Mauaina o le Faatuatua i le Alii o Iesu Keriso
E na o le faatuatua i le Alii o Iesu Keriso ma Lana Togiola e mafai ona aumaia ai ia i tatou le filemu, faamoemoe, ma le malamalama.
O le talitonu i le Faaola ma Lana misiona e taua tele, lea ua fai ai ma uluai mataupu faavae o le talalelei: “Faatuatua i le Alii o Iesu Keriso.”1 O le a le faatuatua? I lana tusi ia Eperu i le Feagaiga Fou, na aoao atu ai le Aposetolo o Paulo, o le “faatuatua o le faalagolago lea i mea ua faamoemoe i ai, o le mautinoa lea o mea e le o vaaia.”2 Ae faapefea ona tatou maua le faatuatua? E faapefea ona tatou maua se faamaoniga o lo tatou Faaola, o lē tatou te le’i vaai i ai? Ua aoaoina i tatou e tusitusiga paia:
“Ua foaiina atu i nisi e le Agaga Paia ia iloa ai o Iesu Keriso o le Atalii o le Atua, ma sa faasatauroina o ia mo agasala a le lalolagi.
“Ua foaiina atu i nisi ia talitonu ia latou upu, ina ia latou maua foi le olaga faavavau pe afai latou te tumau pea i le faatuatua.”3
Mai le amataga o taimi, na malamalama lava perofeta o Iesu Keriso o le Alo o le Atua, o Lana misiona i la le tino, ma Lana Togiola mo tagata uma. O loo tuuina mai e faamaumauga paia ia valoaga o le fiaafe tausaga, e le gata i le uluai afio mai o lo tatou Faaola ae faapea foi i le Afio Mai Faalua—o se aso mamalu lea o le a matuai mautinoa lava e oo mai.
Ana fai tatou te ola i aso o nei perofeta anamua, pe tatou te talitonu ea i a latou upu? Pe tatou te maua ea le faatuatua i le afio mai o lo tatou Faaola?
I Amerika anamua, na vavalo atu ai Samuelu le Sa Lamana e faapea o le po e fanau mai ai le Faaola “[o le a] i ai i le lagi malamalama tetele, … e iu ina i ai i tagata e peiseai o le ao.”4
E toatele na talitonu ia Samuelu ma o atu e saili ia Nifae, ma ta’uta’u atu a latou agasala, salamo, ma papatisoina. “Ua asiasi mai foi agelu ia i [latou], ma ua talai mai ia te i latou le tala lelei e olioli tele ai.”5
Ae o le vaega tele lava, o sa Nifae sa “faamaaa [ina] o latou loto”6 ma ua tauaso i “faailoga ma mea e ofo ai” o taimi. O nei faailoga na tuuina mai “ina ia iloa e [tagata] e vave afio mai Keriso.”7 Ae nai lo le faalogo i ai, ae ua “faalagolago [Sa Nifae] i lo latou lava … poto, ua faapea atu: Ai o i ai nisi mea ua matea tonu [e tagata ua talitonu], … [ae peitai] e le tusa lenei mea ma le mafaufau lelei, ia afio mai se tasi e pei o le Keriso.”8
I na aso e pei foi o o tatou vaitaimi, o nisi tagata tetee, ua ta’ua o anetikeriso, ua faatalitonuina isi faapea e le o manaomia se Faaola ma Lana Togiola. Ina ua oo ina ua faataunuuina le valoaga a Samuelu ma sa i ai le “aso e tasi ma le po e tasi ma le tasi ao a e leai se po,”9 e maeu se olioli atonu sa faatumulia ai loto o e na talitonu i perofeta! “Ma ua amata ona latou iloa, ioe, ua taunuu mea uma, o iota uma lava, e tusa ma upu a perofeta. Ua oo foi ina pupula mai le fetu fou, e tusa ma le upu.”10
O e na talitonu i upu a perofeta na iloaina le Faaola i Lona soifuaga ma Lana misiona atoa, ma sa faamanuiaina i le mulimuli ia te Ia. Ae o nisi taimi sa tofotofoina ai le faatuatua e oo lava i e sili ona faamaoni sa mulimuli atu i ai. Ina ua mavae le Faasatauroga, na faalogo Toma i ona uso o molimau atu faapea ua toetu le Faaola mai le tuugamau. Nai lo le talitonu i a latou upu, na faailoa atu ai e Toma faapea, “Afai ou te le vaai … ou te le talia lava.”11 Mulimuli ane, na tuuina atu i lenei Aposetolo faapelepele le avanoa e tago atu ai i mea na tutu’i ai fao i aao o le Faaola ma tautino atu, “Lo’u Alii e ma lo’u Atua e.”12 Ona aoaoina lea o ia e le Faaola ma le alofa e pei ona Ia aoaoina i tatou uma i le uiga o le i ai o le faatuatua: “Ua e talitonu aua ua e vaai mai ia te au: amuia o e le vaai mai, a e talitonu mai pea.”13
O tagata talitonu i luga o le konitineta o Amerika sa feagai foi ma tofotofoga faapea o le faatuatua. E pei ona valoia e Samuelu, sa i ai “faititili ma le uila,”14 ma na ufitia e le pouliuli “luga o lenei laueeleele i aso e tolu.”15 Ae o e na “talia perofeta ae le’i fetogia i maa”16 e le’i fefefe pe sosolaese. Sa latou iloaina o le “faailoga lenei na tuuina mai i le maliu [o le Faaola],”17 ma faapotopoto atu i le malumalu, ma taufaiofo faatasi ai. Ma o iina na Ia faaali atu ai ia i latou, ua faapea atu:
“Faauta, o A’u o Iesu Keriso, o le na molimau ai perofeta, e sau i le lalolagi.
“… ua ou inu foi i lena ipu oona na tuuina mai ia te au e le Tama, ma ua ou faamamaluina le Tama i le aveina i o’u luga o agasala a le lalolagi… .
“Ua oo ina fetalai atu e Iesu o nei upu, ona faapauu ai lea o le motu o tagata uma i le eleele; aua ua latou manatua, sa valoia ia te i latou, e faaali Keriso e ia lava ia te i latou, pe a mavae lona afio ae i le lagi.”18
Uso e ma tuafafine, o valoaga o le uluai afio mai o Keriso na faataunuuina, “iota uma.” O le taunuuga, o le toatele i le lalolagi atoa e talitonu na afio mai le Faaola ma sa soifua ai i le vaeluaga o aso. Ae o loo tele pea valoaga e le’i faataunuuina! I lenei konafesi ma isi konafesi, tatou te faalogo ai i perofeta soifua o vavalo ma molimau mai i le Afio Mai Faalua o Keriso. Latou te molimau mai foi i faailoga ma mea ofoofogia ia i tatou, e ta’u mai ai e mautinoa lava o le a toe afio mai Keriso. Pe ua tatou filifili ea e talitonu i a latou upu? Po o le, e ui lava i a latou molimau ma lapataiga, pe o tatou faatalitali ea mo se faamaoniga—pe o tatou “savavali ea i le pouliuli i le aoauli,”19 e mumusu e vaai i le malamalama o valoaga o onaponei, ma teenaina o le a toe foi mai le Malamalama o le Lalolagi e pule ma nofotupu ia i tatou?
I le gasologa o lo’u olaga, ua ou iloa ai le toatele o tagata lelei ma le agaalofa o e taofimau i tulaga taua faaKerisiano. Ae peitai, o nisi ua le lava le faatuatua o loo soifua o Ia, o Ia o le Faaola o le lalolagi, ma ua toefuatai mai Lana Ekalesia i le lalolagi. Talu ai latou te le talitonu i upu a perofeta, ua latou misia ai le olioli o le talalelei ma ona sauniga faaola i o latou olaga.
E i ai sa’u uo faapelepele, o le na fesili mai i se tasi aso e le i mamao atu, i se lagona faaleuso: “Elder Hales, ou te fia talitonu. Sa ou manao lava ia ou talitonu, ae faapefea ona ou faia?” O le taeao nei ou te fia tali atu ai i lena fesili.
Na tusi atu le Aposetolo o Paulo i tagata Roma, “E tupu le faatuatua i le taulogologo atu, o le taulogologo atu foi o i le afioga a le Atua lea.”20 O le tulaga faapea o loo e maimoa, faalogo, pe faitauina taualumaga o lenei konafesi o lona uiga o loo e faalogologo i le afioga a le Atua. O le laasaga muamua lava i le mauaina o le faatuatua i le Alii o Iesu Keriso o le tuu atu lea i Lana afioga—o loo tautalagia e fofoga o Ana auauna, o perofeta—ia pa’i atu i lou loto. Ae le lava ai le na ona oo atu lava o na upu ia te oe, e pei ua lava lena e mafai ona suia ai oe. E tatau ona faia la tatou vaega. Po o le, e pei ona fetalai le Faaola lava Ia, “o le ua i ai taliga e faalogo ai, ina faalogo mai ia o ia.”21 I se isi faaupuga, o le faalogo e moomia ai se taumafaiga mataalia. “E mate le faatuatua pe a leai ni galuega.”22 O lona uiga o le matuai faatauaina lea o mea na aoaoina, mafaufau lelei i ai, suesueina i o outou mafaufau. E pei ona aoaoina e le perofeta o Enosa, o lona uiga o le tuuina atu lea i molimau a isi o le talalelei ina ia “[tuia] ai o [tatou] loto.”23 Se’i o tatou iloiloina nisi o elemene o le aafiaga loloto o Enosa e fausia ai le faatuatua:
Muamua, na faalogo Enosa i upumoni o le talalelei o aoaoina mai e lona tama, e pei lava ona outou faalogoina i totonu o tou aiga ma lenei konafesi. Lua, na ia tuu atu i aoaoga a lona tama e uiga i le “ola faavavau ma le olioli tele o le au paia”24 ina ia tuia ai lona loto. Tolu, sa faatumulia o ia i se manao ina ia iloa e ia lava pe moni nei aoaoga, ae o fea e tu ai o ia i luma o Le na faia o ia. Ia faaaoga upu a Enosa, “Sa matelaina lo’u agaga.”25 O le i ai o lenei matuai naunau i meaai faaleagaga, na agavaa ai Enosa lava ia e mauaina le folafolaga a le Faaola: “Amuia i latou uma o e fia aai ma fia inu i le amiotonu, aua e maoona i latou i le Agaga Paia.”26 Fa, na usita’i Enosa i poloaiga a le Atua, lea na mafai ai e ia ona gauai atu i le Agaga o le Agaga Paia. Lima, na tusia e Enosa, “Na ou tootuli ai lea i luma o Le na faia a’u, ma ua ou tagi atu ia te ia i le tatalo faatauanau ma le aioi atu mo lo’u lava agaga; na ou tagi ia te ia i le aso atoa, ioe, ina ua po lava le aso ua ou alaga atu pea i le lagi.”27 Sa le’i faigofie. E le’i vave ona oo mai le faatuatua. O le mea moni lava, na faamatalaina e Enosa lona aafiaga i le tatalo o se “fagatuaga na [ia] faia i luma o le Atua.”28 Ae na oo mai lava le faatuatua. O le mana o le Agaga Paia, na ia maua ai se molimau mo ia lava.
E le mafai ona tatou mauaina le faatuatua pei o Enosa e aunoa ma lo tatou fagatua i luma o le Atua i le tatalo. Ou te molimau atu e aoga le taui mo le taumafaiga. Ia manatua le faatulagaga: (1) faalogo i le afioga a le Atua, e tautalagia pe tusia e Ana auauna anamua; (2) ia tuia ai lou loto i lena upu; (3) ia matelaina lou agaga mo le amiotonu; (4) mulimuli ma le usiusita’i i tulafono, sauniga, ma feagaiga; ma le (5) ia sii lou leo i le tatalo faatauanau ma le aioi, ia ole atu i le faatuatua ina ia iloa o Iesu Keriso o lo tatou Faaola. Ou te folafola atu afai e te faia nei mea ma le faamaoni ma le le musua, o afioga na fetalai i ai Keriso i Ona soo o le a faataunuuina i lou olaga: “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou.”29
O le taimi lava tatou te maua ai le amataga o lo tatou faatuatua ia Iesu, ona faatagaina lea e lo tatou Tama Faalelagi lo tatou faatuatua ina ia faamalosia. E tele auala e tupu ai lenei mea, e aofia ai le aafiaga o faigata. Na tusia talu ai nei e se tasi ou te masani ai:
“Ua maliu le atalii o le ma tama e lua ma le afa tausaga le matua i le liukimia… . E le’i teueseina lava e la’u fanau lona moega; e le o toe [mamao] atoa le 7 tausaga [talu ona maliu o ia. E faigata tele] ona i ai le faatuatua. Na maliu [sa’u] uo[sa] 69 ona tausaga. E tolu [ona] ituaiga kanesa i le 10 tausaga, lea na faalua ona tau mou ese atu ai. [Na latou mauaina muamua lava i totonu o ona] fatuga’o, [ona sosoo ai lea ma lona] faiai, sosoo ai [ma] [ona] mama. Sa le mafai ona [ia] toe gafataulimaina. Sa [ia] taumafaia mea uma e mafai e se tagata ma o le 6 tausaga talu ai na maua ai lona faatuatua… . ae le’i mafai ona ia toe ola i se isi aso faaopoopo, ma ou te matea e faigata tele ona talitonu i ai.”
O lenei augani mai ia te au mo le faatuatua na taliina faapenei: “O lau tala i le maliu o le atalii o lau tama i le liukimia e faamomoiloto. E faamoemoe, o le a maua e oe ma lau fanau le filemu a o outou sailia ia tali i le faamoemoega o le olaga. O lo tatou faatuatua e maua i le tatalo ma se naunautaiga faamaoni ina ia faalatalata atu ai i le Atua ma faalagolago ia te Ia ina ia tauaveina ai a outou avega ma tuuina atu ai tali i tulaga lilo e le mafaamatalaina o le faamoemoega o le olaga: O fea na tatou omai ai? Aisea ua tatou i ai iinei i le lalolagi i le olaga faaletino? Ae o fea tatou te o i ai pe a mavae lo tatou nonofo ai e le tumau i le lalolagi? O loo manuia mea uma i si au tama aua na maliu o ia a o le’i oo i le valu tausaga e faamasinoina ai ma o loo i ai o ia i le afioaga o le Atua. Saili le faatuatua, ma ia i ai faamanuiaga a le Atua ma oe.”
Pe le o se mea e maofa ai ona o lē e puapuagatia e tele ina mauaina le faatuatua e ala i le puapuagatia ma taliaina le finagalo o le Alii, “ia faia lou finagalo,”30 ae o tagata o aiga ma e e tausia e mafai ona maua se taimi faigata e taliaina ai le taunuuga faanoanoa ma mafai ona faamalosia lo latou faatuatua mai le aafiaga na oo i ai. E le mafai ona tatou fuatia le faatuatua e ala “i se isi aso faaopoopo e ola ai.”
Afai e oo mai luitau o le olaga faaletino, ma e oo mai mo i tatou uma lava, e foliga mai e faigata ona maua le faatuatua ma faigata ona talitonu. I nei vaitaimi, e na o le faatuatua i le Alii o Iesu Keriso ma Lana Togiola e mafai ona aumaia ai le filemu, faamoemoe, ma le malamalama ia i tatou. E na o le faatuatua na Ia puapuaga mo i tatou o le a maua ai e i tatou le malosi e tumau ai e oo i le iuga. Afai tatou te mauaina lenei faatuatua, tatou te iloaina se liliuina tele o le loto, ma, e pei o Enosa, tatou te malolosi ma amata ona lagonaina le manao mo le soifua manuia o o tatou uso ma tuafafine. Tatou te tatalo mo i latou ina ia siitia ma faamalosia foi i latou e ala i le faatuatua i le Togiola a lo tatou Faaola o Iesu Keriso.
Se’i o tatou mafaufau lava i nisi nei o molimau faavaloaga o aafiaga o le Togiola i o tatou olaga. A o tatou faia, ou te valaauliaina outou ina ia tuia ai o outou loto ma faatumuina ai soo se vaega o loo matelaina ma le galala atonu o loo i ai i lou agaga.
“Ma o lena lava aso na afio ifo ai i luga o Atamu le Agaga Paia, o Le e molimau i le Tama ma le Alo, o le na faapea mai: O au o le Atalii e Toatasi na Fanau o le Tama mai le amataga … , ina ia togiolaina oe talu ai ona ua e pau.”31
Ma “ua faailoa atu le Alii o ia lava [i le uso o Iareto], ma faapea atu: … Faauta, o a’u o le na saunia talu le faavaeina o le lalolagi e togiolaina lo’u nuu… . O a’u e maua ai e tagata uma le ola, e faavavau foi lea, o i latou lava o e faatuatua i lo’u igoa.”32
Na molimau mai Apinati: “O lo’u manao ia malamalama ia te outou, e afio ifo le Atua lava i le fanauga a tagata ma togiola lona nuu… . Ioe, e faapea lava ona taitaiina atu o ia, ma faasatauroina, ma fasiotia … ; ua foaiina ia te [ia] le mana e fautua mo le fanauga a tagata … , ua togiola foi ia te i latou, ma faamalie ai poloaiga a le faamasinoga.”33
Ma le vaega faaiu, o Iosefa Samita. I le avea ai ma se taulealea e 14 tausaga le matua, sa ia faaalia le faatuatua e le maluelue ma mulimuli i le taitaiga a le perofeta o Iakopo ina ia “ole atu i le Atua.”34 Talu ai ona o le valaauga faaperofeta a Iosefa, na faaali atu ai le Atua le Tama ma Lona Alo, o Iesu Keriso ia te ia ma tuuina atu faatonuga ia te ia. E maeu le mamalu o lenei Uluai Faaaliga i le uluai perofeta o lenei tisipenisione mulimuli! I le sefuluono tausaga mulimuli ane i le Malumalu o Katelani, na toe asiasi atu ai le Faaola ia Iosefa, ma molimau mai ai: “Na ma vaaia le Alii… . Ma o lona siufofoga e pei o le taalili o vai tetele, o le siufofoga lava o Ieova, ua faapea mai: O A’u le muamua ma le mulimuli; o A’u o le o loo ola, o A’u o le na fasiotia; o A’u o lo outou fautua i le Tama.”35
I la’u uo pele ma i latou o e o loo matelaina o latou agaga i le faatuatua, ou te valaaulia outou ina ia “saili ia Iesu ua tusia e le au perofeta ma le au Aposetolo.”36 Ia tuia o outou loto i le latou molimau, na tuuina mai e le Faaola Lona soifua mo outou. Saili se molimau o le upumoni e ala i le Agaga Paia i le tatalo, ona vaai lea i le faamalosia o lo outou faatuatua a o outou faafetaiaia ma le olioli ia luitau o lenei olaga faaletino ma saunia ai mo le ola faavavau.
Na afio mai Iesu Keriso. Sa soifua o Ia. Ma o le a Ia toe afio mai. Ou te iloa lenei mea ma e tuuina atu ai la’u molimau ma la’u tautinoga faapitoa, i le suafa paia o Iesu Keriso, amene.