salavata kei na nomu ivakarau tawamudu, mo ivalavala ca ka nanuma ni dodonu. E sega ni dodonu me vakakina. E tiki ni nomu DNA vakayalo, me vaka o ya, ni vakacegu, reki, kei na marau ena nomu ka na vakatau ena nomu bulataka na kosipeli.
Na veibasai, na vakatau ni nomu digia mo kua ni bulataka na kosipeli, ko na rarawa me vaka na ika e lako tani mai wai (raica Mosaia 4:30). Me vaka e tukuna ko Alama vei Korianitoni na luvena:
“Raica au sa kaya vei iko, ko na sega ni kune marau ena nomu ivalavala ca.
“Ia mo kila na luvequ; era sa vesuki ena rarawa kei na ivalavala ca na tamata kecega; era sa sega ni qarava na Kalou se muria na nona vunau; raica era sa sega ni rawata kina na marau” (Alama 41:10–11).
Mo kila ni ko ira era sa sega ni qarava na Kalou e vuravura—ena dua tale na kena ivosavosa, me ra bese ni bulataka na Nona kosipeli, o koya gona, sa yali kina vei ira na veitokani ni Yalo Tabu—sa yaco me da tu ena itutu e veisaqasaqa ki na inaki ni marau. Na kosipeli i Jisu Karisito, e dodonu me—kilai ni oqo e lewedua, kena ibalebale ni oqo ga na—“ituvatuva cecere ni marau” (Alama 42:8). Ke o digia e dua tale na bula se saga mo bulataka ga eso na tiki ni kosipeli e rawarawa, na digidigi oqo ena kauta tani mai vei iko na reki kei na marau e taucoko ka lagilagi ka navuca tu vei iko na Tamada Vakalomalagi dauloloma kei na Luvena.
Na ikarua ni lesoni ni noqu laki siwa: me vaka ga e dua na ika ena uciwai ena ulunivanua me qarauna na veibacani e biu tu e nona gaunisala me levea na laudre tani mai wai, sa vakakina ko iko kei au me daru yalomatua me daru levea kina na laudreti tani mai na marau kei na bula e yavutaki ena kosipeli. Nanuma ni, nona vakadikeva ko Liai, na tevoro “raica sa segata ko koya me ra rarawa na tamata kecega me vakataki koya” (2 Nifai 2:27, 29) ni da vakayacora na ka dukadukali kei na cakacaka ca. Ia, mo kua ni vakacalai ena nomu vakaitavi vakalalai ena ka sega ni yaga, ni ko Setani e vakarau tu me vakatokara na bati ni siwa. Ena kena leqataki na bolebole ni bati ni siwa e tokari vaqaseqase se vakidacala, ka vakauqeta na parofita makawa o Moronai—o koya ka raica vakaidina na gauna oqo (raica Momani 8:35)—me vakasala vakadodonu sara vei iko kei au: “… kakua ni taura na isolisoli ca se na ka sa tawa savasava” (Moronai 10:30; vakamatatataki).
E levu na ka cala ka tawa savasava ena ivakatagi, Initaneti, iyaloyalo yavala, mekesini, kei na alakaolo, waigaga ni veivakamatenitaki, kei na tavako. Me vaka e dua ga na ka cala se tawa savasava, kemuni na noqu itokani gone, ni kua ni tara! E vakamatavulo tu mai ena veika ko ya na bati ni siwa e vakatokari vaqaseqase ka veivakidacalataki vakalevu mai na ka ko namaka—ka rawa ni dua na ka na bibi ni yaluma ni luvati na bati ni siwa. E vakamacala kina ko Alama kivei koya na cakacaka ni veivutuni e “voleka sara ni mate” (Mosaia 27:28); oi, e kaya ni “sega [na ka] me vakatauvatani vata rawa kei na levu ni noqu yaluma” (Alama 36:21).
Eso beka vei kemuni e a sa vakaitavi beka ena so na cala se tawa savasava. Vakanuinui ena dina vakalotu ka isitori ni nona vakabauta na Turaga ko Alama, e vukei koya me veivutuni, ia na vua dodonu ni nona veivutuni e sotava na marau o ya ena kaukauwa ni Veisorovaki i Karisito me vaka na nona vosa, “sa sega na ka e vakatautauvatani rawa kei na levu ni noqu marau” (Alama 36:21). Ena vaka ko ya na ka ko sotava ni ko vakasaqara na Turaga ena veivutuni.
Oi keda yadudua e ganita me da veivutuni ena dua na kena ivakarau se dua tale. Ni ko veivutuni e kena ibalebale mo kitaka na veisau dina ena nomu bula e gadreva na iVakabula mo cakava mo marau kina. Na veivutuni e ivakavuvuli vakarawa ka levu ni kosipeli: ni vakavuna na nomu veisau, na nomu vakabauta na Turaga na nomu iVakabula vaka ko ya, me vaka e tukuna ko Ilamani: “Na tamata me ra bula kina ena nona kaukauwa na iVakabula” (Ilamani 5:11). Ni ko vakasaqara mo veisau mo nanuma ni noda iVakabula dauloloma, ka tukuna ko Alama, e tu vua, “na kaukauwa me vakabulai ira na tamata kecega era sa vakabauta na yacana, ka vuataka na vua e kilikili kei na veivutuni.” (Alama 12:15). Oqo e vunau kaukauwa levu, veisereki ka vakasinaiti ena vakanuinui.
Na Parofita o Josefa Simici, e vulica mai na ka ga e sotava, ni Turaga, e namaka me da levea na rarawa bibi ena bulataki ni Nona kosipeli ka vinakata me da kila ni da rawa ni veivutuni. Ena nona vakayalia na ilavelave ni vakavakadewa e 116 na draunipepa ni iVola i Momani ena nona vakayacora ga na nodra gagadre na tamata, e a rarawa sara vakalevu ko Josefa. E a tukuna vua na Turaga: “E dodonu mo rokova ka muria; io ena qai dodoka mai na ligana me vakaukauwataki iko, mo vorata kina na gasauvidi kecega ni tevoro; raica ena vukei iko ena gauna kecega ni nomu leqa” (V&V 3:8). E vaka ko ya na nomuni kisi yadudua na gonetagane: mo ni yalodina ena qai tokoni kemuni na liga ni Kalou. E a qai tukuni tale vua na Parofita—me vakataki keda yadudua—kevaka e veivutuni ena vosoti. Raitayaloyalotaka na reki e yacovi koya ni rogoca na Turaga ni kaya, “Mo nanuma tiko, ni sa yalololoma sara na Kalou; ia, mo veivutunitaka na nomu cala ni ko a beca na noqu ivakaro; io ko na digitaki tale ka lesi mo vakacavara na cakacaka” (V&V 3:10).
Na noqu veisureti vei kemuni yadudua ena bogi nikua mo ni bulataka na kosipeli mo ni na marau dina, levea na ca kei na rarawa bibi e kauta mai; ia kevaka ko sa vakaitavitaki iko ena so na cala se na ka tawa savasava, cakava na veisau e vinakata vei iko na Turaga, me baleta na nomu marau—kau vakadinadinataka ni o Koya ena vukei iko mo rawa ni rawata ena Nona kaukauwa e sega na ka me vakatautauvatani vata.
Ni o ciqoma na veisureti oqo, ko na kumuna na marau tudei ka tara na yavu ni nomu bula ena uluvatu ni noda iVakabula, ia kevaka ena gauna e cokai iko kina na moto ni vu ni ca kei na draki ca ni vuravura, ena me vaka e vakavulica ko Ilamani sega, “ni rawai kemudrau se dreti kemudrau sobu ki na ikeli ni rarawa kei na yaluma tawamudu, ni sa dei sara na uluvatu drau sa tara kina; ia kevaka sa tara cake na tamata ena yavu oqo, ena sega ni bale rawa” (Ilamani 5:12; vakamatataki). Na Turaga ko Jisu Karisito, au vakadinadinataka ena vuni yaloqu: o Koya e Uluvatu, ka yavu tudei ni marau kei na veivakabulai. E bula tiko ko Koya, e soli vua na lewa kecega mai lomalagi, kei vuravura, e kila na yacamu, ka lomani iko ko Koya. Ena yaca tabu ni Turaga ko Jisu Karisito, emeni.