“Iwe Nengeni! Ngang emon Koten Manaman”
Manaman, esisin, me amararen mettoch ra nomw ren ekkewe chon tapweno mwirin Jises Kraist ikanai, non manawom me manawei.
Atongei pwii me fefinei kana, met ren ei tufichin tongeni ai uwa uta mwemi ikanai. Chufengen fiti ekkewe rafen afanafan non ei mwichenap, uwa pwarata pwe Jises Kraist mi manau. Ii a emweni an ei Mwichefen; A kapas ngeni noun ewe soufos Preseten Russell M. Nelson, me a tongei meinisin noun Samach won Nang kewe semirit.
Non ei Raninfelin Paska kich sia fori achecheman an Jises Kraist ewe Manausefanita, ach chon Amanaw me Chon Angasano,1 ewe Kot mi Tekia, ewe Prinsen Kinamwe.2 An ewe Achasefan, fiti An Manausefanita mwirin unungat ran non ewe pokuo, a fis pwe ewe watten manaman non uruwon aramas. “Iwe nengeni,” A apasa, “Ngang Kot; me ngang emon Koten manaman.”3
“Met manaman ra kouno pwokiten Kraist a feita nang, me a motiw won peniemwanin poun Kot,”4ewe soufos Mormon a eis non ewe Puken Mormon. A ponuweni, “Apw; ekkewe mo chon nang rese pwan kouno ne feitiw efeiochu aramas.”5
Mwirinon ewe ninino, emon chon nang seni ewe Samol a pwa ngeni Mary, fiti pwan ekkoch fefin, kewe ra fen feino ngeni ewe pokuo ar repwe epinano inisin Jises. Ewe chon nang a apasa:
“Pwata oua kutta ewe mi manau nein ekkewe mi mano?”6
“Ese nomw ikei: pwe a fen manaueta.”7
Ewe Puken Mormon ewe soufos Abinadi a pwarano usun ei manaman:
“Ika Kraist ese fen manaueta seni mano, … esapw pwan wor manausefanita.
“Nge mi wor ew manausefanita, iei minne ewe peias ese wor an win, iwe ewe tipisin mano a kuf pokiten Kraist.”8
Ewe amwararen fofor an Jises Kraist a efisi an kewe chon kaeo repwe weitifengenir: “Met sokkun aramas atei! pwe a afanafana ewe mo asapwan me ekkewe saat met repwe fori, iwe rapwan rongosich ngeni.”9
Usun an kewe chon kaeo akomw ra tapmwirin Jises Kraist me rong an afanafana ewe kapas allim, ra fen kuna chomong manaman. Ra fen kuna “ekkewe mi chuun ra tongeni kuna, me ekkewe mi pechema ra tongeni fetan, ekkewe mi urir semwenin keinapan ra nimenimochuno, me ekkewe mi seningepung ra tongeni rongorong, ekkewe mi mano ra manaueta, me ekkewe mi woungaw ra rong ewe afanafanen ewe kapas allim ngenir.”10
Manaman, esisin, me amararen mettoch ra nomw ren ekkewe chon tapweno mwirin Jises Kraist ikanai, non manawom me manawei. Manaman ikana fofor mi ning, ra pwarano, me ina ussun an Kot manaman ese wor keukun me a afatano pwe Ii “ussun ewe chok naneu, ikanai, me tori feinfeino chok.”11 Jises Kraist, ewe a fori ewe matau, a tongeni anuano ir; Ii ewe a ngeni ewe mi chun an epwe kuna a tongeni anisikich ach sipwe neta nang; Ii ewe a nimeti ewe mi semwenin keinapan a pwan tongeni echikara ach semwen; Ii ewe a echikara ewe mwan mi apwangapwang a tongeni korikich ach sipwe uta ren “Feito, tapweno mwiri”12
Chomong neimi owa fen kuna manaman, nap seni ami eteneki. Meni epwe chok kukunutiw seni ach anonou ngeni an Jises amanawa kewe mi mano. Nge ren watten esap ina met epwe esisineta pwe ew manaman, ren chok pwe a feito seni Kot. Ekoch ra apasa pwe manaman ra chok kefisita ika aseser chok. Nge ewe soufos Nifai ese peni ekkewe ra “turunufasei ewe pochokunen me manamanen Kot, me ra pwisin afanafana ngeni ir ar pwisin mirit me ar pwisin kao, pwe repwe pisekisekino.”13
Manaman ra kawor seni pochokunen nang seni Ii ewe mi “poracho ne amanaua kich.”14 Manaman ikana pwan an Kot kokkotun esemuch; manaman ina amanawach seni nang ngeni fonufan.
Ewe fansoun fall ekkeran wes Sister Rasband me ngang auwa feino ngeni Goshen, Utah, ren ew watten mwich non fonufan unus ren chufengen ren Face ngeni Face a fis non asepwan ngeni 600,000 aramas non 16 sokofesenin fosun kapas.15 Ewe prokram a kawor fan iten met a fis ren ewe Niwinsefaniton ewe kapas allimen Jises Kraist fiti kapas eis a tonong meren sarafo seni fonufan unus. Am me sister Rasband aiwa fen aneaniochu ekkei kapaseis won am; ra mut ngenikem am aipwe pwarata usun Joseph Smith ren wisan emon soufosun Kot, ewe manamanen pwarata no manawem, ewe Niwinsefaniton ewe kapas allimen Jises Kraist mi chok sopwosopwono, me ekkewe pwung me kewe annuk am mi afona. Chomong mi ausening ikenai rapwan fiti ena amwararen mwich.
Ita ewe toun mwich non asepwan epwe fis non ewe neni mi pin non New York, ikkewe Joseph Smith a pwarata ia: “Ngang uwa kuna ruemen auchean Aramas, saramer me ninger a nap seni ning meinisin, ra uta me woi non asapwan. Emon me neir a fos ngeniei, a kokkoriei ren itei, a itini ngeni ewe emon me a apasa—Iei nei we At mi Achengicheng. Rong Ngeni!”16 Pwe, pwiich me fefinach, ina ew manaman.
Ewe watten semwen mi tori unusen fonufan a ekkesiwini nenien ei chufengen non asepwan ngeni Goshen, Utah, ikkewe ewe Mwichefenin Jises Kraist ren Aramas mi Pin non Fansoun Sopwonon ra fori- sefani, ren fichin kachiton, ew kinikinin ren ewe Jerusalem minen nomw. Am me sister Rasband mi nomw non fitu chok mwain seni Goshen non na nekunionun Raninfel nupwen auwa kuna ewe etuwet a feito seni ikewe aupwe saino ia. Ewe watten kar a nget non ewe neni, me auwa nonien ika ewe chufengen non asepwan epwene osukosukono. Mwirin chok, ren ruwe minich memwen kuonok wonu, kunokkun am ewe chufengen non asepwan, ewe fifi non unusen ewe imw a kununo. Ese wor fifi! Ese wor ewe chufengen non asepwan. Mei wor ew chenereitor ekkoch ra ekieki pwe am mei tongeni aea, nge aise sinei ika epwe tongeni ekii pochokunen minafon pisek non angangan.
Meinisin am chon ewe prokram, fiti chon ateten, sou kon, me chon fori mosin—fen pwan 20 sarafo seni ai we famini—ra monota ngeni met ewe epwe fis. Uwa fein senir seni ar kewe kechiw me osukosuk me uwa siongeni ewe Samol ren ew manaman. “Semei non nang,” Uwa iotek, “Ngang use kon tungor ren manaman epwe fis non chommong fansoun, nge iei uwa tungor ren ew. Ei mwich epwe chok fis fan iten kewe sarafo meinisin non unusen fonufan. Auwa mwochen ewe fifi epwe tin safan ika epwe fan emweniomw.”
Fisu minich mwirin kunok wonu, usun chok mwitirin an a kununo, a tin safan ewe fifi. Mettoch meinisin ra pwopwuta angang, seni ewe kon me maikrofon ngeni kewe fitio me meinisin kewe uwowuwen pisekin non asapwan. Auwa tawen feino me sa fori. Auwa kuna ew manaman.
Atun am me sister Rasband auwa nomw non ewe toraku ren am auwa niwin ngeni imwem non ewe nekunionun, Preseten me sister Nelson ra text ngenikem ei pworous: “Ron, auwa mwochen kopwe sinei pwe nupwen chok auwa rong pwe ewe fifi a kununo, auwa fen ioteki ren ew manaman epwe fis.”
Non pukfelin ranin-soponon a mak: “Pwun ngang, ewe Samol, uwa pwarano pei pwe epwe wato ewe pochokunen nang; kosapw kuna iei, iwe utiw ngeni ekkis fansoun iwe kopwe tongeni kuna, me kopwe sinei pwe ngang, me upwe war me nomw ren nei aramas.”17
Ina ososen met a fis. Ewe Samol a wato poun, me ewe fifi a tin.
Manaman ra fis non pechekunen nuku, usun Preseten Nelson a pechekun an aitikich non ewe mwich a wesino. Ewe soufos Moronai a apasa ngeni kewe aramas, “Ika ese wor nuku nein noun Kot kewe semirit Kot ese tongeni fori manaman neir; ina minne, ese pwarano inisin tori mwirin ar nuku.”
A sopweno:
“Iwe Nengeni, ewe nuku an Alma me Amulek a fori an ewe imwen kanapus pwe epwe turutiw ngeni ewe puun.
“Iwe Nengeni, ewe nuku an Nifai me Liai a efisi ewe ekkesiwin won ekkewe chon Leiman, iwe ra papataiseno ren ekkei me ren ewe Ngun mi Fel.
“Nengeni, pwe ewe nuku an Ammon me pwin kewe minne a efisi ew fokkun auchean manaman nein ekkewe chon Leiman. …
“Iwe esap pwan fan ew fansoun emon a efisi manaman tori mwirin ar nuku; ina minne ra akkom nuku non ewe Noun Kot.”18
Ngang uwa tongeni upwe pwan kapach ngeni ei tetenin wokisin, “Pokiten ar kewe nukunuk ren ekkewe sarafo chon nom non ewe chufengen, ekkewe chon angangen ewe mwichen non asapwan mi sinenap, Souemwenin mwichefen me chon mwichefen, emon chon Aposel, me emon soufosun Kot mi achocho fan iten watten manaman an ewe fifi epwe tin safan ngeni ewe kachito non Goshen, Utah.”
Manaman a tongeni feito ren ponuwan iotek. Esapw meni ikana met sia tungor fan itan iteitan ika met sia mochen epwe fis, nge nupwen sia nukunuk non ewe Samol, Ii epwe nomw ikewe, me Ii epwe pwung. Ii epwe enenia ewe manaman ngeni fansoun a auchea ngeni kich.
Ewe Samol a fori manaman ren an epwe achema ngenikich usun An pochokun, An tong fan itach, An eteneki kich seni nang tori ach fetan won fonufan ei, me An mwochen epwe aitikich met mi kon namwot. “Ii ewe mi wor an nuku non ngang epwe chikar,” A apasa ngeni kewe Souneng non 1831, me ena pwon mi sopwosopwono ikanai, “me ese fin ngeni mano, epwe chikar.”19 Mi wor annuk mi katou me non nang, me kich sipwe fori iteitan.
Mi wor ekoch fansoun sia aneanei epwe wor manaman an epwe echikara emon atongeach, epwe ekesiwini fofor mingaw, ika etipetipa netip mingaw ika ngun ese namwot. Non ach nenengeni mettoch non mesach non ei manaw, sia mochen ewe Samol epwe aninis, epwe atawei met mi tano. Ren non nuku, ewe manaman epwe war, nge esapw fan ekkoch non ach fansoun mochen ika esap ren ach fansoun mochen epwe atawei ach osukosuk. Met wewen ei pwe ese watte ach nukunuk ika sise tufich ngeni An aninis? App. Kich sia achengicheng meren ewe Samol. A fangono manawan fan itach, me an ewe Achasefan a sopweno me epichikicheno seni osach mi chow me tipis nupwen sia aier me niwin ngeni I.
Ewe Samol a achema ngenikich, “Esapw omw nikinik epwe ai.”20 A fangeno, “Feito rei, meinisin mi angang weires me oso chou, me ngang upwe asoso kemi”21—asoso seni ekiekichow, netipengaw, nuokus, nukunukumang, ekichow fan iten atongeach, ren tan mi peutuno ika ngawono. Kinamwe epwe awesi osukosuk ika netipechow ina ew manaman. Chechemeni an ewe Samol kapas: “Met use porous kinamwe ngeni om ekkiek usun met ka ani kapaseis? Met kapasen pwarata mi nap ka tongeni angei nap seni Kot?”22 Ewe manaman pwe Jises Kraist, ewe Jiowa mi nap, ewe Naw mi tekia, a ponuweni fiti kinamwe.
Usun chok an pwano ngeni Mary non ewe atake, a kekeri ren itan, a kokorikich ach sipwe anganga ach nuku. Mary a nenengeni an epwe angang ngeni Ii me tumunu Ii. An Manausefanita esap ina met neminewe a witiwitin, nge a fen fis fanitan ewe watten kokkotun pwapwa.
“Totiw seni ewe irapenges,”23ewe mwichen rese nuku ra eitengawa Ii won Calvary. A fen tongeni fori ew manaman. Nge a fen sinei met nesopwonon seni ewe nepwopwutan, me II a mwochen aneasochis ngeni an Saman ewe kokkot. Ena awewe esapw tongeni menuk senikich.
Ngenikich non fansoun weires Ii a fen apasa, “Iwe nengeni ekkewe kinas mi pwereni nepeki, me pwan rasen ekkewe chufon non pei me pechei; oupwe nikitu, aneasochisi ai annuk, me oupwe muuni ewe muun nang.”24 Ina, pwii me fefinei, ewe manaman a pwon ngeni kich meinisin.
Non ei Raninfel Paska ren ach sia fori achechemwan ewe manamanen an ewe Samol Manausefanita, ren ngang emon Aposel fan iten Jises Kraist, Uwa anomwatiw ai efeiechu kemi pwe oupwe mefi ewe pochokunen ewe Chon Angasano non manawomw, pwe omw tingor ngeni Samach non nang epwe ponuweni fiti tong me fofor Jises Kraist a fen pwarano non An ewe angangen mwich. Ngang uwa iotek pwe kopwe uta pochokun me nukuchar non meinisin met epwe feito. Me uwa efeiechuk pwe manaman epwe toruk usun am mei kuna me Goshen—ika epwe fan mwochenin ewe Samol. Nengeni ekei feioch seni-nang non manawom ren omw ka “kutta ei Jises usun ekkewe soufos me aposel ra fen makkei, pwe ewe chenin Kot ewe Sam, me pwan ewe Samon Jises Kraist, me ewe Ngun mi Fel, minne a pwarata usur, epwe tongeni nonnom rem feinfeino chok.”25 Non iten Jises Kraist, amen.