Rum non ewe Imwen Asoso
Non ei fansoun Paska, Jises Kraist a tingor sipwe winiti, usun I, emon re Sameria mi murino, ne fori An imwen asoso (An Mwichefen) ew nenien tumun ngeni meinisin.
Pwi me fefinei achengicheng, ina mwo ika pwe a mano 20 ier ano, mi wor fansoun ua wesen positi semei we. Paska a pwonei upwe kuna sefani.
Nupwen ua nom non college non England, semei we a eto rei. Non netipen semei we a sinei pwe ua pwositi neimw.
Semei we a sani sokkonon mettoch tiwenon chok mongo. Pwan non France, mi itefouno ren mwongon, epwe soun era, “Sipwe mongo mongon China.” A tam an fori angangen patriark non ewe Mwichefen, semei we a sounengoch me tong. Eu pwin, nupwen efoch sein emeregency a fokkun nouwomong ne sa fetan nein Paris, a apasa, “Gerrit, ekkenan kekechiw ir feiengawen eu neni.”
Non ena sai, Ua mefi pwan ekkoch kechiw me kinas. Emon kukun nengin a amomo ice cream seni efoch kukun sein kamo pisek. An kewe kapen ice cream ra chok ukukun ngeni eu tukotuken ice cream. Ren ekkoch wewe, emon mwanimwong a feito ngeni ewe kukun nengin. A puchor me pusei, a aturano wan we sein kamo pisek, iwe kewe kap ra nino. Ese wor met upwe tongeni fori otun an we a puratiw ekkewe kap fan noun kewe puch. Ngang ua kuna ewe kukun nengin a fotopuku won ewe aan, a sotuni ne tumunu tatakisin an kewe kap, nge chonun mesan akan wesen suputiw. A wesen kungawei netipei nikinikin ewe nengin we, a achemato usun kirikiringaw, ekiekingaw, wewengaw, sia fori iteitan ngeni emon me emon.
Non pwan eu neanowasan, kanengeni Paris, am me semei we aua no ngeni ewe watten cathedral non Chartres. Malcolm Miller,1 emon noun fonufan ketiweno non ewe cathedral, a itini unungat pinukun kinasen asamwacho mi nios mi ning wor. A apasa ir ra erenikich eu porous.
Ewe aewin asamwacho a pwarata usun an Atam me Eve we suseni ewe Ataken Eden.
Ewe oruwan a aporousa ewe kapas monomon usun ewe Re Sameria mi murino.
Ewe aunungatin a pwarata usun an ewe Samon Oruwen Wareto.
Apachafengeni, kei kinasen asamwacho mi chunga mi ning ra awewei usun fetanin manauach. Ra tingor kich pwe sipwe etiwa meinisin non rumen An we imwen asoso.2
iStock.com/digitalimagination
Usun Atam me Eve, sia feito ngeni ewe fonuen riaffou me weires.3
iStock.com/digitalimagination
Won aanach mi toputop ngeni Seriko, sia kuna sokkun, kinas me sia feinno non metek.4
Ina mwo nge a auchea sipwe aninis fengen, napengeni sia pasini ewe efoch aan, ren ekkoch sokkun wewe.
Nge, fiti tong, ewe Re Sameria mi Murino a kouno me a epiti kinasach kewe ngeni wain me oin. Esisinen ewe sakrament me ekkoch angangepin, ewe wain me oin ra itini kich ngeni chikaren non Jises Kraist.5 Ewe re Sameria mi Murino a ekikicheta won wan we tongki ika, non ekkoch asamwacho mi ning, ra amwerakich won Afaran kewe. A uweikichenong non ewe nenien asoso, minne mi tongeni tupuni An Mwichefen. Non ewe nenien asoso, ewe re Sameria mi Murino a apasa, “Tumunu atei; … nupwen upwe niwinsefanito, upwe niwini ngonuk sefan.”6 Ewe re Sameria mi Murino, ew esisinen ach Chon Amanau, a pwon pwe epwe niwinsefan, ei fansoun non manaman me ning.
iStock.com/digitalimagination
Non ei fansoun Paska, Jises Kraist a tingor sipwe winiti, usun I, emon re Sameria mi murino, ne fori An imwen asoso (An Mwichefen) ew nenien tumun ngeni meinisin seni riaffou manau me monumon.7 Sia amonata ngeni An we Oruwen Wareto usun iteiten ran sia fori ngeni ewe “mi kisifochofoch”8 usun sia fori ngeni I. “Mi kisifochofoch” wewen emon me emon kich.
Nupwen sia feito ren ewe re Sameria mi Murino ngeni ewe Imwen asoso, sia kaeo nimu mettoch usun Jises Kraist me pwisin kich.
Ewin, sipwe feito non ewe Imwen asoso usun pwisin kich, ren ach muan me nipwakingaw. Nge kich meinisin mi wor rech mettoch sipwe aninis won. Fetanich ngeni Kot achok soun fifis fengen. Kich chochon non eu neni—ina mwo ika a fis ngeni kich efeiengawen samau, asepwan, watten kar, pwasen fonu ika met sia kan fokkun aucheani non manauach. Sia angei aninis nupwen sia kokkot fengen, ausening ngeni emon me emon, pachenong fefinach kewe, me ewe Ngun.
Nupwen netipach epwe ekkesiwin me kuna Nikinikin non nikinikin mesach,9 sa kuna I me kich non An Mwichefen. Non I, sia kuna ochu, ese fatangaw. Non I, sia kuna pungoch, fori met mi pung, me anapano ach manauaen murino. Non I, sia kuna ach nuku, aramasoch, ekkesiwin umoumoch, me nuku non Kot. Non An imwen asoso, sia kuna me anononu nefinach ngeni Kot, Samach we, me Jises Kraist.
A nuku kich pwe sipwe anisi ne fori ewe Imwen asoso epwe ewe neni A mochen. Nupwen sia awora ach tongeni me angang, An kewe niffangen ngun ra apochokuna efeioch.10
Usun emon chon chiaku non kapasen Spain a ereniei, “Elter Gong, Ua sinei seni ewe Ngun mi Fel met kopwene apasa iwe ua tongeni awewei,” pwiei mi unusen nukuchar a apasa, “seni ewe niffangen kapas.”
Nifangen nuku me feioch mi feito, a sokofesen pwanon non sokkun napanap. Emon achengicheng sister a angei ewe ngunun ourur nupwen punuwan we a mano ren ewe COVID-19. A apasa, “Ua sinei pwe am me punuwei we mi achengicheng aupwe pwan chufengen sefan.” Non eu napanapen COVID mi sokono, pwan emon achengicheng sister a apasa, “Ua mefi pwe upwe tingorei ewe Samon me kewe tokter repwe mut ngeni punuwei we pwan ekis chok fansoun.”
Oruwan, A mochen sipwe fori An we Imwen asoso epwe eu nenien chen me neni mi watte, ekis ian sipwe tongeni chufengen, ren rumen meinisin. Kich noun Jises Kraist chon kuno, meinisin sia chok nonno, ese wor pwan eu mwich.
Kich meinisin sia ketiw ach sipwe fiti mwichen sakrament, ekkoch mwichen Raninfel, me mwichen chufengen.11 Sia mosonoson ne pin ngeni ach we Chon Amanau, ekipwichi me tumunochu emon me emon. Sia kuna me sinei emon me emon aramas. Sia emenimen, momot ren ekkewe ra momot akanaemon, kaeo iter, pachenong ekkewe minefon souneng, pwich kana me fefinach rakeran niwin, anuon at me fopun, emon me emon achengicheng semiritin Kinter.
Anchangei nge ita kich ir, sia etiwa chiechiach, chon feito, minefonong, emon me emon mi osukosuk ren met mi fori. Sipwe netipechou, pwapwa, me aninis fengen nefinach. Nupwen sia turutiw ren met sia fori me atapwanapwan, tumunungaw, apungu, ika ekiekingaw, sipwe omusomus fengen me murinono.
Eu famini seni Africa ra nom Merika iei, “Seni ewe akkaewin ran, Chon ewe Mwichefen ramen chiechioch me etiwetiwoch. Meinisin ra forii am oupwe mefi pwe aua nomw neimw. Ese wor emon a nenengawei kem. Ewe sam a apasa, “Ewe Paipen a aiti kich pwe uwan ewe kapas allim a feito seni kewe waren kapas allim.” “Me ekkewe misineri,” ewe sam me in ra apasa, “aua mochen noum ewe at me nengin repwe wateta usun ekkenan misineri.” Pwii me fefinei, amwo sipwe etiwa meinisin ngeni An we Imwen asoso.
Aunungatin, non An imwen asoso sia kaeo unusoch non Jises Kraist, esapw unusoch non ewe fonufan. Ese pung me ese tufich, an fonufan “angangen ounusoch” won media a tongeni fori ach sipwe menemenemang, mwochuti ne tikipat won fon ne kutta sasing sipwe sani. Sokonon, ach we Chon Amanau Jises Kraist, a sinei mettoch meinisin usuch sise mochen emon epwe sinei, me Amen unusen tongei kich. An we kapas allim ew kapas allimen oruwan me aunungatin tufich.12 A etiwa emon me emon kich sipwe emon re Sameria mi murino, sisapw chon apungu nge sipwe anapano omusano pusin kich me omusano ekkoch, pwan nupwen sia achocho ne unusen aneasochisi An annuk.
Sia anisikich nupwen sia anisi ekkoch. Eu famini ua sisiner ra nom unukun eu aan amen osukosuk. Chon sai ramen kan soun kouno me tingor aninis. Eu winingachin ewe famini ra rong eu fichifich amen nouomong won asamer we. Monu me aureki ion ei non ei atun 2:00 winingach., ra ekieki ika, ei fansoun, emon epwe tongeni aninis. Nupwen ewe fichifich mi chok soposopw, ra rongorong, “Ekkei—a wor ekkei nukunupen imwom we. Chon Sameria mi Murino ra anisi fengenir.
Oruwanun, non An we Imwen asoso, sia winiti chon me nukanapen ewe kapas allimen Jises Kraist,nukuchar non niwinsefaniton ennet, soufos mi manau me ekkewe aposel, me ewe pwan kapas allimen Jises Kraist—ewe Puken Mormon. A uwei kich ngeni An we Imwen asoso me pwan Imwan we—ewe tempel mi pin. Imwen ewe Samon ewe neni, usun ewe mwan mi feiengaw won ewe anen Seriko, ewe re Sameria mi Murino a tongeni nimeti me episeki kich, amonakicheta ach sipwe niwiniti Samach won Nang, me ochufengeni kich non an Kot famini. An kewe tempel a suk ngeni kich meinisin ion mi manaueni An kapas allim ren nuku me aneasosich.
Pwapwan tempel pachenong chufengen nukanapen uruon ewe kapas allim, oreni, kapas, me mwirimwirin aramas. Me non ewe katanpuun ren ewe tempel Taylorsville Utah, 17-ierin Max Harker a aporousa porousen an famini nuku a poputa seni onu tapin aramas me mwan seni inan me saman chinap Joseph Harker me punuwan we, Susannah Sneath. Non ewe niwinsefaniton ewe kapas allimen Jises Kraist, sia tongeni winiti eu riri mi pochokun non mwirimwirin ach kewe famini.
Amwuchunon, enimuwan, sia pwapwa pwe Kot a tongei Noun semirit non ach sokofesen me nonnomuch, non muu meinisin, einang meinisin, me sokopaten kapas, ren rumen non An we Imwen asoso.
Mwirin ekkewe 40 ier ra no, Chon mwichefen ra winiti chomongono non unusen fonufan. Seni 1998, chommong chon mwichefen ra nomw nukun nap seni non Merika me Canada. Seni 2025, sia ekieki pwe napengeni chon mwichefen repwe non non Latin America usun non Merika me Canada. Ewe chufengenin mwirimwirin Samach Liai kewe mi nukuchar ra ounusachuono ekkewe osuni. Souneng nukuchar, pachenong non ewe corridor painier, ra sopweno ar nikitu me anisi unusen fonufan.
Pwan, napengeni ekkewe mi mwuk chon Mwichefen rese pupunu iei, mwan me fefin, ika ra mu seni punuwer. Ei mi wate ekkesiwin. A pachenong napeseni nesopw ach kewe sister Fin Anisi me pwich kewe mi muk pristut. Ei napanapen koukun aramas a pin fis non unusen ach mwichefen seni 1992 me non ewe Mwichefen non Merika me Canada seni non 2019.
Ach uta me mwen ewe Samon me non An Mwichefen esapw ren nonomun ach pupunu nge ren ach winiti mi tupwen me achocho chon kuno noun Jises Kraist.13 Mi muk ra mochen sipwe kuner usun rmi muk me fori met ra tongeni fori usun pwan mi muk. Noun Jises Kraist chon kuno ra feito seni ekis meinisin, non sokkun napanap, sais, onuer, ier, emon me emon mi wo ar sineoch, ar wor ar mochen mi nukuchar, me watten tufich ne efeioch me aninis. Sia kutta iteiten ran ne tapweno mwirin Jises Kraist ren nuku tori aier14 me pwapwa fochofoch.
Non ei manau, fan ekkoch sia uti ngeni ewe Samon. Meni sise mwo nomw ikewe sia epinukunuku me aneanei sipwe nom ian non kan fansoun mwach. Emon souneng a apasa, “Nukucharen utiwiti ewe Samon ren An kewe feioch mi eu wis mi pin. Esapw wor netipengaw, amoson, ika kapung nge epwe wor mwareiti mi pin.”15 Non ei fansoun, sia nonom ikenai, esapw utiwiti manau epwe poputa.
Isaiah a pwon, “Ra utiwiti ewe Samon epwe asofosefani ar pochokun; repwe tongeni uta ren pour usun poun machang; repwe sa, nge resap apwangapwang; me repwe fetan, me resapw turuno.”16
Nouch we Sameria mi Murino a pwon pwe epwe niwinsefan. Manaman ra fis nupwen sia tumun fengen usun I ita epwe fori. Nupwen sia feito ren netipengaw me netip niemam,17 sia tongeni kuna mongungu non Jises Kraist me pwennino me non Poun mi weweoch ren tumun.18 Angangepin a awora ach fiti pwon mi pin me “ewe manamanen kot”19 an epwe epinano mochenin netip me fofforun nukun. Ren An tong-kirekiroch me tipepos, An Mwichefen a winiti ach Imwen asoso.
Nupwen sia fori rum non An we Imwen asoso, etiwa meinisin, ach foforoch usun ewe re Sameria a tongeni echikara kich non ach manauen nipwakingaw. Ren unusochun tong, Samach me Noun we, Jises Kraist, ra pwonei kinamwe non ei fonufan, me ewe manau esemuch non ewe fonufan epwe wareto 20—ikena ie upwe pwan nom ie.21 Ua ennetin pwarata me affata non ewe it mi pin me manaman iten Jises Kraist, amen.