Un Registro di Tantu Loke Mi A Mira i Skucha
Nunka tabata tin un mihó tempu pa ta un miembro di E Iglesia di JesuCristo di e Santunan di e Delaster Dianan.
Despues ku mi a graduá na skol di lei, mi kasá, Marcia i ami a skohe pa djòin un kantor di abogado ku ta spesialisá den huisionan di promé instansia. Ora ku mi a kuminsá mi training riba trabou, mi a pasa hopi di mi tempu preparando testigunan pa testifiká na huisionan di promé instansia. Hopi lihé mi a siña ku echonan tabata wòrdu determiná den sala di korte ora ku testigunan, bou huramentu, tabata testifiká di e bèrdat di loke nan tantu a mira i a skucha. Ora ku testigunan testifiká, nan palabranan tabata wòrdu graba i preservá. Eimportansia di testigunan konfiabel tabata semper na promé lugá den mi preparashon.
E no a tuma muchu pa mi realisá ku e mesun términonan ku mi tabata usa tur dia komo abogado tabata tambe e términonan ku mi tabata usa den mi kombersashonnan di evangelio. “Testigu” i “testimonio” ta e terminonan ku nos ta usa ora ku nos ta kompartí nos konosementu i sintimentu tokante e bèrdat di e evangelio di JesuCristo.
Ora mi a wòrdu sostené komo Setenta di Aria, mi a habri e skrituranan pa mi siña mi debernan, mi a lesá Doctrina y Convenios107:25 kual ta sita, “E setenta ta wòrdu yama tambe … pa [nan] ta testigunan speshal pa e gentilnan i den hinter mundu.” Manera bo por imaginá, e término “testigunan speshal” a kapta atenshon di mi wowonan. El a bira kla pa mi ku mi tabata tin un responsabilidat i un responsabilidat pa duna mi testimonio—pa testifiká di e nòmber di JesuCristo—unda ku mi biaha na mundu.
Tin hopi ehèmpel den skritura di esnan ku tabata testigu ku a mira i ku a testifiká di tantu loke nan a mira i skucha.
Ora ku e profeta Mormon di antigwedat a kuminsá su registro, el a skibi, “I awor, ami, Mormon, a traha un registro di e kosnan ku ami a tantu mira komo skucha i mi ta yam’é e Buki di Mormon.”1
E Salbador su Apòstelnan Pedro i Juan a sana un hòmber den e nòmber di JesuCristo di Názarèt.2 Ora ku a ordená nan pa no a papia den e nòmber di Jesus, nan a respondé:
“Si ta rekto dilanti di Dios pa skucha boso mas ku Dios, husga boso.
“Paso nos no por papia nada otro ku no ta e kosnan ku nos a mira i skucha.”3
Un otro testimonio konvinsente ta bini for di e Santunan di e Buki di Mormon ku tabata testigu di e bishita di e Salbador JesuCristo. Skucha e deskripshon aki di nan testimonio: “I di e manera aki nan ta duna testimonio: E wowo nunka no a wak, ni e orea a tende, ántes, kosnan asina grandi i maravioso manera nos a mira i skucha Jesus papia ku e Tata.”4
Rumannan, awe mi ta deklará mi testimonio i ta registrá di loke mi a tantu mira komo skucha durante mi ministerio sagrado komo un Setenta di Señor JesuCristo. Hasiendo asina, mi ta testifiká na boso di un Tata Selestial amoroso i Su Yu bondadoso, JesuCristo, ku a sufri, muri i resusitá pa ofresé bida eterno na yunan di Dios. Mi ta testifiká di “un trabou maravioso i un asombro” 5 i ku Señor a pone Su man un bes mas pa restorá Su evangelio riba mundu pa medio di Su profeta bibu i apòstelnan.6 Mi ta testifiká ku basá riba loke mi a tantu mira komo skucha, nunka tabata tin un mihó tempu pa ta un miembro di e Iglesia di JesuCristo di e Santunan di e Delaster Dianan ku awendia. Mi sa esaki for di mi propio konosementu, independiente di kualkier otro rekurso, dor di loke mi a tantu mira i skucha.
Durante mi último aña di skol sekundario, pa gradua di seminario mi mester a identifiká tur e 15 tèmpelnan di Iglesia. Un pintura di kada tèmpel tabata dilanti den nos lokal i mi mester a sa unda kada un tabata lokalisá. Awor, añanan despues, e lo ta un reto enorme—ku 335 tèmpel operashonal òf ku a keda anunsiá—pa identifiká kada un. Mi a mira hopi di e kasnan di Señor aki personalmente i ta testifiká ku Señor ta ofresé Su bendishonnan i ordenansanan na mas i mas di su yunan rònt mundu.
Mi amigunan na Historia Familiar a konta mi ku mas di un mion nòmbernan nobo ta wòrdu agregá na Historia Familiar tur dia. Si bo no a haña bo antepasadonan ayera, mi ta invitá bo pa wak atrobe mañan. Ora ta trata di rekohé Israel na e otro banda di e velo, nunka tabata tin un mihó tempu pa ta un miembro di E Iglesia di JesuCristo di e Santunan di e Delaster Diananku awendia.
Lantando nos yunan na Twin Falls, Idaho, nos perspektiva di e Iglesia rònt mundu tabata limitá. Ora ku mi a wòrdu yamá pa ta un Outoridat General, Marcia i ami a wòrdu asigná pa sirbi den e Área Pasífiko, un lugá kaminda nunka nos a bai. Nos tabata kontentu di haña estakanan for di e parti ariba di New Zealand te e parti abou, ku un tèmpel ku a wòrdu dediká na 1958. E tabata un di e 15 tèmpelnan ku mi mester a memorisá den seminario. Nos a haña tèmpelnan den kada siudat grandi di Australia, ku estakanan den hinter e kontinente ei. Nos a haña enkargonan den Samoa, kaminda tin 25 estaka, i Tonga, kaminda kasi mas ku mitar di e poblashon ta miembro di Iglesia. Nos tabata tin un tarea na e isla di Kiribati, kaminda no a haña dos estaka. Nos tabata tin enkargonan pa bishita estakanan den Ebeye den e islanan Marshall i Daru den Papua New Guinea.
Despues di nos servisio den e islanan Pasífiko, nos a wòrdu asigná pa sirbi na Filipina. Pa mi sorpresa e Iglesia di JesuCristo na Filipina ta kresiendo mas aleu di loke mi a realisá. Awor tin 125 estaka, 23 mishon i 13 tèmpel den funshon òf anunsiá. Mi ta testigu di un iglesia di mas ku 850.000 miembro den e pais ei. Kon mi por a pèrdè e establesimentu di Cristo su Iglesia rònt mundu.
Despues di tres aña na Filipina, mi a wòrdu puntrá pa mi sirbi den e deportamentu di Misioneronan. Mi asignashon a hiba nos na mishonnan rònt mundu. Mi bista di e Salbador su Iglesia rònt mundu a ekspandé bastante. Marcia i ami a wòrdu asigná pa bishitá mishonnan na Asia. Nos a haña un sentro di estaka bunita na Singapur, ku miembronan asombroso, miembronan fiel. Nos a bishitá miembronan i misioneronan den e kapèl na Kota Kinabalu, Malasia. Nos a konosé misioneronan na Hong Kong i partisipá den un konferensia di estaka maravioso ku Santunan fiel i dediká.
E eksperensia aki a ripití ora ku nos a konosé misioneronan i miembronan den Europa, Latino Amérika, den Karibe i na Afrika. E Iglesia di JesuCristo ta eksperensiando un kresementu tremendo den Afrika.
Mi ta un testigu di e Restorashon andando di e evangelio di JesuCristo i e kumplimentu di e profesia di Jose Smith ku “e bèrdat di Dios lo sali pa dilanti ku balentia, nobelmente i independiente, te ora ku e penetrá den tur kontinente, bishitá tur klima, bari tur paisnan i zona den tur orea.”7
Nos misioneronan maravioso kende awor ta kubri e mundu ta 74.000 awor aki. Trahando huntu ku miembronan, nan ta boutisá 20.000 persona tur luna. Ta trata hóbennan di 18-, 19-, i 20 aña kende resientemente ku yudansa di Señor a produsí e milager poderoso di rekohementu aki. Nos ta haña e mucha muhé i hòmbernan hóben aki den e pueblonan chikí di Vanuatu i den e siudatnan grandi di New York, Paris i London. Mi a wak nan siña tokante e Salbador den kongregashonnan leu den Fiji i lugánan di enkuentro mas grandi manera Texas, California i Florida na Estado Unidos.
Lo bo haña misioneronan den kada skina di mundu papiando 60 idioma diferente i kumpliendo ku e Salbador su gran enkargo den Mateo 28: “Bai pues boso, i siña tur nashonnan, boutisandonan den e nòmber di e Tata i di e Yu i di e Spiritu Santu.”8 Mi ta honra e misioneronan aktual i esnan di pasado di e Iglesia i rekordá nos generashon ku ta lanta di Presidente Nelson su invitashon pa bin e rekohé Israel.9
Mi ta testifiká awe ku mi a opservá e restorashon profundo aki di e Salbador su evangelio ku mi propio wowonan i skuch’é ku mi propio oreanan. Mi ta un testigu di Dios su obra rònt mundu. Nunka tabata tin un mihó tempu pa ta un miembro di E Iglesia di JesuCristo di e Santunan di e Delaster Dianan ku awendia.
Kisas e milager di mas inspiradó di e Restorashon ku mi ta testigu di dje ta boso, e miembronan fiel di Iglesia den kada pais. Boso, e Santu di Delaster Dianan, ta deskribí pa Nefi den e buki di Mormon, di tal manera ku el a mira nos dianan i a testifiká, “I a sosodé ku ami, Nefi, a mira e poder di e Lamchi di Dios, ku el a baha riba e santunan di e iglesia di e Lamchi, i riba e pueblo di kombenio di Señor, ku tabata plamá riba tur e superfisie di mundu; i nan tabata armá ku rektitut i ku e poder di Dios den gran gloria.”10
Mi ta testifiká ku mi a wak ku mi propio wowonan loke Nefi a wak—boso, e santunan di kombenio den kada pais, armá ku rektitut i poder di Dios. Ora ku mi tabata riba pulpito den un di e gran nashonnan di mundu, Señor a pone den mi mente algu ku Rei Benhamin a siña denMosia 2den e buki di Mormon. Brent, “Mi ta deseá pa boso por kontemplá, riba e estado bendishoná i felis di esnan ku ta warda e mandamentunan di Dios. … Pasobra at’akí, nan ta bendishoná den tur kos, tantu temporal komo spiritual.”11
Mi ta testifiká na boso ku mi a mira ku mi propio wowonan i a skuch’é ku mi propio oreanan ora ku mi a konosé boso nan, santunan fiel di Dios rònt mundu ku ta warda e mandamentunan. Boso ta e yunan di kombenio di e Tata. Boso ta disípulonan di JesuCristo. Boso tambe sa loke ami sa paso boso a risibí boso testimonio personal di e bèrdatnan di e evangelio restorá di JesuCristo. E Salbador a siña, “Pero bendishoná ta bo wowonan, paso nan ta mira: i bo oreanan, paso nan ta skucha.”12
Bou di direkshon di Señor i e liderazgo di Su profetanan i apòstelnan, nos lo kontinuá pa prepará misioneronan, hasi i warda kombenionan sagrado, establesé Cristo su Iglesia rònt mundu i risibí bendishonnan ku ta bini ora ku nos warda e mandamentunan di Dios. Nos ta uni. Nos ta yunan di Dios. Nos konos’É i nos ta Stim’É.
Mi ta uni na boso tur, mi amigunan segun nos ta testifiká unánimemente ku e kosnan aki ta bèrdat. Nos ta traha un registro di tantu loke nos a mira i skucha. Ami i abo ta testigunan ku ta testifiká. E ta pa e poder di e testimonio unánime aki ku nos ta sigui move pa dilanti ku fe den Señor JesuCristo i Su evangelio. Mi ta deklará mi testimonio ku JesuCristo ta bibu. E ta nos Salbador i nos Redentor. Den e nòmber di JesuCristo, amèn.