Met Ach ewe Chon Amanau a Fen Fori Fan Itach?
A fen fori mettoch meinisin mi auchea faniten ach sai non manauach iei ngeni ewe fansoun mi affat non ewe kokot an Samach won Nang.
Non ew kunionun Ammon ua churi emon fefin ren ew mwichen steik chommong ier a no, a ura pwe chiechian kewe ra ureni pwe epwe niwinsefan ngeni Mwichefen mwirin chommong ierin an patapteno, nge ese ekieki met popun epwe. Ai upwe pesei, ua apsa, “Nupwen ka ekieki meinisin ekewe mettoch ewe Chon Amanau a fen fori fan itom, a wor chomong popun om kopwe niwin sefan om kopwe pin me angang ngeni Ii.” Ua unusen mairu nupwen a ponueni, “Met e fori fan itei?”
Met Jises Kraist a fori fan iten emon me emon kich? A fen fori mettoch meinisin mi auchea faniten ach sai non manauach iei ngeni ewe fansoun mi affat non ewe kokot an Samach won Nang. Upwe porous ren ruanu auchean ewe nongonongun ewe kokkot. Non ew me ew ekkei, Noun we Anaemon, Jises Kraist, i ewe a nom nukanapechikin. Amwasangen meinisin ei “ewe tongen Kot, mine a unusen pwisin meresino non netipen ekewe noun aramas; ina mnne, ina ewe a fokkun anno seni mettoch meinisin” (1 Nifai 11:22).
I.
Me mwen chok Raninifenin Paska, ew fansoun sipwe akom porous ussun ewe Manausefanin Jises Kraist. Ewe Manausefan seni mano ina ewe anukunuk sefanin pusin ach nuku. A apachata wewen ngeni ach annuk, amwasang ngeni ach mokutukut, me epinukunuk ren ach fansoun mwach.
Pokiten sia achifoua ewe Paipen me Puken Mormon ekewe awewen ewe kapasen Manausefan an Jises Kraist, sia pwan etiwa kewe chommongun osukunen non pukefen pwe ew manausefan mi nono fengen epwe fis ngeni meinisin mi manu ion kewe ra nom won ei fonufan.1 Ussun Jises a afanafana, “Pokiten ngang mi manau, ami oupwe pwan manau” (John 14:19). Me Noun kewe chon kuno ra afanafana pwe “ekkewe mi mano repwe manau sefan, nge resap chiwen mano” iwe “kich meinisin sipwene winino” (1 Corinth 15:52, 54).
Nge ewe Manausefan a ngenikich nap seni ei anukunukun manau fochofoch. A siwini nikinikin ach nenengeni manauen inisich.
Ewe Manausefan a ngeni kich ewe ekiek e ewe pochokun ne nikitu ngeni ekkewe sossotun non ei manau emon me emon kich me ekkana sia tonger sia nenengeni. A ngeni kich ew minefon an ngeni ach sipwe nengeni ekkewe sokofesen a wor ren ren pekin, inis, ekiek, memef nupwen ach uputiw ika angei non manauach iei. A ngeni kich ewe pochokun ne nikitu ngeni netipechou, nipwakingaw, me netipengaw. Pokiten emon me emon kich a wor ach anukunukun manausefan, sia sinei pwe ekei nafangaw me tipefesen ren chok ekis fansoun.
Ewe Manausefan a pwan ngeni kich ew pochokunen pesepes ne aponueta ekkewe annukun Kot non manauach iei. Nupwen sia manaueta seni mano me feino ngeni ewe Omuchunon Kapung mi fat non osini, sia mochen sipwe fich ngeni ekkewe feioch mi pwon ngeni ekkewe aramas mi manau sefan.2
Pwan ew, ewe pwon pwe Manausefan a apachanong ew tufichin ach sipwe nom ren chon ach famini—punuwach, nouch kewe, inach kewe, me tapin aramas fansoun mwach—ew pochokunen pesepes ne awesano ekkewe wis an ach famini non manauach iei. A pwan anisikich ne nom fengen non tong non ei manau, me a ekinamwei kich non fansoun manon atongeach kewe. Sia sinei pwe ekkei keimu fesen non manau ra chok fis ren ekis fansoun, me sia sia osukusuku pwapwan mwach ren kewe chusefan me mwichfengen. Ewe Manausefan a ngenikich epinukunuk me ewe pochokun ne nikitu nupwen sia witiwit. A pwan amona kich fiti ewe pwaracho me nimenimoch ne mesengeni pusin ach mano—pwan mwo ew mano meni epwe iteni mwitir.
Ekkei meinisin mi fis ren ewe Manausefan kinikinin ewe aewin ponuen ewe kapas eis “Met Jises Kraist a fen fori fan itei?”
II.
Ren chommong kich, ewe tufichin musono seni ach kewe tipis ina ewe watten wewen ewe Achasefan an Jises Kraist. Non ach fen ngeni, sia kon ren ach sufon:
A supuseni Chan we mi unusen auchea;
Manauan A pwisin fangeno,
Ew asor ese wor tipisin,
Ew fonufan a mano epwe amanaua.3
Ach Chon Amanau me Chon Angasano a achocho ne ani ewe riaffou ese wor e weweiti a winiti ew asoren tipisin meinisin kewe ir mi manau repwe aier. Ei asoren achasefan a awora ewe omuchunon murinno, ewe apanen siip mi nimenimoch ese wor terin, ren ewe omuchunon kaukun, kewe tipisin unusen ei fonufan. A suki ewe asam ren emon me emon kich pwe sipwe nimenimoch seni ach kewe pusin tipis pwe sipwe tongeni tosefaninong fan mesen Kot, Samach Esemuch. Ei sukun asam a wor ngeni meinisin noun Kot semirit. Sia fen ngeni, sia kon:
U mwareit an feitiu seni nenian mi nap
Fan asengesin an epwe angasaieno,
U ingeiti an fafangeto an tong me chen.4
Ewe Achasefan an Jises Kraist a pwano eingeingan me anononun anongonong won an Kot tong fan iten kich meinisin. A afata An ewe kapasen esinesin pwe “auchean ekkewe ngun”—pwe meinisin mi manau—“epwe murinno me nemesen Kot” (Doctrine and Covenants 18:10). Non ewe Paipen, Jises Kraist a awewei ei non napanapan Semach won Nang tong: “Pun Kot a fokkun tongei chon fonufan, ina minne a fangeno Noun we anamon pun iteiten aramas mi nuku I resap poutmwanino pwe repwe kuna manau ese much” (John 3:16). Non pwarata ikenai, ach Chon Angasano, Jises Kraist, a afata pwe (29}I(30) “a tongei chon fonufan ina minne a fangano manauan, pwe ion mi nuku epwe winiti noun Kot” (Doctrine and Covenants 34:3).
Mei wor memefin tipemwaramwar, nge, ren ewe Puken Mormon: Pwan ew Testamenin Kraist a wesino fiti ewe afanafan pwe ach sipwe winiti “unusoch” me “epinipinino non Kraist,” sipwe fokkun “tongei Kot ren unusen [ach] ekiek, nenukach me pochokun”? (Moronai 10:32–33). An kokot a opochokuna ren tong epwe pwan angei fiti tong.
III.
Pwan met Ewe Chon Amanau, Jises Kraist, a fen fori fan itach? Seni ekkewe afanafan an Noun kewe soufos me seni pusin An angangen afanafan, Jises a aiti kich ewe kokotun manau ese much. Ei kokot a pachenong ewe Forata, ewe popun manau, ewe auchean u fengen, me ewe niffangen pungun finata. A pwan aiti ngeni kich kewe annuk me kewe pwon mi pin sipwe anneasochisir me kewe angangepin sipwe sinei ar repwe uesefanikich ngeni inach me samach won nang.
Non ewe Paipen sia aneani An afanafan: “Ngang ewe saramen fonufan: Ion epwe tapweto muri iwe esap tongeni fetan non kiroch, nge epwe ani ewe saramen manau” (John 8:12). Me non pwarata ikenai sia anneani, “Iei minne, Ngang Jises Kraist, … ew nam ewe ese tongeni opono non kiroch” (Doctrine and Covenants 14:9). Ika sia a oppuru An kewe afanafan, I epwe asarama anach non ei manau me afata nonnomuch me mwirin.
Pokiten I a tongei kich, I a pesei ngeni kich ach sipwe anonga ach ekiek won I, esap won kewe mettochun ei manau. Non An ewe auchean afanafan won ewe pinewan manau, Jises a afanafana pwe sisap nom nein ekana ra sani kewe mettochun fonufan—kewe mettoch ra etiwa manau won fonufan nge ese ngenikich met sipwe fefeita ren ngeni ewe manau esemuch.5 Usun an Jises a korikich a eniwini me eniwini me eniwini, “apweto mwiri.”6
IV.
Arapakan nge, ewe Puken Mormon a aitikich pwe kinikinin An ewe Achasefan, Jises Kraist epwe “engi[no] ngeni metek me riaffou me sokopaten sossot meinisin; iwe ei epwe fis pwe ewe kapas epwe tongeni pwonueta minne ra fen apasa pwe i epwe wata won inisin ekkewe metek me semwenin noun kewe aramas” (Alma 7:11).
Pwata ach ewe Chon Amanau a riaffouni ekkewe osukosuken manau “meinisin”? Alma a awewei, “Me I epwe wata won inisin ar apwangapwang, pwe nenukan epwe tongeni ureno ren umoumoch, anongonong won ewe pekin aion, pwe i epwe tongeni sinei anongonong won ewe pekin aion [ifa usun an epwe anisi] noun kewe aramas anongonong won ar apwangapwang” (Alma 7:12).
Ach Chon Amanau a mefi me sinei sosotuch, ach tinisuk, ach netipeta, me ach riaffou, pwe I a fen sinei non an etiwa meinisin pwe kinikinin An ewe Achasefan. Ekkoch pukefen ra affata ei. Ewe Testamen mi Fo a affata, “Iwe iei a tongeni anisir ekkewe mi kuna sossot, pokiten pusin I a fen kuna sossot me riaffou” (Hebrew 2:18). Isaia a osukuna, “Kosap nuokus; ngang mi nonnom remw: … Upwe apochokunok; iwe, upwe anisuk” (Isaiah 41:10). Meinisin ra riaffouni ei napanap repwe chechemeni pwe ach Chon Amanau mi pwan mefi ei sokkun metek, iwe ren An Achasefan, A awora ewe pochokun emon me emon kich sipwe engino ngenii.
Ewe Soufos Joseph Smith a afata meinisin ei non nouch ounungatin nongonongen achifoua: “a nuku pwe seni ewe Achasefanin Jises Kraist, aramas meinisin repwe kuna manau, ren ar anneasosichi ekkewe annuk me angangepin an ewe Kapas Allim.”
“Met Jises Kraist a fen fori fan itei?” ena sister a eis. Pokiten ewe kokot an Samach won Nang, I a “fori ekkewe nang me ewe fonufan” (Doctrine and Covenants 14:9) pwe emon me emon kich sipwe tongeni sinei ewe manau mi fich ngeni ach sipwe kutta nonomun manauach. Ussun pwan kinikinin ewe kokkot an ewe Sam, ewe Manausefan an Jises Krist a okufatiw mano an epwe onukunuku kich ren ewe manau fochofoch. An Jises Kraist asoren achasefan a ngenikich ewe tufich ach sipwe aier seni ach kewe tipis me nimenimoch ne niwino ren imwan non nang. An kewe annuk me pwon mi pin ra pwar ngenikich ewe an, me An ewe pristut a ngenikich mumuta ne fori ekkewe angangepin mi auchea ren ach sipwe tori nonnomun manauach. Me ach Chon Amanau a mochen sinei an meinisin mi manau kewe metek me ekkewe apwangapwangen inis pun I epwe sinei ifa ussun an epwe anisi ika apochokuna kich non ach riaffou.
Jises Kraist a fori ekkei meinisin pun I a tongei meinisin noun Kot semirit. Tong ina ewe pochokunen ekiek ren meinisin, me pwan ussun chok me nepoputan. Kot a fen urenikich non pwarata ikenai pwe “a fori … mwan me fefin, seni ununun … ; a ngenir ekkewe annuk pwe repwe tongei me angang ngeni” (Doctrine and Covenants 20:18–19).
Ua pwarata ekkei meinisin me iotek pwe kich meinisin sipwe chemeni met ach Chon Amanau a fen fori fan iten emon me emon kich me kich meinisin sipwe tongei me angang ngeni I, non iten Jises Kraist amen.