O Mea Iti Foi
E le tatau ona tatou lotovaivai i le faia o mea lelei, ma e le tatau ona tatou le onosai; o suiga o loo tatou sailia o le a oo mai lava i “o latou aso.”
O upu o le viiga o le Toefuataiga na usuina i le amataga o la tatou sauniga sa teu i lo’u mafaufau ma lo’u loto talu ona matou muai filifilia le autu. “Siona e le nuu lelei; sauni ia oe… . O ni tagata ua saunia e faafeiloai le Alii” (“Siona e Le Nuu Lelei,” Viiga, nu. 22). E maoae tele pe a mafaufau i lena taimi folafolaina pe a toe afio mai le Alii, ae e matuai mamafatu foi le mafaufau atu i suiga ia e moomia ona faia e i tatou taitoatasi e sauniuni ai. Ou te talitonu pea lava, uso pele e, a o o’u feiloai atu ia te outou ma vaaia a outou tautinoga, ua tatou saunia e pei ona masani ona tatou lagonaina. O loo i ai ni a tatou mafuaaga ma le faamoemoe a o tatou saunia.
O Setema 1832 o se vaitau pisi tele mo sauniuniga a uluai Au Paia. Sa sauni le Perofeta e siitia atu i le fale o John Johnson i le itu i saute i sasae o Katelani, Ohaio; o isi usoga sa tapena e malaga atu i Misuri. I le totonugalemu o nei sauniuniga, na maua ai e Iosefa Samita le faaaliga lea ua tatou iloaina nei o le vaega e 64 o le Mataupu Faavae ma Feagaiga. Ina ua maea ona faatonuina alii e o atu i Misuri, na toe faamanatu atu e le Alii ia i latou: “A o mea uma lava e ao ina oo mai i ona aso. O lea, ‘aua ne’i lotovaivai i le faia o mea lelei, aua o loo oulua faataatia le faavae o le galuega. O mea iti foi e tutupu mai ai mea tetele” (MFF 64:32–33; faamamafa faaopoopo).
O nei fuaiupu o ni taiala mo i tatou a o tatou saunia i tatou lava ma o tatou aiga ina ia ola i “aso faigata.” (tagai 2 Timoteo 3:1). E le tatau ona tatou lotovaivai i le faia o mea lelei, ma e le tatau ona tatou le onosai; o suiga o loo tatou sailia o le a oo mai lava “i ona aso.” O le mea sili ona taua, o galuega lelei o loo tatou mananao e fai o le a tutupu mai “mea iti.”
O se tasi o na mea iti, na ou aoaoina, o le tatau lea ona ou sailia le taimi e faatumuina ai lo’u olaga faaleagaga i aso taitasi. E taufaaosooso tele le faia o se lisi tele o mea ou te le o faia, ona galue ai lea, e pei ona fai mai sa’u uo, e pei lava o loo o’u “tamateina ni gata.” O le faaleleia o le tagata lava ia e foliga mai o se ituaiga galuega, ae o loo—i le loto—o se suiga o le loto. Afai e tauivi i tatou o tamaitai ma le olaga—i le tausiga o fanau, saunia mea e moomia, auai i le aoga, taulimaina o faigata o le matua po o le faaletonu o le ola maloloina—e masani lava o lo tatou faaleagaga e pito i lalo o a tatou lisi “o mea e fai.”
O le suesueina o tusitusiga paia ma le tatalo o le a oo mai ai ia suiga—ae le otometi. Afai tatou te faitau matatasi, ma tatalo ma se afa loto, o loo tatou faatinoina se amioga masani, ma e ui ina e lē o alu le aoga lena taimi, ae e le o atoatoa ona fua mai e pei ona tatau ai. Tatou te moomia, faatasi ai ma le lagolago a le aiga, ia lava se taimi e faaavanoa e suesue ai—e le na o le faitau—ia manatunatu i ai, ia lagonaina, ma faatalitali mo ni tali. Ua folafola mai le Alii o le a Ia faamalosiau ia i tatou, faamalosia ma faafouina i tatou, pe afai o le a tatou faaaluina se taimi mo Ia i aso taitasi (tagai MFF 88: 63).
Uso e, e tatau ona tatou saunia pe afai tatou te fia auauna atu, ma e tatau ona tatou auauna atu pe afai tatou te fia saunia. Ina ua 16 o’u tausaga sa tofia a’u e faiaoga i le au ta’i tolu tausaga i le vaega sa ta’ua i na aso o le Aoga Sa Laiti. (Tou te silafia, sa i ai se mea faapena i aso la.) Sa ou aoaoina ni tamaiti e lē malolo. E feaei i luga o nofoa ma laulau ma e foliga mai e le nofonofo lelei. Sa ou matuai le malamalama lava, ma o le gasologa o nai vaiaso muamua sa ou manatunatu ai pe ua ou faia le mea sa’o i le taliaina o le valaauga.
Ae sa ou tumau ai pea, ma o le mea na ou iloaina—vave lava—sa le mafai ona ou tatalo atu mo le fesoasoani. Sa tatau ona ou saunia. O lona uiga o lena mea o le fuafuaina o gaoioiga, tala ma lesona, ma ia saunia se Fuafuaga E, e o faatasi ma le I e oo i le V. I le tele o tausaga mulimuli ane, ina ua valaauina a’u e taitai se Aoga Sa Laiti, sa ou iloa le auala e fesoasoani ai i faiaoga fou. Sa ou iloa pe faapefea ona fiafia i tamaiti, ma sa ou iloa le taua o le faamaoni i lo’u valaauga.
O a’u, e pei o le toatele o outou, sa tele ni valaauga o le Ekalesia na mauaina. O nisi sa faigofie atu ia te a’u nai lo isi, ae sa ou taumafai e faalauteleina valaauga taitasi. Ae pe na faapopoleina ea oe e le fuaitau “faalauteleina lou valaaulia?” Sa faapopoleina ai a’u. Talu ai nei lava, sa ou faitau ai se saunoaga lea sa ta’ua ai e Peresitene Monson e uiga i lea mataupu: “E faapefea la ona faalauteleina e se tasi se valaauga? E faigofie lava e ala lea i le faatinoina o le auaunaga e fitoitonu i ai” (“Mana o le Perisitua,” Liahona, Ian. 2000, 58). Uso e, e mafai ona tatou faia lena mea! Ua ou faalogo ai i tamaitai o loo faapea mai o o latou valaauga ua alu uma ai lo latou malosi po o le leai o so latou taimi e auauna atu ai. Ae o le faalauteleina o o tatou valaauga e le faapea o lona uiga o lo tatou feala i le po atoa e saunia pepa e tufatufaina atu ma matuai auiliili le teuteuina o laulau. E le faapea o lona uiga ia tatou aveina atu se mea i o tatou uso i taimi uma e fai ai a tatou asiasiga faaleaiga. O nisi taimi ua tatou faitioina ai i tatou lava. Ia tatou faafaigofieina. O le savali o se lesona lelei e oo mai e ala i sauniuniga faaleagaga. Ia tatou tuu atu la tatou taulaiga i mataupu faavae o le talalelei ma mea e faaaogaina i a tatou taiala suesue. Ia tatou saunia e faia se faasoaga o manatu, e ala i talatalanoaga, ae le auala atu i ni galuega faaopoopo e le talafeagai lea ua tatou lelavava ma tatou oo atu ai i le le fiafia i le taimi tatou te faaalu e faataunuu ai o tatou valaauga.
Afai e valaauina i tatou e auauna atu, e le faapea e tuu mai ai ma se aso e faamaloloina ai i tatou. E ao ona faaaluina o tatou olaga i le faia o le galuega. O Lois Bonner, o se tamaitai i la’u siteki ua 92 tausaga le matua, na amata ona auauna atu o se faiaoga asiasi ina ua faaipoipo i le 65 tausaga ua mavae. O loo auauna atu pea o ia ma le faamaoni. O le au Nelson mai Kanata ma le au Ellsworth mai Iuta, i le avea ai ma ni faifeautalai, sa aoao atu, fautua atu, ma alolofa atu ia i latou o e sa i ai i se tamai uarota, sa faatupulaia i Misuri. Na matou aoaoina, e ala ia i latou, le fiafia i le auauna atu ma le faamanuiaina mai le atamai o o latou aafiaga. E leai se isi auala sili e mafai ona ou mafaufau i ai e faafetai atu ai i lo tatou Tama mo mea uma ua Ia tuuina mai nai lo le auauna atu i Ana fanau i soo se matua o le olaga o loo tatou i ai.
O le vaega mulimuli, ua ou malamalama i le uiga ma le taua o a tatou taulaga–aemaise lava, i a tatou sefuluai ma taulaga anapogi. I le Mataupu Faavae ma Feagaiga atoa lava o loo apoapoai mai ai e le Alii i Lona moomia lea o ni tagata o e e manatu popole mo isi ma tuu atu a tatou punaoa faaletino e fausia ai le malo o le Atua. O le mea moni lava, o lo tatou naunau e faia lenei mea o se tasi lea o tulaga moomia mo le toe afio mai o le Alii i le lalolagi (tagai Daniel H. Ludlow, A Companion to Your Study of the Doctrine and Covenants, 2 vols. [1978], 2:46). E ui lava atonu e eseese o tatou tulaga, ae e taua tele mo i tatou ona foai atu mea uma tatou te mafaia. E le manaomia mai lava e le Alii i tatou ina ia foai atu mea uma ua ia i tatou, ae e taua ia te Ia lona silafia lea o le a tatou foaiina atu mea uma ma e mafai ona foaiina atu mea uma, pe a talosagaina ai (tagai Bruce R. McConkie, “Obedience” Consecration, and Sacrifice,” Ensign, Me 1975, 50). I se tasi o siteki sa ma nonofo ai ma lo’u toalua, na luitauina ai e le peresitene o la matou siteki tagata o le ekalesia ina ia faaluaina a latou taulaga anapogi ma saunia mo faamanuiaga o le a oo mai. E mafai nei ona ou molimau atu faapea, o le a faamanuiaina e le Alii i tatou i ni auala e le malamalama i ai pe afai tatou te faamaoni ma faatuatua i le foai atu ma le matamau.
O le faaleagaga e ala mai i le tatalo ma le suesue. O le auauna atu i isi. O le foai ma le matamau i sefuluai ma taulaga. E le o ni mataupu faavae fou nei. O nisi nei o mea iti e moomia e tutupu mai ai mea tetele. I le fuaiupu o loo sosoo mai ai, tatou te aoao ai i le mea o loo moomia mai e le Alii ia i tatou. Na te moomia “le loto ma le mafaufau matala”(D&C 64:34 emphasis added); O o tatou loto ma mafaufau ia e tatau ona faafouina. E tofu i tatou ma toilalo, o o tatou vaivaiga, o o tatou uiga le atoatoa. Ua talosaga mai le Alii ia i tatou ina ia salamo, ia toe faaleleia, ia faaeteete i a tatou taumafaiga. Ua Ia talosaga mai ia i tatou ina ia tatala atu o tatou tagata ia te Ia, aua ne’i tuua se mea e tasi. Ua Ia fetalai mai ia i tatou, ia ‘aua ne’i o “tatou saili ia saogalemu o tatou lava ola”; a ia saili “lo’u loto ina ia e tausia a’u poloaiga” (Helamana 10:4). E oo mai le faafouina o le loto pe a tatou faia ma tuuina atu mea uma tatou te mafaia, ona tuuina atu lea o o tatou loto ma manao i le Tama. A tatou faia lenei mea, ua folafola mai lo tatou Tama ia i tatou e faapea o le a matuai faamauoaina lava o tatou olaga iinei ma le faavavau. E le moomia ona tatou fefefe.
Uso e, aua tou te faavaivai i le faia o mea lelei. Afai tatou te onosai, e mafai ona tatou iloaina se suiga o le loto o loo tatou sailia. O le toatele o i tatou o le a moomia ai na o sina fesuiaiga o a tatou amioga, ina ia taitaiina atu ai i tatou i le ala o le amiotonu. O fesuiaiga e tatau ona tatou faia o loo i ai i totonu o na “mea iti,” ae le faapea la o lona uiga e faigofie. E tele gaoioiga e mafai ona tosoeseina ai i tatou mai le upumoni. Ae tatou te iloaina lava ia uunaiga e taitai atu ai i tatou i le taitaiga tonu. O le taitaiga tonu lea e tau atu ai i lo tatou aiga i le lagi.
Ou te molimau atu i le moni o folafolaga a le Tama ia i tatou, o Ona afafine faapelepele. Ou te molimau atu a tatou faaogatasia o tatou olaga ina ia faataitai i le soifuaga sa faaali mai e le Faaola ia i tatou, o le a tatou iloaina ua tu mai le malamalama o Siona, ma ua avea i tatou ma ni tagata ua saunia mo Lona toe afio mai. I le suafa o Iesu Keriso, amene.