Tur Kos Lo Ta Bon Dor di Kombenionan di Tèmpel
No tin nada mas importante ku honra e kombenionan ku bo a hasi òf por hasi den e tèmpel.
Mi kerido rumannan, e seshon di konferensia general aki, tabata pa ami, un temporada sagrado. Mi ta agradesido pa e asignashon pa papia ku miles di Santunan di Delaster Dianan i nos amigunan rònt mundu. Mi stima boso i mi sa ku Señor stima boso.
Un 50 aña pasá, mi tabata tin e privilegio di sirbi komo presidente di Kolegio Ricks na Rexburg, Idaho. Riba e mainta di 5 yüni, 1976, mi kasa, Kathy i ami a kore for di Rexburg pa e Tèmpel di Idaho Falls pa asistí na e seyamentu di un amigu serkano. Dimes, ku kuater yu hòmber chikí na kas e tempu ei, nos biahe pa tèmpel por a wòrdu kristalisá únikamente ku yudansa di un “babysitter” yen di kurashi. Nos a laga nos yunan stimá na su enkargo i a hasi e kareda kòrtiku di 30 minüt.
Nos eksperensia den tèmpel e dia ei tabata maravioso, manera semper e tabata. Sinembargo, despues di e konklushon di e seyamentu den tèmpel—i segun nos ta preparando pa regresá kas bek—nos a nota hopi obreronan di tèmpel i patronnan kombersando nèrvioso den lòbi di tèmpel. Den un ratu di tempu, un di e obreronan di tèmpel a informá nos ku e Dam di Teton konstruí nobo na e parti ost di Idaho a kibra! Mas di 80 mil mión galòn (300 mion meter kúbiko) di awa tabata kore dor di e dam i den e 300 mia kuadrá (775 km kuadra) di e vayenan den bisindario. Hopi parti di e siudat di Rexburg tabata bou di awa, ku bibiendanan i vehíkulonan lastrá dor di awanan di inundashon. Dos tersera parti di e 9000 abitantenan tabata direpente sin bibienda.1
Manera boso por imaginá, nos pensamentunan i preokupashonnan inmediatamente a bai pa seguridat i bienestar di nos kerido yunan, sentenáres di studiantenan i dosentenan di universidat, i un komunidat ku nos stima. Nos tabata ménos ku 30 mia (50 km) for di kas, i sinembargo riba e dia aki, hopi mas promé ku telefòn selular i mensahenan di teksto, nos no tabatin ningun manera pa komuniká inmediatamente ku nos yunan, tampoko nos por a kore for di Idaho Falls bai bèk Rexburg, ya ku tur kamindanan a wòrdu será.
Nos úniko opshon tabata pa pasa e anochi den un motèl lokal na Idaho Falls. Kathy i ami a hinka rudia huntu den nos kamber di motèl chikí i a supliká Tata Selestial humildemente pa e seguridat di nos yunan stimá i pa e míles di personanan afektá pa e suseso trágiko. Mi ta kòrda Kathy kanando bai bin te den oranan di mainta ku preokupashon pa su yunan. Apesar di mi propio preokupashonnan opviamente, mi tabata por a trankilisá mi mente i finalmente bai soño.
No a dura muchu ku mi kerida kompañera eterno a lanta mi i bisa, “Hal, kon bo por drumi den un momentu asin’aki?”
E palabranan aki e ora ei a bin kla na mi kurason i mente. Mi a bisa mi kasa, “Kathy, loke sea e resultado, tur kos lo ta bon danki na e tèmpel. Nos a hasi kombenionan ku Dios i a wòrdu seyá komo un famia eterno.”
Na e momentu ei, tabata manera e Spiritu di Señor a konfirmá den nos kurason i mente loke nos tur dos tabata sa ku ta bèrdat: e ordenansanan di seyamentu, ku por haña solamente den kas di Señor i atministrá pa outoridatnan apropiá di saserdosio, a seya nos na otro komo kasa i nos yunan a wòrdu seya na nos. Di bèrdat no tabata tin nesesidat di tin temor, i nos tabata agradesido di por a konfirmá mas lat ku nos yu hòmbernan tabata bon.
Kisas e deklarashon aki di Presidente Thomas S. Monson por ilustrá mas mihó loke Kathy i ami a sinti riba e anochi inolvidabel ei. “Ora nos asistí na tèmpel, lo por bin na nos un dimenshon di spiritualidat i un sentimentu di pas. … Nos lo komprondé e berdadero nifikashon di e palabranan di e Salbador ora e la bisa: “Pas mi ta laga ku boso, mi pas mi ta duna na boso. … No laga boso kurason ta perturbá, tampoko lage tin miedu[Juan 14:27].’”2
Mi a wòrdu bendishoná pa sinti e pas ei kada momentu ku mi drenta e tèmpel sagrado. Mi ta kòrda e promé dia ku mi a kana drenta e Tèmpel di Salt Lake. Mi tabata yòn.
Mi a wak ariba na e plafòn haltu blanku, ku a iluminá e sala asina tantu ku kasi e tabata parse ku e tabata habrí pa shelu. I na e momento ei, e pensamentu a bini na ni mente den palabranan kla: “mi tabata den e lugá iluminá áki kaba.” Pero inmediatamente a bini na mi mente, no den mi propio bos, e palabranan aki: 0147No, nunka promé bo no a bini aki nan. Bo ta kòrdando un momento promé ku bo a nanse. Bo tabata den un lugá sagrado manera esaki kaminda Señor por a bini.”
Rumannan, mi ta testifiká humildemente ku ora nos asistí na tèmpel, nos por kòrda di e naturalesa eterno di nos spiritu, nos relashon ku Tata i Su Yu dibino i nos deseo máksimo pa regresá na nos hogar selestial.
Den diskurso di konferensia resien, Presidente Russell M. Nelson a siña:
“E lugá di mas sigur pa ta spiritualmente ta di biba denter di bo kombenionan di tèmpel!”
“Tur loke nos ta kere i kada promesa ku Dios a hasi ku Su pueblo di kombenio ta bin huntu den tèmpel.”3
“Kada persona ku hasi kombenionan … den tèmpelnan—i warda nan—tin mas akseso na e poder di JesuCristo.”4
El a siña tambe ku “una bes nos hasi un kombenio ku Dios, nos ta bandoná e suela neutral pa semper. Dios lo no bandoná Su relashon ku esnan ku a forma e tipo di lasonan ku n’É. En realidat, tur esnan ku a hasi un kombenio ku Dios tin akseso nan un tipo di amor i miserikòrdia speshal.”5
Bou di Presidente Nelson su liderazgo speshal, Señor a aselerá i lo sigui aselerá, e konstrukshon di tèmpelnan rònt mundu. Esaki lo permití tur Dios Su yunan e oportunidat pa risibí e ordenansanan di salbashon i eksaltashon i pa hasi i warda kombenionan sagrado. Kalifiká pa hasi kombenionan sagrado no ta un esfuerso di un solo biaha pero un patronchi di bida largu. Señor a bisa ku esaki lo rekerí hinter nos kurason, alma, mente i forsa.6
Partisipashon frekuente den e ordenansanan den tèmpel por krea un patronchi di deboshon na Señor. Ora ku bo warda bo kombenionan di tèmpel i rekordá nan, bo ta invitá e kompania di e Spiritu Santu pa tantu fortalesé i purifiká bo.
Lo bo por eksperensia e ora ei un sintimentu di lus i speransa testifikando ku e promesanan ta bèrdat. Lo bo yega na sa ku kada kombenio ku Dios ta un oportunidat pa hala mas serka di Dje, kual lo krea e ora ei un deseo den bo kurason pa warda kombenionan di tèmpel.
A wòrdu primintí na nos, “Dor di nos kombenio ku Dios, E nunka lo no kansa den Su esfuersonan pa yuda nos, i nunka nos lo agotá Su pasenshi mizerikòrdioso ku nos.”7
E ta pa medio di e kombenionan di seyamentu den tèmpel ku nos por risibí e siguransa di un konekshon amoroso di un famia ku lo kontinuá despues di morto i ku lo dura pa eternidat. Honra kombenionan matrimonial i familiar hasi den tèmpel ku Dios lo brinda protekshon for di e maldat di egoismo i orguyo.
Kuido konsistente di hermano i hermananan un pa otro lo wòrdu logra solamente ku esfuersonan persistente pa guia bo famia den e kaminda di Señor. Duna muchanan oportunidat pa hasi orashon un pa otro. Diserní hopi lihé komienso di diskordia i rekonosé positivamente aktonan di servisio sin egoismo, spesialmente un na otro. Ora ku rumannan ta hasi orashon un pa otro i sirbi otro, kurasonnan lo wòrdu moldia i bira na otro i na nan mayornan.
Por parti, esei ta loke ta deskribí dor di Malakias ora ku el a predisí e yegada di e profeta Elias: “E lo planta den e kurason di e yunan e promesanan hasí na e tatanan i e kurason di e yunan lo bira na e tatanan. Si lo no tabata asina, hinter e mundu lo a wòrdu destruí na su binida.”8
Pruebanan, retonan i angustia lo bin sigur pa nos tur. Niun di nos ta imün pa “sumpiñanan di e karni.”9 Sinembargo, segun nos ta asistí na tèmpel i rekordá nos kombenionan, nos por prepará pa risibí direkshon personal for di Señor.
Ora ku Kathy i ami a kasa i seya den Tèmpel di Logan Utah, e seyamentu a keda efektuá pa e tempu ei Elder Spencer W. Kimball. Den e tiki palabranan ku el a papia , el a duna e konseho aki,“Hal i Kathy, biba di un manera ku ora e yamada yega boso por sali bai fásilmente.”
Na prinsipio, nos no a komprondé kiko e konseho ei tabata nifiká pa nos, pero nos a hasi nos bèst pa biba nos bida di tal manera ku nos lo ta prepará pa sirbi Señor ora ku e yamada a yega. Despues ku nos tabata kasa pa kasi 10 aña, a drenta un yamada inesperá di esun enkargá ku Edukashon di Iglesia, Neal A. Maxwell.
E konseho amoroso duná pa Presidente Kimbell den tèmpel pa ta prepará pa “sali fásil” a bira realidat. Kathy i ami a risibí un yamamentu pa bai laga atras loke tabata parse un situashon familiar ideal na California pa sirbi den un asignashon i den un lugá ku mi no sa nada di dje. Sinembargo, nos famia tabata kla pa bai pasó un profeta, den un tèmpel sagrado, un lugá di revelashon, a mira un suseso den futuro, pa kual nos tabata prepará e momentu ei.
Mi kerido rumannan, mi ta testifiká ku no tin nada mas importante ku honra e kombenionan ku bo a hasi o lo por hasi den tèmpel. No ta importá unda bo ta riba e kaminda di kombenio, mi ta urgi bo pa kalifiká i bin na remarke pa asistí na tèmpel. Bishita ku mas frekuensia segun sirkunstansianan ta permití. Hasi i warda kombenionan ku Dios. Mi por sigurá bo di e mesun bèrdat ku mi a kompartí ku Kathy mei mei di e anochi kasi 5 dékada pasá den un kamber di motèl chikí di Idaho Falls: “No ta importá e resultado, tur kos lo ta bon danki na e kombenionan di tèmpel.”
Mi ta duna boso mi testimonio ku siguridat ku Jesus ta e Cristo. E ta bibu i ta guia Su Iglesia. Tèmpelnan ta kasnan di Señor. Presidente Russell M. Nelson ta Dios su Profeta bibiente na tera. Mi Stim’e i mi stima kada un di boso. Den e nòmber sagrado di JesuCristo, amèn.