Hasi Orashon, E ta Einan
Mi ta invitá bo pa hasi orashon pa sa ku Tata Selestial ta ei, hasi orashon pa krese pa bira manera E, i hasi orashon pa mustra Su amor pa otronan.
Rumannan, mi ta sinti goso ora mi hasi kaso na un impreshon pa papia na muchanan!
Muchanan, unda ku boso ta den mundu, mi ke kompartí algu ku boso
Nos Tata Selestial stima bo! Bo ta Su Yu. E konosé bo. E ke bendishoná bo. Mi ta pidi ku henter mi kurason ku lo bo sinti Su amor.
Bo gusta hana regalo? Mi ke papia ku bo tokante un regalo masha spesial ku Tata Selestial a duna bo pa yuda bo. Ta e regalo di orashon. Orashon ta un gran bendishon ! Nos por papia ku Tata Selestial tur ora, tur kaminda.
Tempu Jesus tabata na tera, El a siña nos hasi orashon. El a bisa, “Pidi i boso lo risibí.”1
Pa kua regalo bo por hasi orashon? Tin hopi, pero awe mi ke kompartí tres:
-
Hasi orashon pa sa.
-
Hasi orashon pa krese.
-
Hasi orashon pa mustra.
Laga nos papia di kada un.
Promé, Hasi orashon pa Sa
Kiko bo mester sa?
Tin un kantika tokante orashon ku muchanan di Primaria ta kantá rònt mundu. E ta kuminsá ku un pregunta. Bo sa kua kantika e ta? Si realmente mi tabatin kurashi, lo mi a kanté pa bo!
“Tata Selestial, bo ta realmente einan? I bo ta skucha i kontestá orashon di tur mucha?”2
Kon bo por sa ku Tata Selestial ta realmente einan, hasta ora ku bo no por mir’É?
Presidente Russell M. Nelson a invitá bo pa “Dramá bo kurason pa bo Tata Selestial. … I despues, skucha!”3 Skucha na loke bo ta sinti den bo kurason i na pensamentunan ku ta bini na bo mente.4
Tata Selestial tin un kurpa glorifiká di karni i wesu i ta e Tata di bo spiritu. Pasobra Tata Selestial tin tur poder i sa tur kos, E por mira tur Su yunan5 i por skucha i kontestá tur orashon. Bo por yega na sa pa bo mes ku E ta einan i ku E ta stima bo.
Ora bo sa ku Tata Selestial ta real i ku E ta stima bo, bo por biba ku kurashi i speransa! “Hasi orashon, e ta einan; papia, e ta skuchando.”6
Bo a yega di sinti bo so? Un dia tempu nos nietu Ashley tabatin seis aña, e tabata e úniko ku no tabatin un amigu pa hunga kuné na e lugá di wega di skol. Miéntras e tabata pará ei, sintiendo su mes insignifikante i invisibel, un pensamentu spesífiko a bini den su mente: “Warda! Mi no ta so! Mi tin Cristo!” Ashley a hinka rudia presis meimei di e lspelplats, krusa su brasanan, i a hasi orashon na Tata Selestial. E momentu ku el a habri su wowonan, un mucha muhé di su edat tabata para ei ta puntra si e kier a hunga. Ashley a haña sa, “Nos ta importante pa Señor, i nos no ta nunka berdaderamente nos so.”
Tin biaha bo por ke sa dikon algu difísil ta pasando den bo bida òf dikon bo no a haña un bendishon ku bo a pidi pe. Hopi biaha e mihó pregunta pa puntra Tata Selestial no ta dikon pero kiko.
Bo ta kòrda ora Nefi i su famia tabata ku hamber miéntras nan tabata biaha den desieto? Ora Nefi i su rumannan a bai yag pa kuminda, Nefi a kibra su bog. Pero e no a puntra dikon.
Nefi a traha un bog nobo i a puntra su tata, Lehi, unda e por a bai pa haña kuminda. Lehi a hasi orashon, i Señor a mustré unda Nefi por bai.7 Tata Selestial lo guia bo ora bo puntr’E kiko bo por hasi i kiko bo por siña.
Di dos, Hasi Orashon pa Krese
Tata Selestial ke yuda bo krese! E ta stima bo asina tantu ku El a manda Su Yu, JesuCristo, pa mustra nos e manera pa biba.8 Jesus a sufri, muri, i a resusitá pa asina nos por wòrdu pordoná pa nos pikánan i krese pa bira manera E.
Bo ke krese den pasenshi òf den honestidat? Bo ke krese den un abilidat? Kisas bo ta tímido i ke krese den kurashi. “Hasi orashon, e ta einan”!9 Pa medio di Su Spiritu, bo kurason por kambia, i bo por risibí forsa.
Mi amigu nobo Jonah a skirbi: “Hopi biaha mi ta sinti mi nervioso riba mi kaminda pa skol mainta. Mi ta preokupá tokante kosnan manera di ta lat, lubidá algu, i hasi un tèst. Tempu mi tabatin 10 aña, mi a kuminsá hasi orashon riba mi kareda pa skol ku mi mama. Mi a pidi pa e yudansa ku mi tabatin mester, i mi a hasi orashon pa mi famia tambe. Mi ta pensa tambe di e kosnan ku mi ta gradesido p’e. [Hasi orashon na Tata Selestial a] yuda mi. Tin biaha mi no ta sinti alivio ora mi ta sali for di outo pero na e tempu ku mi ta na mi klas mi ta sinti mi trankil.”10
Jona su fe tabata kresiendo miéntras e tabata resa tur dia i sigui bai dilanti.
Di tres, Hasi orashon pa Mustra
Bo por hasi orashon pa yudansa pa mustra Tata Selestial Su amor na otronan.11 Pa medio di Su Spiritu, Tata Selestial lo yuda bo nota un persona ku ta tristu p’asina bo por konsolá nan. E por yuda bo mustra Su amor pa pordoná un persona. E por duna bo kurashi pa sirbi un persona i kompartí ku nan ku nan ta un yu di Dios. Bo por yuda otronan yega na konosé i stima Jesus i Tata Selestial manera abo ta hasi. 11
Durante henter mi bida mi a hasi orashon pa mi tata bira miembro di E Iglesia di JesuCristo di e Santu di e Delaster Dianan. Hasta komo mucha muhé yòn, mi tabata sa kuantu bendishon e por a risibí. Nos famia por a risibí e bendishon pa wòrdu seyá pa eternidat. Mi famia, amigunan i ami a hasi orashon hopi bia p’e, pero e no a djòin Iglesia. Tata Selestial no ta fòrsa niun hende pa hasi un eskoho.13 E por manda kontesta pa nos orashonnan di otro maneranan.
Tempu mi tabata di sufisiente edat, mi a risibí mi bendishon patriarkal. Den e bendishon, e patriarka a bisa mi e mihó kos ku mi por hasi pa yuda mi famia pa ta huntu den shelu tabata pa ta un ehèmpel di e evangelio di JesuCristo. Esaki ta algu ku mi por hasi!
Mi tata a biba i a bira 86 aña. Sinku dia despues ku el a muri, mi a risibí un sentimentu sagrado di goso. Tata Selestial a laga mi sa pa medio di Su Spiritu ku mi tata tabata ke risibí e bendishonnan di e evangelio di JesuCristo! Nunka lo mi lubidá e dia ku mi a hinka rudia na e altar den tèmpel ku mi ruman muhé i rumannan hòmber pa keda seyá na mi mayornan. Mi a kuminsá hasi orashon pa e e bendishonnan aki ora mi tabata den Primaria, i mi a risibí nan ora mi tabata un wela.
Kisas bo ta hasiendo orashon pa bendishonnan pa bo famia i otro hende ku bo ta stima. No entregá! Tata Selestial lo mustra bo kiko bo por hasi.
Kompartí ku Tata Selestial lo ke ta den bo kurason.14 Ora bo ta pidi Su yudansa sinseramente, lo bo risibí Su Spiritu pa guia bo.15 Hasi orashon tur dia lo yena bo ku amor pa Tata Selestial i JesuCristo. Esaki lo yuda bo pa bo ke sigui Nan henter bo bida!
Imaginá kiko lo pasa si tur e muchanan di Afrika, Amérika Sur, Asia, Oropa, Nort Amérika, i Australia hasi orashon tur dia. Henter e mundu lo ta bendishoná ku mas amor di Dios!
Mi ta invitá bo pa hasi orashon pa sa Tata Selestial ta ei, hasi orashon pa krese pa bira manera E, i hasi orashon pa mustra Su amor pa otronan. Mi sa ku E ta bibu i stima bo. “Hasi orashon, E ta einan.” Den e nòmber sagrado di JesuCristo, amèn.