Konfiansa den Señor
Nos relashon ku Dios lo krese solamente na e grado ku nos ta dispuesto pa konfia den djE.
Den nos famia, tin bes nos ta hunga un wega ku nos ta yama “E Ehersisio Loko di Konfiansa.” Boso tambe kisas a hung’é. Dos hende ta para algun pia leu for di otro, unu ku lomba [e otro. Riba señal di e persona patras, e persona dilanti ta kai patras den e mannan di su amigu ku ta wardando.
Konfiansa ta e fundeshi di tur relashonnan. Un pregunta di balor pa kada relashon ta “Mi por konfia e otro persona?” Un relashon por wòrdu formá solamente ora ku hende ta dispuesto pa pone konfiansa den otro. No ta un relashon si un persona ta konfia kompletamente i e otro no.
Kada un di nos ta “un yu spiritual di un Tata Selestial ku ta stimá.”1 Pero ounke genealogia spiritual ta proveé un fundeshi, e no ta krea di su mes un relashon mas signifikante ku Dios. Un relashon por wòrdu konstruí solamente ora nos skohe pa konfia den djE.
Tata Selestial ta deseá pa krea un relashon profundo i personal ku kada un di Su yunan spiritual.2 Jesus a ekspresá e deseo ei ora El a hasi orashon, “Pa nan tur por ta un, manera Abo ta den Mi i Ami den Bo, pa asina nan tambe por ta den nos.”3 E relashon ku Dios ta buska ku kada un di su yunan spiritual ta unu asina será i personal ku E lo por kompartí tur loke E tin i tur loke E ta.4 E tipo di relashon profundo, duradero ei por desaroyá solamente ora ku traha riba konfiansa perfekto, total.
Di Su parti, Tata Selestial a traha for di komienso pa komuniká Su konfiansa apsoluto den e potensial divino di kada un di Su yunan. Konfiansa ta e base di e plan ku El a presentá pa nos kresementu i progreso promé ku nos a bin na mundu. E lo a siña nos leinan eterno, krea un mundu, proveé nos ku kurpanan mortal, duna nos e don di por skohe pa nos mes, i permití nos siña i krese dor di hasi nos propio eskóhonan. E ke pa nos lo skohe pa sigui Su leinan i regresá bek pa gosa di bida eterno kunE i Su Yu.
Sabiendo ku nos lo no hasi bon eskóhonan semper, El a prepará un kaminda pa nos skapa for di e konsekuensianan di nos mal eskohonan. El a proveé nos un Salbador—Su Yu, JesuCristo—pa ekspia pa nos pikánan i hasi nos limpi atrobe bou di kondishon di arepentimentu.5 E ta invitá nos pa usa e regalo presioso di arepentimentu regularmente.6
Kada mayor sa kon difísil e ta pa konfia un yu sufisiente pa laga nan tuma nan propio desishonnan, spesialmente ora ku e mayor sa ku e yu kisas lo komete erornan i sufri komo resultado. Aun asina Tata Selestial ta pèrmití nos pa hasi eskohonan ku lo yuda nos yega nos potenshal divino! Manera Elder Dale G. Renlund a siña, “[Su] ophetivo den kria no ta pa Su yunan hasi loke ta bon; ta pa Su yunan skohe pa hasi loke ta bon i últimamente bira manera E.”7
No opstante Dios su konfiansa den nos, nos relashon kunE por krese solamente na e grado ku nos ta dispuesto pa konfia den djE. E reto ta ku nos ta biba den un mundu kaí i nos tur a eksperensiá un traishon di konfiansa komo resultado di deshonestidat, manipulashon, koershon òf otro sirkunstanshanan. Una bes traishoná, nos lo tin ku lucha pa konfia atrobe. E eksperensianan negativo di konfiansa aki ku mortalnan imperfekto por asta impakta nos boluntat di konfia den un Tata Selestial perfekto.
Hopi aña pasá, dos amigu di mi, Leonid i Valentina, a ekspresá nan interes den bira miembro di e Iglesia. Ora Leonid a kuminsá siña e evangelio, el a hañ’é difísil pa hasi orashon. Anteriormente den su bida, Leonid a sufri di manipulashon i kontrol dor di superiornan i a desaroyá un deskonfiansa den outoridat. E eksperensianan aki a afektá su abilidat pa habri su kurason i ekspresá sentimentunan personal na Tata Selestial. Ku tempu i estudio, Leonid a gana un mihó entendimentu di Dios su karakter i a eksperensiá sinti Dios su amor. Eventualmente, orashon a bira un manera natural pa e pa ekspresá gratitut i interkambiá e amor ku e tabata sinti pa Dios. Su konfiansa kresiente den Dios eventualmente a hiba na e ku Valentina na drenta den e kombenionan sagrado pa fortalesé nan relashon ku Dios i ku un i otro.
Si pèrdida di konfiansa anteriormente ta teniendo bo leu for di Dios, por fabor sigui Leonid su ehèmpel. Sigui ku pasenshi pa siña mas tokante Tata Selestial, Su karakter, Su atributonan, i Su propósito. Buska i skibi eksperensianan sintiendo Su amor i poder den bo bida. Nos profeta bibu, Presidente Russel M. Nelson, a siña ku mas nos siña tokante Dios, mas fásil e lo ta pa nos konfia den djE.8
Tin bes e mihó manera pa siña di konfia Dios ta dor di simplemente konfi’E. Manera e “Ehersisio di Konfiansa Loko,” tin bia nos djis mester tin e boluntat di kai atras i laga E gara nos. Nos bida mortal ta un tèst. Desafionan ku ta bai mas ayá di nos propio kapasidat ta bin frekuentemente. Ora nos konosementu i entendimentu ta inadekuá, nos naturalmente ta buska fuentenan pa yuda nos. Den un mundu saturá ku informashon, no tin un eskases di fuentenan promoviendo nan solushonnan na nos desafionan. Sinembargo, e konseho simpel i eterno den Proverbionan ta proveé nos e mihó konseho: “Konfia den Señor ku henter bo kurason.”9 Nos ta demostrá nos konfiansa den Dios dor di bira na djE promé ora nos wòrdu enfrentá ku desafionan di bida.
Ora mi a kaba skol di lei na Utah, mi famia tabata enfrenta un desishon importante di unda pa traha i hasi nos hogar. Despues di konsehá un ku otro i ku Señor, nos a sinti dirigí pa muda nos famia bai e parti ost di Merka, leu for di mayornan i rumannan. Inisialmente, kosnan a bai bon, i nos a sinti konfirmá den nos desishon. Pero despues kosnan a kambia. Tabata tin un bahada di personal na e kantor di abogado, i mi a enfrentá tantu pèrdida di entrada i prospekto di no tin traboou i na mes momentu nos yu Dora a nase ku retonan médiko serio i nesesidat di yudansa speshal pa término largu. Mientras konfrontando e desafionan aki, a ekstendé n’ami un yamamentu pa sirbi ku lo a rekerí tempu i kompromiso signifikante.
Nunka mi a enfrentá e tipo di desafio ei i tabata abrumá. Mi a kuminsa kuestioná e desishon ku nos a hasi i e konfirmashon ku a bin kuné. Nos a konfia den Señor, i tur kos mester a resultá bon. Mi a kai atras, i awor ta aparentá ku niun hende no tabata bai gara mi.
Un dia e palabranan “No puntra dikon: puntra kiko mi kier pa bo siña” a bin firmemente na mi mente i kurason. Awor mi tabata mas konfundí. Den e momentu ei ku mi tabata lucha ku mi desishon anterior, Dios tabata invitando mi pa konfi’E mas tantu. Mirando bek atras, esaki tabata un punto kritiko den mi bida—e tabata e momentu ku mi a realisá ku e mihó manera pa siña konfia den Dios tabata simplemente konfia den djE. Den e simannan ku a sigui, mi a mira ku asombro ora ku Señor milagrosamente a desplega Su plan pa bendishoná nos famia.
Bon maestronan i entrenadó sa ku kresementu intelektual i fortalesa físiko por tuma lugá solamente ora mentenan i muskulonan wòru di trèk. Meskos, Dios ta invitá nos pa krese dor di konfia Su instrukshonnan spiritual pa medio di eksperensianan ku ta trèk e alma. P’esei, nos por ta sigur ku kualkier konfiansa ku nos por a demostrá den Dios den pasado, un otro eksperensia pa ekstendé konfiansa ta pará ei dilanti. Dios ta enfoká riba nos kresementu i progreso. E ta e Maestro Prinsipal, e entrenadó kompletu ku semper ta trahando pa yuda nos realisá djis un tiki mas di nos potensial dibino. Esei semper lo inkluí un invitashon pa futuro pa konfi’E djis un tiki mas.
E Buki di Mormon ta siña nos e patronchi ku Dios ta usa pa trèk nos p’asina konstruí relashonnan fuerte ku nos. Den Ven Sigueme, resientemente nos a siña tokante kon Nefi su konfiansa den Dios a wòrdu poné na prueba ora ku e i su rumannan a wòrdu ordená pa regresá Jerusalem pa optené e planchanan di bròns. Despues ku nan promé intentonan a frakasá, su rumannan a entregá i tabata kla pa regresá sin e planchanan. Pero Nefi a skohe pa pone su konfiansa kompletu den Señor i tabata tin éksito den optené e planchanan.10 E eksperensia ei probablemente a stimulá Nefi su konfiansa den Dios ora ku su arko a kibra i e famia tabata konfrontando hamber den desierto. Atrobe, Nefi a skohe pa konfia den Dios i e famia a wòrdu salba.11 E eksperensianan susesivo aki a duna Nefi konfiansa mas fuerte den Dios pa e tarea enorme ku ta desafiá e konfiansa ku el lo a enfrentá pronto esta di konstruí un barku. 12
Pa medio di eksperensianan aki, Nefi a fortalesé su relashon ku Dios dor di konfi’E ku konsistensia i kontinuamente. Dios ta usa e mesun patronchi ku nos. E ta ekstendé nos un invitashon personal pa fortalesé i profundisá nos konfiansa den Dje.13 Kada bes ku nos aseptá i aktua riba un invitashon, nos konfiansa den Dios ta krese. Si nos ignorá òf rechasá un invitashon, nos progreso ta stòp te ora ku nos ta kla pa aktua riba un invitashon nobo.
E bon notisia ta ku no opstante e eskoho ku nos a hasi pa pone konfiansa òf no den Dios den pasado, nos por skohe pa konfia Dios awe i kada dia ku ta sigui. Mi ta primintí ku kada bia ku nos hasié, Dios lo tei einan pa gara nos, i nos relashon di konfiansa lo krese mas fuerte te dia ku nos bira un ku nE i Su Yu. E ora ei nos por deklará manera Nefi, “Oh Señor, mi a konfia den bo, i lo mi konfia den bo pa semper.”14 Den e nòmber di JesuCristo, amèn.