Afanafanen Etiwetiw
Feito ngeni mwichenapen mwichefen me ngeni ewe tufichin ausening mwongungun ewe Samon.
Pwii me fefinei achengicheng me chiechiei non unusen fonufan, uwa pwisin etiwa kemi ngeni ei mwichenapen mwichefen. Sia chufengen pwe ew watten faminien fonufan ren ach mochen fen ngeni ach Samon me Chon Amanau, Jises Kraist. Kinisou ren ami fiti kich.
Ewe ier a no a ew ier mi fokkun sokkono. Ese wor tipemwaramwar pwe sia kaeo mettoch sise sinei me akkom. Ekkoch nesen ngang mi sinei akkom ra fen nom non netipei non ekkoch napanap mi minafo me aninisoch.
Ren awewe, Ngang mi sinei ren ennet pwe ewe Samon a emweni mwokutun An Mwichefen. A apasa, “Upwe pwar ngeni [kemi] pwe ngang mi tongeni pwisin fori ai angang.”1
Napengeni, ngang me nei kewe chon aninis aua katon ren am kechiw nupwen I a etto aninis non fansoun mi fokkun weires mwirin sia fori ach tongeni me sise chiwen pwan tongeni fori och. Aua ennetin ingeiti.
Ua pwan weweochuti iei met I a awewei nupwen I a apasa pwe I epwe emwitiri An angang non an fansoun.”2 A fis fan chommong ai ua pwapwa nupwen I a emweni me efisi mwitirin An angang—pwan mwo fansoun pandemic non unusen fonufan.
Pwi me fefinei achengicheng, pochokunen ewe Mwichefen a pwa non an chon mwichefen achocho me ar kapasen pwarata mi chok wakatteno. Kapasen Pwarata a murino epwe mar me non imwach. Fansoun ewe ier a no, chommong neimi oua wesen anapano kaeon ewe kapas allim non imwemi kewe. Ua kinisou ngeni kemi, me noumi kewe repwe kinisou ngeni kemi.
Ewe watten angang ne forsefani ewe Salt Lake Tempel mi soposopono. Seni ai ofes ua mwot mwechikin ai katon ewe angang a fis won ewe nenien tempel.
Nupwen ua kakaton chon angang ra tueta waren ira minen nom, paip, wea, me konikin puacheta mi nich, ua ekiek usun auchean ach sipwe aturano pipin non manauach minen nom, ren an ewe Chon Amanau aninis.
Ewe kapas allimen Jises Kraist ew kapas allimen aier.3 Pokiten an ew Chon Amanau Achasefan, An kapas allim a awora ew tingor ach sipwe sopweno ne siwin, marita, me nimenimochuno. Ina ew kapas allimen epinukunuk, chikar, me mamarita. Ina minne, ewe kapas allim ew pworousen pwapwa! Ngunuch a pwapwa ren ew me ew fetanoch sia fori.
Pekin achufengenin Israel, me ew pekin mi fokkun auchea, ina wisach aramas ach sipwe nimenimoch me mochen anisi ne amwonata ewe fonufan ren ewe Oruwen Wareto an ewe Samon.
Nupwen sia ausening ngeni ekkewe porous ra mwonefichita me ren nouch sou emwen fan emwenien ewe Ngun mi Fel, ua tingor oupwe iotek pwe oupwe esinna ewe pipi oupwe aturano seni manauemi pwe oupwe winiti mi nimenimoch.
Ua tongei kemi, pwi me fefinei achengicheng, me pwarata pwe Samach non Nang me Noun Achengicheng ir mi sinei me tongei emon me emon ami. Ra mwoneta ar repwe anisi kemi non ew me ew mettoch oupwe fori. Feito ngeni mwichenapen mwichefen me ngeni ewe tufichin ausening mwongungun ewe Samon. Non iten Jises Kraist, amen.