Vakavolivoliti Au Na Nona Loloma ka Tawamudu
Kemuni na taciqu, au kila ni [Tamada Vakalomalagi] e lomani keda, me vaka talega kina na Luvena, o Jisu Karisito. Na loloma o ya ena sega ni veisau—ena dua tu ga.
Ena noqu a ciqoma na ilesilesi oqo, au nanuma tiko na noqu a vakamamasu vua na Tamada Vakalomalagi me vukei au meu kila se cava era gadreva na taciqu ena Lotu. Au a ciqoma ena dua na ivakadinadina kaukauwa ni o keda, na Luvena yalewa, e dodonu me da kila ni lomani keda o Koya. E dodonu me da kila ni o Koya e raica na vinaka e tu vei keda. E vakauqeti keda me da tosoya ki liu na noda vakila na Nona loloma, vakadeitaki keda ni da Nona, ka vakataudeitaka vei keda ni maroroi keda tiko o Koya, veitalia kevaka eda caka cala ka sotava na malumalumu ni vakatovolei.
Au a vakataudeitaka na itukutuku oqo ena noqu wasea na noqu ivakadinadina ena soqoni ena yakavi ni Sigatabu ni koniferedi raraba ni Epereli ena 2002. E a tukuni vei au ena mataka o ya ni o Elder David Haight e rairai sega ni rawa me vakaitavi ena koniferedi. Kevaka me na yaco vakakina, au sa na wasea tiko na noqu ivakadinadina me lima na miniti. Au a masulaki Elder Haight sara vakaukauwa ena siga o ya! Ena mataka ni Sigatabu au vakaraici koya toka ena nona lako mai ki na Vale ni Koniferedi, sa tekivu meu vakacegu—me yacova sara ga na gauna e curu yani kina ena nodra lagasere tiko na ivavakoso. Niu sa tucake tu ena itutu ni vunau ena yakavi o ya, e a boko tu na sikirini ni vosa! Ia e tovure tikoga mai ena noqu vakasama kei na yaloqu na itukutuku sa ikoya ni ra gadreva na marama me ra vakila na loloma ni Turaga ena nodra bula ni veisiga. Ka sa ikoya na itukutuku au kila ni gadrevi meu vakadewataka ena siga o ya, ka sa tomani tiko me noda itukutuku.
E dau vakayalomaluataki au na nomuni dauloloma, nomuni kauwai vakayadudua ena itukutuku oqo. Vinaka vakalevu na nomuni wasea tiko na vakalougatataki ni nomuni bula ena itukutuku oqo. Na nomuni vosa e sa vakadeitaka ni o keda vakayadua eda votai kina—kei na veigagadre–me vakila na loloma ni Turaga ena nona bula ni veisiga.
E lomani keda tu na Tamada Vakalomalagi ni bera noda lako mai ki na vuravura oqo. Kemuni na taciqu, au kila ni lomani keda o Koya, ka vakatalega kina na Luvena o Jisu Karisito. Na loloma o ya ena sega ni veisau—ena dua tu ga. E rawa mo ni vakararavi kina. E rawa mo ni vakanuinui kina.
Me vaka ga e tukuna vei keda na ibole ni iSoqosoqo ni Veivukei ni “sega ni mudu na loloma,” ka sa dodonu me da vakabauta ni loloma i Karisito ena sega vakadua ni biuti keda. Na veika kece eda cakava ena iSoqosoqo ni Veivukei e dodonu me vakaraitayaloyalotaka na loloma ni noda iVakabula kei na loloma ni Tamada Vakalomalagi. Na loloma vakaitamera oqo e dodonu me ivurevure ni noda vakayarayarataki me da qaravi ira tale eso. E dodonu me noda yavu ni itekitekivu ka noda itinitini talega!
Au kila e dua na tina gone e lima na luvena gonelalai ka a qirita e dua na itokani ka qase cake vua, e dau nona qasenivuli yaga, ka taroga, “E rawa beka ni daru taubale vata vakabalavu?” E kila na nona itokani ni kena ibalebale o ya ni gadreva na veitalanoa. Ni veimama na taubale ena gaunisala cowiri ka walu na maile na kena balavu, e qai kaya mai na tina gone, ‘au sega ni vakabauta ni lomani au na Tamada Vakalomalagi; au sa cakava e levu na cala ena noqu bula. E sega ni rawa meu vakila ni kilikili kei au na Nona loloma; e rawa vakacava me lomani au o Koya?” Kemuni na taciqu, na marama oqo sa veiyalayalati ena valetabu ka sa bulabula sara ena Lotu. Ia e se vakila tikoga ni sega ni kilikili kaya na Nona loloma. E a sauma vakatotolo mai o tuakana, “Io, e lomani iko dina o Koya. O iko na Luvena yalewa.”
Eda dau besetaka vakalevu cake li mai na noda via ciqoma na loloma ni Turaga ka dau sovaraka ka binia tu mai vakalevu sara kivei keda? Eda dau nanuma li ni dodonu me da taucoko tu ga me rawa ni da votai ena Nona loloma? Mai na noda vakila ni sa “vakavolivoliti keda na nona loloma ka tawamudu,”1 eda vakila na noda taqomaki, ka da kila ni sega ni gadrevi me da taucoko mai vakasauri. E dodonu me da kila ni taucoko ni bula e yaco mai vakamalua. Sa ikoya oqo e dua na kosipeli ni toro cake tawamudu, ka sa dodonu me da vakavinavinakataka tiko na noda tubu. Tawamudu e kena ibalebale “sega na kena itekitekivu se itinitini” o koya gona e sa vakavolivoliti keda tu ga na Nona loloma ena veisiga. Nanuma ena dua tu ga—ena gauna mada ga eda sega ni vakila kina. Au taleitaka na ivakamacala nei Nifai ena isolisoli cecere oqo, “Na loloma ni Kalou sa vakararamataka na yalodra na luve ni tamata; io sa ikoya na ka sa uasivi duadua ka sa uasivi duadua vei ira na tamata.”2 Au vakadinadinataka ni dina na ka oqo.
Au kila ni so e dredre vei ira me ra raitayaloyalotaka se vakacava sara tu mada na Nona loloma. Vakasamataka mada e dua na tina vata kei na luvena se qai sucu walega. Na nona iroqo katakata, veitaqomaki, veikaroni ka veivakacegui e dua na tinanigone e rawa ni vukei keda me da kila ni da vakavolivoliti ena liga ni Nona loloma. E dua na tacida uabula ni iSoqosoqo ni Veivukei e vola, “Ena loloma duadua walega nei tinaqu au a toro voleka mai kina meu kila na rabailevu kei na kaukauwa ni loloma ni iVakabula.”
Kemuni na tina, e rawa beka mo ni raica na kena yaga sara vakalevu na nomuni vakatavulica na dina oqo kivei ira na luvemuni? Ena nomuni vakavolivoliti ira na luvemuni ena nomuni loloma, era na raica na veivakaraitaki ni Nona loloma. E uqeti keda o Peresitedi Gordon B. Hinckley me da “lomana na Turaga na [noda] Kalou, ka lomana na Luvena, ka dau vakavinavinakataka tikoga na nodrau lomani keda. Ena gauna era sa seyavu yani kina na loloma tale eso, ena serau tiko mai na kena o ya, sega ni vakaiyalayala, na loloma ni Kalou tawamudu me baleti keda vakayadua kei na loloma ni Luvena, ka a solia na Nona bula”3 ena vukuda.
Na tina ka kila na nona veiwekani vata kei na Kalou ena vukei ira na luvena me ra kilai Koya ka me ra vakavolivoliti ena Nona loloma. E tarai au dina na nona itukutuku e dua na goneyalewa ka wasea ena veibulu vua na tinana yabaki 100: “Ena noqu yabaki tinivakacaca ka tovolea tiko meu tuva na ituvatuva ni noqu kalasi, au na dau gole sara yani ki valenikuro ka yayani tiko kina o Tinaqu. Au na vakaraitaka sara na veidigidigi e rawa ni caka me baleta na noqu vuli. Ena vakarogoci ira taucoko sara. Keirau na veivosakitaka na veika e rawa me caka ena qai kaya, ‘Sa vinaka, Cathy, o sa masulaka beka na ka oqori?’ Au madualaka sara ga na ka oqori, au na qai dau galu vakalailai kau qai kaya yani. “E dodonu mo dau masulaka na ka kecega?’ E sauma vakarawarawa ga mai, ‘Io, e vakakina.’”4
E dau vakatudaliga na tina oqo. E dau wasea na nona vakabauta na Turaga, e vakaraitaka e dua na ivakaraitaki, e wasea na veika e namaka vei luvena goneyalewa me tomana tikoga na nona dauvakanamata vua na Turaga. Ena noda volekata yani na Turaga, eda vakila na Nona loloma ni dreti keda vata vakavoleka. Kemuni na tina, ni vakatavulici ira na luvemuni me ra dau okata na Turaga ena nodra bula, ka vukei ira me ra dau raica na Nona veivakayarayarataki ni loloma.
Keirau a ciqoma vata kei tinaqu na neirau veivakalougatataki vakapeteriaki. Au se qai yabaki 20, ka 49 o Tinaqu. Au na sega ni guilecava rawa na siga o ya—ena nona a tabaka na ului Tinaqu o peteriaki ka tukuna vua na wasoma ni gauna sa vakabulai mai kina ena vuqa na veimulomulo kei na momosi ni isema ni yago, mate ni uto, kei na vuqa tale na mate. E wilika lesu tale na nona bula, na iwiliwili ni gauna e vakalougatataka kina na nodra bula eso tale. E tukuna vua na veika tale eso e vakarautaka tu na Turaga me baleti koya ka solia na nona veidusimaki ena veika e gadrevi me cakava. Au kila na bula nei tinaqu, kau vakarogoci peteriaki, e sega ni kilai koya vakavinaka, ni vakamacalataka tiko na nona bula. Na ka au sotava oqo e vakadinadinataka vei au ni bula tiko na Kalou, ni lomani keda o Koya, ka ni kilai keda talega vakayadudua o Koya. Au vakila na loloma ni Turaga kivei tinaqu—ka vakakina koi au—ena dua na siga guiguilecavi dredre o ya.
Na ivakadinadina uasivi duadua ni loloma ni noda iVakabula kivei keda sa ikoya na Nona Veisorovaki. Na Nona loloma e vuabale vata kei na yalomalua, dauvosota, rarawa vakadede, yalololoma kei na veivosoti.
Vei keda na buinigone ena gauna oqo, e dua tiko na noda itavi vakalou sai koya me da vakavolivoliti ira na makubuda ena loloma. Ena gauna e vosa vakaviavialevu kina e dua na goneyalewa yabaki tolu, e dusimaki koya o buna, “Kua ni vosa vaqori vei bumu—baleta ni da na veitokani tu me milioni vakamilioni na yabaki.” E sega beka ni dua na ka e uasivi duadua me da budra na gone? Mo ni nanuma, kemuni na taciqu, na loloma kei na veiyalayalati e vauci keda vata tu me matavuvale tawamudu.
Na loloma ni Turaga e wasoma na kena dau vakadewataki mai vei ira tale eso ena nodra sauma na veivakauqeti ni Yalotabu. Eda sa rogoca ka vakamuria tiko beka na veivakauqeti oqori?
Ena vuku ni leqaleqa vakailavo, a toki kina mai na nona vale kei na nona tabanalevu lomani ni oti e 22 na yabaki nona vakaitikotiko voli kina e dua na taciqu. E sa bau mosimosi dina oqori. Ena imatai ni Sigatabu ena nona tabanalevu vou e a kaya, “Au vakila noqu galili, e dina ga niu kila toka e vica na tamata. Au a dua vei ira na imatai meu yaco yani ena iSoqosoqo ni Veivukei ena mataka o ya. Au a dabe toka e kea ka vakaraici ira na taciqu ena nodra curu yani ka dabe ena nodra idabedabe. E vaka me ra vinakata cake me ra yadua na iyatu idabedabe, ka sega ni yadua ga na idabadabe. Era sega ni dabe vata ka ra sega ni dabe vata kei au. Au vakila niu vaka e dua na yanuyanu.” Kemuni na taciqu, na cava na vuna eda cakava kina o ya kivua tale e dua?! E tomana na taciqu, “E a qai curu mai o Lisa. E waqa na matana ni raici au ka lako vakusakusa sara mai vei au, dabe sobu e yasaqu, ologi au e ligana ka mokoti au vakaukauwa. E veivakurabuitaki na kena rawa me vakaibalebale na veika lalai vaka o ya. Na nona veiciqomi”—kau rawa ni tomana, na nona loloma—“e kauta tani na noqu galili.”
Au ririkotaka ni so na gauna e rawa walega ni da raica na loloma ni Turaga ena veika lelevu ena noda bula; e dodonu talega me da dau raica na Nona loloma ena veika lalai sara mada ga. Kakua ni beca na nomu rawa ni wasea na Nona loloma mai na dua na kena ivakadewa rawarawa, ka dina me vaka na dabe volekata e dua tale na tacida ka vakayacora e dua na ka me vakila kina o koya ni marautaki.
O vakila tiko li na loloma ni Turaga ena nomu bula? Na noqu vakila na Nona loloma e rawa me duidui mai na kena o sotava. Na kena dina sai koya mo yaco mo kila na sala o vakila rawa kina na loloma o ya. Kei na gauna ga o sa vakila kina, tovolea sara mo wasea?
Me vaka niu lewe tiko ni mataveiliutaki keitou a sikova na veivakarusai ena Gulf Coast salamuria na Cagilaba o Katrina. Ena dua na yasanibuka ena dua na yakavi, niu tucake tu ena itutu ni vunau au a vakila na veivakauqeti ni ra gadreva kece na taciqu vakayadua ka ra tiko rawa, e dua me lako yani ka vakaukauwataki ira. Ni suka na soqoni, keitou a tucake yadua tu e katuba o Sisita Hughes, Sisita Pingree kei au tu ka mokoti ira vakayadudua na marama ena nodra sa curu yani ki tautuba. Keitou a vakayacora ga me keitou vakaraitaka kina na neitou lomani ira. Ki na dua ga vei ira na marama o ya e vakarorogo tiko mai ena bogi nikua, ena neitou a biuta mai na valenilotu keitou vakila na veivakavoui ni loloma ni Kalou o ni a wasea vata kei keitou. Vinaka vakalevu na nomuni dau veikauwaitaki tiko vakaikemuni—vakakina vei keitou na lewe tolu!
Ena noqu masu e veimataka, au kerea na Tamada Vakalomalagi me vakasinaiti au ena Nona loloma me rawa niu cakava na Nona cakacaka ena igu e kaukauwa cake. Au kila niu sa vakalougatataki tiko me baleta na kerekere ni veisiga oqo. Me vaka ni da veitacini ena iSoqosoqo ni Veivukei, e dodonu me da tovolea me da vakaraitaka na loloma i Karisito o koya ka dau segata tu ga me vakamarautaka na Tamana ena nona vakayacora na Nona lewa. Kemuni na taciqu, e dodonu me da saga vakaukauwa me da muria na Nona ivakaraitaki uasivi—me da vakaraitaka na loloma vakaoqo mai na noda vakasama, noda ivosavosa, noda ivakarau—ni sa ikeda sara tikoga na veika kece sara eda vakayacora. Me da kakua ni vakatara na dokadoka se veivakatawayagataki, kocokoco se qaciqacia vakatamata me sosomitaka na noda dolele yani kivei ira tale eso ena loloma. Na kena mana kei na kena dina, e dodonu me taumada noda vakatara me da vakavolivoliti ena loloma ni Kalou. Na sala vinaka duadua eda rawa ni cakava kina na ka oqo sa ikoya na noda karona na Veisorovaki tawamudu ni iVakabula. E sa na qai rawa kina vei keda me da vakarabailevutaka na noda vakavolivoliti oqori me okati kina na noda matavuvale kei ira kece tale eso. Sai lomalagi sara ga na veivakavolivoliti oqo.
Kemuni na taciqu lomani, me vakalougatataki kemuni na Turaga mo ni vakila na nona loloma e veisiga ena nomuni rokova na nomuni veiyalayalati, ni veilomani ka vakaqaqacotaka na nomuni veimatavuvale. Ena yaca i Jisu Karisito, emeni.