Aua Ne’i Faaseseina
O le a puipuia i tatou e le Agaga Paia mai le faaseseina ae ina ia iloaina lena faamanuiaga sili e tatau foi ona tatou faia pea mea e talafeagai ai ina ia faamautuina ai lena Agaga.
Ou te matuai fiafia lava e tautala atu i lenei aofia i le lalolagi atoa o e o loo umia le perisitua. Ua ta nei le 8:00 i le taeao o le Aso Sa i Filipaina, lo’u aiga mo le lua tausaga ua mavae. E momoli atu o’u alofaaga i a’u uo faapelepele i lena atunuu, faapea ma outou uma.
Ou te matea e le o i ai ni tamaiti laiti i lenei aofia, e na o alii talavou o e o loo umia le perisitua. Na tusia e le Aposetolo o Paulo e faapea a o avea o ia ma tamaitiiti sa ia malamalama e pei o se tamaitiiti, ae ina ua avea o ia ma tagata matua na ia tuuese mea faapena (tagai i le 1 Korinito 13:11). E faapena foi le mea o loo faia e outou alii talavou, o lea o le a ou talanoa atu ai e pei o loo talanoa atu le isi tagata matua i le isi tagata matua.
I.
O outou alii talavou e umi lava le ala tou te faimalaga ai i le olaga ma e tele foi filifiliga e faia a o outou saili ina ia toe foi atu i lo tatou Tama Faalelagi. E tele ni faailoilo o loo i luga o le ala. O Satani le faapogai o nisi o nei valaaulia. E taumafai e faafenumiai ma faasese i tatou, ina ia avatu i tatou i se ala e foliga e faigofie lea e taitaieseina ai i tatou mai lo tatou taunuuga e faavavau.
I le amataga, ina ua tuli ifo i lalo se agaga malosi ona o le faatautee, “ona avea ai lea o ia ma Satani, … o le tiapolo lava lea, o le tama o pepelo uma, e faasese ma faatauaso mafaufau o tagata, ma taitai faatagataotaua i latou i le mea e loto i ai” (Mose 4:4). O loo avea pea o ia ma agaga o e na mulimuli atu ia te ia ma taufaasese i le lalolagi. Ua faailoa mai e faaaliga o ona po nei e faapea “ua saili foi Satani e faasese ia te outou, ina ia faatoilaloina outou e ia” (tagai MFF 50:2–3). O auala taufaasese a Satani e faatosina tele: o musika, tifaga ma isi ala o faasalalauga, ma le faatosina o se taimi manaia. Afai e manuia pepelo a Satani i le faaseseina o i tatou, ua tatou tosina atu i lona mana.
O nisi nei o auala o loo taumafai ai le tiapolo e faasese i tatou. O poloaiga a le Atua ma aoaoga a Ana perofeta ua lapataiina ai i tatou ina ia tatou tetee atu i ai.
1. se tasi ituaiga taufaasese o loo saili ina ia faaseseina i tatou po o ai e tatau ona tatou mulimuli i ai. I le ta’ua ai o aso mulimuli, na aoao mai ai le Faaola: “Ia aua ne’i faaseseina outou e se tasi. Aua e toatele e o mai i lo’u igoa, ua faapea ane, O a’u nei o le Keriso; latou te faaseseina foi tagata e toatele” (Mataio 24:4–5). I se isi faaupuga, e toatele o le a saili e faasese i tatou i le faapea mai o i latou po o a latou aoaoga o le a faasaoina ai i tatou ma o le a e le manaomia ai se Faaola po o Lana talalelei. O loo faamatalaina mai e le Tusi a Mamona lenei mea e faapea “o le mana o le tiapolo e taitaieseina ai ma olegia loto o le nuu”ina ia talitonu faapea “o le mataupu a Keriso o le mea faavalea lea ma le pepelo” (3 Nifae 2:2).
2. O loo saili Satani ina ia faasese i tatou e uiga i le sa’o ma le sese ma faatauanau i tatou e leai se mea faapea o se agasala. O lenei taufaasese e amata lava i sina mea laitiiti e pei o se tamai agasala: “Na o na faataitai lava i ai. E tasi lava sina pia po o se sikareti se tasi po o se ata tifaga leaga se tasi e leai lava se afaina.” O le mea e tutusa uma ai nei faatosinaga e taufai avea uma lava ma mausa. O le avea o se mea ma se mausa, o se tulaga lea ua tatou tuueseina atu ai se vaega o lo tatou mana e filifili ai. Afai tatou te faia lena mea, ua tatou tuuina atu i le tiapolo le mana e pule ai ia i tatou. Na faamatalaina e le perofeta o Nifae le mea e tau atu i ai lenei tulaga ua fai mai le tiapolo, “E leai se seoli” ma “E le se tiapolo a’u nei, aua ua leai se tiapolo—e faapena ona musumusu o ia i o latou taliga seia faamauina i latou e ia i ana filifili matautia, e le malaveaiina mai ai” (2 Nifae 28:22).
Afai tatou te filifili le auala sese, ua tatou filifili le taunuuga sese. Mo se faataitaiga, na faamatala mai e sa’u uo ua leva e faapea o lana tane sa masani lava ona avea ma se “tamaitiiti lelei” i le aoga maualuga, e na te inuina ni nai meainu ma le manatu o le a fesoasoani ai ia te ia e faagalo ai nisi o faafitauli. A o le’i iloa e ia le mea o loo tupu, ua leva ona fai ma ona mausa. O le taimi nei, ua le mafai e ia ona tausia lona aiga, ma e toetoe lava o mea uma e taumafai o ia e fai, e le aoga lava. Ua pulea e le ava malosi lona tino ma e foliga mai e le mafai ona ia faamatuueseina atu.
3. Na lapatai mai le Perofeta o Nifae ia i tatou i le tetee atu i se tasi ituaiga taufaasese: “A o isi na te faalotomalie, ma faamoe ia te i latou i le filemu i la le tino, latou te fai mai: Ua lelei mea uma i Siona, e moni, ua manuia Siona, ua lelei mea uma—e faapena ona olegia e le tiapolo o latou agaga, e taitai ifo ai i latou ma le faaeteete i seoli” (2 Nifae 28:21).
O i latou o e pauu atu i lenei taufaasese e mafai ona fai mai e talitonu i le Atua, ae latou te le matuai faatauaina Ana poloaiga po o Lana faamasinoga tonu. E mausali i latou i lo latou tamaoaiga ma latou faaiuina ai faapea ua talia e le Atua lo latou ala ua filifilia.
“E moni, e toatele o e faapea mai: Ina aai ma inu, ma ia olioli aua o a taeao e oti ai i tatou; e manuia foi i tatou.“E toatele foi e faapea mai: Ina aai ma inu, ma ia olioli, a e ui i lea, ia tatou matatau i le Atua—na te ta’uamiotonuina le faiga o agasala laiti; … e le afaina lava lenei mea; ia tatou faia foi nei mea uma, aua o a taeao e oti ai i tatou, afai foi e agasala i tatou, e sasa foi le Atua ia te i tatou i ni nai ta itiiti, a o le iuga e faaolaina i tatou i le malo o le Atua” (2 Nifae 28:7–8).
E mautinoa lava ua outou vaai ma faalogo i nei fefinauaiga, uso e. O le a oo atu ia te outou i totonu o potuaoga po o faapaologa, i mea tou te faitauina, ma mea tou te vaai i ai i faafiafiaga lauiloa. O le toatele i le lalolagi ua teenaina le moomia o se Faaola. O isi ua teenaina faapea e leai se sa’o po o se sese ma latou te tauemu i le manatu i le agasala po o se tiapolo. O isi o loo faalagolago pea i le alofa tunoa o le Atua ae le amanaiaina Lana faamasinoga tonu. Ua fetalai mai le perofeta, “E toatele e faapea ona aoao atu mataupu pepelo, ma le le aoga, ma le faavalea” (2 Nifae 28:9).
Na tuuina mai e le Aposetolo o Paulo ia ni lapataiga patino e tetee atu ai i “aso faigata” ia o le a oo mai i aso e gata ai. “Aua e avea tagata ma e alolofa i latou ia i latou, … o e le faalogo i matua, o e le faafetai, o e amioleaga, o e le lotoaiga, … o e le alolofa i tagata amiolelei, … o e ua tele le manao i mea faafiafia ae leai se manao i le Atua” (2 Timoteo 3:1–4). Na ia saunoa mai foi faapea “O tagata amioleaga ma e taupelopelo, e alualu pea lava lo latou leaga, o loo faasese atu, ua faaseseina foi i latou” (f. 13). I se taimi o le a ou talanoaina ai le mea na ta’u atu e Paulo i le taulealea o Timoteo e uiga i le auala e aloese ai mai lenei amioleaga.
Na tuu mai e le Aposetolo se isi lapataiga e tetee atu ai i le faaseseina e le tiapolo ma ana ‘au:
“Tou te le iloa ea, o e amio leaga e le fai mo latou tofi le malo o le Atua? Aua ne’i faaseseina outou; o e faitaaga, ma e ifo i tupua, ma e mulilulua, ma e tauatane, ma e faasotoma,
“O e gaoi ma e matapeapea, ma e ona, ma e agatele, ma e fao mea, e le fai mo latou tofi le malo o le Atua” (1 Korinito 6:9–10).
Aua lava ne’i faaseseina, uso e. Ia faalogo atu i lapataiga faaperofeta o anamua ma ona po nei e tetee atu ai i le gaoi, ona, ma ituaiga uma o agasala o feusuaiga. O le taufaasese e saili e faaleagaina lou faaleagaga i nei auala uma. Na lapatai mai Paulo ia i tatou e uiga ia i latou o e faatalitali e taufaasese “e ala i pepelo o tagata, ma togafiti leaga” (Efeso 4:14). Ia nofouta i faatosinaga e maoae se taimi manaia e maua ai. O le mea e faaalia mai e le tiapolo e malie, e mafai ona leaga ma matautia i le faaleagaga.
II.
A o tatou vaavaai solo, tatou te iloa ai le toatele o loo faia le taufaasese. Tatou te faalogo i taitai lauiloa o e ua talapepelo e uiga i a latou gaoioiga faalilolilo. Ua tatou iloaina nisi o toa faamamaluina i taaloga o e na pepelo i le taalo tupe i le taunuuga o a latou taaloga po o le faaaogaina o fualaau e faalautele ai a latou faatinoga. E seasea ona tatou vaaia ni tagata lauiloa o aafia i ni faiga faatiapolo e fai faalilolilo, latou te le faia lava i le lautele o tagata. Atonu latou te manatu e leai lava se tasi o le a iloaina. Ae o loo silafia e le Atua. Ma ua Ia lapatai sa’o mai faapea o le a oo mai le taimi o le a “tautalagia ai a [tatou] amioleaga i tumutumu o fale, ma o le a faaalia a [tatou] amioga lilo” (MFF 1:3; tagai foi i le Mamona 5:8; MFF 38:7).
“Aua ne’i faaseseina outou,” na aoao mai ai le Aposetolo o Paulo. “E le ulagia le Atua: aua o le mea e luluina e le tagata, o le mea lava lea e seleseleina mai ai e ia. Aua o se lulu i la lona tino, e selesele mai ai e ia i la le tino le mea e pala; a o se lulu i la le Agaga, e selesele mai ai e ia i la le Agaga le ola faavavau” (Kalatia 6:7–8).
I nisi upu, afai tatou te aafia i fualaau po o ata ma tusi mataga po o isi mea leaga lea na taua e le aposetolo o le “luluina i la le tino,” ua ta’u mai e le tulafono e faavavau faapea tatou te seleseleina le ma e pala nai lo le ola e faavavau. O le faamasinoga tonu lena a le Atua, ma e le mafai e le alofa tunoa ona faoa le faamasinoga tonu. Afai ua solia se tulafono e faavavau, o le faasalaga foi e tatau ai i lena tulafono e tatau ona mafatia ai. O nisi o nei vaega e mafai ona faamalieina e ala i le togiola a le Faaola, ae o le faamamaina i le alofa tunoa o se tagata agasala ua afaina le faaleagaga e faatoa oo mai pe a mavae le salamo (tagai i le Alema 42:22–25), lea o se faiga e umi ma tiga mo nisi agasala. A leai, “o le le faaaoga le faatuatua e oo i le salamo, e oo ia te ia le tulafono uma i iuga o le faamasinoga. O lenei, ua na o le faatuatua e oo i le salamo e oo i ai le ala o le faaolataga sili ma le faavavau” (Alema 34:16).
O le mea e lelei ai, o loo avanoa le salamo. Mo agasala sili ona matuia e moomia ai ona tatou tautau atu i lo tatou epikopo ma saili lana fesoasoaniga alofa. Mo isi agasala atonu e lava lo tatou tautau atu i le Alii ma soo se tasi na tatou sese i ai. O le tele lava o pepelo e aofia ai i le vaega lea. Afai na e faaseseina se tasi, ia fai nei se faaiuga e tuu loa le tauaveina o le avega. Ia faasa’o le mea sese ma faaauau lou olaga.
III.
O lea ou te fia tautala atu i le auala e mafai ai e i tatou taitoatasi ona aloese mai le faaseseina i mea e faavavau le taua. E lua ni a’u mau. O le mau muamua o le mea na aoao atu e Paulo ia Timoteo ina ua uma ona tuuina atu ia te ia le lapataiga lea na ou faitauina muamua. Ia faaauau pea i mea ua e aoaoina ma ia mautinoa, na ia tusia, “ia e iloa o ia na aoao atu ai ia te oe” (2 Timoteo 3:14). I se isi faaupuga, ua aoaoina outou i le amiotonu ma faamautinoa atu lona moni, o lea ia tumau ai. I le faaauauina ai, na faamanatu atu e Paulo i lana uo talavou e faapea “talu foi ina o e tama itiiti ua e iloa Tusi Paia, e mafaia ona faapoto ai ia te oe e iu ai i le ola” e ala i le faatuatua i lo tatou Faaola. (f. 15). Ia taofi mau i tusitusiga paia, o ona aoaoga e puipuia ai i tatou mai le tiapolo.
O le faataoto i taupou e toasefulu o loo aoao mai ai e faapea afai e afio mai le Alii i Lona Mamalu, o soo uma o Keriso na valaaulia i le tausamaaga o le faaipoipoga, e na o le ‘afa o i latou o le a faaulufale. O le faamalamalamaga musuia o lenei faataoto, ua faaalia mai ai lo tatou punaoa lona lua o le puipuiga:
“Aua o e popoto ma sa talia le upu moni, ma avea le Agaga Paia mo latou taitai, a e le’i faaseseina—e moni ou te fai atu ia te outou, e le taia latou i lalo ma lafoina i le afi, a e tumau pea i latou i lea aso” (MFF 45:57).
O le isi afa o le a le taliaina aua latou te le’i saunia. E le lava le na ona mauaina o le upumoni. E tatau foi ona tatou “avea le Agaga Paia e fai ma o [tatou] taitai,” ae “[aua ne’i ] faaseseina.”
E faapefea ona tatou avea le Agaga Paia e fai ma o tatou taitai? E tatau ona tatou salamo i a tatou agasala i vaiaso taitasi, ma faafouina a tatou feagaiga e ala i le fetagofi atu i le faamanatuga ma lima mama ma loto mama, e pei ona poloaiina tatou e fai (tagai i le MFF 59:8–9, 12). E na o le pau lea o le auala e mafai ai ona tatou maua le folafolaga mai le lagi e faapea “o le a faatasi pea Lona Agaga ma i [tatou]” (MFF 20:77). O lena Agaga o le Agaga Paia lea, o lana misiona o le aoao o i tatou, e taitai i tatou i le upumoni, ma molimau mai i le Tama ma le Alo (tagai i le Ioane 14:26; 15:26; 16:13; 3 Nifae 11:32, 36).
Ina ia aloese mai le faaseseina, e tatau foi ona tatou mulimuli i uunaiga a lena Agaga. Na aoao mai e le Alii lenei mataupu faavae i le vaega e 46 o le Mataupu Faavae ma Feagaiga:
“Ma o mea ua molimau atu ai le Agaga ia te outou ou te loto ia outou faia i le paia atoatoa o le loto, ma savavali i le amiotonu i o’u luma, a o manatunatu i le iuga o lo outou faaolataga, ma faia pea uma lava i le tatalo ma le faafetai, ina ia le faaseseina outou e agaga leaga, po o mataupu a temoni po o poloaiga a tagata… .
“O le mea lea, ia faaeteete ai ne’i olegia outou; ma ia matua saili atu i meaalofa sili ina ia le olegia outou, a ia manatua pea lava pe na tuuina atu i se a ia mea” (f. 46:7–8).
O le a puipuia i tatou e le Agaga Paia mai le faaseseina, ae ina ia iloaina lena faamanuiaga sili e tatau foi ona tatou faia pea mea e talafeagai ai ina ia faamautuina ai lena Agaga. E tatau ona tatou tausia ia poloaiga, tatalo mo le taitaiga, ma auai i le lotu ma fetagofi atu i le faamanatuga i Aso Sa taitasi. Ma e le tatau ona tatou faia soo se mea e tuliese ai lena Agaga. Aemaise lava, e tatau ona tatou aloese mai ata ma tusi mataga, ava malosi ma fualaau faasaina, ma ia aloese lava pea mai le solia o le tulafono o le legavia. E le tatau ona tatou faaaogaina pe faia ni mea i o tatou tino e tuliese ai le Agaga o le Alii ma tuua ai i tatou e aunoa ma se puipuiga faaleagaga mai le faaseseina.
O le a ou faaiuina e ala lea i le faamatalaina atu o se isi ituaiga taufaasese—o le manatu faapea e le lava le faalogo ma talitonu, e aunoa ma le galue ai i lena talitonuga. E toatele perofeta na aoao mai e tetee i le taufaasese. Na tusia e le Aposetolo o Iakopo, “A ia fai outou ma e anaana i le upu, a e aua le na ona faalogologo i ai, o faaseseina ai outou e outou” (Iakopo 1:22). Na aoao atu le Tupu o Peniamina, “O lenei foi, afai ua outou talitonu i nei mea uma, ina outou faia ia” (Mosaea 4:10). Ma o faaaliga o ona po nei, na faailoa mai ai e le Alii, “Aua afai tou te mananao ou te tuuina atu ia te outou se nofoaga i le lalolagi selesitila, e tatau ona outou saunia outou lava i le faia o mea ou te poloai atu ai ia te outou e ao ina outou faia” (MFF 78:7).
E le lava le iloa o loo soifua le Atua, ma o Iesu Keriso o lo tatou Faaola, ma o le talalelei e moni. E tatau ona tatou ola i se olaga amiotonu e ala lea i le galulue e tusa ai ma lena malamalama. E le lava le iloa o Peresitene Gordon B. Hinckley o le perofeta a le Atua. E tatau ona tatou faaaogaina ana aoaoga i o tatou olaga. E le lava le i ai o se valaauga. E tatau ona tatou faatinoina o tatou tiutetauave. O mea e aoaoina atu i lenei konafesi, e le na ona faatumu ai o o tatou mafaufau. E ao ona avea ma uunaiga ma taiala i a tatou mea e fai.
Ou te molimau atu o nei mea e moni, ma ou te tatalo o le a tatou faia mea uma e talafeagai ai ina ia aloese ai mai taufaasese a le tiapolo, i le suafa o Iesu Keriso, amene.