O Le Avea ma se Itu Tino, o Lo Tatou Tofi Paia Lea
Ou te molimau atu ua tatau ai mo outou, o outou o se itu tino taua o le Aualofa—o le lafu mamoe a le Leoleo Mamoe lelei mo tamaitai.
Uso e, ua ou olioli i le tatou mafutaga i lenei po. Faafetai i le anoanoai o a outou galuega alofa, o a outou molimau tuputupu pea, o a tou kuka manogi e le motu! Ua outou faia se tulaga e ese ai, ma o outou o ni lasusulu mo le agaga!
I nei taimi faigata, ou te maua lava le mafanafana i le folafolaga “afai ua [tatou] saunia o le a [tatou] lē matata’u ai lava.”1 E fesoasoani le Aualofa e saunia i tatou—e le mo na o le faaletino, ae ma le faaleagaga foi. Ae e le mafai ona fesoasoani le Aualofa ia tatou sauniuniga e aunoa ma lo tatou auai i le faatinoga! Ou te popole ne’i manatu nisi o outou faapea e le talafeagai outou mo le Aualofa, pe le o outou o ni itutino o le Aualofa. Pe tou te manatu ua outou laiti tele pe ua matutua tele, ua mauoa tele pe matitiva tele, popoto tele pe maualalo tele le aoaoga, e leai se tasi o i tatou ua ese naua e le mafai ai ona avea ma se itutino [o le Aualofa]! Afai e mafai ona ou ta’u atu le faanaunauga aupito sili o lo’u loto, ou te manao ia tofu lagona e outou uma taitoatasi ua matua tatau ai lava mo outou, ma o outou foi o ni ō le Aualofa. Ou te molimau atu ua tatau ai mo outou, o outou o se itu tino taua o le Aualofa—o le lafu mamoe a le Leoleo Mamoe Lelei mo tamaitai.
Ou te lagona e pei foi o Peresitene Iosefa F. Samita ina ua ia saunoa i se taimi ua leva i le 1907: “O le taimi nei ua matua toatele naua o tatou tamaitai talavou malolosi, atamamai ua latou lagona e na o loomatutua e tatau ona mafuta i le Aualofa.” Ona ia tautino mai lea: “O se mea sese lena mea.”2
Sa ou asiasi talu ai nei i Itiopia, ma sa ma feiloai ai ma Jennifer Smith. Afai e i ai se tamaitai e mafai ona faapea mai e le talafeagai mo ia, o Sister Smith. Fai mai a ia, “‘Sa le pei a’u o isi [uso] uma i le matou paranesi. O a matou gagana, lavalava, aganuu, sa foliga uma nei mea e i ai [se] avanoa [i lo matou va. Peitai] ina ua matou talanoa e uiga i le Faaola … sa laitiiti le va. Ina ua matou talanoa e uiga i se Tama Faalelagi alofa … , sa leai se va.” Sa faaauau lana tala, “E le mafai ona tatou suia pe aveese avega a isi, ae e mafai ona tatou faaaofia ma avea le tasi ma itu tino o le isi i le alofa.”3
Sa maua e nei uso se fasi vaega o Siona i le tasi o o latou loto ma o latou manatu. Aua “afai e le tasi outou,”4 ua fetalai mai ai le Alii, “e le a a’u outou.”5 Na saunoa Peresitene Hinckley, afai “o le a tatou lotogatasi ma tautatala atu ma le leo e tasi, o le a le mafaatusalia lo [tatou] malosi.”6 I le avea ai o ni uso i Siona, e faapefea ona tasi i tatou? O le auala lava e tasi ua avea ai i tatou ma se vaega o le toalua po o se aiga: e fetufaai o tatou tagata—o o tatou lagona, o mafaufau, ma o tatou loto.
I se tasi uarota, e faailoa mai e tina a latou tama teine i le Aualofa i se sauniga a le Aualofa i le Aso Sa, pe a atoa lo latou ta’i 18. Sa ta’u atu ma le faamemelo e se tasi tina le auala na faafaileleina ai o ia e uso o le Aualofa ina ua faatoa faaipoipo: “Sa latou aumaia meaai ma ni opo i taimi faanoanoa, o le ata ma le fesoasoani i ni aso faamanatu. Sa latou aoaoina a’u i le talalelei e ala i lo latou asiasi mai ma faatagaina foi a’u ou te asia i latou. Sa latou faatagaina ou te faia ni sasi ae sa latou onosai.” Ona faamatala lea e lea tina i lana tama teine le aumaiga o teisi o lona togalaau mai ia Kaloline, o lili na aumai ia Venise, o makerita na aumai ia Pauline.” Sa ofo lana tama. Sa tali atu lona tina, “O nei tamaitai o o’u uso i soo se itu, ma ou te fiafia e tuuina atu oe i la latou vaaiga.”
O le eseese [o laau] i totonu o se togalaau, e maua ai lona matagofie—tatou te manaomia ni teisi ma lili ma ni makelita; tatou te manaomia ni faitogalaau e fuiina, faafailele ma tausi. Ae paga lea, ua iloa foi e Satani o le fetufaai e fusia faatasi ai la tatou usoga i aso fai pea ma le faavavau. Ua ia iloa o le manatu faapito o le a amata ai ona faatauma’oia ai le fetufaai, lea e faatauma’oia ai le lotogatasi, lea foi e faatauma’oia ai Siona. Uso e, e le tatau ona tatou faatagaina le fili e tuueseeseina i tatou. Tou te silafia, “O se tasi e atoatoa,” na saunoa ai Polika Iaga, “o le a faasaoina ai se nuu.”7 Ma ou te faaopoop atu i ai, o se tasi e atoatoa o le a faasaoina ai lo tatou atunuu.
Sa faamanatu mai ia i tatou e Peresitene Boyd K. Packer, “ua tele naua tuafafine … ua manatu faapea o le Aualofa ua na o se vasega e auai atu i ai… . Uso e,” sa ia fautua mai, “e tatau ona sili atu o outou mafaufauga e faapea e na o lou auai lava i le Aualofa i le lagona lea, o oe o se sui auai!”8 O lagona o le avea ai ma itutino [o le Aualofa] e amata i le Aso Sa, pe a tatou faalogo i leo o isi. E le tatau i se faiaoga ona tuuina atu “sana” lesona i se potopotoga o ni uso e na o le faalogologo, aua o la tatou lesona.
O le avea ma se itu tino, o le manaomia lea, alofagia ma misia pe a e le i ai. O le eseesega lena o le auai ma le avea ma se itu tino. O le Aualofa ua le na o se vasega o le Aso Sa: o se meaalofa faalelagi mo i tatou o tamaitai.
O ni mafuaaga nei se lua ou te lagonaina ai o a’u o se tasi o le Aualofa—ma e le ona o lo’u valaauga o i ai nei! Sa ou mafatia i le masina na te’a nei ina ua o mai o’u faiaoga asiasi. Ua tete’a Sue ma lona toalua, a o Cate o se tasi o teineiti o le Lora sa ou faiaoga ai. Sa la aumaia le savali ma faia foi se tatalo. Ae sa la aumaia foi se atugaluga mo’i. Sa ou lagona le faalototeleina ma le alofagia.
E le i leva talu ai ona faia e se uso o le matou Aualofa se tatalo, ma sa ole atu ai i le Tama Faalelagi e faamanuia mai ia te au—ma sa ta’u lo’u igoa—i o’u tiutetauave. Na te le i iloaina o’u manaoga faapitoa, ae sa ia iloaina lo’u loto.
Atonu e le i oo atu talu ai nei ou faiaoga asiasi, pe atonu foi e le’i talosiaina oe ma ta’u lou igoa i se tatalo. E faamalie atu pe afai e moni lena mea. Ae le tau asiasia oe ina ia avea ai ma se faiaoga asiasi lelei, e le tau talosia foi ina ia e tatalo ai. Tusa lava pe o a o tatou eseesega, afai tatou te fetufaai ma le matamau ma le faamaoni, o le a fetufaai mai foi o tatou uso; o le a tatou taufai iloa o tatou lagona, ma o le a fuga mai e pei o se togalaau le avea ma se itu tino. Sa aoaoina e Sister Smith ma o tatou uso Itiopia, e le afaina ni eseesega, aua o le avea ai ma se itu tino [o i tatou] o le alofa lea, le alofa mama o Keriso, i lona faatinoga. Ma e le uma le alofa.
Pe o tatou galulue i le Peraimeri po o Tamaitai Talavou, pe o tatou toaaga pe leai, pe ua tatou faaipoipo pe nofotoatasi, pe o ni tama’imoa o le tautotogo po o ni matuamoa o le tautoulu, o i tatou uma lava e ō le Aualofa. Masalo o a’u o se matuamoa o le tautoulu, ae pei a la’u faalogo o se tama’imoa o le tautotogo Matou te manaomia o outou leo, o lagona, ma o outou loto. E manaomia oe e le Aualofa! Ma, e tou te silafia? E te manaomia le Aualofa. A e le auai, ua e faafitia oe lava ma ua e faafitia foi le Aualofa.
Uso e, e le mafai ona i ai ni faigā vaega i totonu o le Aualofa, ae “o uso uma e tatau ona fetausia’i faatasi uma itutino.”9 “Pe afai e tiga le tasi itutino, ia tiga faatasi ai itutino uma lava; pe viia le tasi itu tino, ia olioli faatasi ai itu tino uma lava.”10 Aua “e aoga foi i le tino itutino taitasi, ina ia atiina ae faatasi itu uma, ma tausia le tino ia atoatoa.”11
Ioe, e mafai ona mālie tele le Aualofa, tele le fiafia, ma sili atu ona lotogatasi. E mafai ona tuumamaina a tatou avega, e mafai foi ona faaitiitia o tatou mafatiaga. E le atoatoa le Aualofa, aua e leai a se tasi o i tatou e atoatoa. Ae e mafai ona tatou galulue i ai; e mafai ona tatou faaatoatoaina faatasi, pe a tatou laalaa lava i tatou i luma. E faapefea? I le na o le sui lava o ou uiga faaalia: O le auala tatou te talanoa ai e uiga i le faaaafiaina e le Aualofa o lagona o isi e uiga i le Aualofa—aemaise lava o tamaitai talavou. Ia lagolago o tatou au peresitene o le Aualofa ma faiaoga—tuu i latou se’i aoao ae tatou onosai (e pei foi ona tatou aoao ae onosai i latou). Ia tele le loto faamagalo ae itiiti le faamasino atu. Ia avea ma faiaoga asiasi alolofa ma lē misi ni asiasiga. Ia auai atu ma le sagisagi i fonotaga o le faatamaoaigaina o le aiga, auaiga, ma le tagata lava ia. Vaavaai mo mea lelei e uiga i le Aualofa ma atiinae ai.
Sa tuuina mai e Peresitene Iosefa F. Samita se faatonuga ina ia tatou “taofi mau i lenei galuega [o le Aualofa] ma le malosi, faatasi ai ma le atamai ma le lotogatasi, mo le fausiaina o Siona.”12 Afai tatou te talitonu ua toefuatai mai le Ekalesia a le Alii—ma ua tatou talitonu i ai—ona tatau ai lea ona tatou talitonu o le Aualofa o se vaega taua o Lana lafu faatulagaina. Ua tatau ona taofi lo tatou tuufesili pe tatau ona tatou i ai—aua e tatau! E le faapea ua tetele naua o tatou eseesega ua le mafai ai ona tatou fausia faatasi Siona!
Toeitiiti atoa se tausaga talu ai, i Pasadena, i Kalefonia, sa tigaina ai ma vaivai Sister Janice Burgoyne ona o le kanesa. Sa ia ofoina atu o ia ma le mataalofa, ma sa matua alofagia lava o ia. Sa avatu i ai e uso o le Aualofa ana meaai, faamama lona fale, tausi lana fanau tama e toalua, ma fesoasoani i lona toalua e fuafua se falelauasiga. Sa faigata ia Janice ona taliaina lenei fesoasoani tele, ne’i maua e ona uso se fasi falaoa faapa’u legalega i tua o le nofoa. Sa popole o ia ina ne’i ua tele atu ni mea e iloa e ona uso nai lo le mea o i lona loto! Peitai talu ai sa iloa lelei e ona uso lona loto, o lea sa lē afaina ai. Sa latou feavea’ia lana fanau i aoga ma isi mea, fesoasoani i a latou meaaoga, tata lana piano, ma sui moega. Ma sa latou faia i lea aso ma lea aso, e aunoa ma se tomumu, ae faia ma le alofa e le faatuaoia. O na ituaiga o fetufaaiga na matua suia ai na uso. A o le’i maliu o ia, sa faliu atu Janice i se uso o le Aualofa, ma fesili atu ma le agaga faafetai ma le maofa, “E faapefea ona oti se tasi e aunoa ma le Aualofa?”
Outou na, o’u uso pele—ma o outou o o’u uso—ou te fesili atu, “E faapefea ona ola se tasi e aunoa ma le Aualofa?”
O le avea ma se itu tino o lo tatou tofi paia. Ma’imau e pe ana mafai ona ou aofa’i mai outou i o’u lima ma tatou o faatasi i le Aualofa. Ma’imau e pe a na ou iloa o outou loto ma outou iloa foi lo’u loto. Aumai o outou loto alolofa i le Aualofa. Aumai a outou taleni, o a outou meaalofa, o o outou tagata taitoatasi ina ia mafai ai ona tasi i tatou.
Ou te molimau atu “ua valaau mai le leoleo mamoe lelei [ia i tatou] …[e] aumaia [i tatou] i lana lafu.”13 Atonu e le o ia i tatou tali uma, ae tatau ona tatou talitonu o le Aualofa o se vaega taua o Lana galuega, aua
E ui lava [o lo tatou] ala e ono taamilomilo solo i atumauga,
Na te silafia le lotoa [tatou] te aai ai …
Na te faaofuina vao o le fanua,
Na te fagaina foi tamai mamoe [o] Lana lafu.
Na te faamaloloina foi i latou e faatuatua ia te Ia,
Ma faia [o tatou] loto e pei o auro.14
I le suafa o Iesu Keriso, Amene.