Faamalosi Pea
O loo i ai se mea e tasi o loo faamoemoe mai le Alii tatou te faia, tusa lava pe o a o tatou faigata ma mafatiaga: O loo faamoemoe mai o Ia ina ia tatou faamalolosi pea.
Ua loa ona ou ola ou te iloa ai mo au lava le tele o luitau o le olaga. Ua ou iloaina ni tagata lelei o e na onosaia ni tofotofoga faigata, ae o nisi, e foliga mai e tau leai ni o latou faafitauli i le olaga.
E masani lava ona tuufesili i latou o e tauivi ma faigata i le fesili, “Aisea ua tupu ai lenei mea ia te au?” Latou te faaaluina le tele o po e le mamoe i le mafaufau pe aisea latou te lagonaina ai le tuua toatasi, mai, lotovaivai, mafatia, po o le loto nutimomoia.
O le fesili, “Aisea ua tupu ai ia te au?” e mafai ona avea o se fesili e faigata ona taliina ma e masani ona oo atu ai i le le fiafia ma le leai o se faamoemoe. O loo i ai se fesili e lelei atu tatou te fesili ai ia i tatou lava: O lena fesili o le, “O le a se mea e mafai ona ou aoaoina mai lenei aafiaga?”
O le ala tatou te taliina ai lena fesili, o le a iloa ai o tatou ituaiga olaga e le gata i lenei lalolagi, ae faapena foi i le faavavau a sau. E ui lava ina eseese o tatou tofotofoga, ae o loo i ai se mea e tasi o loo faamoemoe mai le Alii tatou te faia, tusa lava pe o a o tatou faigata ma mafatiaga: O loo faamoemoe mai o Ia ina ia tatou faamalolosi pea.
O Le Mataupu Faavae o le Tumau seia oo i le Iuga
O le talalelei a Iesu Keriso o loo aofia ai le tumau seia oo i le iuga o se tasi o ona mataupu faavae mautu. Na aoao mai Iesu: “A o le tumau seia oo i le gataaga, e faaolaina lea.”1 Ma: “afai tou te tumau pea i lau mataupu, o ou soo moni outou.”2 O nisi ua manatu o le tumau seia oo i le iuga, ua na o le puapuagatia e ala i luitau. E sili atu nai lo lena—o le faagasologa o le omai ia Keriso ma faaatoatoaina ia te Ia.
Na aoao mai e le perofeta o le Tusi a Mamona o Nifae: “O le mea lea, e tatau ai ona outou fetaomi atu i luma ma le faamaoni ia Keriso, ina ua i ai le faamoemoe atoatoa lelei, i le ma le alofa atu i le Atua atoa ma tagata uma. O lea, afai tou te fetaomi atu i luma, o fiafia i le afioga a Keriso, ma tumau lava e oo i le iuga, faauta, o loo faapea ona fetalai mai le Tama: Tou te maua le ola faavavau.”3
O le tumau seia oo i le iuga, o le mataupu faavae o le faaauau pea i le ala lea e tau atu i le ola faavavau, pe a uma ona ulufale atu se tasi i le ala e ala i le faatuatua, salamo, papatisoina ma le mauaina o le Agaga Paia. O le tumau seia oo i le iuga, e manaomia ai o tatou loto atoa, pe o le faapei ona aoao mai le perofeta o le Tusi a Mamona o Amaleki, e tatau ona “o mai ia te ia, ma tuu mai o [tatou] agaga atoa e fai ma taulaga ia te ia, ma ia tutumau i le anapogi ma le tatalo, ma ia tutumau e oo i le iuga; o soifua lava le Atua, e faaolaina [tatou].”4
O le tumau seia oo i le iuga, o lona uiga ua tatou faavaeina o tatou olaga i aoaoga faavae o le talalelei, ma tausia ia aoaoga faavae taliaina o le Ekalesia, auauna atu ma le lotomaulalo i o tatou uso a tagata, ola i ni olaga e faapei o Keriso, ma tausia a tatou feagaiga. O i latou o e tumau e mausali, faatuatuaina, lotomaulalo, alualu pea i luma, ma e aunoa ma le pepelo. O a latou molimau e le faavaeina i vaaiga faalelalolagi—o loo faavae i le upu moni, poto, aafiaga, ma le Agaga.
O Le Faataoto i le Lulu Saito
Na faaaoga e le Alii o Iesu Keriso le faataoto faigofie i le lulu saito e aoao ai le mataupu faavae o le tumau seia oo i le iuga.
“O le lulu saito, e lulu ia i le upu.
“O i latou ia i le auala, e luluina ai le upu; a latou faalogo ai, ona alu ane loa lea o Satani, ma aveeseina le upu na luluina i o latou loto.
“E faapea foi i latou na luluina i le mea papa; o i latou ia ua faalogo i le upu, ona talia loa lea ma le fiafia;
“A e peitai ua leai ni o latou aa, ua faaletumau i latou: pe a tupu le puapuaga, po o le sauaina ona o le upu, ona latou tausuai loa lea.
“O i latou foi sa luluina i le vao tuitui; o i latou ia e na faalogo i le upu,
“A o le loto popole i mea a lenei lalolagi, ma le pepelo o le oa, ma le tuinanau i nisi mea ua oo atu i totonu o le loto, ua fetinaiina ai le upu, ona le fua mai lava lea.
“A o i latou na luluina i le eleele lelei; o i latou ia e ua faalogo i le upu, ma latou talia, ma fua mai e taitolugafulu i nisi, e taiono sefulu i nisi, e taiselau foi i nisi.”5
O lenei faataoto ua faamatalaina ai ituaiga o eleele na luluina ma tausiaina ai fatu o le upu moni. O ituaiga eleele taitasi ua faatusaina i le maualuga o lo tatou tautinoga ma le gafatia ona tumau.
O le ituaiga eleele muamua, o le “auala,” ua faatusaina ia i latou e faalogo i le talalelei, ae le tuuina atu le avanoa i le upu moni e mauaa ai.
O le ituaiga eleele lona lua o le, “mea papa,” ua faatusaina ia i latou ua auai i le Ekalesia, o e o le faailoga muamua lava o le ositaulaga po o faafitauli, e sosola ese ai ma le faatausuai, e le naunau e totogi le tau.
O le ituaiga eleele lona tolu, sa “luluina i le vao tuitui,” ua faatusaina i nisi o tagata o le Ekalesia o e faalavelaveina ma lofituina i popolega, o oa ma tuinanau o le lalolagi.
Ma le mulimuli, o i latou i luga o le “eleele lelei,” o tagata ia o le Ekalesia ua atagia i o latou olaga lo latou avea ma soo o le Matai, o o latou aa e o atu maualalo i le eleele o le talalelei, ma faapea ona fua mai ai le mano o fua.
I le faataoto i le lulu saito, na faailoa mai ai e le Faaola ia toatuga e tolu i le tumau, lea e mafai ona faaleagaina ai o tatou agaga ma taofia ai lo tatou alualu i luma e faavavau.
O le toatuga muamua lava o le tumau, “o le loto popole i mea a le lalolagi,” o le mea moni o le faamaualuga.6 O le faamaualuga na te faalala mai lona ulu matagā i le tele o auala faatafunaina. Mo se faataitaiga, o le faamaualuga i le atamai ua matuai taatele i o tatou nei aso. O nisi tagata ua faaeaina i latou lava i luga ae o le Atua ma Ana auauna filifilia ona o lo latou aoaoina ma tulaga faaleaoaoga ua ausia. E le tatau ona tatou faatagaina ona faamuamua lo tatou atamai i o tatou agaga. E mafai e lo tatou atamai ona fafagaina o tatou agaga, ma e mafai e o tatou agaga ona fafagaina o tatou atamai, ae a tatou faatagaina le faamuamua o o tatou atamai nai lo o tatou agaga, o le a tatou tautevateva, saili masei, ma e ono aveesea ai foi a tatou molimau.
O le poto e taua tele, ma o se tasi lea o nai mea iti e mafai ona tatou aveina atu faatasi i le olaga a sau.7 E tatau ona tatou aoao pea. Ae peitai, e tatau ona tatou faaeteete ina ia aua nei tatou lafoaiina lo tatou faatuatua i le faagasologa, aua o le faatuatua na te faaleleia moni lo tatou gafatia e aoao.
O le toatuga lona lua e oo atu i le tumau “o le taufaasese o oa.” E tatau ona tatou faamutaina lo tatou mananao i oa. Ua na o se mea e ausia ai se taunuuga sa naunau i ai, ma o le taunuuga laualuga o le fausiaina lea o le malo o le Atua. Ou te manatu, ua sili atu le popole o nisi i le ituaiga o taavale latou te feoai ai, o lavalava taugata latou te ofuina, po o le telē o le latou fale e faatusatusa i [fale] o isi, ma faapea ona latou le iloaina ai mea e sili atu ona taua.8 E tatau ona tatou faaeteete i o tatou olaga i aso taitasi, ina ia tatou le faatagaina le faamuamua o mea a lenei lalolagi nai lo mea faaleagaga.
O le toatuga lona tolu e oo atu i le tumau na tau mai e le Faaola “o le tuinanau i nisi mea.” O le mala o tusi ma ata mataga ua siomia atoa ai i tatou nai lo se isi lava taimi. O tusi ma ata mataga e aumaia ai taunuuga inosia o le ola le mama, o aiga ma olaga malepelepe. O tusi ma ata mataga, o le a faavaivaia le malosi faaleagaga e tumau ai. O tusi ma ata mataga, e pei uma lava o le oneone mimiti. E faigofie lava ona maileia ma lofituina ai oe i le taimi lava e te tuvae ai i totonu, ma e te le iloaina le matautia tele. O le mea moni lava, o le a e manaomia le fesoasoani e aluese ai mai le oneone mimiti o tusi ma ata mataga. Ae o le a sili atu le lelei o le le tu ai i totonu. Ou te augani atu ia te outou, ina ia faaeteete ma mataala.
O Le Tumau seia oo i le Iuga O se Mataupu Faavae mo Tagata Uma
O ni nai vaiaso a o lei maliu Peresitene Hipa J. Kurene, na asiasi atu ai se tasi o Uso ia te ia i lona fale. A o lei tuumuli lea alii, na tatalo Peresitene Kurene: “Le Atua e, faamanuia mai ia te au ina ia aua nei aveesea lau molimau ma ia tumau faamaoni seia oo i le iuga!”9 E mafai ona e vaai faalemafaufau ia Peresitene Kurene, o se tasi o perofeta maoae o le Toefuataiga, o le Peresitene o le Ekalesia mo le toeitiiti atoa le 27 tausaga, o tatalo ina ia mafai ona ia tumau faamaoni seia oo i le iuga?
E leai se tasi e tuusaunoa mai aafiaga ma faaosoosoga a Satani. Aua e te nenee ma faapea ane ua e sao mai aafiaga a le fili. Ia mataala ina ia aua nei e pau atu i ana togafiti. Ia faalatalata atu i le Alii e ala i le suesueina o tusitusiga paia i aso uma ma tatalo i aso uma. E le mafai ona tatou nofonofo ma faapea ane ua mautinoa lava lo tatou faaolataga. E tatau ona tatou galulue ma le naunautai i o tatou olaga atoa.10 O upu nei a Peresitene Polika Iaga e uunaia ma faamanatu mai ai ia i tatou, e le mafai ona tatou lafoaia le tauivi e tumau: “O alii ma tamaitai o e mananao e maua ni nofoaga i le malo selesitila, o le a latou iloa e tatau lava ona latou tauivi i aso uma [mo lenei sini paia.].”11
Malosi e Tumau Ai
Ou te iloa e toatele ua pagatia i le loto nutimomoia, tuua toatasi, tiga ma le lotovaivai. O nei aafiaga o se vaega manaomia o le aafiaga o le tagata. Ae peitai, faamolemole aua nei lafoaia le faamoemoe i le Faaola ma Lona alofa mo oe. E tumau ma ua Ia folafola mai o le a Ia le tuua i tatou o matuaoti.12
Pe a tatou fetaiai ma luitau i o tatou olaga, e faamafanafanaina i tatou i fetalaiga a le Alii o loo i le vaega e 58 o le Mataupu Faavae ma Feagaiga:
“Tou te le mafai ona vaaia i o outou mata faaletino i lenei olaga, le faatatauga a lo outou Atua e uiga i na mea o le a oo mai i aso lumanai, atoa ma le mamalu e mulimuli ai pe a mavae puapuaga e tele.
“Aua e oo mai faamanuiaga pe a mavae atu puapuaga e tele. O lea o le a oo mai le mamalu e matua tele; e lei oo i le ituaso, a ua lata mai lava.”13
O le mea lea, uso e ma tuafafine ia tatou faamalolosi pea, ma e iu lava ina [tatou] avea atili e pei o le Alii i le faagasologa. Ua tatou iloa uma i latou o e na fetaiai ma tofotofoga tetele i le olaga, ma sa tumau ma le faamaoni. O le tasi faataitaiga musuia e mai se tasi o le Au Paia muamua o le seneturi 19, o Warren M. Johnson lea. Sa tofia o ia e taitai o le Ekalesia e faatautaia le Lee’s Ferry, o se sopo taua i le Vaitafe o Colorado i le toafa o Arisona i matu. Na onosaia e Uso Johnson ni luitau maoae, ae sa tumau pea le faamaoni i lona olaga atoa. Faafofoga i le faamatalaina e Uso Johnson o le faalavelave a lona aiga i se tusi ia Peresitene Uilifoti Uitilafi:
“O Me i le 1891 na o mai ai iinei … se aiga [i le Lee’s Ferry] mai Richfield Iuta, lea na latou … faaaluina ai le taumalulu e asiasi ai i uo. Sa latou tanuina i Panguitch se tamaitiiti, … e aunoa ma le faamamaina o le taavale solofanua po o i latou foi… . Sa latou o mai i lo matou fale, ma nonofo ai i le po, ma faifai mea faatasi ai ma la’u fanau laiti …
“Matou te le i iloaina se mea e uiga i le faamai [lipi], ae sa [matou] faatuatua i le Atua, ona sa matou i ai iinei i se misiona sili ona faigata, ma sa matou taumafai i le malosi sa matou iloa e usitai ai i [poloaiga] … o le a faapea ona laveaiina mai le ma fanau. Ae paga lea, o le lona fa ma le afa o aso [na oti ai le tama matua] i ou lima. E toalua isi na pesia i le faamai ma sa matou anapopogi ma tatalo malosi ona sa matou faapea o le mea tatau lea aua e tele ni o matou tiute e faataunuuina iinei. Sa matou anapopogi [mo le] luasefulufa itula ma na i ai se taimi sa ou anapogi ai [mo le] fasefulu itula, ae lei faamanuiaina, ona sa maliliu uma ou afafine laiti e toalua. Pe a ma se vaiaso talu ona mavae o la maliu, ae lavea [foi] lou afafine e sefululima tausaga o Melinda, ma sa matou faia mea uma sa matou mafaia mo ia ae [e lei umi] ae mulimuli atu o ia i isi… . E toatolu si au fanau teine faapelepele ma le tama e toatasi [ua] aveese atu ma i matou, peitai e lei uma ai iina. O lau teine matua e sefuluiva tausaga ua le mafai ona savali [ona] o le faamai, ma o loo matou tatalo ma anapogi mo ia i le aso… . Ae peitai, ou te talosagaina lou faatuatua ma tatalo mo i matou. O le a se mea ua matou faia ua tuulafoai ai i matou e le Alii, ma o le a se mea e mafai ona matou faia e toe maua mai ai lana fesoasoani [?]”
O se taimi e lei mamao mulimuli ane, sa tusi atu ai Uso Johnson i se taitai ma se uo i le lotoifale, e faailoa atu lona faatuatua e faamalosi ai pea:
“O le tofotofoga aupito sili lea ona faigata o lou olaga, ae ua ou amataina lau malaga mo le faaolataga ma ou te naunau lava … e ala mai i le fesoasoani a le Tama Faalelagi, o le a faapea [ona] ou pipii mau ai i le ai uamea, e tusa lava pe o a faafitauli e [oo] mai ia te au. Ou te le o faavaivai i le faataunuuina o ou tiute, ma ou te faamoemoe ma talitonu o le a ou maua le faatuatua ma tatalo a ou uso, ina ia mafai ona ou ola ina ia ou maua ia faamanuiaga …”14
E ui o tofotofoga faigata e pei o tofotofoga a Uso Johnson e mafai ona fesoasoani ia i tatou i le faafetaiaia o o tatou lava luitau, ae sei ou fautuaina atu ni manatu se tolu e atiina ae ai le tumau i o tatou nei aso.
Muamua, molimau. O le molimau e aumaia ai ia i tatou le vaaiga e faavavau e manaomia e vaavaai atu ai i tua atu o tofotofoga po o luitau o le a tatou fetaiai. Ia manatua le mea na valoia e Heber C. Kimball:
“O le a oo mai le taimi o le a le mafai ai e se alii po o se tamaitai ona tumau i le malamalama o le isi [tagata]. O le a taitaiina lava le tagata ia e lona lava malamalama i totonu… .
“Afai e le o ia te oe le malamalama, o le a le mafai ona e tumau; o le mea lea, saili mo le molimau e uiga ia Iesu Keriso ma pipii mau ai, ma a oo mai taimi faigata, o le a le mafai ona e lavea ma pau ai.”15
Lona lua, lotomaulalo. O le lotomaulalo o le iloa lea ma uiga faaalia o se tasi e tatau ai ona faalagolago atu i le fesoasoani a le Alii, ina ia faamanuiaina ai i lenei olaga. E le mafai ona tatou tumau e oo i le iuga i lo tatou lava malosi. E le mafaia e i tatou ona fai o se mea e tasi, pe a aunoa ma Ia.16
Lona tolu, salamo. O le meaalofa mamalu o le salamo, e mafai ai ona tatou toe foi atu i le ala ma se loto fou, e aumaia ia i tatou le malosi e tumau ai i le ala e oo atu i le ola faavavau. O le mea lea, ua avea ai le faamanatuga ma vaega autu o lo tatou tumau i lenei olaga. O le faamanatuga e aumaia ai se avanoa faapelepele i vaiaso taitasi e faafou ai a tatou feagaiga o le papatisoga ma salamo ma iloilo lo tatou alualu i luma i le faaeaga.
O i tatou o atalii ma afafine o le Atua Faavavau, ma le gafatia e avea ai o suli faatasi ma Keriso.17 O le iloaina po o ai i tatou, e le tatau ai lava ona tatou lafoaiina le sini o le ausiaina o lo tatou taunuuga e faavavau.
Ou te molimau atu e faapea, i le faavavau, a o tatou toe tepa i lo tatou taimi puupuu o lo tatou i ai i luga o lenei fogaeleele, o le a sii ae o tatou leo ma olioli, ona e ui lava i faigata sa tatou fetaiai, sa ia i tatou le poto, le faatuatua, ma le lototele e tumau ai ma faamalosi pea.
Tau ina ia tatou faia faapea i le asō ma le faavavau, o la’u tatalo lea i le suafa o Iesu Keriso, amene.