I Le Malosiaga o le Alii
O le malosiaga o le Alii e mafai ai ona tatou faia ma tumau ma faatoilalo mea uma.
Uso e ma tuafafine, ua matua tumu lo’u loto, ua taavilivili lo’u mafaufau, ua vaivai o’u tulivae ma gatete, ma ou te iloa ua matua le lava upu e ta’u faalelei atu ai o’u lagona ma manatu ou te manao e faasoa atu ia te outou. Ou te tatalo ma valaaulia le mafutaga a le Agaga Paia mo a’u ma oe, a’o ou talanoa puupuu atu ia te outou i le taeao o lenei Sapati.
I le taimi talu ona tuuina mai e Peresitene Hinckley lenei valaauga fou, ua ou gaua’i atu i le apoapoaiga a Nifae ia “faatatau tusi paia uma ia te i tatou” (1 Nifae 19:23) ma se lagona tele o le faamoemoe ma le malosi nai lo se isi taimi muamua.
Sa ou toe mafaufau i le aoaoga a Paulo e faapea “… ua filifilia e le Atua mea vālea a le lalolagi, ina ia faamāina ē popoto, ma mea vaivai a le lalolagi ua filifilia e le Atua e faamāina ai mea malolosi” (1 Korinito 1:27). I lenei taeao ua ou matua mafanafana lava auā ua ou iloa, o a’u o le tasi o mea vaivai o le lalolagi.
Sa ou manatunatu loloto i le aoaoga a Iakopo o loo i ai i le Tusi a Mamona: “O le mea lea na matou suesueina ai le au perofeta ma ua matou maua faaaliga e tele, ma le Agaga o le valoaga, ina ua ia te i matou molimau uma nei matou te maua ai le faamoemoe, e mausali lo matou faatuatua, e moni, e iu ina mafai i matou ona poloai atu i le suafa o Iesu, ona usiusitai ai lea ia te i matou o Iesu lava, po o mauga, po o peau o le sami. A e ui i lea, ua faailoa mai ia te i matou e le Alii le Atua lo matou vaivai, ina ia matou iloa o lona alofa tunoa ma lona faamaulalo tele i le fanauga a tagata ua matou maua ai le mana e fai ai nei mea” (Iakopo 4: 6–7).
Uso e ma tuafafine, faamolemole ia matua’i matau lelei le upu alofa tunoa, e pei ona faaaogaina i le fuaiupu lea sa faatoa ou faitauina. I le lomifefiloi o le Tusi Paia, tatou te aoaoina ai o le upu “alofa tunoa” e masani ona faaaoga i tusi paia e faamatala mai ai se mana e faamalosi ma mafai ai:
“O le manatu autu lava o le upu, o auala faalelagi e maua ai le fesoasoani po o le malosi, lea e aumaia i le alofa ma le alofa mutimutivale matamau o Iesu Keriso. E faapena foi e ala i le alofa tunoa o le Alii, ona maua e tagata taitoatasi e ala i le faatuatua i le Togiola o Iesu Keriso ma le salamo i a latou agasala, ona latou maua le malosi ma le fesoasoani e fai ai galuega lelei, ia semanu e le mafai ona latou tausisia pe ana tuu e fai i a latou lava ala. O lenei alofa tunoa, o se mana malosi lea e mafai ai e alii ma tamaitai ona maua le ola faavavau ma le faaeaga pe a uma ona latou faia le mea sili latou te mafaia” (i. 697).
O lea, o le vaega malosi ma le mamana o le Togiola e fesoasoani ia i tatou e iloa ai ma fai ma lelei i auala e le mafai ona tatou iloa, ma faataunuuina i lo tatou lava malosi faaleolaga nei. Ou te tautino atu ma molimau atu e moni lava le mana malosi o le Togiola a le Faaola. A na leai lena mana malosi o le Togiola, semanu e le mafai ona ou tu atu i o outou luma i lenei taeao.
Pe mafai ea ona tatou lagona le alofa tunoa ma le mana faamalosiau o Keriso i le molimau a Amona? “Ioe, ua tusa a’u nei ma le leai; o lo’u malosi foi ua ou vaivai ai, o le mea lea ou te le mitamita ai ia te au lava, ae peitai, ou te mitamita i lo’u Atua, auā o lona malosi ou te mafaia ai mea uma; ioe, faauta, ua tele vavega tetele ua tatou faia i lenei nuu, o le mea lea tatou te vivii atu ai e faavavau i lona suafa” (Alema 26:12). E moni, uso e ma tuafafine, o le malosi o le Alii e mafai ai ona tatou faia ma tumau ma faatoilalo mea uma.
A o ou savali ese mai le Ofisa o le Au Taitai o le Ekalesia ina ua mae’a lo’u faatalanoaga e Peresitene Hinckley, i le aoauli o le Aso Faraile, sa ou toe manatua upu a Enoka:
“Ma ina ua faalogo Enoka i ia upu, ona ia ifo toele ai lea i luma o le Alii ma fai atu ia te Ia, ua faapea atu: Se a le mea ua ta’uaogaina ai au i lau silafilaga, aua o a’u ua na o se taulealea, ma ua inoino foi tagata uma ia te au; ona o le gese o la’u tautala; o lea aisea ea ua avea ai a’u ma au auauna?
Ona fetalai mai lea o le Alii ia Enoka: Ina alu ia ma faia e pei ona ou poloaiina ai oe, e leai foi se tasi na te faatigaina ia te oe. Ina tatala ia lou gutu o le a faatumuina, ma o le a ou avatu ia te oe upu e te tautala atu ai aua e i o’u lima tagata uma lava, ma ou te faia foi le mea lelei ia te au” (Mose 6:31–32).
Mo i tatou uma lava e lagona le le’i saunia ma le lofituina ma le le tusa ai ma se valaauga po o se tiute fou, e feauga lelei lava ma le folafolaga a le Alii ia Enoka. Sa moni lava le folafolaga i ona po o Enoka, ma e moni foi i aso nei.
I le po o le aso 20 o Iuni, 2000, sa matou faigaluega po ai ma nisi o paaga i ofisa o le au ta’ita’i a o le taimi lena o faaigoa o Ricks College, i Rexburg, i Idaho. Sa matou galulue i toe sauniuniga mo se sauniga o le talafaasolopito i lo matou lotoa i le taeao e sosoo ai, ma le faasilasilaga e fofogaina e Peresitene Hinckley o le a avea le Kolisi o Ricks ma iunivesite e maua ai faailoga tikeri, ma o le a faaigoaina o le Iunivesite o Polika Iaga i Idaho. I le avea ai ma se ‘au taitai, sa faatoa matou iloaina ai le natura mata’utia o le tiutetauave ma le lu’itau o loo faatalitali mai.
A o matou savavali ese atu mai le ofisa i lena po, sa fesili mai se tasi o a’u paaga, “Peresitene, ua e fefe?” I le mea sili e mafai ona ou manatua, e foliga faapea la’u tali. “Afai sa ou manatu e tatau ona tatou faatinoina lenei suiga e faalagolago atoa i lo’u lava iloa ma la matou lava faamasinoga, o lona uiga e tatau ona ou fefe. Ae o le a maua lo tatou fesoasoani mai le lagi. Aua ua tatou iloa lē o loo taiulu, ma e lē o tuulafoaiina i tatou, o le mea la lea, ou te le o fefe.” Ma o i matou o loo galulue i le BYU—Idaho, matou te molimau atu i le lotogatasi, sa i ai le fesoasoani mai le lagi, sa tutupu vavega, sa maua faaaliga, sa talaia faitotoa, ma ua matua faamanuiaina lava e le gata o ni tagata taitoatasi, ae faapea foi o se faalapotopotoga.
Faamolemole faataga mai a’u i lenei taimi e faailoa atu ai la’u faafetai ma le agaga talisapaia. Ou te faafetai i o’u augatamā—mo na alii ma tamaitai faatuatua ma le mausalī, ou te faaaloalo ma faamamalu i ai, ma ua ou nofo aitalafu ai i mea uma. Ou te alofa ma talisapaia lo’u tina ma lo’u tama, faapea foi le tina ma le tama o lo’u toalua. Ou te faafetai i lo latou alolofa ma la latou lagolago, faapea foi a latou aoaoga ma le malosiaga.
O lo’u toalua o Susana, o se tamaitai amioatua ma o se tina amiotonu. E vave ona outou vaaia le moni o lena mama atoatoa ma le lelei i ona foliga. Ou te alofa ma talisapaia o ia e sili atu nai lo upu ona faamatala. Ou te faafetai i le ituaiga tamaitai o i ai o ia, mo lesona sa ia aoao mai ia te au, ma le alofa o loo ma’ua fefaasoaa’i ai.
Ua faamanuiaina i ma’ua ma Susana i se fanau tama faatuatua se toatolu. Ou te alofa ma faafetai atu ia te i latou. Ma o si o matou aiga toaitiiti ua tuputupu a’e, ua aofia ai nei ma ni afafine faaletulafono amiotonu e toalua, ma a latou fanau teine atamamai, lalelei ma le tausaafia e toatolu. Pe a matou avanoa e potopoto faatasi, e faamanuiaina i matou i le vaai atu i se ata o le iunite faaleaiga i le faavavau.
O’u uso e ma tuafafine pele, ou te faafetai tele mo outou. A o ou vaavaai atu i lo outou potopoto mai i le Maota mo Konafesi, ma vaai faalemafaufau ia te outou o i falelotu i le lalolagi atoa, e matua faamanuiaina lava a’u i lo outou faatuatua ma le faamaoni i le Faaola. Ina ua sii a’e o outou aao i le sikuea i le Aso Toonai, sa ou lagonaina se aafiaga o le lagolagoina, o sosolo ifo i lo’u agaga e sili ona ofoofogia. E toaitiiti outou e silafia a’u, ae ua outou silafia lē na aumai ai le valaauga, ma ua outou matua naunau ai e talia ma lagolagoina. Ou te faafetai atu ia te outou ma ofoina atu lo’u agaga atoa ma lo’u malosi atoa i lenei galuega paia.
O le a ou alu i le mea e finagalo le Alii ma taitai o Lana Ekalesia ou te alu i ai, o le a ou faia le mea latou te finagalo ou te faia, o le a ou aoao atu mea latou te finagalo ou te aoaoina atu, ma o le a ou taumafai ia avea ma tagata e tatau ona avea ai a’u. I le malosiaga o le Alii ma ala i Lona alofa tunoa, ou te iloa e mafai ona faamanuiaina oe ma a’u ina ia faataunuuina mea uma.
I le avea ai ma se e aupito vaivai o i latou e vaivai, ou te tautino atu o loo soifua le Atua. Ou te tautino atu ma molimau atu o Iesu o le Keriso. O Ia o lo tatou Togiola ma lo tatou Faaola, ma o loo soifua o Ia. Ma ou te tautino atu ua toefuata’i mai le atoaga o le talalelei a Iesu Keriso ma Lana ekalesia moni i le fogaeleele i nei aso e gata ai, e ala i le perofeta o Iosefa Samita. Ua toe i ai nei ki ma le pule o le Perisitua ma sauniga faaola i luga o le fogaeleele. O le mana o lena perisitua, ua mafai ai ona faavavau aiga. O le Tusi a Mamona o le afioga a le Atua, ma o le maa ‘au’au o la tatou tapuaiga. Ma, uso e ma tuafafine, e le’i punitia le lagi. E tulei mai le Atua—ia i tatou taitoatasi faapea foi taitai o lona malo i nei aso e gata ai i le fogaeleele. O Peresitene Gordon B. Hinckley, o le perofeta a le Alii i le fogaeleele i ona po nei. Ou te tautino atu ma tuu atu la’u molimau i nei mea i le suafa paia o Iesu Keriso, amene.